上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
約押勸王
19:1 有人給約押講：「看啊，王為著押沙龍啼哭悲哀。」
約押苦勸大闢
19:1 有人給約押講：「王為著押沙龍啼哭悲哀。」
19:2 彼日的得勝變做眾百姓的悲哀，因為彼日百姓聽見講王為著伊的子憂悶。
19:2 彼日的勝利變做全軍的悲哀，因為彼日軍兵有聽講王為著伊的子哀傷。
19:3 彼日百姓暗靜入城，親像佇陣裡逃走、見誚的百姓暗靜入來一樣。
19:3 彼日軍兵偷偷仔入城，親像戰敗逃走見笑的兵士仝款。
19:4 王罩伊的面，王大聲哮講：「我的子押沙龍啊！押沙龍，我的子，我的子啊！」
19:4 王罩伊的面，大聲哮，講：「我的子押沙龍啊！押沙龍，我的子，我的子啊！」
19:5 約押入厝去見王，講：「你今仔日互你一切的奴僕無體面！𪜶今仔日救你的生命及你的子查某子的生命，你許個某的生命，你許個細姨的生命，
19:5 約押入王住的所在去見王，講：「你今仔日互你所有的人臣無體面。𪜶今仔日救你的性命，救你的子及查某子，閣救你的后妃及嬪妃的性命。
19:6 因為怨恨你的你疼伊，疼你的你怨恨伊。你今仔日已經顯明你無要緊許個首領及人臣。我今仔日看出，若押沙龍活啲，阮今仔日攏死，你就歡喜。
19:6 怨恨你的，你疼𪜶；疼你的，你怨恨𪜶。你今仔日明明表示你無看許個將領及部下做要緊。我今仔日看出，若押沙龍活啲，阮攏死，你顛倒歡喜。
19:7 今你著起來出去，安慰你的奴僕的心。我指耶和華來咒誓：你若無出去，今暝無一人及你佇啲；這災禍比你對少年到今所抵著的卡慘！」
19:7 今你著起來出去安慰你的部下。我指上主咒誓，你若無出去，今暝無一個人會及你做夥，陪伴你；此個災禍比你對少年到現在抵著的閣較嚴重。」
19:8 王就起來，坐佇城門裡。有人給眾百姓講：看啊，王坐佇城門裡，百姓就攏到王的面前。
大衛倒去耶路撒冷
以色列人已經逃走，逐人倒去伊的布棚。
19:8 王就起來，坐佇城門口；有人給軍兵講：「恁看，王坐佇城門口。」軍兵就攏來到王的面前。
大闢倒去耶路撒冷
以色列人已經逃走，逐個人倒去𪜶兜。
19:9 以色列眾支派的人紛紛議論講：「王曾救咱脫離對敵的手，閣救咱脫離非利士人的手，今伊閃避押沙龍走佇外面。
19:9 以色列逐支族的人紛紛議論，講：「大闢王曾解救咱脫離對敵的迫害，閣解放咱脫離非利士人的壓迫；伊因為閃避押沙龍猶佇外面逃亡。
19:10 咱用油抹押沙龍治理咱，伊已經陣亡。恁今啥事出一句請王倒來啊？」
19:10 咱有選立押沙龍作王治理咱，伊已經陣亡。恁哪佯恬恬，毋請王倒來？」
19:11 大衛王差人去見祭司撒督及亞比亞他，講：「恁著給猶大的長老講：『以色列眾人已經有話到佇王，請王倒來伊的厝，恁請王倒來啥事做人的路尾啊？
19:11 大闢王派人去見祭司撒督及亞比亞他，講：「恁著給猶大的長老講：『王已經有聽著以色列眾人欲請王轉來王宮；恁哪猶未欲請王倒來？
19:12 恁是我的兄弟，是我的骨肉，請王倒來啥事做人的路尾啊？』
19:12 恁是我的兄弟，我的骨肉；請王倒來此個代誌，恁是按怎隨人𣍐著？』
19:13 也給亞瑪撒講：『你豈是我的骨肉嗎？我若無設立你替約押長長佇我的面前做軍長，願上帝加倍責罰我！』」
19:13 恁嘛著給亞瑪撒講：『你豈毋是我的骨肉？我欲互你對現在起代替約押做元帥，若無，願上帝加倍責罰我。』」
19:14 對按呢伊就感激猶大眾人的心，親像一人的心。𪜶就差人去見王，講：「願你及你的眾人臣倒來。」
19:14 按呢，大闢就得著猶大眾人的心；𪜶攏同心親像一個人。𪜶就差人去見王，講：「請你及你的眾人臣倒來。」
