上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
戶篩破壞亞希多弗的計劃
17:1 亞希多弗閣給押沙龍講：「請你准我揀一萬二千人，今暝我欲起身追趇大衛，
戶篩破壞亞希多弗的計策
17:1 亞希多弗對押沙龍講：「請准我揀一萬兩千人，今暗起身追趇大闢。
17:2 趁伊厭倦手軟，我欲趇著伊，互伊驚惶；隨伊的眾百姓欲攏逃走，我就干單刣死王若定，
17:2 我趁伊厭倦失志，給伊攻擊，互伊驚惶失膽，隨伊的人攏會逃走。我干焦欲刣死王一個人，
17:3 互眾百姓攏歸你。你所尋彼人是親像眾人倒轉來一樣，按呢百姓攏平安。」
17:3 互人民攏歸順你。你所欲刣彼個人以外，所有的人民攏會平安。」
17:4 押沙龍及以色列的長老攏掠此個話做好。
17:4 押沙龍及以色列所有的長老攏贊成此個提議。
17:5 押沙龍講：「著叫亞基人戶篩來，咱也通聽伊所講的。」
17:5 押沙龍講：「召亞基人戶篩來，咱嘛來聽伊的意見。」
17:6 戶篩到押沙龍遐，押沙龍給伊講：「亞希多弗講按呢，咱著照伊的話行嗎？若無，你就著講！」
17:6 戶篩到押沙龍遐，押沙龍對伊講：「亞希多弗按呢提議，咱照伊講的去做好無？若無，你有什麼意見？」
17:7 戶篩給押沙龍講：「亞希多弗此擺所計劃的好。」
17:7 戶篩對押沙龍講：「亞希多弗此遍的計策毋好。」
17:8 戶篩閣講：「你知，你的老父及隨伊的人攏是勇士，今𪜶的心猛烈，親像田野失落子的熊母一般，閣你的老父是戰士，的確無及百姓相及歇。
17:8 戶篩閣講：「你知你的老父及隨伊的人攏是勇士。𪜶凝心掠狂，親像子互人搶去的熊母。閣你的老父是有經驗的戰士，一定𣍐及軍兵做夥歇睏。
17:9 看啊，伊今匿佇山坑抑是別所在，若有幾若人代先互伊刣死，見若聽見的人欲講：『隨押沙龍的百姓其中有受刣。』
17:9 現在伊一定匿佇山洞抑是別個所在。若有人代先互伊刣死，聽著的人會講：『隨押沙龍的軍兵互人刣死啦。』
17:10 雖然有人好膽𪜶的心親像獅的心，也欲攏消溶；因為以色列人攏知你的父是勇士，隨伊的人也攏是好膽。
17:10 彼時，連勇猛親像獅的人，心嘛會消熔失膽；因為以色列人攏知你的老父是勇士，隨伊的人嘛攏真勇敢。
17:11 所以我舉議，著互以色列眾人──對但到別是巴，聚集來你遮，親像海邊的沙許多──你也親身督陣。
17:11 所以我提議，著互親像海邊的沙赫呢多的以色列人，對但到別是巴聚集來你遮，你嘛親身導𪜶出戰。
17:12 按呢，無論佇甚麼所在抵著伊，咱欲攻擊伊，落佇伊的頂面親像露水落佇地裡一般，互伊及隨的人，無留一個。
17:12 按呢，咱無論佇什麼所在抵著伊，給伊突擊，親像露水降落大地，互伊及隨伊的人無留甲一個。
17:13 伊若入城，以色列眾人欲帶索到彼個城，咱欲給伊拖落河，致到佇遐無看見一塊石頭仔。」
17:13 伊若撤退入一個城，所有的以色列人會帶索去彼個城，給城拖落山谷，佇遐連一塊石頭仔都尋無。」
17:14 押沙龍及以色列眾人講：「亞基人戶篩的計劃比亞希多弗的計劃卡好！」因為耶和華定著欲破壞亞希多弗的好計劃，致到耶和華通降災禍互押沙龍。
17:14 押沙龍及所有的以色列人攏講：「亞基人戶篩的計策比亞希多弗的較好。」上主決定欲破壞亞希多弗好的計策，通降災禍互押沙龍。
大衛接著警告來逃走
17:15 戶篩給祭司撒督及亞比亞他講：「亞希多弗給押沙龍及以色列的長老所計劃的是按呢按呢，我所給伊計劃的是按呢按呢。
大闢接著警告逃脫
17:15 戶篩給祭司撒督及亞比亞他講：「亞希多弗給押沙龍及以色列的長老出的計謀是按呢按呢；我出的計策是按呢按呢。
