上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
及亞瑪力人交戰
30:1 第三日，大衛及隨伊的人到洗革拉。亞瑪力人已經侵犯南方及洗革拉，也拍洗革拉，用火燒伊，
及亞瑪力人交戰
30:1 第三日，大闢及伊的部下倒去洗革拉。𪜶到以前，亞瑪力人已經有侵犯猶大南方及洗革拉。亞瑪力人放火燒洗革拉，
30:2 掠城內的婦女無論大細，無刣死一個，干單掠伊去。
30:2 掠婦女及城內的人，無論大細，一個都無刣死，攏給𪜶掠去。
30:3 大衛及隨伊的人到彼個城，看見城已經互火燒去，𪜶的某子查某子攏互伊掠去。
30:3 大闢及伊的部下到彼個城，看著城已經燒去，𪜶的某、子、查某子，攏互人掠去。
30:4 大衛及隨伊的人就開聲哮，哮到無力通哮。
30:4 大闢及隨伊的人就開聲哮，哮甲無力通閣哮。
30:5 大衛二個某──耶斯列人亞希暖及曾做迦密人拿八的某亞比該，也互伊掠去。
30:5 大闢兩個某，就是耶斯列人亞希暖及拿霸的遺孀迦密人愛比該，嘛互亞瑪力人掠去。
30:6 大衛真著急，因為百姓講：「著用石頭擲伊。」是百姓人人為著𪜶的子查某子真煩惱，總是大衛倚靠耶和華──伊的上帝，家己堅固。
30:6 大闢非常著急，因為伊的部下為著𪜶的子、查某子苦痛慼心，講欲用石頭給伊抌死。毋拘大闢倚靠上主 — 伊的上帝得著氣力。
30:7 大衛給亞希米勒的子祭司亞比亞他講：「請你給我帶以弗得來。」亞比亞他就帶以弗得到大衛遐。
30:7 大闢給亞希米勒的子祭司亞比亞他講：「請你帶以弗得來。」亞比亞他就帶以弗得來互大闢。
30:8 大衛問耶和華講：「我趇此個軍隊，趇會著抑𣍐？」耶和華講：「你著趇伊，因為趇穩當著，也穩當救𪜶攏倒來。」
30:8 大闢問上主講：「我追趇許個匪徒，豈趇會著？」
上主應講：「去趇，一定會趇著，嘛一定會當救𪜶倒來。」
30:9 大衛就及隨伊的六百人來到比梭的溪；留啲的人歇佇遐。
30:9 大闢就導伊的部下六百人出發，來到比梭溪。有兩百個厭倦，行𣍐過比梭溪，就留佇遐。大闢及四百個部下繼續去追趇。
30:10 總是大衛及四百人去追趇，有二百人厭倦，𣍐會過比梭的溪，就留佇遐。
30:10 併於上節
30:11 𪜶佇田野抵著一個埃及人，就帶伊到大衛遐；用餅互伊，伊就食，用水互伊飲，
30:11 𪜶佇野外抵著一個埃及人，就帶伊去大闢遐；用餅互伊食，用水互伊飲；
30:12 閣互伊一塊無花果餅，二葩葡萄干。伊食了，精神復倒；因為伊三日三暝無食餅，無飲水。
30:12 閣互伊一粒無花果乾丸，兩粒葡萄乾丸；伊食了，元氣回復；因為伊三暝三日無食無飲。
30:13 大衛問伊講：「你屬是誰？對叨落來？」伊應講：「我是埃及的少年人，是亞瑪力人的奴僕；因為我三日前破病，我的主人就放拺我。
30:13 大闢問伊講：「你的主人是啥人？你對叨位來？」
伊應講：「我是埃及囝仔，是亞瑪力人的奴隸。我三日前破病，就互主人放拺。
30:14 阮侵犯基利提的南勢及屬猶大的地，及迦勒地的南勢，閣用火燒洗革拉。」
30:14 阮侵犯猶大南部的基利提及迦勒地區，閣用火燒洗革拉。」
30:15 大衛問伊講：「你會導我到彼個軍隊遐抑𣍐？」伊應講：「你著給我指上帝來咒誓，無刣死我，也無將我交佇我的主人的手，我就欲導你落去到彼個軍隊遐。」
30:15 大闢問伊講：「你豈肯導我去許個匪徒遐？」
伊應講：「你著指上帝對我咒誓，保證𣍐給我刣死，嘛𣍐將我交互我的主人，我就導你去。」
