上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
掃羅及伊的子死
31:1 ( 代上 10:1-12 )
非利士人及以色列人交戰。以色列人佇非利士人的面前逃走，受傷來死倒佇基利波山。
掃羅及伊的子戰死
31:1 ( 代上 10:1-12 )
非利士人攻擊以色列人；以色列人戰敗逃走，佇基利波山死真多人。
31:2 非利士人趇倚掃羅及伊的子，非利士人就刣死掃羅的子約拿單、亞比拿達、麥基舒亞。
31:2 非利士人追趇掃羅及伊許個子，刣死掃羅三個子約拿單、亞比拿達，及麥基‧舒亞。
31:3 彼個交戰攻擊掃羅真傷重，射箭的人趇著伊，伊互射箭的人迫伊真慘，
31:3 掃羅受著猛烈的攻擊；伊互射箭的人發見，射著，受傷真傷重。
31:4 掃羅給攑伊的軍器的人講：「拔你的刀，給我鑿過去，驚了諸個無受割禮的人來鑿死我，來凌辱我。」攑伊的軍器的人無欲，因為伊真驚；掃羅就攑伊的刀扼佇彼頂面。
31:4 掃羅給替伊攑軍器的侍衛講：「拔刀給我鑿死，才免我互諸個無受割禮的人刣死，給我凌辱。」彼個侍衛毋敢，因為伊真驚。掃羅就向刀仆落去，家己鑿死。
31:5 攑伊的軍器的看見掃羅已經死，伊也扼佇刀裡及伊相及死。
31:5 彼個侍衛看著掃羅已經死，嘛仆落去，家己鑿，及掃羅做夥死。
31:6 掃羅及伊三個子，及攑伊的軍器的人，以及攏總隨伊的人，同一日做一下死。
31:6 掃羅及伊三個子，攑軍器的，及所有跟隨掃羅的人仝一日死。
31:7 對按呢佇山谷彼旁及佇約但河彼旁的以色列人，看見以色列人已經逃走，掃羅及伊許個子也攏死，就棄拺許個城逃走。非利士人續來𫢶遐徛起。
31:7 佇耶斯列山谷彼旁及佇約旦河東旁的以色列人，看著𪜶的軍隊已經逃走，掃羅及伊的子嘛攏戰死，就放城逃走。非利士人就來佔許個城，佇遐徛起。
31:8 隔日，非利士人來縛許個受刣死的人，尋著掃羅及伊三個子死佇基利波山，
31:8 隔日，非利士人來剝戰死的人的物件，看著掃羅及伊三個子死佇基利波山，
31:9 就割斷伊的頭殼，褪伊的戰甲，差人到非利士地的四境，遍傳佇許個偶像的廟及百姓的中間；
31:9 就斬伊的頭，褪伊的戰甲，派人去非利士逐所在，將此個消息報互𪜶廟裡的偶像及人民知。
31:10 閣將伊的戰甲下佇亞斯他錄的廟內，將伊的身屍釘佇伯‧珊的城牆頂。
31:10 𪜶將掃羅的戰甲下佇亞斯她錄的廟內，將伊的身屍釘佇伯‧善的城牆頂。
31:11 基列‧雅比徛起的百姓聽見非利士人所行佇掃羅的事，
31:11 基列的雅比的住民聽著非利士人對掃羅所做的代誌，
31:12 𪜶許個勇士攏起來，通暝行，將掃羅的身屍及伊許個子的身屍對伯‧珊的城牆取落來，帶到雅比，佇遐燒伊；
31:12 𪜶的勇士攏起來，歸暝行軍，去將掃羅及伊的子的身屍對伯‧善的城牆取落來，帶到雅比，佇遐火化，
31:13 將𪜶的骨埋葬佇雅比的垂絲柳樹腳，禁食七日。
31:13 將𪜶的骨骸葬佇雅比的柳樹腳，禁食七日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。