17:16 今恁著趕緊差人去，給大衛講：『今暝通𫢶佇曠野的渡口，的確著過河，免得王及隨伊的人攏受吞滅。』」
17:16 現在恁著趕緊派人去給大闢報告，今暗毋通𫢶佇曠野的渡口，一定著過河，才免王及隨伊的人攏受剿滅。」
17:17 彼時，約拿單及亞希瑪斯𫢶佇隱‧羅結啲聽候，因為敢互人看見𪜶入城。有一個女婢來，給𪜶講，𪜶就去給大衛王講。
17:17 彼時約拿單及亞希瑪斯𫢶佇隱‧羅結，毋敢入城，驚互人看著；𪜶啲聽候一個女婢對城內出來給𪜶通報，互𪜶通對大闢王報告。
17:18 總是有一個囝仔看見𪜶，就去給押沙龍講。𪜶二人趕緊走到巴戶琳某人的厝；彼人的院內有井，𪜶二人就落去遐。
17:18 毋拘有一個少年人看著𪜶，就去給押沙龍報告；𪜶兩人趕緊走去巴戶琳某一個人的厝；彼個人的埕有井，𪜶兩人就落去遐匿。
17:19 彼家的婦仁人用蓋蓋井嘴，頂面舖麥屑，代誌就無漏洩。
17:19 彼家的婦仁人用蓋蓋井口，頂面鋪麥仔，代誌就無漏洩。
17:20 押沙龍的奴僕來到婦仁人彼間厝，問伊講：「亞希瑪斯及約拿單佇叨落？」婦仁人講：「𪜶過溪去啦。」
奴僕尋𪜶，尋無著，就倒去耶路撒冷。
17:20 押沙龍的部下來到婦仁人彼間厝，問伊講：「亞希瑪斯及約拿單佇叨位？」
婦仁人講：「𪜶過溪去啦。」
許個部下去尋，尋無著，就倒去耶路撒冷。
17:21 𪜶倒去了，二人對井裡起來，去給大衛王講，𪜶給大衛講：「恁著起來，緊緊過水，因為亞希多弗有按呢按呢計劃，欲害你。」
17:21 𪜶離開了，彼兩個人對井裡起來，去給大闢王通報。𪜶對大闢講：「恁著起來，趕緊過河，因為亞希多弗有按呢按呢計謀欲害你。」
17:22 大衛及隨伊的人就起來，過約但。到天光，無剩一人無過約但。
17:22 大闢及隨伊的人就起來，過約旦河；到天光，無一個無過約旦河。
17:23 亞希多弗看見無照伊的計劃行，就備辦驢起身，倒去伊的城；到伊的家，吩咐伊的家事，就家己吊死，埋葬佇伊的老父的墓。
17:23 亞希多弗知伊的計策無受採納，就騎驢倒去伊的城，到𪜶兜。伊給厝內的代誌交代好勢，就家己吊死；人給伊埋葬佇𪜶老父的墓。
17:24 大衛到瑪哈念，押沙龍及隨伊的以色列人也攏過約但。
17:24 大闢到瑪哈念的時，押沙龍及隨伊的以色列人才過約旦河。
17:25 押沙龍設立亞瑪撒做軍長，替約押。亞瑪撒是以色列人以特拉的子。以特拉曾及拿轄的查某子亞比該同房；此個亞比該及約押的老母洗魯雅是姊妹。
17:25 押沙龍設立亞瑪撒做元帥代替約押。亞瑪撒是以色列人以特拉的子；以特拉曾及拿轄的查某子愛比該同房。此個愛比該及約押的老母洗璐雅是姊妹。
17:26 以色列人及押沙龍紮營佇基列地。
17:26 以色列人及押沙龍佇基列地區紮營。
17:27 大衛到瑪哈念彼時，亞捫族的拉巴人拿轄的子朔比，羅‧底巴人亞米利的子瑪吉，基列的羅基琳人巴西萊，
17:27 大闢到瑪哈念彼時，亞捫族的拉巴人拿轄的子朔比、羅‧底巴人亞米利的子瑪吉，及基列的羅基琳人巴西萊，
17:28 帶舖仔、盆、磁器、小麥、大麥、麵粉、炒的五榖、豆仔、紅豆、炒豆、
17:28 帶床舖、盆、瓷器、小麥、大麥、麵粉、焙熟的五穀、豆仔、紅豆、焙過的豆仔、
17:29 蜜、奶油、羊、牛奶餅，供給大衛及隨伊的人通食；因為𪜶講：「百姓佇曠野必定會枵，厭倦嘴乾。」
17:29 蜜、油、牛奶及羊奶做的食物，供給大闢及隨伊的人；𪜶講：「軍兵佇曠野一定會枵，會厭倦，嘴焦。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。