上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛受抹油做猶大王
2:1 後來，大衛問耶和華講：「我上去猶大一個城通嗎？」耶和華給伊講：「通上去。」大衛講：「我著上去叨落？」伊講：「到希伯崙。」
大闢受抹油做猶大王
2:1 後來，大闢問上主講：「我上去猶大的一個城好無？」
上主給伊講：「好，通去。」
大闢講：「我著上去叨一個城？」
上主講：「去希伯崙。」
2:2 大衛就及伊二個某──就是耶斯列人亞希暖，及迦密人曾做拿八的某名亞比該──攏上去遐。
2:2 大闢就及伊兩個某，就是耶斯列人亞希暖及迦密人拿霸的遺孀愛比該，攏上去遐。
2:3 大衛也互跟隨伊的人及𪜶逐人的家眷攏上去，𪜶就𫢶佇希伯崙許個城。
2:3 大闢嘛導跟隨伊的人及𪜶的家眷做夥上去；𪜶就住佇希伯崙許個城。
2:4 猶大人到，佇遐用油抹大衛做猶大家的王。
有人給大衛講：「埋葬掃羅的是基列‧雅比的人。」
2:4 猶大人來遐，用油抹大闢做猶大家的王。
有人給大闢講，埋葬掃羅的是基列的雅比人。
2:5 大衛就差使者去見基列‧雅比的人，給𪜶講：「願耶和華賜福恁！因為恁用此個仁慈款待你的主──掃羅；給伊埋葬。
2:5 大闢就差使者去見基列的雅比人，給𪜶講：「願上主賜福恁，因為恁有用忠誠對待恁的主掃羅，給伊埋葬。
2:6 願耶和華用仁慈誠實款待恁，我也欲答恁此個仁慈，因為恁有行此個事。
2:6 願上主用仁慈誠實款待恁；我嘛欲答謝恁，因為恁有做此個代誌。
2:7 恁的手著嚴硬，恁著勇敢，因為恁的主──掃羅已經死。猶大族也有用油抹我做𪜶的王。」
2:7 恁著堅強勇敢，因為恁的主掃羅已經死。今，猶大家嘛已經用油抹我做𪜶的王。」
伊施波設做以色列王
2:8 掃羅的軍長尼珥的子押尼珥，曾將掃羅的子伊施波設帶伊過去瑪哈念，
伊施波設做以色列的王
2:8 掃羅的元帥，尼珥的子押尼珥，導掃羅的子伊施‧波設過去瑪哈念，
2:9 設立伊做王，治理基列、亞書利、耶斯列、以法蓮、便雅憫，及以色列的眾人。
2:9 設立伊作王治理基列、亞設、耶斯列、以法蓮、便雅憫，及所有的以色列人。
2:10 掃羅的子伊施波設起頭做以色列王，彼時四十歲，坐位二年；獨獨猶大族隨大衛。
2:10 掃羅的子伊施‧波設四十歲做以色列王，坐位兩年。毋拘，猶大家隨大闢。
2:11 大衛佇希伯崙做猶大族的王，歷過七年閣六月日。
2:11 大闢佇希伯崙做猶大家的王，總共七年六個月。
掃羅家及大衛家交戰
2:12 尼珥的子押尼珥及掃羅的子伊施波設的人臣對瑪哈念出來，去基遍。
掃羅家及大闢家的戰爭
2:12 尼珥的子押尼珥及掃羅的子伊施‧波設的人臣，對瑪哈念去基遍。
2:13 洗魯雅的子約押及大衛的人臣也出來，佇基遍的池邊相抵著；𪜶就坐啲，一隊坐佇池的此旁，一隊坐佇池的彼旁。
2:13 洗璐雅的子約押及大闢的人臣嘛出去，及𪜶佇基遍的水池邊相抵；一隊坐佇水池的此旁，一隊坐佇水池的彼旁。
2:14 押尼珥對約押講：「請你互少年人起來，佇咱的面前滾笑。」約押講：「通互伊起來。」
2:14 押尼珥對約押講：「咱來叫少年人佇咱的面前決鬥。」
約押講：「好，互𪜶出來。」
2:15 𪜶就起來照數額過去：屬掃羅的子伊施波設的便雅憫人十二名，大衛的人臣也有十二名，
2:15 𪜶就點人數，派少年人過去；屬掃羅的子伊施‧波設的便雅憫人十二名，大闢的部下嘛十二名。
2:16 逐個搝伊對面彼人的頭殼，用刀鑿伊對面彼人的脇，做一下倒落去死。所以，彼所在叫做希利甲‧哈素林，就是佇基遍。
