上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
大衛閣饒掃羅的命
26:1 西弗人到基比亞見掃羅，講：「大衛豈是家己匿佇耶示們頭前的哈基拉山嗎？」
大闢閣一遍無刣掃羅
26:1 西弗人閣去基比亞給掃羅報告，講大闢匿佇約斯門東旁的哈基拉山。
26:2 掃羅就起來，導以色列中揀選的兵三千落去到西弗的曠野，欲佇西弗的曠野尋大衛。
26:2 掃羅就起來，導以色列中特選的兵三千，落去西弗的曠野欲尋大闢。
26:3 掃羅佇耶示們頭前的哈基拉山，紮營佇路裡。大衛𫢶佇曠野，知掃羅來曠野欲追赴伊，
26:3 掃羅佇約斯門東旁的哈基拉山路邊紮營。大闢𫢶佇曠野，聽著掃羅來曠野欲追趇伊，
26:4 大衛就差幾若個偵探，才知掃羅真正來。
26:4 就差幾若個偵探去探，才知掃羅真正來啦。
26:5 大衛就起來，到掃羅紮營的所在，大衛看見掃羅及伊的軍長尼珥的子押尼珥睏的所在；掃羅睏佇排列車的內面，百姓紮營佇伊的四圍。
26:5 大闢就出發，去掃羅紮營的所在，看著掃羅及尼珥的子元帥押尼珥睏的所在，掃羅睏佇軍營的中央，部隊佇伊的周圍紮營。
26:6 大衛對赫人亞希米勒及洗魯雅的子約押的兄弟亞比篩講：「是誰欲及我落去到營盤到掃羅遐？」亞比篩講：「我及你落去。」
26:6 大闢對赫人亞希米勒及洗璐雅的子，約押的兄弟亞比篩，講：「啥人欲及我落去掃羅的營內？」
亞比篩講：「我及你落去。」
26:7 大衛及亞比篩透暝到百姓遐，看見掃羅倒佇排列車的內面啲睏；伊的槍佇頭殼邊，插佇地裡。押尼珥及百姓睏佇伊的四圍。
26:7 大闢及亞比篩透暝到部隊遐，看著掃羅佇軍營的中央啲睏；伊的槍佇頭殼邊，插佇土腳；押尼珥及軍兵睏佇伊的周圍。
26:8 亞比篩給大衛講：「上帝今仔日將你的對敵交佇你的手，求你准我用槍給伊鑿佇地裡，鑿一下，免二下。」
26:8 亞比篩對大闢講：「今仔日上帝將你的對敵交佇你的手。請准我用槍給伊鑿迵過，釘佇土腳；一下就好，免鑿兩下。」
26:9 大衛給亞比篩講：「通害死伊。是誰起手害耶和華所抹油者也無罪啊？」
26:9 大闢給亞比篩講：「毋通給伊刣死！啥人傷害上主所選立的王閣會當無罪？」
26:10 大衛閣講：「我指永活的耶和華來咒誓，耶和華欲拍伊，豈採伊死日欲到，抑是伊欲落戰陣來死；
26:10 大闢閣講：「我指永活的上主咒誓，上主會給伊拍死，若毋是死期到死去，就是佇戰場戰死。
26:11 我對佇耶和華，決斷敢起手拍耶和華所抹油者。今你通取伊頭殼邊的槍及水瓶，咱通提來去。」
26:11 我絕對毋敢下手拍上主選立的王；干焦提伊頭殼邊的槍及水瓶，咱就走。」
26:12 大衛對掃羅的頭殼邊取伊的槍及水瓶，二人就去，無人看見，無人知，也無人醒，是𪜶攏啲睏，因為耶和華互𪜶睏重眠。
26:12 大闢就去提掃羅頭殼邊的槍及水瓶。兩人離開，無人看著，無人知，嘛無人醒；𪜶攏啲睏，因為上主互𪜶睏重眠。
26:13 大衛過去到彼旁，遠遠徛佇山頂，及𪜶相離不止遠。
26:13 後來，大闢過去另外彼旁，徛佇山頂，及𪜶相離不止遠。
26:14 大衛叫百姓及尼珥的子押尼珥講：「押尼珥啊，你無應嗎？」押尼珥講：「你是是誰？啲叫王啊？」
