上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛凱旋的歌
22:1 ( 詩 18 )
當耶和華救大衛脫離一切的對敵的手及掃羅的手的日，伊向耶和華唸此個詩的話，
大闢凱旋的歌
22:1 ( 詩 18 )
上主救大闢脫離所有的對敵及掃羅的手了後，伊向上主唸此首詩：
22:2 講：
耶和華是我的山巖，
我的營寨，拯救我者，
22:2 上主是我的山巖，我的要塞，我的拯救者；
22:3 上帝是我的石磐，我欲倚靠伊。
伊是盾牌，是拯救我的角，
是我的高台，是我的避難所。
拯救我者啊，你是救我脫離強暴的。
22:3 是我的上帝，我的石磐，我欲倚靠伊；
伊是我的盾牌，救我的氣力，我的堡壘，我的避難所。
我的拯救者，你有救我脫離強暴。
22:4 我欲求叫耶和華，伊是應該謳咾的。
按呢，我欲得著救脫離我的對敵。
22:4 我求叫應該受稱讚的上主，
我就得著解救脫離對敵。
22:5 死無的水湧圍我，
匪類的氾濫互我驚。
22:5 死亡的大湧圍困我；
毀滅的大水互我驚。
22:6 陰間的索纏我，
死無的活罩到佇我。
22:6 陰府的索捆縛我；
死亡的羅網網著我。
22:7 我佇患難中求叫耶和華，
我求叫我的上帝。
伊對殿裡聽我的聲；
我的求叫入伊的耳孔。
22:7 我佇苦難中祈求上主，
對我的上帝求叫；
伊佇伊的殿內聽我的聲；
我的懇求有入伊的耳孔。
22:8 地就振動搖泏，天的根基也栗栗戰，
為著伊的受氣來振動。
22:8 伊受氣，地就搖泏；
天的根基嘛振動搖閣泏。
22:9 對伊的鼻孔有煙淐上去；
對伊的嘴有出燒滅的火，炭對按呢𤏸。
22:9 對伊的鼻孔有煙淐出；
對伊的嘴有火發出，
連土炭嘛𤏸起來。
22:10 伊互天低落來，就降臨；
佇伊的腳下有黑雲。
22:10 伊搋開天，親身降臨；
伊腳下有厚厚的烏雲。
22:11 伊騎𠼻𡀔兵啲飛，
佇風的翅頂顯現。
22:11 伊騎天使基路伯啲飛；
伊坐風的翼顯現。
22:12 伊用黑暗做周圍的帳房，
就是聚集的水、及空中的密雲。
22:12 伊用烏暗做伊隱密的所在，
用水及密雲圍起來做帳房。
22:13 因為伊面前的光，火炭就𤏸起來。
22:13 伊發出的光，
互炭𤏸起來。
22:14 耶和華對天起雷；
至高者發出伊的聲。
22:14 上主對天頂彈雷，
至高的上帝出聲。
22:15 伊射箭來，趕散𪜶，
閃爁來互𪜶亂。
22:15 伊射箭，互對敵四散；
伊發出熠爁，互𪜶混亂。
22:16 海底就出現，大地的根基也露現，
是因為耶和華的責備，也因為伊的鼻孔歕出的氣。
22:16 上主一下責備，
鼻孔的氣一下出，
海底就露出，
大地的根基嘛露現。
22:17 伊對頂面伸手搝我，
對大水中牽我出。
22:17 伊對頂面伸手扭我，
對大水給我救出來。
22:18 伊救我脫離勇猛的對敵及許個怨恨我的人，
因為𪜶比我卡有力。
22:18 伊救我脫離兇猛的對敵，
脫離怨恨我的人；
因為𪜶比我較強。
22:19 我抵著患難的日，𪜶來窘迫我；
總是耶和華是我所倚靠的。
22:19 我抵著災難的時，𪜶來攻擊我；
毋拘上主是我的倚靠。
22:20 伊導我到開闊的所在；
伊救我，因為伊歡喜我。
22:20 伊導我到開闊安全的所在；
伊救我，因為伊意愛我。
22:21 耶和華照我的公義報答我，
照我的手的清氣報賞我。
22:21 上主因為我正直報答我，
因為我的所做清氣報賞我。
22:22 因為我守耶和華的道路，
未曾做歹離開我的上帝。
22:22 我遵守上主的道路，
毋曾作歹離開我的上帝。
22:23 伊一切的法度佇我的面前；
伊的律例，我也無悖逆。
22:23 伊所有的命令我有遵守；
伊的規例我毋曾放拺。
22:24 我對佇伊是完全；
我也守本身無行我的歹。
22:24 我佇伊的面前無通指責；
我保守家己離開罪惡。
22:25 所以耶和華報賞我是照我的公義，
也照我佇伊的目睭前的清氣。
22:25 因為我正直，上主報賞我；
佇伊的目睭前，我的所做清氣。
22:26 對佇仁慈的人，你顯明家己是仁慈；
對佇完全的人，你顯明家己是完全；
22:26 慈愛的人，你用慈愛對待伊；
純全的人，你用純全對待伊；
