上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
暗嫩及他瑪
13:1 此個以後大衛的子押沙龍有一個真媠的小妹，名叫他瑪。大衛的子暗嫩疼伊。
暗嫩及她瑪
13:1 大闢的子押沙龍有一個真媠的小妹，叫做她瑪；大闢另外一個子暗嫩戀慕伊。
13:2 暗嫩為著伊的小妹他瑪鬱悴到破病。因為伊是在室女，暗嫩家己知得對伊做甚麼代誌。
13:2 暗嫩愛伊的小妹她瑪愛甲破病；因為伊是在室女，暗嫩家己知𣍐當對伊做什麼。
13:3 暗嫩有一個朋友，名叫約拿達，是大衛的兄示米亞的子。約拿達是真靈竅的人；
13:3 暗嫩有一個朋友，叫做約拿達，是大闢的兄哥示米亞的子。約拿達此個人真奸巧。
13:4 伊對暗嫩講：「王的子啊，你啥事一日一日卡消瘦啊？啥事給我講。」暗嫩給伊講：「我疼我的小弟押沙龍的小妹他瑪。」
13:4 伊對暗嫩講：「王的子啊，你是按怎一日比一日消瘦無精神？豈𣍐當給我講？」
暗嫩給伊講：「我愛我的小弟押沙龍的小妹她瑪。」
13:5 約拿達給伊講：「你著倒佇眠床裡假做破病；你的老父來看你，就對伊講：『求你准我的小妹他瑪來我遮，用食物互我，備辦佇我的面前，互我看見，對伊的手接來食。』」
13:5 約拿達就對伊講：「你著倒佇眠床，假破病；你的老父若來看你，你通對伊講：『請互我的小妹她瑪來我遮，佇我看會著的所在準備食物，親手提互我食。』」
13:6 暗嫩就倒啲假破病。王來覓伊，暗嫩就對王講：「求你互我的小妹他瑪來，佇我的面前給我做二塊餅，我通對伊的手接來食伊。」
13:6 暗嫩就倒啲，假破病；王來看伊；暗嫩就對王講：「請互我的小妹她瑪來我遮，給我做兩塊餅，我通對伊的手接來食。」
13:7 大衛就差人到他瑪的厝，給伊講：「今你去你的兄暗嫩的厝，給伊備辦食物。」
13:7 大闢就派人去她瑪的厝，給伊講：「你去恁兄哥暗嫩遐，給伊準備食物。」
13:8 他瑪就到伊的兄暗嫩的厝；暗嫩倒啲。他瑪提麵粉，佇伊的面前摶做餅，閣煏許個餅，
13:8 她瑪就去伊的兄哥暗嫩的厝；彼時暗嫩倒佇眠床。她瑪佇伊看會著的所在撋麵粉，烘餅。
13:9 就將煎盤傾佇伊的面前，暗嫩食，就講：「眾人著離開我出去！」眾人就離開伊，出去。
13:9 她瑪將歸盤的餅下佇暗嫩的面前，毋拘伊毋食。暗嫩叫所有的人攏出去，𪜶就出去。
13:10 暗嫩給他瑪講：「你捧食物入睏房，我通對你的手接來食。」他瑪就捧所做的餅入睏房，到伊的兄暗嫩遐，
13:10 伊給她瑪講：「你捧餅入來房間，親手提互我食。」她瑪就捧許個餅入去房間互伊的兄哥暗嫩。
13:11 伊捧去互伊食，伊就搝伊，給伊講：「我的小妹啊，你來及我相及睏。」
13:11 伊捧去互暗嫩食的時，暗嫩給扭啲，講：「小妹啊，來及我睏。」
13:12 伊給伊講：「我的兄，通莫得凌辱我。因為佇以色列中應該按呢行，你莫得做此個戇事；
13:12 伊應講：「我的兄哥，毋通，毋通給我侮辱。佇以色列無應該做此款代誌。你毋通做此款見笑事。
