上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
掃羅的後裔受處死
21:1 佇大衛的時有飢荒，連連三年，大衛就問耶和華。耶和華講：「是因為掃羅及伊的家流人的血的，因為伊刣死基遍人。」
掃羅的後代受處死
21:1 大闢在位的時有飢荒連續三年。大闢請問上主。上主講：「是因為掃羅及伊的家刣死基遍人，流𪜶的血。」
21:2 基遍人本是以色列人，就是亞摩利人所剩的；以色列人曾對𪜶咒誓，刣𪜶，總是掃羅為著以色列人及猶大人熱心，想計謀刣𪜶。王就召基遍人來給𪜶講，
21:2 王就召基遍人來，對𪜶講話。(基遍人本來毋是以色列人，是亞摩利人留落來的。以色列人曾對𪜶咒誓，無欲刣𪜶；毋拘掃羅因為對以色列人及猶大人的熱心，熱切甲計謀欲給𪜶消滅。)
21:3 大衛給基遍人講：「我著為恁做甚麼？我著用甚麼來替贖，互恁祝福耶和華的產業啊？」
21:3 大闢給基遍人講：「我著為恁做什麼？我著按怎給恁補償，通互恁祝福上主的子民？」
21:4 基遍人講：「阮及掃羅及伊的家的事無關係金銀，也通為著阮的緣故害死一個以色列人。」伊講：「恁所講怎樣，我欲為恁行伊。」
21:4 基遍人講：「阮及掃羅以及伊的家的代誌毋是用金銀會當解決，嘛毋通因為阮的緣故害死任何一個以色列人。」
伊講：「恁講按怎，我就按呢做。」
21:5 𪜶對王講：「彼個從前毀壞阮、謀害阮、欲滅阮，互阮𣍐得通徛起佇以色列的境內的，
21:5 𪜶對王講：「掃羅計謀欲給阮剿滅，害阮佇全以色列境內無徛起的所在。
21:6 今願用伊的後裔七人交付阮，阮欲佇耶和華的面前，將𪜶吊佇耶和華所揀掃羅的基比亞。」王講：「我欲交互恁。」
21:6 請將伊七個查甫的子孫交互阮，阮欲佇上主的面前給𪜶吊佇基比亞，就是上主選立作王的掃羅的家鄉。」
王講：「我會將𪜶交互恁。」
21:7 掃羅的子約拿單，伊的子米非波設王保惜，因為大衛及掃羅的子約拿單前曾指耶和華的名來咒誓，
21:7 大闢王因為曾及掃羅的子約拿單指上主的名咒誓，所以毋甘將約拿單的子米非波設交互𪜶。
21:8 總是王將愛雅的查某子利斯巴給掃羅所生二個子亞摩尼、米非波設，及掃羅的查某子米甲給米何拉人巴西萊的子亞得列所生的五個子
21:8 王就將愛亞的查某子利斯巴給掃羅生的兩個子亞摩尼及米非波設，以及掃羅的查某子米拉給米何拉人巴西萊的子亞得列生的五個子，
21:9 攏交佇基遍人的手。𪜶就吊𪜶佇山裡，佇耶和華的面前，這七人攏做一下倒落來。攏總死佇起頭收割的時，就是起頭割大麥的時。
21:9 攏交互基遍人。基遍人就佇上主的面前給𪜶吊佇山頂。此七個人攏做夥死，彼時抵是開始收割大麥的時。
21:10 愛雅的查某子利斯巴提粗麻布為家己舒佇石磐頂，對起頭收割的時到天落雨水佇身屍的時，准日時空中的鳥，及暝時的走獸到佇許個身屍。
21:10 愛亞的查某子利斯巴提粗麻布，佇石磐頂為家己搭棚仔住佇遐；對開始收割到落秋雨沃著身屍的期間，伊日時毋准飛鳥，暝時毋准走獸磕著許個身屍。
21:11 有人將掃羅的妃愛雅的查某子利斯巴所做的事給大衛講。
