上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
約押設法互押沙龍倒來
14:1 洗魯雅的子約押，知王的心意向押沙龍，
約押安排押沙龍轉來
14:1 洗璐雅的子約押知王的心猶啲想押沙龍，
14:2 就差人去提哥亞，對遐叫一個聰明的婦仁人來，給伊講：「請你假做竪孝的，穿孝衫，莫得用油抹身軀，著妝做為著死人久久悲哀的婦仁人；
14:2 就派人去提哥亞，叫一個聰明的婦仁人來。約押給伊講：「請你裝做帶孝的婦仁人；穿麻衫，身軀毋通抹油，假做已經為著死人哀傷幾若日。
14:3 入去見王，照此個款對伊按呢講。」約押就將所著講的話教婦仁人講。
14:3 然後你入去見王，照我交代你的對王講。」約押就將所著講的話教婦仁人。
14:4 提哥亞的婦仁人對王講的時，面仆佇地裡拜，講：「王啊，救我！」
14:4 提哥亞的婦仁人來見王，面仆佇土腳拜，講：「王啊，救我。」
14:5 王問伊講：「你有甚麼代誌啊？」伊應講：「我實在是寡婦，我的丈夫已經死。
14:5 王問伊講：「你有什麼代誌？」伊應講：「我是一個寡婦，我的丈夫已經死。
14:6 女婢有二個子，𪜶二個佇田裡相拍，無人佇𪜶中間排解，此個拍彼個互伊死。
14:6 女婢有兩個子，𪜶兩個佇園裡相拍，無人給𪜶排解；一個拍死另外一個。
14:7 今全家的人攏起來攻擊你的女婢，講：『你著將彼個拍死兄弟的交出來，阮通互伊死，賠伊拍死兄弟的生命，絕伊的後嗣。』按呢，𪜶欲將我剩的火炭拍熄，無互我的丈夫留名留後裔佇世間。」
14:7 現在全家族攏啲攻擊你的女婢，講：『你著將彼個拍死兄弟的交出來，阮欲互伊死，賠伊拍死兄弟的性命，絕伊的後嗣。』按呢𪜶欲將我賰的火種拍化，互我的丈夫𣍐當留名留後代佇世間。」
14:8 王給婦仁人講：「你通倒去恁兜！我欲為著你出命令。」
14:8 王給婦仁人講：「你通倒去，我會為著你下令。」
14:9 提哥亞的婦仁人閣給王講：「我的主我的王，願此個罪歸佇我及我的父的家，王及伊的位攏無罪。」
14:9 提哥亞的婦仁人閣對王講：「我的主我的王，願此個罪歸佇我及我的家族；及王以及王位攏無關係。」
14:10 王講：「見若有及你加講話的，你就導伊到我遮，伊就無閣來共你。」
14:10 王講：「若有人給你加講話，你給導來我遮，伊就𣍐閣共你。」
14:11 婦仁人講：「願王紀念耶和華──你的上帝，通准報人命的行滅絕，驚了𪜶滅絕我的子。」王講：「我指永活的耶和華來咒誓：你的子連一支頭毛也𣍐磕落佇地裡。」
14:11 婦仁人講：「願王記念上主 — 你的上帝，毋通互阮親族中報血仇的閣刣死我的子，才免𪜶滅絕我的後嗣。」
王講：「我指永活的上主咒誓，你的子，連一支頭毛都𣍐加落佇土腳。」
14:12 婦仁人講：「求你容允你的女婢對我的主我的王閣講一句話。」王講：「做你講！」
14:12 婦仁人講：「求你允准你的女婢對我的主我的王閣講一句話。」
王講：「做你講。」
14:13 婦仁人講：「你啥事想按呢來攻擊上帝的百姓啊？王講此個話親像有罪，因為王無互伊的逃命者倒來。
14:13 婦仁人講：「王是按怎按呢計謀欲攻擊上帝的子民？王若無互彼個逃命的子倒來，王抵即講的話，表示家己有毋著。
14:14 因為咱攏的確著死，親像水潑佇地裡，𣍐會閣收倒轉。總是上帝無搶人的生命，是設法互逃命的人免受革逐、離開伊。
14:14 咱攏一定會死，親像水潑落地，𣍐當閣收倒轉；毋拘上帝𣍐搶奪人的性命，會設法互逃命的人免永遠受趕逐離開伊。
14:15 我來將此個話給我的主我的王講，是因為百姓互我驚惶。所以女婢講，今我欲給王講，豈採王欲成女婢的所求。
14:15 我將諸個話給我的主我的王講，是因為有人給我恐嚇，所以女婢想講著互王知，豈採王會聽女婢的訴求。
14:16 人欲將我及我的子對上帝的業做一下除滅，總是王欲聽，救伊的女婢脫離彼人的手。
14:16 有人欲將我及我的子對上帝所賜的產業做一下除滅。毋拘王會聽，會救伊的女婢脫離彼個人的手。
14:17 女婢閣講，願我的主我的王的話來安慰；因為我的主我的王會分別是非，親像上帝的使者一樣。獨獨願耶和華──你的上帝及你佇啲！」
