上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
押沙龍陣亡
18:1 大衛算隨伊的百姓，設立千總、百總導𪜶。
押沙龍的死
18:1 大闢召集隨伊的軍兵，用一千人及一百人做單位，照編制設立指揮官。
18:2 大衛差百姓出去，三份一交約押的手，三份一交洗魯雅的子、約押的兄弟亞比篩的手，三份一交迦特人以太的手。王給百姓講：「我的確及恁出去。」
18:2 大闢派軍兵出去，將三分一交互洗璐雅的子約押，三分一交互約押的兄弟亞比篩，三分一交互迦特人以太。王對軍兵講：「我一定欲及恁做夥出戰。」
18:3 總是百姓講：「你通出去。若阮逃走，對敵無掠阮做要緊；阮若陣亡一半，對敵也無掠阮做要緊。因為你一人擋得阮一萬人，你對城內幫助阮卡好。」
18:3 毋拘軍兵講：「你毋通出去；阮若刣輸逃走，對敵𣍐注意阮；阮若一半陣亡，對敵嘛𣍐看做要緊；你一人比阮一萬人較重要。你留佇城內幫贊阮較好。」
18:4 王給𪜶講：「恁所看做好的，我欲行伊。」對按呢王徛佇城門邊，百姓有的一百，有的一千，照次序出去。
18:4 王給𪜶講：「恁看做好的，我照按呢做。」王就徛佇城門邊，軍兵一百一百，一千一千，照次序出去。
18:5 王命令約押、亞比篩、以太講：「恁帶著我款待彼個少年人押沙龍著卡寬。」王為著押沙龍命令許個首領的話，百姓攏有聽見。
18:5 王命令約押、亞比篩、以太，講：「恁著帶念我，毋通傷害彼個少年人押沙龍。」王為押沙龍命令許個首領的話，軍兵攏有聽著。
18:6 百姓就出去田野抵敵以色列人，佇以法蓮的樹林交戰。
18:6 軍兵就出去野外，佇以法蓮的樹林及以色列人交戰。
18:7 佇遐以色列人刣輸佇大衛許個奴僕的面前；彼日陣亡的真多，共有二萬人。
18:7 佇遐，以色列的軍隊刣輸大闢的部下；彼日戰死的真多，有兩萬人。
18:8 因為戰陣散真開，遍遍佇彼所在，樹林所吞滅的比互刀所吞滅的卡多。
18:8 交戰湠到全地區；彼日佇樹林內死的，比互刀刣死的較多。
18:9 押沙龍偶然抵著大衛的奴僕。押沙龍騎伊的騾，騾走對大欉橡樹艷的樹枝下經過，伊的頭殼掛著橡樹，吊佇半空中，所騎的騾做伊去。
18:9 押沙龍騎騾，抵著大闢的部下。騾走對大欉橡樹真艷的樹椏下面經過，伊的頭毛鉤著橡樹枝，人吊佇半空中；所騎的騾做伊去。
18:10 有一個人看見，就給約押講：「我看見押沙龍掛佇橡樹裡。」
18:10 有一個兵士看著，給約押講：「我看著押沙龍吊佇橡樹。」
18:11 約押給報伊的人講：「你已經看見，啥事對遐拍伊互伊墜落地啊？我就賞你十個銀，及一條帶。」
18:11 約押給報伊的人講：「啥？你有看著噢！哪無當場給拍死？你若按呢做，我就賞你十塊銀，及一條腰帶。」
18:12 彼個人給約押講：「我就得著一千銀佇我的手，也敢伸手害王的子；因為阮聽見王命令你及亞比篩以太講：『恁著細膩，通害彼個少年人押沙龍。』
18:12 彼個人對約押講：「你就是互我一千塊銀，我嘛毋敢動手害王的子；因為阮有聽著王命令你及亞比篩、以太，講：『恁著細膩，毋通害彼個少年人押沙龍。』
18:13 我若濫粉做來害伊的生命，無一項會瞞得王，你就欲徛佇邊仔插我。」
18:13 我若敢按呢做害伊的性命，王一定會知，到時你嘛會毋插我。」
18:14 約押講：「我通及你延迁。」約押手攑三支短鎗，彼時押沙龍吊佇橡樹猶活啲，就鑿透伊的心。
18:14 約押講：「我無時間閣及你講。」約押就攑三支短槍去；彼時押沙龍吊佇橡樹猶活啲。約押鑿迵押沙龍的心。
18:15 給約押攑家私的少年人十個圍押沙龍，拍互伊死。
18:15 為約押攑武器的十個少年人給押沙龍圍啲，給伊刣死。
18:16 約押歕哨角，百姓就倒來，無閣趇以色列人，因為約押阻止百姓。
18:16 約押歕哨角，軍兵就倒來，無閣趇以色列人；因為約押給𪜶阻止。
18:17 𪜶將押沙龍㧒佇樹林內一個大深坑，頂面疊一大堆的石頭。以色列眾人逐個走倒去𪜶的布棚。
18:17 𪜶將押沙龍㧒佇樹林內一個大深坑，頂面疊一大堆石頭；所有的以色列人攏走倒去家己的厝。
18:18 押沙龍活啲的時，佇王的山谷為家己竪一支柱，因為伊講：「我無子通留我的名。」就用家己的名稱彼支柱，到今仔日稱做押沙龍的號表。
