上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
押沙龍陰謀造反
15:1 此霎了後，押沙龍為家己備辦車馬，閣五十人走佇伊的頭前。
押沙龍造反
15:1 諸個代誌了後，押沙龍為家己準備馬及戰車，閣派五十個兵佇頭前開路。
15:2 押沙龍早早起來，徛佇城門的路邊，若有人來有案件著互王判斷的，押沙龍就叫伊來，問伊講：「你是叨落一個城的人。」伊應講：「奴僕是以色列一個支派的人。」
15:2 押沙龍常常早早起來，徛佇城門口的路邊；若有人有案件欲互王判斷，押沙龍就叫伊來，問伊講：「你是叨一個城的人？」伊應講：「僕人是以色列某一個支族的人。」
15:3 押沙龍給伊講：「你的代誌是好是有情理，總是王無交代人聽你的話。」
15:3 押沙龍給伊講：「你的案件合情合理，毋拘王無交代人處理你的案件。」
15:4 押沙龍閣講：「可惜無設立我做此個地方的審判司！見有相告著判斷的事的來到我遮，我欲照公義判決伊。」
15:4 押沙龍閣講：「可惜無人指派我做此個地的審判官；若有人有相告著審判的案件，來我遮，我會照公道判決。」
15:5 見有人近倚來拜伊，伊就伸手牽伊，給伊唚。
15:5 若有人來拜伊，伊就伸手牽伊，給伊唚。
15:6 以色列人的中間，見若欲去見王求判斷的，押沙龍攏按呢款待𪜶。按呢，押沙龍暗靜得著以色列人的心。
15:6 以色列人的中間，若有人欲去見王請求判斷，押沙龍攏按呢對待𪜶。押沙龍用按呢暗中得著以色列人的心。
15:7 過四年，押沙龍對王講：「求你准我去希伯崙，還我對耶和華所下的願。
15:7 四年後，押沙龍對王講：「求你准我去希伯崙，互我通對上主謝願。
15:8 因為奴僕𫢶佇亞蘭的基述，曾下願講：『耶和華若果然互我閣倒來耶路撒冷，我欲服事耶和華。』」
15:8 因為僕人住佇敘利亞的基述的時有下願講：『上主若互我閣倒來耶路撒冷，我欲去希伯崙服事上主。』」
15:9 王給伊講：「你通平安去！」押沙龍就起來，去希伯崙。
15:9 王給伊講：「你通平安去。」押沙龍就出發，去希伯崙。
15:10 押沙龍差偵探行遍以色列逐支派，講：「恁一下聽見哨角的聲就講：『押沙龍佇希伯崙做王啦！』」
15:10 押沙龍暗中派使者去以色列逐個支族，講：「恁一下聽著哨角的聲，就喝講：『押沙龍佇希伯崙作王啦！』」
15:11 押沙龍所請彼二百人及伊對耶路撒冷去，許個人攏是無意中去，知彼個事。
15:11 毋拘押沙龍對耶路撒冷所請及伊去彼兩百個人，攏毋知代誌的頭尾。
15:12 大衛的謀士亞希多弗是基羅人，當獻祭的時，押沙龍差人召伊，對伊的本城基羅來。對按呢叛逆的勢面愈強；因為隨押沙龍的百姓日日愈多。
15:12 押沙龍獻祭的時，派人去基羅城請大闢的參謀亞希多弗來；對按呢，隨押沙龍的人愈來愈多，反叛的勢面愈來愈強。
大衛走離耶路撒冷
15:13 有人來報大衛講：「以色列人的心攏歸向押沙龍啦。」
大闢逃難
15:13 有人來給大闢報告講：「以色列人的心攏歸向押沙龍啦。」
15:14 大衛給許個及伊佇耶路撒冷的人臣講：「起來，咱著逃走，若無攏𣍐會閃避押沙龍；著緊緊去，驚了伊緊緊到來趇著咱，陷害咱，用刀刣死城內的人。」
15:14 大闢對許個及伊佇耶路撒冷的人臣講：「起來，咱著逃走；若無，咱𣍐當逃避押沙龍。著趕緊走，才免伊連鞭趇著咱，傷害咱，刣死城內的人。」
15:15 王的人臣給王講：「看啊，我的主我的王所注意的，你的奴僕攏欲行。」
15:15 王的人臣給王講：「阮的主阮的王所決定的，你的僕人攏欲照按呢做。」
15:16 王出去，伊的家眷攏隨伊，王留十個嬪妃顧厝。
15:16 王出城，伊的家眷攏隨佇伊的後面，只有留十個嬪妃顧王宮。
15:17 王出去，眾百姓攏隨伊，到伯墨哈，就歇。
15:17 城內的人嘛隨王離開；𪜶行到城的最後一間厝停啲。
15:18 王的人臣攏佇伊的面前行過去。一切的基利提人、比利提人，及迦特人就是對迦特隨伊來的六百人，也攏佇王的面前行過去。
15:18 王的人臣攏佇伊的面前行過去；所有的基利提人、比利提人，及對迦特隨伊來彼六百個迦特人，嘛攏佇王的面前行過去。
15:19 王給迦特人以太講：「你啥事及阮去？通倒去及王相及住，你是外邦人，遷徙佇外面，通倒去本所在！
15:19 王給迦特人以太講：「你是按怎欲及阮去？著倒去倚新王；你是外國人，對你的本國逃難來遮。
