上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
示巴反叛
20:1 佇遐抵當有一個匪類，是便雅憫人比基利的子，名叫示巴。伊歕哨角，講：「阮對佇大衛無份，阮對佇耶西的子無干涉。以色列人啊，恁逐人倒去恁的布棚！」
示巴背叛
20:1 彼時有一個匪類，叫做示巴，是便雅憫人比基利的子。伊歕哨角講：
「大闢的王國咱無份，
耶西的子及咱無關係。
以色列人啊，恁攏倒去恁兜。」
20:2 對按呢以色列眾人攏離開大衛，去隨比基利的子示巴。獨獨猶大人對約但到耶路撒冷，攏隨伊的王住住。
20:2 對按呢，所有的以色列人攏離開大闢去隨比基利的子示巴；毋拘猶大人，對約旦河到耶路撒冷，歸綴路攏給王隨牢牢。
20:3 大衛到耶路撒冷，入伊的王宮，王將前所留啲顧厝的十個嬪妃關禁𪜶佇別間厝，供給𪜶食用，無及𪜶親近。𪜶受關禁親像寡婦，直到𪜶死的日。
20:3 大闢到耶路撒冷，入王宮。伊將前所留啲顧王宮的十個嬪妃，給𪜶關禁佇別間厝，供給𪜶食、穿、用，無及𪜶親近；𪜶受關禁，親像寡婦，直到𪜶死。
20:4 王給亞瑪撒講：「你著佇三日內給我招集猶大人來，你也著來遮。」
20:4 王對亞瑪撒講：「你著佇三日內招集猶大人來我遮，你嘛著來。」
20:5 亞瑪撒就去招集猶大人，總是伊延迁過所限的期。
20:5 亞瑪撒就去招集猶大人，毋拘伊延延超過期限。
20:6 大衛給亞比篩講：「今比基利的子示巴欲害咱比押沙龍卡傷重。你著帶你主人的奴僕追趇伊，驚了伊得著堅固的城，閃避咱。」
20:6 大闢給亞比篩講：「今比基利的子示巴對咱的傷害，會比押沙龍較嚴重。你著帶你主人的軍隊給伊追趇，才免伊佔著堅固的城，成做咱的困擾。」
20:7 約押的人及基利提人、比利提人，及眾勇士，攏出去隨亞比篩，對耶路撒冷出去追趇比基利的子示巴。
20:7 約押的部下，及基利提人、比利提人，以及眾勇士，攏隨亞比篩對耶路撒冷出去，追趇比基利的子示巴。
20:8 𪜶到基遍的大石磐遐，亞瑪撒來到𪜶的面前。彼時約押所穿的戰甲，縖佇伊的身軀，外面有帶閣有劍縛佇腰裡，插佇鞘內；伊行的時，劍對鞘裡落出來。
20:8 𪜶到基遍的大石磐遐，亞瑪撒來到𪜶的面前。彼時約押穿戰甲，縖帶刀劍的腰帶，刀插佇鞘內。伊行進前的時，刀對鞘裡落出來。
20:9 約押給亞瑪撒講：「我的兄，你平安嗎？」約押就用正手捋亞瑪撒的嘴鬚，欲及伊唚嘴。
20:9 約押給亞瑪撒講：「兄弟，平安。」約押就用正手搙亞瑪撒的嘴鬚，欲給伊唚。
20:10 亞瑪撒無張持約押手裡所攑的劍；約押用彼支刺入伊的腹肚，互伊的腸仔流佇地裡，無閣鑿伊，就死。
約押及伊的小弟亞比篩去追趇比基利的子示巴。
20:10 亞瑪撒無注意約押倒手攑劍；約押用彼支劍鑿入亞瑪撒的腹肚，伊的腸仔流出來佇土腳；一刀就死。
約押及伊的小弟亞比篩去追趇比基利的子示巴。
20:11 約押的少年人中有一個徛佇彼邊仔，講：「是誰歡喜約押，是誰歸順大衛，就著隨約押去。」
20:11 有一個約押的部下徛佇亞瑪撒的屍體邊仔，講：「擁護約押，歸順大闢的人攏著隨約押去。」
20:12 亞瑪撒佇路中翱佇伊的血裡。彼人看見眾百姓攏停腳，就將亞瑪撒對路中徙到田裡，用衫蓋伊，因為看見到許個人攏停腳。