21:11 有人將愛亞的查某子，掃羅的妃利斯巴所做的事給大闢講。
21:12 大衛就去，對基列‧雅比人提掃羅的骨及伊的子約拿單的骨（𪜶曾對伯‧珊的街路偷提，因為非利士人前佇基利波刣死掃羅的時，非利士人有吊𪜶佇遐。）
21:12 大闢就去基列的雅比人遐，將掃羅及伊的子約拿單的骨骸提來。(非利士人佇基利波刣死掃羅的時，將掃羅及約拿單吊死佇伯‧善的廣場；基列的雅比人對遐偷提𪜶的屍體。)
21:13 伊就對遐帶掃羅的骨及伊的子約拿單的骨倒來，人就收拾許個受吊死者的骨，
21:13 大闢對遐帶掃羅及伊的子約拿單的骨骸倒來，閣收拾彼七個受吊死的人的骨骸。
21:14 就埋葬掃羅及伊的子約拿單的骨佇便雅憫地的洗拉，佇掃羅的父基士的墓；照王一切所命令的去行。此霎了後上帝為著彼個地方聽𪜶的祈禱。
21:14 人就將掃羅及伊的子約拿單的骨骸埋葬佇便雅憫地區的洗拉，掃羅的老父基士的墓。𪜶照王的命令做了後，上帝有聽𪜶為全國的祈禱。
攻拍非利士大漢人
21:15 ( 代上 20:4-8 )
非利士人閣及以色列人交戰；大衛及伊的奴僕落去，及非利士人交戰，大衛真厭倦。
攻打非利士人
21:15 非利士人閣及以色列人交戰。大闢及伊的軍兵做夥落去攻打非利士人，大闢就真厭倦。
21:16 有大漢族的一人名叫以實‧比諾；伊的槍的銅重三百舍客勒，閣佩新的刀，欲刣大衛。
21:16 有一個大漢族的人，叫做以實‧比諾，伊的槍的頭用銅做，重三公斤半，閣背新的刀，欲刣大闢。
21:17 總是洗魯雅的子亞比篩保護大衛，拍死彼個非利士人。當時，隨大衛的人對伊咒誓講：「此霎了後你通閣及阮出戰，驚了拍熄以色列的燈。」
21:17 洗璐雅的子亞比篩保護大闢，拍死彼個非利士人。後來隨大闢的人對伊咒誓講：「對今仔日起，你毋通閣及阮出戰，才免以色列的燈化去。」
21:18 後來，閣及非利士人交戰佇歌伯，彼時有戶沙人西比該刣死一個大漢族的人名做撒弗。
21:18 後來，以色列人佇歌伯及非利士人交戰；彼時有戶沙人西比該刣死一個大漢族的人，名叫做撒弗。
21:19 閣再佇歌伯及非利士人交戰，伯利恆人雅雷俄珥金的子伊勒哈難刣死迦特人歌利亞。伊的槍柄親像布機的軸心。
21:19 𪜶閣佇歌伯及非利士人交戰；伯利恆人睚珥的子伊勒哈難刣死迦特人歌利亞；伊的槍柄親像織布機的車心赫粗。
21:20 閣佇迦特交戰，佇遐有一個大漢人，二支手各有六支指頭仔，二支腳各有六支指頭仔，共有二十四支；伊也是大漢族人的子。
21:20 𪜶閣佇迦特交戰；佇遐有一個大漢人，兩支手各有六支指頭仔，兩支腳嘛各有六支腳指頭仔，共有二十四支；伊嘛是大漢族的後代。
21:21 此人藐視以色列的時，大衛的兄示米亞的子約拿單就給伊刣死。
21:21 此個人對以色列的軍隊嗆聲的時，大闢的兄哥示米亞的子約拿單給伊刣死。
21:22 此四人是迦特大漢人所生的，攏死佇大衛的手及伊的奴僕的手。
21:22 此四個人是迦特大漢族的後代；𪜶攏互大闢及伊的軍兵刣死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。