14:17 女婢想，我的主我的王會安慰我，因為我的主我的王親像上帝的使者，會分別是非。願上主 — 你的上帝及你同在。」
14:18 王應婦仁人給伊講：「我見若所欲問你的，攏通對我囥密。」婦仁人講：「願我的主我的王講伊。」
14:18 王應婦仁人講：「我欲問你的，你著照實講。」
婦仁人講：「請我的主我的王講。」
14:19 王講：「諸個豈是約押及你通套的嗎？」婦仁人講：「我的主我的王啊，我指你的活命來咒誓：我的主我的王所講的，無人會偏左抑偏右來閃避伊，因為你的奴僕約押吩咐我，用諸個話攏教你的女婢講。
14:19 王講：「諸個攏是約押及你套好的是無？」
婦仁人講：「我的主我的王，我指你的活命咒誓，抵照我的主我的王講的，是，是你的僕人約押吩咐我，教我講的。
14:20 你的奴僕約押做按呢，是欲互此個事勢轉彎。我的主有智慧親像上帝使者的智慧，會透徹世上一切的事。」
14:20 你的僕人約押按呢做，是欲互此個代誌改變；我的主有親像上帝使者的智慧，會了解世間所有的事。」
14:21 王給約押講：「我的確行此個事。今你著去，導彼個少年人押沙龍倒來。」
14:21 後來，王給約押講：「此件事我答應你。今你去，給彼個少年人押沙龍導倒來。」
14:22 約押仆佇地裡來拜，祝謝王，約押講：「我的主我的王啊，王既然行你的奴僕所求的，今仔日你的奴僕知我有得著恩典佇你的目睭前。」
14:22 約押仆佇土腳拜，給王祝福。約押講：「我的主我的王有答應你僕人的請求。今仔日你的僕人知我有得著你的歡喜。」
14:23 對按呢約押起身去基述，導押沙龍到耶路撒冷。
14:23 對按呢約押出發去基述，導押沙龍轉來耶路撒冷。
14:24 王講：「教伊倒去伊的厝，通見我的面。」押沙龍就倒去伊的厝，無見王的面。
14:24 王講：「叫伊倒去伊的厝，毋通見我的面。」押沙龍就倒去家己的厝，無見王的面。
押沙龍及大衛和好
14:25 押沙龍生做真好看，通以色列中無人親像伊得著人謳咾，對腳跡底到頭殼頂攏無瑕疵。
大闢赦免押沙龍
14:25 佇以色列中，無人親像押沙龍赫呢英俊得著人謳咾；對腳底到頭殼頂攏無缺點。
14:26 伊剪頭毛的時，秤伊的頭毛，照王的秤，重二百舍客勒；伊剪髮是佇逐個年尾，因為伊的頭毛真重，所以著剪伊。
14:26 押沙龍逐年著剪一遍頭毛，因為伊的頭毛真重。伊剪起來的頭毛，照王的秤，大約兩公斤。
14:27 押沙龍生三個子，一個查某子。查某子名叫他瑪，是一個面貌真媠的查某囝仔。
14:27 押沙龍生三個子，一個查某子；查某子名叫她瑪，是一個真媠的查某囝仔。
14:28 押沙龍住佇耶路撒冷滿二年，無見王的面。
14:28 押沙龍住佇耶路撒冷滿兩年，無見著王的面。
14:29 押沙龍差人叫約押，欲差伊去見王，總是約押肯來伊遐。伊第二擺差人去叫伊，伊猶原來。
14:29 押沙龍派人去叫約押，欲請伊去見王，毋拘約押毋肯來。押沙龍第二遍派人去叫，伊猶原毋來。
14:30 所以押沙龍對伊的奴僕講：「恁看，約押的園近我的園，伊有大麥佇遐，恁去放火燒伊。」押沙龍的奴僕就去放火燒伊。
14:30 押沙龍對伊的部下講：「恁看，約押的園離我的園真近，有種大麥。恁去給放火燒。」押沙龍的部下就去放火燒約押的園。
14:31 約押就起來，到押沙龍的厝，問伊講：「你的奴僕啥事放火燒我的園？」
14:31 約押去押沙龍的厝，問伊講：「你的部下是按怎放火燒我的園？」
14:32 押沙龍應約押講：「我差人給你講來遮，互我通差你去見王，給伊講：『我啥事對基述倒來啊？我值著猶原住遐。』今著准我見王的面；我若有罪，伊通刣我。」
14:32 押沙龍給約押講：「我派人請你來，是欲請你去見王，給伊講我哪著對基述倒來；我寧可留佇遐。今著互我去見王的面；我若有罪，伊通刣我。」
14:33 約押就去見王，給伊講，伊叫押沙龍。押沙龍就來見王，佇王的面前仆佇地裡，王就唚押沙龍。
14:33 約押就去見王給伊轉達。王叫押沙龍來；押沙龍就來見王，佇王的面前仆佇土腳。王就唚押沙龍。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。