30:16 伊導伊落去的時，看見𪜶四散佇遍地，飲食跳舞，因為對非利士地及猶大地所搶的物真多。
30:16 伊導大闢落去的時，看著𪜶分散一四界啲飲食跳舞；因為𪜶對非利士地及猶大地搶的物真多。
30:17 大衛拍𪜶對黃昏暗到隔日下昏，只有四百個騎駱駝的少年人走去，以外無一人走離。
30:17 大闢對天未光攻擊𪜶到黃昏暗；只有四百個騎駱駝的少年人走有去，以外無一個走有離。
30:18 亞瑪力人所搶去的財物，大衛攏救倒轉，大衛也救伊二個某倒來。
30:18 亞瑪力人劫去的財物，大闢攏有搶轉來，嘛有給伊兩個某救倒來。
30:19 見若亞瑪力人所搶去的，無論大細、子、查某子、財物，大衛攏帶倒轉，無失落一個。
30:19 亞瑪力人搶去的，無論大細、子、查某子、財物，大闢攏帶轉來，無失落一項。
30:20 大衛閣搶所有的羊群牛群，𪜶趕伊佇精牲的頭前，講：「這是大衛所取來的。」
30:20 大闢的部下將所有搶來的牛群羊群，趕佇其他牲生的頭前，展講：「諸個是大闢的戰利品。」
30:21 大衛到許個厭倦𣍐會跟隨大衛去，留佇比梭溪的二百人遐。𪜶出來迎接大衛及隨伊的百姓。大衛進前到百姓遐請安𪜶。
30:21 大闢轉來到許個因為厭倦無隨伊去，留佇比梭溪的兩百人遐。𪜶出來迎接大闢及有隨伊去的軍兵的時，大闢行進前給𪜶請安。
30:22 及大衛去的人，其中有歹人匪類攏總講：「因為𪜶無及咱去，咱所救倒轉的物的確分互𪜶，干單用𪜶逐人的某、子兒互𪜶，互𪜶導去。」
30:22 及大闢去的人中間有一寡歹人匪類按呢講：「𪜶無及咱去，諸個戰利品分互𪜶，干焦𪜶的某、子兒，互𪜶導轉去。」
30:23 大衛講：「兄弟啊，通將耶和華所賞賜咱的物，按呢做；因為伊保護咱，將攻擊咱的軍隊交佇咱的手。
30:23 大闢講：「兄弟啊，上主賞賜互咱的物，毋通按呢處理，因為伊有保護咱，將攻擊咱的對敵交佇咱的手。
30:24 此個代誌是誰欲聽趁恁啊？顧守雜物的人所得著的份額，著親像出陣的人的份額；大家著平分。」
30:24 恁此款做法啥人會同意？出陣的人分著偌多，顧補給品的人嘛著分赫多；大家著公家分。」
30:25 對彼日以後大衛設立此個做以色列的律例法度，直到今仔日。
30:25 對彼日起，大闢設立此個辦法做以色列的規例及命令，直到今仔日。
30:26 大衛到洗革拉的時，對所搶的物的中間提起來寄去送伊的朋友猶大的長老，講：「看啊，諸個是對耶和華的對敵搶來的，送互恁做禮物。」
30:26 大闢到洗革拉的時，提一部份的戰利品送互伊的朋友，猶大的長老。伊講：「諸個是對上主的對敵搶來的，送互恁做禮物。」
30:27 就是送互𫢶佇伯特利的，𫢶佇南方的拉末的，𫢶佇雅提珥的；
30:27 伊將禮物送互𫢶佇伯特利，猶大南方的拉末、雅提珥、
30:28 𫢶佇亞羅珥的，𫢶佇息末的，𫢶佇以實提莫的；
30:28 亞羅珥、息末、以實提莫、
30:29 𫢶佇拉哈勒的，𫢶佇耶拉蔑人諸個城的，𫢶佇基尼人許個城的；
30:29 拉哈勒、耶拉篾人及基尼人許個城，
30:30 𫢶佇何珥瑪的，𫢶佇歌拉珊的，𫢶佇亞撻的；
30:30 何珥瑪、坡拉珊、亞撻、
30:31 𫢶佇希伯崙的，以及大衛及隨伊的人平素所往來的所在攏互伊。
30:31 希伯崙，以及大闢及伊的部下平常有啲往來的所在的長老。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。