19:15 王就倒來，到約但。猶大人來到吉甲，欲迎接王，導王過約但。
19:15 王就起身倒去。伊到約旦河的時，猶大人來吉甲迎接伊，導伊過河。
19:16 巴戶琳的便雅憫人、基拉的子示每趕緊及猶大人落來迎接大衛王。
19:16 巴戶琳的便雅憫人，基拉的子示每趕緊及猶大人落來迎接大闢王。
19:17 及伊來的有一千個便雅憫人，也有掃羅家的奴僕洗巴及伊十五個子，二十個奴僕；𪜶攏佇王的面前過約但。
19:17 及伊來的，有一千個便雅憫人，有掃羅家的僕人洗巴，及伊十五個子、二十個僕人，𪜶攏趕緊過約旦河去見王。
19:18 有渡船過去，載王的家眷，出在王用。
大衛好款待示每
王過約但的時，基拉的子示每就仆佇王的面前，
19:18 有人照王的意思，用船護送王的家眷過河。
大闢赦免示每
王啲欲過河的時，基拉的子示每來仆佇王的面前，
19:19 給王講：「我的主我的王出耶路撒冷的日，你的奴僕行悖逆的事；今求我的主莫得責罪我，莫得記得，王也莫得下佇心裡。
19:19 對王講：「我的主我的王離開耶路撒冷的時，你的僕人有背逆你；今求我的主毋通追究我的罪。請王毋通將此個代誌記牢牢，囥佇你的心內。
19:20 你的奴僕明明知家己有罪，所以約瑟全家，今仔日我第一代先落來迎接我的主我的王。」
19:20 你的僕人明明知家己有罪，所以今仔日約瑟全家我第一代先落來迎接我的主我的王。」
19:21 洗魯雅的子亞比篩講：「示每曾咒詛耶和華所抹油者，豈著因為按呢互伊死嗎？」
19:21 洗璐雅的子亞比篩講：「示每曾咒詛上主所抹油選立的，豈毋免互伊死？」
19:22 大衛講：「洗魯雅的子啊，我及恁甚麼干涉，互恁今仔日反對我啊？今仔日以色列中豈通互人死嗎？我豈知我今仔日做以色列王嗎？」
19:22 大闢講：「洗璐雅的子，這毋是恁的代誌，我來處理就好；恁毋通反對。今仔日以色列中豈通有人受處死？我豈毋知此陣啲做以色列的王的是我？」
19:23 對按呢王給示每講：「你免死。」王就對伊咒誓。
19:23 王就給示每講：「你毋免死。」王對伊咒誓。
大衛好款待米非波設
19:24 掃羅的孫米非波設也落去迎接王。伊對王去的日，到王平安倒來的日，伊無修整腳，也無修整嘴鬚，也無洗衫。
大闢恩待米非波設
19:24 掃羅的孫米非波設嘛落去迎接王；伊對王離開的日到王平安倒來，無洗腳，無修嘴鬚，嘛無洗衫。
19:25 伊佇耶路撒冷迎接王的時，王給伊講：「米非波設，你啥事無及我落去？」
19:25 伊佇耶路撒冷迎接王的時，王問伊：「米非波設，你哪無及我做夥去？」
19:26 伊應講：「我的主我的王啊，當時你的奴僕想講我欲備辦驢騎伊，及王相及去，因為你的奴僕是跛腳，總是我的奴僕騙我，
19:26 伊應講：「我的主我的王啊，彼陣你的僕人有準備驢，想欲及王做夥去，毋拘我是跛腳。我的僕人洗巴騙我，
19:27 閣佇我的主我的王的面前誹謗你的奴僕。獨獨我的主我的王親像上帝的使者，照你所看做好的行伊。
19:27 閣佇我的主我的王面前誹謗我。我的主我的王親像上帝的使者，請王照你看做好的對待我。
19:28 因為我的祖全家，佇我的主我的王的面前攏是著死的人，總是你互你的奴僕及你一桌的人相及食，我猶有甚麼理由通閣對王求叫啊？」
19:28 我的父全家，佇我的主我的王面前攏該死；毋拘王猶互你的僕人及王做夥食，我哪有權通閣對王請求什麼？」
19:29 王對伊講：「你啥事閣講你的代誌啊？我講，你及洗巴著平分許個業產。」
19:29 王給伊講：「你毋免閣講你的代誌。我決定，你及洗巴平分許個土地。」
