上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
28:1 彼時，非利士人聚集軍兵出陣，欲及以色列人交戰。亞吉對大衛講：「你著確實知，你及隨你的人攏著隨我出陣。」
28:1 過無偌久，非利士人召集軍隊欲攻擊以色列人。亞吉王對大闢講：「你應該知，你及你的部下著及我鬥陣作戰。」
28:2 大衛對亞吉講：「是，奴僕所會做的代誌，你的確會知。」亞吉給大衛講：「按呢，我設立你永遠做我的侍衛長。」
28:2 大闢應講：「無問題，我是你的奴僕，你知我會為著你做什麼。」
亞吉王給大闢講：「按呢，我欲派你做我終身的侍衛。」
掃羅尋尪姨
28:3 彼時撒母耳已經死，以色列眾人為著伊哀哭，埋葬伊佇拉瑪，就是佇伊的本城。掃羅曾趕逐鬼上身的及行邪術的離開伊的境內。
掃羅求問尪姨
28:3 彼時撒母耳已經死，所有的以色列人為著伊哀哭，給伊埋葬佇伊的故鄉拉瑪。掃羅曾將尪姨及行邪術的攏趕出國境。
28:4 非利士人聚集，紮營佇書念；掃羅聚集以色列眾人紮營佇基利波。
28:4 非利士人聚集，行軍到書念紮營；掃羅聚集所有的以色列人佇基利波紮營。
28:5 掃羅看見非利士的軍兵就真驚，心噗噗筅到極。
28:5 掃羅看著非利士的軍兵，就真驚，心肝噗噗筅。
28:6 掃羅問耶和華，耶和華攏無用眠夢，抑是烏陵，抑是先知來應伊。
28:6 掃羅問上主；上主攏無用眠夢，無用烏陵，抑是先知，給伊應答。
28:7 掃羅吩咐伊的奴僕講：「你著給我尋尪姨，互我通去伊遐問伊。」奴僕講：「佇隱‧多珥有一個尪姨。」
28:7 掃羅吩咐伊的僕人講：「給我尋一個尪姨，我通去問伊。」
僕人講：「佇隱‧多珥有一個尪姨。」
28:8 掃羅就改換伊的形容，穿別號的衫，有二人及伊去，暝時去彼個婦仁人遐。掃羅講：「請你用上你的身的神給我行法術，我所給你講的人，你給我牽伊上來。」
28:8 掃羅就變裝，穿別款衫；導兩個人及伊做夥去。佇暝時𪜶去彼個尪姨遐。
掃羅給伊講：「請你用牽亡的法術，牽我給你講彼個人出來。」
28:9 婦仁人對伊講：「看啊，你知掃羅的所做伊對境內剪除諸個鬼上身的及行邪術的。你啥事設計欲害死我的生命啊？」
28:9 尪姨對伊講：「你知掃羅的所做；伊有給尪姨及行邪術的攏趕出國境；你是按怎設計欲害我的性命？」
28:10 掃羅指耶和華對伊咒誓講：「我指永活的耶和華來咒誓，你無欲因為此個事受刑罰。」
28:10 掃羅指上主對伊咒誓，講：「我指永活的上主咒誓，你𣍐因為此個代誌受刑罰。」
28:11 婦仁人講：「我著給你牽甚麼人上來啊？」伊講：「給我牽撒母耳上來。」
28:11 尪姨講：「你愛我給你牽啥人出來？」
伊講：「給我請撒母耳出來。」
28:12 婦仁人看見撒母耳，就大聲叫，婦仁人給掃羅講：「你啥事騙我？因為你是掃羅。」
28:12 尪姨看著撒母耳就大聲吱出來，給掃羅講：「你是按怎騙我？你是掃羅！」
28:13 王對伊講「莫得驚，你看見甚麼？」婦仁人給掃羅講：「我看見神明對地裡上來。」
28:13 王對伊講：「免驚，你看見什麼？」
尪姨給掃羅講：「我看著神魂對地裡出來。」
28:14 掃羅講：「伊的形狀怎樣？」伊講：「有一個老人上來，身軀𧜞長衫。」掃羅知是撒母耳，就仆佇地裡，拜伊。
28:14 掃羅講：「伊生做啥款？」
尪姨講：「有一個老人出來，身軀幔長衫。」
掃羅知是撒母耳，就仆佇土腳給伊拜。
28:15 撒母耳給掃羅講：「你啥事攪擾我，牽我上來啊？」掃羅講：「我困苦到極；因為非利士人及我交戰，上帝也離開我，無閣用先知抑是眠夢來應我。所以我請你來，通指示我著怎樣行。」
28:15 撒母耳給掃羅講：「你是按怎攪擾我，牽我出來？」
掃羅講：「我非常痛苦，因為非利士人來攻擊我，上帝嘛離開我，無閣通過先知抑是眠夢應答我。所以我請你來，通指示我著按怎做。」
28:16 撒母耳講：「耶和華已經離開你，續做你的對敵，你啥事問我啊？
28:16 撒母耳講：「上主已經離開你，做你的對敵；你哪著問我？
28:17 耶和華照伊託我所講的話行佇你，耶和華已經對你的手搶奪國位，互你的同伴大衛。
28:17 上主會照伊交代我對你講的實現；伊已經將你的王權剝起來交互你的同伴大闢。
28:18 因為你無趁耶和華的話；行伊的大受氣佇亞瑪力，所以耶和華今仔日按呢行佇你，
28:18 因為你違背上主的話，無將亞瑪力人及𪜶所有的攏消滅，所以上主今仔日對你做此個代誌。
28:19 閣耶和華欲將你及以色列交佇非利士人的手。明仔日你及你許個子欲及我佇啲；耶和華欲將以色列的軍兵交佇非利士人的手。」
28:19 上主欲將你及以色列交佇非利士人的手。明仔載你及你的子兒會及我做夥；上主嘛欲將以色列的軍隊交佇非利士人的手。」
28:20 掃羅忽然身軀倒直直佇地裡，因為撒母耳的話就真驚，到攏無力；因為一日一暝，攏無食甚麼。
28:20 掃羅因為撒母耳的話非常驚惶，隨時倒落去，倒甲直直直；歸暝歸日無食半項，身軀攏無力。
28:21 婦仁人倚近掃羅，看見伊真迫腹，對伊講：「你的女婢聽你的話，無顧家己的生命，聽你所給我講的話。
28:21 彼個尪姨行倚去掃羅遐，看著伊赫呢驚惶，就對伊講：「你的女婢聽你的話，無顧家己的性命，有照你的要求去做。
28:22 今求你聽女婢的話，容允我佇你的面前排淡薄食物，互你食，你行路才有氣力。」
28:22 今，請你聽女婢的話，允准我款淡薄物件互你食，你才有氣力上路。」
28:23 伊推辭，講：「我食。」總是伊的奴僕及婦仁人好嘴勸伊，伊才聽𪜶的嘴，對地裡起來，坐佇床裡。
28:23 掃羅拒絕，講：「我毋食。」毋拘伊的僕人及尪姨給伊好嘴苦勸，伊才聽𪜶的話，對土腳起來，坐佇眠床。
28:24 婦仁人厝內有一隻肥的牛仔，趕緊刣伊，閣提麵粉摶伊做無酵餅來煏伊，
28:24 尪姨趕緊牽厝裡彼隻肥牛仔去刣，閣抄麵粉，烘無酵餅，
28:25 排佇掃羅及伊的奴僕的面前。𪜶食伊，彼暝𪜶就起身去。
28:25 排佇掃羅及伊的僕人面前，𪜶就食。彼暝𪜶起身倒去。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。