26:14 大闢對軍隊及尼珥的子押尼珥喝講：「押尼珥啊，你有聽著無，你哪毋應？」
押尼珥講：「你是啥人，敢給王吵醒？」
26:15 大衛對押尼珥講：「你豈是一個勇士嗎？以色列中是誰比得你啊？你啥事無保護你的主──你的王啊？因為百姓中有一人入去欲害你的王──你的主。
26:15 大闢對押尼珥講：「你豈毋是以色列中上強的勇士？是按怎你無保護你的主你的王？抵即有一個兵仔入去欲害你的王你的主。
26:16 你此號所做是好！我指永活的耶和華咒誓，恁攏是該死的；因為無保護恁的主，就是耶和華所抹油者。今你看王頭殼邊的鎗及水瓶佇叨落？」
26:16 你無盡責任。我指永活的上主咒誓，恁攏該死，因為無保護恁的主，就是上主所選立的王。你看覓咧，王頭殼邊的槍及水瓶佇叨位？」
26:17 掃羅認得是大衛的聲，就講：「我的子大衛，這是你的聲嗎？」大衛講：「王啊──我的主，是我的聲」；
26:17 掃羅認出是大闢的聲，就講：「我的子大闢，是你噢？」
大闢講：「王，我的主啊，是我！」
26:18 閣講：「我的主啥事追趇奴僕？我做甚麼？我的手有甚麼歹？
26:18 伊閣講：「我的主是按怎啲追趇你的奴僕？我有做什麼？我有做什麼歹？
26:19 王啊，我的主啊今求你聽奴僕的話：若是耶和華激動你攻擊我，願伊監納祭物；若是人激動你，願𪜶佇耶和華的面前受咒詛；因為𪜶今仔日革逐我，互我無份佇耶和華的業，講：『你去服事別個上帝！』
26:19 王，我的主啊，求你聽奴僕的話。若是上主激動你攻擊我，願伊歡喜接受我獻的祭。若是人給你使弄，願𪜶受上主咒詛，因為𪜶今仔日給我趕出上主應允的土地，害我著去服事別個神明。
26:20 今莫得互我的血流佇離開耶和華面前的地。因為以色列王出來是尋一隻虼蚤，親像人佇山裡趇一隻鷓鴣。」
26:20 求你毋通互我死佇外國，離開上主面前。以色列王哪著出來尋一隻虼蚤，哪著佇山裡親像啲趇一隻野鳥！」
26:21 掃羅講：「我有罪啦！我的子大衛，你通倒來，我無欲閣害你；因為你今仔日看我的生命做寶貝。看啊，我所做是真戇，錯誤到極。」
26:21 掃羅應講：「我毋著。我的子大闢，你通倒來。我𣍐閣害你，因為今仔日你有看重我的性命。我實在真糊塗，犯即呢大的錯誤！」
26:22 大衛應講：「王啊，你的鎗佇遮，你著叫一個少年人過來攑。
26:22 大闢講：「王啊，你的槍佇遮，請叫一個部下過來攑轉去。
26:23 耶和華欲照逐人的公義及忠信來報伊，因為今仔日耶和華將你交佇我的手。總是我肯伸手害耶和華所抹油者。
26:23 上主會照逐個人的正義信實給伊報答；今仔日上主有將你交佇我的手，毋拘我無出手傷害上主選立的王。
26:24 我今仔日看重你的生命，願耶和華也按呢看重我的生命，閣救我脫離攏總的患難。」
26:24 我今仔日看重你的性命，願上主嘛按呢看重我的性命，救我脫離所有的患難。」
26:25 掃羅給大衛講：「我的子大衛，願你受祝福！你欲行出大的代誌，也穩當欲卡贏。」大衛就做伊行，掃羅倒去伊的本所在。
26:25 掃羅給大闢講：「我的子大闢，願你得著上帝的祝福；你會做大代誌，所做的一定會成功。」
大闢就離開，掃羅嘛倒轉去伊住的所在。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。