20:12 亞瑪撒的屍體滒甲全血倒佇路中，約押彼個部下看著眾人攏停腳啲看，就將屍體對路中徙去園裡，用衫給伊蓋啲。
20:13 身屍對路中徙去以後，眾百姓就攏隨約押去追趇比基利的子示巴。
20:13 身屍對路中徙走以後，所有的人就攏隨約押，去追趇比基利的子示巴。
20:14 伊遍行以色列諸個支派，直到伯‧瑪迦的亞比拉，及比利人；𪜶也聚集來隨伊。
20:14 示巴行透以色列所有的支族，到伯‧瑪迦的亞伯；比基利仝宗族的人嘛聚集來隨伊。
20:15 𪜶到伯‧瑪迦的亞比拉，圍困伊，就佇城外起土堆，起佇外城的對面；約押及隨伊的眾百姓撞城，欲互伊倒。
20:15 約押及伊的軍兵到伯‧瑪迦的亞伯，圍困此個城；面對城的外牆起土堆，閣挵城欲互伊倒。
20:16 有一個聰明的婦仁人對城裡叫講：「聽啊，聽啊，求恁給約押講，請你來遮，我欲及你講話。」
20:16 有一個聰明的婦仁人對城頂叫講：「聽咧，聽咧。恁去給約押講，請伊來遮，我有話欲及伊講。」
20:17 伊就行倚來，婦仁人講：「你是約押抑是？」伊應講：「我是啦。」婦仁人講：「求你聽女婢的話。」應講：「我啲聽。」
20:17 約押就行倚去。婦仁人講：「你是約押是無？」
伊應講：「我就是。」
婦仁人講：「請聽女婢的話。」
伊應講：「我啲聽。」
20:18 婦仁人講：「古早人常常講，著佇亞比拉請問，代誌才會解決。
20:18 婦仁人講：「古早人有按呢講：『有代誌著去亞伯遐問，才會解決。』
20:19 阮佇以色列中是和平、忠厚的。你想欲滅以色列中一個府城，你啥事愛吞滅耶和華的產業啊？」
20:19 阮佇以色列中是上和平上忠誠的一座城。你是想欲毀滅以色列中此個即呢要緊的城，愛欲吞滅上主的產業是無？」
20:20 約押應講：「我決斷愛吞，決斷愛滅，
20:20 約押應講：「我絕對毋是欲吞，抑是欲滅此個城。
20:21 代誌是按呢，不過是因為以法蓮山地有一個人──比基利的子名叫示巴──有起手攻擊王就是大衛，若將伊一人交出，我就離開此個城。」婦仁人給約押講：「你看，伊的頭殼欲對城頂㧒互你。」
20:21 代誌毋是按呢，是因為以法蓮山區有一個人，比基利的子示巴起手攻擊大闢王。恁將此個人交出來，我就離開此個城。」
婦仁人給約押講：「好！伊的頭殼我會㧒過城牆互你。」
20:22 婦仁人就照伊的智慧勸眾人。𪜶就斬比基利的子示巴的頭殼，㧒互約押。伊就歕哨角，眾人就離開城四散，逐人倒去伊的布棚。約押倒去耶路撒冷，到王遐。
20:22 婦仁人就用伊的智慧說服眾人。𪜶斬比基利的子示巴的頭殼，㧒互約押。約押歕哨角，軍兵就離開城解散，逐個人倒去𪜶兜。約押倒去耶路撒冷，去王遐。
20:23 約押做以色列的總軍長；耶何耶大的子比拿雅管轄基利提人及比利提人；
大闢的大臣
20:23 約押做以色列的元帥；耶何耶大的子比拿雅管轄基利提人及比利提人。
20:24 亞多蘭管理做王的工的；亞希律的子約沙法做史官；
20:24 亞多蘭管理勞役；亞希律的子約沙法做史官；
20:25 示法做秘書；撒督及亞比亞他做祭司；
20:25 示法做書記。撒督及亞比亞他做祭司；
20:26 睚珥人以拉做大衛的領袖。
20:26 睚珥人以拉嘛做大闢的祭司。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。