上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
伊施波設受刣
4:1 掃羅的子聽見押尼珥死佇希伯崙，手就軟落去；以色列眾人也攏愣愣。
伊施波設受暗殺
4:1 掃羅的子伊施‧波設聽著押尼珥死佇希伯崙，就驚惶失膽。以色列眾人嘛驚甲毋知欲按怎。
4:2 掃羅的子有二個隊長，一個名巴拿，一個名利甲，是便雅憫支派、比錄人臨門的子。因為比錄也屬佇便雅憫。
4:2 伊施‧波設有兩個官長，巴拿及利甲，是便雅憫支族比錄人臨門的子。
4:3 比錄人早前走到基他音，出外佇遐，到今仔日。
4:3 比錄人早前走到基他音，徛起佇遐，到今仔日。
4:4 掃羅的子約拿單有一個子二腳攏跛，名叫米非波設。當掃羅及約拿單的消息對耶斯列傳來的時，伊抵仔五歲。伊的奶母抱伊走；因為走真緊，囝仔跋落來，就致跛腳。
4:4 掃羅的子約拿單有一個子兩腳攏跛，叫做米非波設。掃羅及約拿單死的消息對耶斯列傳來的時，伊抵仔五歲；伊的奶母給伊抱啲走；因為走真緊，囝仔跋落去，腳才跛。
4:5 比錄人臨門的子利甲及巴拿出去，約略日燒烙的時到伊施波設的厝；伊佇中晝抵仔啲睏。
4:5 比錄人臨門的子利甲及巴拿出去，差不多日中晝的時來伊施‧波設的厝。伊抵仔啲睏中晝。
4:6 𪜶入厝內，假影欲扒麥，就刺透伊施波設的腹肚，利甲及伊的兄弟巴拿就逃走。
4:6 𪜶入去厝內假影欲扒麥仔，就對伊施‧波設的腹肚揬落去；利甲及伊的兄弟巴拿就逃走。
4:7 𪜶入房內的時，伊施波設抵仔佇房內倒佇床裡啲睏，𪜶就拍伊刣死伊，割伊的頭殼，帶伊去，對亞拉巴的路透暝行，
4:7 𪜶入房內的時，伊施‧波設抵仔佇房間倒佇眠床啲睏；𪜶就給伊刣死，割伊的頭殼，給頭捾啲，向亞拉巴的方向透暝逃走。
4:8 𪜶帶伊施波設的頭殼到希伯崙大衛遐，給王講：「你的對敵掃羅曾數想你的生命的。看啊，這是伊的子伊施波設的頭殼；耶和華今仔日為著我的主我的王報仇佇掃羅及伊的後裔。」
4:8 𪜶帶伊施‧波設的頭殼去希伯崙 大闢遐，對王講：「請看！這是掃羅的子伊施‧波設的頭；你的對敵掃羅曾數想你的性命。上主今仔日已經有為著我的主我的王對掃羅及伊的後代報仇。」
4:9 大衛應比錄人臨門的子利甲及伊的兄弟巴拿給伊講：「耶和華救贖我的生命、脫離攏總的苦難，我指伊的永活來咒誓：
4:9 大闢應比錄人臨門的子利甲及伊的兄弟巴拿，講：「上主救贖我的性命脫離所有的苦難，我指永活的上主咒誓；
4:10 前有人報我講，掃羅已經死，伊家己掠做是報好消息；我就掠伊，佇洗革拉給伊刣死，這是我互伊做傳消息的報賞。
4:10 以前有人來洗革拉報我講：『掃羅已經死。』伊家己掠做是報好消息，毋拘我無給伊獎勵，顛倒給伊掠起來，刣死。
4:11 何況歹人入義人的厝刣伊佇眠床裡，我豈無欲對恁的手討伊的血、除滅恁佇地上嗎？」
4:11 何況恁諸個歹人！恁趁無辜的人啲睏的時，入去厝內給伊刣死，我豈無欲對恁的手討恁流伊的血的罪，對地上給恁除滅？」
4:12 大衛命令伊的少年人，𪜶就刣死𪜶，斬斷𪜶的腳手，吊佇希伯崙的池邊，也將伊施波設的頭殼埋葬佇希伯崙押尼珥的墓。
4:12 大闢命令部下給𪜶刣死，斬斷𪜶的腳手，給𪜶的屍體吊佇希伯崙的水池邊，然後將伊施‧波設的頭殼埋葬佇希伯崙 押尼珥的墓。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。