22:27 對佇清氣的人，你顯明家己是清氣；
對佇乖僻的人，你顯明家己是彎曲。
22:27 清氣的人，你用清氣對待伊；
毋拘，奸詐的人，你用彎曲對待伊。
22:28 困苦的百姓，你救伊；
你的目睭看驕傲的人，互伊降低。
22:28 困苦的人，你解救伊；
自高的人，你敵視伊，給伊降低。
22:29 耶和華啊，你是我的燈；
耶和華欲照光我的黑暗。
22:29 上主，你是我的燈；
上主給我的烏暗變做光明。
22:30 因為我倚靠你衝入軍隊，
倚靠我的上帝就跳過牆。
22:30 我因為倚靠你，會當攻破敵軍；
倚靠我的上帝，會當跳過城牆。
22:31 論到上帝，伊的道路是完全的；
耶和華的話是過鍛煉的。
見若倚靠伊的，伊就做𪜶的盾牌。
22:31 此位上帝，伊的道路完全。
上主的話有過火鍛鍊；
倚靠伊的，伊做盾牌保護𪜶。
22:32 耶和華以外，是誰是上帝啊？
咱的上帝以外，是誰是石磐啊？
22:32 上主以外，豈有別個上帝？
阮的上帝以外，豈有石磐通倚靠？
22:33 上帝是我堅固的營寨，
伊引導完全的人行伊的路。
22:33 此位上帝是我堅固的要塞；
伊引導我行安全的路。
22:34 伊互我的腳親像鹿母，
互我徛佇我高的所在。
22:34 伊互我的腳親像鹿𠢕走，
閣互我徛在佇高的所在。
22:35 伊教示我的手會交戰，
致到我的手骨會開銅弓。
22:35 伊訓練我的手𠢕交戰，
互我的手會開銅的弓。
22:36 你用你的拯救互我做盾牌；
你的溫柔互我做大。
22:36 你用盾牌解救我；
你的幫贊互我堅強。
22:37 你互我的腳所踏的地開闊；
我的腳也未曾踏脫。
22:37 你互我踏的地開闊安全；
我的腳毋曾踏脫。
22:38 我追趇我的對敵，來剪除𪜶，
𪜶未剿滅的代先，我無倒轉來。
22:38 我追我的對敵到趇著𪜶；
𪜶無滅亡，我𣍐倒轉。
22:39 我剿滅𪜶，
拍傷𪜶，互𪜶𣍐起來；
倒佇我的腳下。
22:39 我拍𪜶悿悿，互𪜶𬦰𣍐起來，
到𪜶倒佇我的腳下。
22:40 因為你曾用氣力縖我，互我會交戰；
你互許個起來攻擊我的攏降服我。
22:40 你賜我氣力互我𠢕交戰；
你互攻擊我的人攏降服佇我下面。
22:41 你互我的對敵向我越轉身，
互我通剪除許個怨恨我的人。
22:41 你互我的對敵越轉身逃走，
閣互我剿滅怨恨我的人。
22:42 𪜶四界看，也無拯救𪜶的；
就向望耶和華，伊也應伊。
22:42 𪜶求叫，無人救𪜶；
求叫上主，伊嘛無應。
22:43 我搥𪜶幼幼，親像地上的塵埃；
我踏𪜶親像街路的土糜，互𪜶四散。
22:43 我給𪜶搥到碎碎，親像地上的土粉，
給𪜶踐踏，親像街路的土糜。
22:44 你救我脫離我的百姓的相爭，
保存我做列國的頭目；
我所識的百姓欲服事我。
22:44 你救我脫離反叛我的人民；
你保護我，互我做列邦的頭。
我毋識的人民會服事我；
22:45 外邦人欲投降我，
一下聽見就欲遵趁我。
22:45 外邦的人屈身投降，
𪜶一下聽著我的名就順服。
22:46 外邦人欲衰敗，
對𪜶秘密的所在愕愕惙出來。
22:46 外邦的人失膽，
行出𪜶的陣地，準備欲作戰。
22:47 耶和華是活的，願我的石磐得著謳咾！
願上帝──就是救我的石磐的得著尊做高！
22:47 上主永遠活啲！
願我倚靠的石磐受稱讚；
願救我的石磐 — 上帝受高舉。
22:48 就是替我伸冤的上帝、
互許個百姓降服我的。
22:48 伊就是為我申冤彼位上帝；
伊互眾人降服佇我腳下。
22:49 救我脫離我的對敵的，
閣舉起我，卡高許個起來攻擊我的；
你救我脫離強暴的人。
22:49 伊救我脫離我的對敵。
你提拔我高過攻擊我的人；
你救我脫離強暴的人。
22:50 耶和華啊，因為按呢我欲佇列邦感謝你，
也欲唱歌謳咾你的名。
22:50 上主啊，因為按呢我欲佇列邦中感謝你，
唱歌稱讚你的名。
22:51 耶和華大大拯救伊所設立的王，
施慈愛互伊所抹油者，
就是互大衛及伊的後裔，
到永遠！
22:51 上主賜極大的救恩互伊設立的王，
施落慈愛互伊抹油選立的人，
互大闢及伊的後代，直到永遠。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。