上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
3:1 掃羅的家及大衛的家交戰久久。大衛愈強盛；掃羅的家愈衰弱。
3:1 掃羅的家及大闢的家交戰真久；大闢愈強盛，掃羅的家愈衰微。
大衛的眾子
3:2 大衛佇希伯崙生幾若個子：大子暗嫩是耶斯列人亞希暖所生的；
大闢佇希伯崙生的子
3:2 大闢佇希伯崙生六個子：大子暗嫩，是耶斯列人亞希暖生的；
3:3 第二個基利押是曾做迦密人拿八的某亞比該所生的；第三個押沙龍是基述王達買的查某子瑪迦的子；
3:3 第二個基利押，是迦密人拿霸的遺孀愛比該生的；第三個押沙龍，是基述王達買的查某子瑪迦生的；
3:4 第四個亞多尼雅是哈及的子；第五個示法提雅是亞比他的子；
3:4 第四個亞多尼雅，是哈及生的；第五個示法提雅，是亞比她生的；
3:5 第六個以特念是大衛的某以格拉所生的。諸個是大衛佇希伯崙所生的。
3:5 第六個以特念，是大闢的某以格拉生的。諸個是大闢佇希伯崙所生的子。
押尼珥歸順大衛
3:6 掃羅的家及大衛的家交戰的時，押尼珥佇掃羅的家家己強。
押尼珥投靠大闢
3:6 掃羅的家及大闢的家繼續啲交戰，押尼珥佇掃羅的家掌握實權。
3:7 掃羅有一個妃，名叫利斯巴，是愛亞的查某子。伊施波設對押尼珥講：「你啥事及我老父的妃同房啊？」
3:7 掃羅有一個妃，名叫利斯巴，是愛亞的查某子。伊施‧波設對押尼珥講：「你哪及我老父的妃做夥睏？」
3:8 押尼珥因為伊施波設的話就真受氣，講：「我豈是猶大的狗頭嗎？我好款待你的老父掃羅的家及伊的兄弟、朋友，無將你交佇大衛的手，你今仔日竟然因為此個婦仁人責備我嗎？
3:8 押尼珥因為伊施‧波設的話就真受氣，講：「你看我做猶大家的狗仔頭是無？我忠誠對待恁老父掃羅的家，及伊的兄弟、伊的朋友，無將你交佇大闢的手，你今仔日竟然因為此個婦仁人責備我。
3:9 我若無照耶和華所對大衛咒誓的來行佇伊，就願上帝加倍責罰押尼珥，
3:9 我若無照上主所立誓對大闢的應允來做，廢除掃羅家的王位，建立大闢的王權，互伊治理以色列及猶大，對但到別是巴，願上帝加倍責罰我押尼珥。」
3:10 欲對掃羅的家移徙國位，來建立大衛的位，互伊治理以色列及猶大，對但到別是巴。」
3:10 併於上節
3:11 伊施波設因為驚押尼珥，𣍐應一句話。
3:11 伊施‧波設因為驚押尼珥，連一句話都毋敢應。
3:12 押尼珥為著本身差使者去見大衛，講：「此個地方屬是誰啊？」閣講：「你及我立約，我的手欲幫助你，互以色列攏歸你。」
3:12 押尼珥差使者代表伊去見大闢，講：「此個國什麼人啲統治？」閣講：「你及我立約，我欲幫贊你，互全以色列攏歸順你。」
3:13 大衛講：「好！我及你立約。總是我欲對你討一項，就是你來見我的面彼時，若無將掃羅的查某子米甲導來，的確𣍐見我的面。」
3:13 大闢講：「好，我及你立約。毋拘我有一個要求，你來見我的時，著將掃羅的查某子米甲導來；若無，一定𣍐當見我的面。」