13:13 也我，我欲怎樣洗我的見誚？也你，你佇以色列做戇人的一個。今請你對王講，伊無欲禁止我嫁互你。」
13:13 我，我欲按怎洗我的見笑？你，你佇以色列中會成做邪惡的戇人。我求你給王講，伊𣍐阻止我嫁互你。」
13:14 總是暗嫩肯聽伊的話，因為伊比伊卡有力，就凌辱伊，及伊相及睏。
13:14 總是暗嫩毋肯聽伊的話；暗嫩比伊較有力，就給伊強暴。
13:15 以後，暗嫩極其怨恨伊，彼個怨恨伊的怨恨比前疼伊的疼閣卡大，暗嫩就給伊講：「起來，去啊！」
13:15 了後，暗嫩厭惡她瑪；彼個厭惡的程度，比以前對伊的愛閣較大。暗嫩給伊講：「起來，出去！」
13:16 伊給伊講：「通按呢！你趕我出去的害著我比你前款待我的卡殄！」總是暗嫩肯聽伊，
13:16 伊給暗嫩講：「毋通按呢，你給我趕出去比給我侮辱閣較邪惡。」
毋拘暗嫩毋聽，
13:17 就叫彼個伺候伊的奴僕，講：「著趕此個查某囝仔對我遮出去！伊出去，門就著閂。」
13:17 叫侍候伊的僕人來，給伊講：「給此個查某囝仔趕出去；伊出去了後，給門閂起來。」
13:18 彼時他瑪穿彩色的衫，因為王的查某子，猶未出嫁的攏穿此號衫。暗嫩的奴僕就牽伊出去，出去了，門就閂啲。
13:18 暗嫩的奴僕就給伊拖出去；出去了，門就閂啲。
彼時她瑪穿彩色的衫，因為王猶未出嫁的查某子攏穿此款衫。
13:19 他瑪摻火灰佇頭殼，拆裂所穿彩色的衫，用手抱頭殼來行，愈行愈哮。
13:19 她瑪糝火灰佇頭殼，拆裂所穿彩色的衫，用手𢯾頭殼，那行那哮。
13:20 伊的兄押沙龍問伊講：「你的兄暗嫩曾及你做堆嗎？我的小妹啊，今無做聲，伊是你的兄，莫得掛意此個事。」他瑪就單身𫢶佇伊的兄押沙龍的厝。
13:20 伊的親兄哥押沙龍問伊講：「你的兄哥暗嫩給你侮辱是無？小妹啊，此陣你著恬恬，伊是你的兄哥，毋免為著此個事心艱苦。」她瑪就孤單傷心住佇伊的兄哥押沙龍的厝。
13:21 大衛王聽見諸個事，就不止受氣。
13:21 大闢王聽著諸個事，非常受氣，毋拘無給暗嫩責備，因為伊是大子，大闢真給寵倖。
13:22 押沙龍無及暗嫩講好講歹；因為押沙龍怨恨暗嫩，是伊有凌辱伊的小妹他瑪。
13:22 押沙龍因為暗嫩侮辱伊的小妹她瑪，就怨恨暗嫩，無及伊講話。
押沙龍為小妹報仇
13:23 過二年，押沙龍佇近以法蓮的巴力‧夏瑣有人給伊剪羊毛；押沙龍請王的眾子攏總去。
押沙龍為小妹報仇
13:23 兩年後，押沙龍佇以法蓮附近的巴力‧夏瑣，倩人給伊剪羊毛。伊請王所有的子攏去。
13:24 押沙龍來見王，講：「今你的奴僕有用人啲剪羊毛，請王及王的人臣及奴僕相及去。」
13:24 押沙龍來見王，講：「你的僕人有倩人啲剪羊毛，請王及你的人臣，及你的僕人做夥來慶祝。」
13:25 王給押沙龍講：「我的子啊，通，阮通攏去，驚了你開費甚傷重。」押沙龍迫伊，總是伊去，干單給伊祝福。
13:25 王給押沙龍講：「我的子啊，毋通，阮毋通攏去，才免你開費傷傷重。」押沙龍再三邀請，王毋去，干焦給伊祝福。