18:18 押沙龍活啲的時，佇王的山谷為家己𫞼一支柱；伊講伊無子通留名，就給彼支柱號做押沙龍。到今仔日，人猶稱呼彼支柱做押沙龍紀念碑。
大衛聽見押沙龍的死訊
18:19 撒督的子亞希瑪斯講：「准我走去，報消息，互王就是耶和華有怎樣對伊的對敵報仇。」
大闢為押沙龍哀傷
18:19 撒督的子亞希瑪斯講：「准我走去對王報告，上主已經有解救伊脫離對敵的手。」
18:20 約押給伊講：「你今仔日通去報消息，別日你通報消息；總是今仔日你通報消息，因為王的子已經死。」
18:20 約押給伊講：「你今仔日毋通去報消息，另日才去。今仔日你毋通報消息，因為王的子死去。」
18:21 約押給古示人講：「你去將你所看見的給王講。」古示人對約押鞠躬，就走去。
18:21 約押給一個古實奴隸講：「你去將你所看著的給王報告。」古實人對約押鞠躬就用走的去。
18:22 撒督的子亞希瑪斯閣給約押講：「無論怎樣，求你准我隨古示人走去。」約押講：「我的子，你報消息，既然𣍐得著賞，啥事愛走去啊？」
18:22 撒督的子亞希瑪斯閣給約押講：「無論按怎，求你准我隨古實人用走的去。」
約押講：「我的子，你報消息𣍐得著賞，是按怎欲去？」
18:23 伊閣講：「無論怎樣，我欲走去。」約押講：「你走去！」亞希瑪斯就對平洋的路走去，走做古示人的頭前。
18:23 伊應講：「無論按怎，我欲去。」
約押講：「你去！」
亞希瑪斯就對約旦平原的路走去，趇過古實人。
18:24 大衛抵仔坐佇二個城牆的中間。守望的人絔上城牆到城門的樓頂，攑目觀看，看見一人單身走來。
18:24 大闢抵仔坐佇內城門及外城門的中間；守望的人𬦰上城牆，到城門的樓頂觀看，看著一個人單身走來。
18:25 守望者叫來給王講。王講：「伊若家己來，的確有消息欲報。」伊愈走愈近倚來，
18:25 守望的大聲喝，對王報告。王講：「伊若家己一個來，一定是欲報好消息。」彼個人那走那近倚。
18:26 守望的人閣看見一人走來，守望者給顧城門的人講：「看啊，有一人單身走來。」王講：「這也是報消息的。」
18:26 守望的人閣看著另外一個人走來，守望的給顧城門的人講：「你看，閣有一個人單身走來。」
王講：「這嘛是報好消息的。」
18:27 守望者講：「我看見頭前啲走者，親像撒督的子亞希瑪斯啲走的款。」王講：「伊是好人，來報好消息。」
18:27 守望的講：「我看頭前啲走的親像撒督的子亞希瑪斯。」
王講：「伊是好人，來報好消息。」
18:28 亞希瑪斯對王叫講：「平安啦！」就佇王的面前仆佇地裡拜，講：「耶和華──你的上帝是應該著謳咾的，因為伊已經將許個起手攻擊我的主我的王的人交互你。」
18:28 亞希瑪斯對王叫講：「平安！」就佇王的面前仆拜，講：「上主 — 你的上帝應該受稱讚！伊已經將許個起手攻擊我的主我的王的人拍敗啦。」
18:29 王講：「少年人押沙龍平安抑無？」亞希瑪斯應講：「約押差王的奴僕，及你的奴僕，彼時我看見大喊嘩，知是甚麼代誌。」
18:29 王講：「少年人押沙龍平安抑無？」
亞希瑪斯應講：「約押派王的僕人，就是你的僕人來的時，我有看著混亂的場面，毋知發生什麼代誌。」
18:30 王講：「你行開，徛佇邊仔。」伊就行開，徛啲。
18:30 王講：「你徛𫢶邊仔。」伊就閃開，徛啲。
18:31 古示人也到，古示人講：「有消息報互我的主我的王！耶和華今仔日對一切興起攻擊你的人給你報仇。」
18:31 古實人嘛到；報告講：「有好消息報告我的主我的王。上主今仔日有替你申冤，拍敗起來攻擊你的人。」
18:32 王給古示人講：「少年人押沙龍平安無？」古示人應講：「願我的主我的王的對敵，及一切興起攻擊你欲害你的人，攏親像彼個少年人一樣。」
18:32 王問古實人講：「少年人押沙龍有平安無？」
古實人應講：「願我的主我的王的對敵，及所有起來攻擊你，欲害你的人，攏及彼個少年人仝款。」
18:33 王就不止傷心，上城門頂的樓啼哭，愈行愈講：「我的子押沙龍啊！我的子，我的子押沙龍啊！我恨𣍐替你死，押沙龍啊，我的子！我的子！」
18:33 王就真傷心。伊上城門頂的房間啼哭，那行那講：「我的子押沙龍啊！我的子，我的子，押沙龍啊！我苦𣍐得替你死。押沙龍啊，我的子，我的子！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。