3:14 大衛就差使者去見掃羅的子伊施波設，講：「你著將我的某米甲還我；伊就是我曾用非利士人一百陽物的皮所聘定的。」
3:14 大闢就差使者去見掃羅的子伊施‧波設，講：「著將我的某米甲還我，伊是我用一百個非利士人的包皮做聘金娶來的。」
3:15 伊施波設就差人，對伊的丈夫、拉億的子帕鐵遐帶伊來。
3:15 伊施‧波設就派人對米甲的丈夫，拉億的子帕鐵遐導米甲來。
3:16 伊的丈夫隨伊的後面，愈行愈哮，及伊到巴戶琳。押尼珥給伊講：「倒去啊！」伊就倒去。
3:16 伊的丈夫隨佇伊的後面，那行那哮，到巴戶琳。押尼珥對帕鐵講：「倒去啦。」伊就倒去。
3:17 押尼珥及以色列的長老參詳講：「恁前欣慕大衛做王治理恁，
3:17 押尼珥及以色列的長老參詳，講：「恁早就愛大闢作王給恁治理，
3:18 今著行伊。因為耶和華曾論到大衛講：『我欲用我的奴僕大衛的手，救我的百姓以色列脫離非利士人的手及眾對敵的手。』」
3:18 今著採取行動。因為上主有應允講：『我欲用我的僕人大闢的手，救我的子民以色列脫離非利士人及所有對敵的手。』」
3:19 押尼珥也講互便雅憫人聽，閣到希伯崙，將以色列人及便雅憫全家一切所看做好的講互大衛聽。
3:19 押尼珥嘛將諸個話講互便雅憫人聽。後來伊去希伯崙，將以色列人及便雅憫全家共同的決定，講互大闢聽。
3:20 押尼珥及二十人到希伯崙見大衛，大衛為著押尼珥以及及伊來的人設筵席。
3:20 押尼珥導二十個人來希伯崙見大闢。大闢設宴席歡迎𪜶。
3:21 押尼珥給大衛講：「我欲起來去招集以色列眾人來見我的主我的王，互𪜶通及你立約，你就通做王照心所愛來管理。」大衛就送押尼珥去；伊就平安去。
3:21 押尼珥給大闢講：「我欲去招集全以色列來見我的主我的王，互𪜶及你立約，你就會當作王，照你的心願治理全國。」大闢就送押尼珥，互伊平安離開。
押尼珥受刣
3:22 大衛的兵及約押出軍倒來，帶多多搶的物來。彼時押尼珥無佇希伯崙大衛遐，因為大衛已經送伊去，伊也平安去。
約押刣死押尼珥
3:22 彼時，大闢的兵隨約押出戰倒來，帶真多戰利品。押尼珥已經無佇希伯崙 大闢遐，因為大闢有送伊平安離開。
3:23 約押及隨伊的全軍已經到，有人通知約押講：「尼珥的子押尼珥來見王，王送伊去，伊也平安去。」
3:23 約押及隨伊的全軍已經到，有人給約押講：「尼珥的子押尼珥有來見王，王嘛送伊平安離開。」
3:24 約押去見王講：「你做甚麼啊？看啊，押尼珥來見你，你啥事送伊去，今伊去了啦！
3:24 約押去見王講：「你哪按呢做？押尼珥來見你，你哪放伊去，互伊離開？
3:25 你知，尼珥的子押尼珥來是欲騙你，愛知你的出及你的入及你一切所做的事。」
3:25 你知尼珥的子押尼珥來是欲騙你，愛知你的動靜，及你一切所做的代誌。」
3:26 約押對大衛遐出來，就差使者去趇押尼珥，𪜶就對西拉的井帶伊來，總是大衛知。
3:26 約押對大闢遐出來，就派人去趇押尼珥。𪜶就對西拉的井給伊帶來；毋拘大闢毋知。
3:27 押尼珥倒轉來到希伯崙，約押導伊到城門口，假欲暗靜及伊講話，就佇遐鑿透伊的腹肚，伊就死。這是為著伊的小弟亞撒黑互伊刣死。