13:26 押沙龍講：「若無，就互我的兄暗嫩及阮去。」王講：「啥事著伊及你去啊？」
13:26 押沙龍講：「若無，就互我的兄哥暗嫩及阮去。」
王講：「是按怎著愛伊及你去？」
13:27 押沙龍迫伊，王就允准暗嫩及王的眾子相及去。
13:27 押沙龍再三請求。王就允准暗嫩及王所有的子攏去。
13:28 押沙龍吩咐伊的奴僕講：「恁著注意，看暗嫩飲酒得解的時，我給恁講拍暗嫩，恁就著刣死伊，莫得驚。這豈是我吩咐恁的嗎？恁做恁好膽勇敢！」
13:28 押沙龍吩咐伊的部下講：「恁著注意，看暗嫩飲酒飲甲真爽快的時，我一下下令刣暗嫩，恁就給伊刣死。毋免驚；一切的後果我負責。恁著好膽勇敢去做。」
13:29 押沙龍的奴僕就照押沙龍所吩咐的，來行佇暗嫩。王的眾子攏絔起來，逐人騎伊的驢，逃走。
13:29 押沙龍的部下照押沙龍的命令刣暗嫩；王的子兒攏𬦰起來，騎家己的騾逃走。
13:30 𪜶猶佇路裡，有風聲傳到大衛，講：「押沙龍有刣死王的眾子，無留一個。」
13:30 𪜶猶佇路裡，就有風聲傳到大闢，講：「押沙龍刣死王所有的子，無留甲半個。」
13:31 王就起來，拆裂衫，倒佇地裡。王的人臣也拆裂衫，徛佇伊的身邊。
13:31 王就起來拆裂衫，倒佇土腳；王的人臣嘛拆裂衫，徛佇伊的身邊。
13:32 大衛的兄示米亞的子約拿達應講：「我的主，莫得拍算王的眾子──許個少年人攏互伊刣死，只有暗嫩死若定。因為對暗嫩凌辱伊的小妹他瑪彼日，押沙龍就已經有此個意思。
13:32 大闢的兄哥示米亞的子約拿達給王講：「我的主，毋通想講王的子攏互押沙龍刣死；死的干焦暗嫩若定，因為對暗嫩侮辱伊的小妹她瑪彼日起，伊就已經有此個意思。
13:33 今我的主我的王，莫得掛意此個事，拍算王的眾子攏死，其實只有暗嫩死若定。」
13:33 今我的主我的王，毋免為著王的子攏死此個風聲心艱苦。其實只有暗嫩死若定。」
13:34 押沙龍就逃走。
守望的少年人攑目看，看見多多百姓對伊的後面對山邊的路來。
13:34 彼時押沙龍已經逃走。
守望的人攑頭看，看著一大陣人對後面山坡的路落來。
13:35 約拿達給王講：「看啊，王的眾子攏來啦，果然照你的奴僕所講的。」
13:35 約拿達給王講：「你看，王的子攏轉來啦，抵照你的僕人所講的。」
13:36 話抵仔講息，王許個子就到，開聲啼哭；王及人臣也攏大啼哭到極。
13:36 話抵仔講煞，王許個子就到，開聲啼哭；王及人臣嘛攏大聲啼哭。
13:37 押沙龍走到基述王亞米忽的子達買遐。大衛日日為著伊的子悲哀。
13:37 押沙龍走去亞米忽的子基述王達買遐。大闢逐日為著伊的子傷心。
13:38 押沙龍走到基述，𫢶遐三年。
13:38 押沙龍走去基述，住遐三年。
13:39 大衛王的心切切數念押沙龍，因為暗嫩已經死，就受安慰。
13:39 對暗嫩的死，大闢王無閣赫呢悲傷，就無閣對押沙龍受氣。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。