2:16 𪜶逐個扭對方的頭殼，用刀揬入對方的脇下；按呢，二十四個做一下倒落去，攏死。所以，基遍彼個所在叫做希利甲‧哈素林。
2:17 彼日的交戰真雄，押尼珥及以色列人卡輸佇大衛的兵的面前。
2:17 彼日的交戰真劇烈；押尼珥及以色列人互大闢的部下拍敗。
2:18 佇遐有洗魯雅三個子：約押、亞比篩、亞撒黑。亞撒黑的腳𠢕走親像野鹿一般；
2:18 佇遐有洗璐雅三個子，約押、亞比篩、亞撒黑；亞撒黑親像野鹿赫呢𠢕走。
2:19 亞撒黑追趇押尼珥無偏左右，直直趇押尼珥。
2:19 亞撒黑追趇押尼珥；直直趇，無偏左，無偏右。
2:20 押尼珥越頭看講：「亞撒黑啊，是你抑是？」應講：「是我。」
2:20 押尼珥越頭看，講：「亞撒黑啊，是你抑毋是？」
應講：「著！」
2:21 押尼珥給伊講：「你著越轉正旁抑是倒旁，掠一個少年人，為你本身剝伊的戰衫。」總是亞撒黑直直追伊，肯越轉。
2:21 押尼珥給伊講：「你斡去別位，掠一個少年人，剝伊的軍服。」毋拘亞撒黑直直給追，毋肯越走。
2:22 押尼珥閣給亞撒黑講：「你越轉莫得追趇我！我啥事著拍你倒地？若按呢，我有甚麼面目通去見你的兄約押？」
2:22 押尼珥閣給伊講：「你越走毋通趇我。我哪著給你刣死？若給你刣死，我哪有面通見恁兄哥約押？」
2:23 伊猶原肯越轉。押尼珥才用槍柄後的刀鑿入伊的腹肚，槍就𥦁過伊的尻脊後，伊就倒佇遐死。見若來到亞撒黑倒啲死的所在，就攏停腳。
2:23 亞撒黑毋肯越走；押尼珥就用槍倒插伊的腹肚，槍迵過伊的尻脊骿，伊就倒落去，死佇遐。所有來到亞撒黑死的所在的人，攏停落來徛佇遐。
2:24 約押及亞比篩追趇押尼珥；𪜶到基亞相對面的亞瑪山，佇基遍曠野的路，日就落。
2:24 約押及亞比篩追押尼珥。日落的時，𪜶趇到迵基遍曠野的路邊，基亞對面的亞瑪山。
2:25 便雅憫人聚集，隨押尼珥做一陣徛佇山頂。
2:25 便雅憫人聚集隨押尼珥，成做一陣，徛佇山頂。
2:26 押尼珥叫約押講：「刀劍刣人永無息嗎？你豈知到尾有艱苦嗎？你欲到甚麼時互百姓倒去、無趇𪜶的兄弟啊？」
2:26 押尼珥叫約押講：「咱豈通永遠刣𣍐煞？你豈毋知結局會真痛苦？你到底時才欲互跟隨你的人倒去，無閣趇𪜶的兄弟？」
2:27 約押講：「我指永活的上帝來咒誓：若是你講，早起百姓就倒去，無趇伊的兄弟。」
2:27 約押講：「我指永活的上帝咒誓，若毋是你按呢講，我的部下就會趇𪜶的兄弟到天光。」
2:28 對按呢約押歕哨角，眾百姓就徛啲，無閣追趇以色列人，也無閣交戰。
2:28 對按呢，約押歕哨角，跟隨的人就停啲，無閣追趇以色列人，嘛無閣交戰。
2:29 押尼珥及隨伊的人通暝行經過亞拉巴，過約但，對畢倫過去，到瑪哈念。
2:29 押尼珥及隨伊的人歸暝行軍，行過亞拉巴，過約旦河，行歸早起才到瑪哈念。
2:30 約押無閣趇押尼珥就倒來，聚集眾百姓，大衛的兵減十九人及亞撒黑。
2:30 約押無閣趇押尼珥，就倒來，聚集所有隨伊的人。亞撒黑以外，大闢的兵減十九人。
2:31 總是大衛的兵拍死便雅憫人及隨押尼珥的人，共三百六十人。
2:31 毋拘大闢的兵拍死便雅憫人及隨押尼珥的人，總共三百六十人。
2:32 𪜶扛亞撒黑去伯利恆，埋葬佇𪜶老父的墓。約押及隨伊的人通暝行，到希伯崙的時天抵仔光。
2:32 𪜶扛亞撒黑去伯利恆，給伊埋葬佇𪜶老父的墓。約押及隨伊的人歸暝行軍，到希伯崙的時，天抵仔光。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。