3:27 押尼珥轉來到希伯崙的時，約押導伊到城門內的城牆邊，假欲私下及伊講話，就對伊的腹肚揬落去，伊就死。這是因為伊有刣死約押的小弟亞撒黑。
3:28 後來大衛聽見，就講：「留尼珥的子押尼珥的血，此個罪佇耶和華的面前的確永遠無歸佇我及我的國。
3:28 後來大闢聽著，就講：「流尼珥的子押尼珥的血此個罪，及我以及我的國無關係，阮佇上主的面前是無辜的。
3:29 願彼個歸佇約押的頭殼及伊的老父全家；閣願約押的家患著下痟的，癩𰣻的，抑是倚柺仔的，互刀刣死的，無通食的永無斷。」
3:29 願彼個罪約押及𪜶老父全家家己擔；閣願約押的家不斷有人致著下消抑是痲瘋，有人無攑柺仔𣍐當行路，有人互刀刣死，抑是無通食。」
3:30 約押及伊的小弟亞比篩刣死押尼珥，是因為伊佇基遍交戰的時刣死𪜶的小弟亞撒黑。
3:30 約押及伊的小弟亞比篩刣死押尼珥，是因為押尼珥佇基遍及𪜶交戰的時，刣死𪜶的兄弟亞撒黑。
安葬押尼珥
3:31 大衛給約押及隨伊的眾百姓講：「恁著拆裂衫，縖麻布，佇押尼珥面前啼哭。」大衛王也隨佇伊的棺柴後。
埋葬押尼珥
3:31 大闢命令約押及隨伊的人講：「恁著拆裂衫，穿麻衫，為著押尼珥啼哭。」大闢王嘛隨佇棺材後面。
3:32 𪜶埋葬押尼珥佇希伯崙。王倚押尼珥的墓來啼哭，眾百姓也啼哭。
3:32 𪜶給押尼珥埋葬佇希伯崙。王倚押尼珥的墓啼哭，眾人嘛啼哭。
3:33 王為著押尼珥悲哀，講：
押尼珥怎樣親像戇人的死啊？
3:33 王為著押尼珥唱哀歌，講：
「押尼珥哪會親像戇人按呢死？
3:34 你的手無捆縛，你的腳無鎖鍊。
你死，親像人死佇歹人的面前。
對按呢眾百姓閣為著伊哀哭。
3:34 你的手無受捆縛，你的腳無銬鎖鍊；
你竟然死佇歹人的手頭。」
眾人閣為著押尼珥哀哭。
3:35 日未落的時，眾百姓來勸大衛食餅，總是大衛咒誓講：「我若佇日未落的代先食淡薄餅，抑是食別項物，願上帝加倍責罰我！」
3:35 日頭猶未落山以前，眾人來勸大闢食飯，毋拘大闢咒誓講：「我若佇日落以前食飯抑是食別項物件，願上帝加倍責罰我。」
3:36 眾百姓注意看，攏看做好。親像王凡所做的，眾百姓攏看做好。
3:36 眾人知影此個代誌，攏感覺真好；王所做的，眾人攏看做好。
3:37 彼日，眾百姓及以色列眾人才知刣死尼珥的子押尼珥攏是出佇王的意思。
3:37 彼日，跟隨大闢的人及所有以色列人才知，刣死尼珥的子押尼珥毋是出佇王的意思。
3:38 王給伊的人臣講：「恁豈知今仔日佇以色列中死一個豪傑的大偉人嗎？
3:38 王對伊的部下講：「恁豈毋知今仔日佇以色列中，死一個偉大的將領？
3:39 我雖然受抹油做王，今仔日猶是軟弱；洗魯雅的子諸個人比我卡強。行歹的人願耶和華照伊的歹報應伊。」
3:39 我雖然受抹油選立作王，毋拘今仔日猶無夠力；洗璐雅許個子比我較強。願上主照歹人所做的歹報應𪜶。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。