上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
大衛佇非利士人中間
27:1 大衛心內講：「欲有一日我死佇掃羅的手，值著走去非利士的地。掃羅對佇我就絕望，無閣佇以色列的境內尋我；按呢我就通脫離伊的手。」
大闢投靠非利士人
27:1 大闢心內想：「總有一日我會死佇掃羅的手，寧可走來非利士人的地，按呢掃羅就會死心，𣍐閣佇以色列境內尋我，我就會當脫離伊的手。」
27:2 大衛就起來，及隨伊的六百人過去到迦特王──瑪俄的子亞吉遐。
27:2 大闢就導六百個部下，過去迦特王，瑪俄的子亞吉遐。
27:3 大衛及伊二個某，就是耶斯列人亞希暖及曾做拿八的某的迦密人亞比該，及隨大衛的人，以及逐人的家眷，攏𫢶佇迦特亞吉遐。
27:3 大闢及伊兩個某，就是耶斯列人亞希暖及拿霸的遺孀迦密人愛比該，及大闢的部下以及𪜶的家眷，攏𫢶佇迦特王亞吉遐。
27:4 有人給掃羅講：「大衛走去迦特。」掃羅就無閣尋伊。
27:4 有人給掃羅講大闢已經走去迦特，掃羅就無閣追趇伊。
27:5 大衛對亞吉講：「我若佇你的面前得著恩典，求你用山場一個城互我，我就有所在通徛起。因為你的奴僕啥事著及你相及徛起佇京城啊？」
27:5 有一日，大闢對亞吉王講：「你若看我做朋友，請佇庄腳賜我一個所在通住，你的奴僕就免及你住佇京城。」
27:6 當彼日亞吉將洗革拉互伊，因為按呢洗革拉屬猶大王，直到今仔日。
27:6 彼日，亞吉王將洗革拉互伊；因為按呢，洗革拉屬猶大王，直到今仔日。
27:7 大衛𫢶佇非利士人的地共一年閣四月日。
27:7 大闢𫢶佇非利士人的地，共一年四個月。
27:8 大衛及隨伊的人上去，侵取基述人、基色人、亞瑪力人。因為此幾族平素徛起佇彼所在，對書珥去到埃及。
27:8 大闢及伊的部下上去攻打基述人、基色人、亞瑪力人；此幾族已經佇書珥到埃及彼中間的地區住真久。
27:9 大衛拍彼所在，無論男女無一個活，閣搶𪜶的羊、牛、驢、駱駝，及衣服，倒轉來見亞吉。
27:9 大闢無論攻佔什麼所在，男女攏刣死，無留甲半個；閣搶𪜶的牛、羊、驢、駱駝，及衣服，倒轉來見亞吉。
27:10 亞吉講：「恁今仔日去侵取甚麼地方啊？」大衛講：「拍猶大的南方、耶拉篾人的南方、基尼人的南方。」
27:10 亞吉王逐遍攏會問伊：「恁今仔日去攻佔什麼所在？」大闢會應講「阮去攻佔猶大南方」，抑是講「耶拉篾人的南方」，抑是講「基尼人的南方」。
27:11 大衛無留一個男女活，帶到迦特。是拍算講：「驚了𪜶將阮的事報人知，講大衛按呢行閣伊𫢶佇非利士人的地的時，也常常照此款來行。」
27:11 大闢逐遍將男女攏刣死，連一個都無帶轉去迦特，才免𪜶將大闢所做的代誌報人知。大闢𫢶佇非利士人的地的時攏按呢做。
27:12 亞吉信大衛，心內講：「大衛互伊本族以色列人真厭惡，所以伊欲永遠做我的奴僕。」
27:12 亞吉信任大闢，想講：「大闢互伊的本族以色列人厭惡，所以伊會永遠做我的奴僕。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。