上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛聽著掃羅的消息
1:1 掃羅死了，也大衛刣死亞瑪力人倒來的時，大衛住佇洗革拉二日。
大闢為著掃羅及約拿單哀傷
1:1 掃羅死了後，大闢刣贏亞瑪力人倒來，佇洗革拉住兩日。
1:2 到第三日，看啊，有一人對營盤對掃羅遐來，衣裳拆裂，頭殼摻土粉，到大衛遐就仆佇地裡拜伊。
1:2 第三日，忽然有一個人對掃羅的軍營來，衫拆破，頭殼糝土粉，到大闢遐，仆佇土腳拜伊。
1:3 大衛問伊講：「你對叨落來？」伊應講：「我對以色列的軍營走來。」
1:3 大闢問伊講：「你對叨位來？」
伊應講：「我對以色列的軍營逃走來。」
1:4 大衛閣問伊講：「代誌怎樣？請你給我講。」伊應講：「百姓對戰陣逃走，百姓多多倒啲死去；掃羅及伊的子約拿單也死。」
1:4 大闢閣問伊：「代誌按怎？緊給我講。」
伊應講：「軍隊對戰場刣輸逃走，真多人戰死，連掃羅及伊的子約拿單嘛死。」
1:5 大衛給對伊講的少年人講：「你怎樣知掃羅及伊的子約拿單死啊？」
1:5 大闢給彼個少年人講：「你按怎知掃羅及伊的子約拿單已經死？」
1:6 給伊講的少年人講：「我偶然到基利波山，看見掃羅倚佇伊的槍，有戰車、馬兵趇倚伊。
1:6 給伊報告的少年人講：「我抵好去基利波山，看著掃羅倚佇伊的槍，有戰車馬兵趇倚伊。
1:7 伊越頭看我，就叫我。我應講：『我佇遮。』
1:7 伊越頭看著我，就叫我；我應講：『我佇遮。』
1:8 伊問我講：『你是甚麼人？』我應講：『我是亞瑪力人。』
1:8 伊問我：『你是什麼人？』我應講：『我是亞瑪力人。』
1:9 伊閣給我講：『請你近倚我，來刣死我；因為我真痛苦，我的生命猶好好。』
1:9 伊閣給我講：『請來我邊仔給我刣死。我猶活啲，毋拘真痛苦。』
1:10 我就近倚伊，來刣死伊，因為我知伊倒落去了的確𣍐活，我就提伊頭殼裡的冕旒、及伊的手環帶到我的主遮。」
1:10 我就倚去，給伊刣死，因為我知伊倒落去，一定𣍐活；我就提伊頭殼的王冠及伊的手環，帶來我的主遮。」
1:11 大衛就拆裂衫，跟隨伊的人也是按呢，
1:11 大闢就拆裂衫，跟隨伊的人嘛按呢。
1:12 為著掃羅及伊的子約拿單，及耶和華的百姓及以色列家，悲哀啼哭，禁食到日暗，因為𪜶倒佇刀下。
1:12 𪜶為著掃羅及伊的子約拿單、上主的子民及以色列家，悲哀啼哭，禁食到日暗，因為𪜶攏死佇刀下。
1:13 大衛給對伊講的少年人講：「你對叨落來？」應講：「我是出外人的子亞瑪力人。」
1:13 大闢給對伊報告的少年人問講：「你是叨位的人？」
應講：「我是出外人的子，亞瑪力人。」
1:14 大衛對伊講：「你伸手刣死耶和華所抹油者，怎樣無驚啊？」
1:14 大闢對伊講：「你親手刣死上主選立的王，哪𣍐驚？」
1:15 大衛叫一個少年人，講：「你近倚去刣死伊。」伊就去拍互伊死。
1:15 大闢叫一個少年人，講：「來，去給刣死。」伊就去給彼個亞瑪力人刣死。
1:16 大衛給伊講：「你的血歸佇你的頭殼，因為你的嘴家己干證你講：『我刣死耶和華所抹油者。』」
1:16 大闢給伊講：「這是你家己做得來的，因為你親嘴作證講：『我刣死上主選立的王。』」
大衛為掃羅及約拿單做哀歌
1:17 大衛做哀歌，追悼掃羅及伊的子約拿單，
大闢為掃羅及約拿單作哀歌
1:17 大闢作哀歌，追悼掃羅及伊的子約拿單。
1:18 閣講將此個哀歌教示猶大人。此個哀歌名叫「弓歌」，寫佇雅煞珥的冊。
1:18 伊命令人將此首叫做「弓歌」的詩教猶大人唱。此首詩有記載佇《雅煞珥記》：
1:19 歌講：以色列啊，
你的榮顯者受刣佇山頭！
嗐啊，英雄的死到按呢啊！
1:19 以色列啊，你的尊榮者受刣佇山頭；
大英雄竟然倒落去！
1:20 莫得佇迦特報告；
莫得佇亞實基倫的街路報揚；
驚了非利士的查某囝仔歡喜；
驚了無受割禮的人的查某囝仔大悅。
1:20 毋通佇迦特宣布，
毋通佇亞實基倫的街路報揚，
才免非利士的查某囝仔歡喜，
無受割禮的人的查某子快樂。
1:21 基利波山啊，願無露水無雨！
佇你遐也無出禮物的田！
因為佇遐勇士的盾牌受㧒擲；
掃羅的盾牌親像無受抹油的。
1:21 基利波山啊，
願你遐無雨，無露水，
土地拋荒無出產；
因為佇你遐勇士的盾牌受㧒确，
掃羅的盾牌無閣抹油。
1:22 對受刣者的血，對勇士的油，約拿單的弓無倒退；
掃羅的刀無空空倒轉。
1:22 約拿單的弓無𠲿著對敵的血𣍐收回；
掃羅的刀無食著勇士的油𣍐入鞘。
1:23 掃羅及約拿單──
活的時通疼，通歡喜的，死的時也無分離
──𪜶比鷹鳥卡緊，比獅卡強。
1:23 掃羅及約拿單人人意愛，受人敬重；
生無分開，死無相離。
𪜶比鷹鳥較緊，
比獅較強。
1:24 以色列的查某子啊，著為著掃羅啼哭！
伊曾互恁穿朱紅色來歡喜，
互恁的衣服有黃金的妝飾。
1:24 以色列的查某子啊，著為掃羅啼哭！
伊曾互恁穿朱紅色的媠衫，
互恁的衣服有黃金做妝飾。
1:25 勇士怎樣倒佇戰陣！
約拿單受刣佇你的山頭。
1:25 勇士竟然倒佇戰場！
約拿單受刣佇你的山頭！
1:26 我的兄約拿單啊，我為你傷心！
我盡在歡喜你！
你的疼我，真奇妙，
贏過婦仁人的疼。
1:26 我的兄弟約拿單啊，我為你哀傷；
你及我上親。
你對我的疼真奇妙，
贏過婦仁人的疼。
1:27 勇士死到按呢！
戰器毀滅到按呢！
1:27 勇士竟然倒落去！
武器嘛攏毀壞！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。