15:20 你昨日才來，我今仔日豈通勞煩你及阮漂流啊？我去我所去的所在，你通倒去，帶你的兄弟相及倒去！願恩典誠實及你佇啲。」
15:20 你昨昏才來，今仔日我家己都毋知欲去叨位，哪通互你及阮做夥飄流？轉去，給你的兄弟做夥導倒去。願上主用慈愛信實對待你。」
15:21 以太應王講：「我指永活的耶和華，及我的主我的王的活命來咒誓：我的主我的王或活或死，見所佇啲的所在，你的奴僕也佇遐。」
15:21 以太應王講：「我指永活的上主佇我的主我的王面前咒誓，王無論佇什麼所在，你的僕人無論死活攏會佇遐。」
15:22 大衛給以太講：「你去，過去！」迦特人以太及許個隨伊的人及所有的囝仔就攏過去。
15:22 大闢給以太講：「好，你進前行。」迦特人以太及許個隨伊的人，及所有的囝仔就攏過去。
15:23 遍地大聲啼哭，眾百姓攏過去，王也過汲淪溪；眾百姓過去，向曠野啲行。
15:23 跟隨王的人過去的時，所有的人攏大聲啼哭。王過汲淪溪谷，人民嘛過去，向迵曠野的路行去。
15:24 撒督及攏總隨伊的利未人扛上帝的約櫃來，𪜶下上帝的櫃佇遐。亞比亞他上來，聽候眾百姓對城內出來攏過去。
15:24 看咧，祭司撒督來啦，所有隨伊的利未人嘛扛上帝的約櫃來。𪜶將上帝的約櫃下佇遐。亞比亞他嘛來到遐，聽候對城內出來的人民攏過去。
15:25 王給撒督講：「你扛上帝的櫃倒去城內。我若得著恩典佇耶和華的目前，伊欲互我倒來，互我閣看見伊及伊徛起的所在。
15:25 王給撒督講：「你扛上帝的約櫃倒去城內。我若得著上主的恩典，伊會互我倒來，互我閣看著約櫃，及囥約櫃的所在。
15:26 設使伊講：『我無歡喜你』，看啊，我佇遮，願伊照伊看做好的行佇我！」
15:26 上主若講：『我無合意你。』願伊照伊的意思對待我。」
15:27 王閣給祭司撒督講：「你豈是先見嗎？你通安然倒去城內；你的子亞希瑪斯及亞比亞他的子約拿單，恁此二個子攏通及你去。
15:27 王閣給撒督講：「你豈毋是先見？你通平安倒去城內；你的子亞希瑪斯及亞比亞他的子約拿單，攏通及你做夥倒去。
15:28 看啊，我佇曠野的渡口聽候對你遐有消息來報我知實情。」
15:28 我會佇曠野的渡口聽候恁報消息互我。」
15:29 對按呢撒督及亞比亞他扛上帝的櫃倒去耶路撒冷，𪜶就住佇遐。
15:29 撒督及亞比亞他就扛上帝的約櫃倒去耶路撒冷；𪜶就留佇遐。
15:30 大衛對上橄欖山的路上去，愈上去愈哮，罩頭殼褪赤腳來行。隨伊去的眾百姓也罩頭殼上去，愈上去愈哮；
15:30 大闢對向橄欖山的路上去，蓋頭褪赤腳，那行那哮；隨伊去的人嘛蓋頭上去，那行那哮。
15:31 有人報大衛講：「亞希多弗也隨押沙龍佇叛黨的中間。」大衛講：「耶和華啊，求你互亞希多弗的計謀變做戇！」
15:31 有人報大闢講：「亞希多弗嘛隨押沙龍佇叛黨的中間。」大闢講：「上主啊，求你互亞希多弗的計謀落空。」
15:32 大衛上到山頂、敬拜上帝的所在，看見亞基人戶篩，衫拆裂，頭殼摻塵埃來迎接伊。
15:32 大闢上到山頂敬拜上帝的所在的時，亞基人戶篩拆裂衫，頭殼糝土粉，來迎接伊。
15:33 大衛給伊講：「你若及我去，會拖倕我；
15:33 大闢給伊講：「你若及我去，會拖累我；
15:34 你若倒去城內，給押沙龍講：『王啊，我欲做你的奴僕；我前做你的父的奴僕，今我也欲按呢做你的奴僕。』你就通給我破壞亞希多弗的計謀。
15:34 你若倒去城內，給押沙龍講：『王啊，我欲做你的僕人；我以前做你老父的僕人，今我嘛欲按呢做你的僕人。』按呢你就會當替我破壞亞希多弗的計謀。
15:35 祭司撒督及亞比亞他豈無及你佇遐嗎？你對王宮內所聽見的，就著給祭司撒督及亞比亞他講。
15:35 祭司撒督及亞比亞他嘛會及你佇遐。你佇王宮所聽著的，著給祭司撒督及亞比亞他講。
15:36 撒督的子亞希瑪斯，亞比亞他的子約拿單，此二個子也及𪜶佇遐。見若恁所聽見的通託仗𪜶來報我。」
15:36 撒督的子亞希瑪斯，亞比亞他的子約拿單，嘛及𪜶佇遐；恁所聽著的，著交代𪜶來報我。」
15:37 對按呢，大衛的朋友戶篩入城；押沙龍也入耶路撒冷。
15:37 對按呢，押沙龍入耶路撒冷的時，大闢的朋友戶篩嘛入城。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。