19:30 米非波設給王講：「我的主我的王已經平安倒來宮內，據在伊攏提去也通。」
19:30 米非波設對王講：「我的主我的王已經平安倒來宮內，許個土地攏互洗巴嘛無要緊。」
大衛好款待巴西萊
19:31 基列人巴西萊對羅基琳落來，欲送王過約但，就及王過約但。
大闢恩待巴西萊
19:31 基列人巴西萊對羅基琳落來，欲護送王過約旦河。
19:32 巴西萊真老，已經八十歲。王住佇瑪哈念的時，伊用食物供給王；因為伊是大好額人。
19:32 巴西萊是八十歲的老人。伊真好額；王住佇瑪哈念的時，伊有用食物供給王。
19:33 王給巴西萊講：「你及我過去，及我住耶路撒冷，我欲供給你。」
19:33 王對巴西萊講：「請你及我做夥過去，及我住耶路撒冷，我欲照顧你。」
19:34 巴西萊給王講：「我的生命猶有幾年幾日，互我及王相及上耶路撒冷啊？
19:34 巴西萊對王講：「我猶有幾年通活，通及王做夥住耶路撒冷？
19:35 我現今已經八十歲啦，猶會分別好歹嗎？你的奴僕猶會試飲食的滋味嗎？唱歌的男女我會曉聽伊的聲音嗎？奴僕啥事拖累我的主我的王啊？
19:35 我已經八十歲，已經𣍐曉分別媠僫，啖𣍐出食物的滋味，聽𣍐出男女唱歌的聲音。僕人哪通拖累我的主我的王。
19:36 你的奴僕只有是欲及王過約但一站仔，王啥事著用此個報賞報賞我啊？
19:36 你的僕人只有陪伴王過約旦河一塊仔路；王哪著按呢恩待我？
19:37 求你准你的奴僕倒去，互我通死佇我的本城，我的父母的墓遐，看啊，你的奴僕金罕佇遮，互伊及我的主我的王過去，照你所看做好的款待伊。」
19:37 求你准你的僕人倒去，互我通死佇我的故鄉，安葬佇我的父母的墓遐。今你的僕人金罕佇遮；請我的主我的王互伊及你做夥過去，照你所看做好的對待伊。」
19:38 王講：「金罕通及我去，我欲照你所看做好的來款待伊。你見有對我求的，我欲給你成。」
19:38 王講：「金罕通及我去；我會照你所向望的款待伊；你對我請求的，我給你答應。」
19:39 對按呢眾百姓過約但，王也過去。王就及巴西萊唚嘴，給伊祝福，伊就倒去伊本所在。
19:39 所有的人攏過約旦河，王嘛過去。王給巴西萊唚，給伊祝福；伊就倒去伊的故鄉。
以色列人及猶大人起爭論
19:40 對按呢王過去，到吉甲，金罕也及伊過去。猶大眾百姓及以色列百姓的一半也攏送王過去。
19:40 王過河，到吉甲；金罕嘛及伊過去；猶大攏總的軍兵及以色列一半的軍兵，嘛攏護送王過去。
19:41 以色列眾人來見王，給伊講：「阮的兄弟猶大人啥事偷你去，來導王及伊的家眷，及跟隨大衛的人，攏相及過約但？」
猶大及以色列起爭論
19:41 後來，以色列人民來見王，給伊講：「阮的兄弟猶大人是按怎偷偷仔給你接去，導王及你的家屬，以及跟隨你的人，過約旦河？」
19:42 猶大眾人應以色列人講：「因為王及阮是同宗，恁啥事因為此個事受氣啊？阮曾食著王甚麼啊？王曾用甚麼送阮嗎？」
19:42 猶大眾人應以色列人，講：「王及阮是仝支族，恁是按怎為著此個事啲受氣？阮豈曾對王得著什麼好處？王豈曾互阮什麼利益？」
19:43 以色列人應猶大人講：「照支派，此個王阮有十份；阮對佇大衛比恁卡有關係。恁啥事看輕阮，導阮的王倒來無代先及阮參詳啊？」
獨獨猶大人的話比以色列人的話卡硬。
19:43 以色列人應猶大人講：「十二支族中，阮有十支族，阮及大闢王比恁較有關係。恁是按怎看輕阮？豈毋是阮先講欲導王倒來？」
總是，猶大人的話比以色列人的話較硬。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。