撒母耳記上
撒母耳死
撒母耳死，以色列眾人聚集，為著伊啼哭，埋葬伊佇伊家己的厝──就是佇拉瑪。
大衛及亞比該
25:1 大衛起身落去，佇巴蘭的曠野。
撒母耳死
撒母耳死，以色列眾人聚集，為著伊啼哭，給伊埋葬佇伊的故鄉拉瑪。
大闢及愛比該
25:1 大闢落去巴蘭的曠野。
25:2 佇瑪雲有一人，伊的產業佇迦密，是大好額人，有綿羊三千隻，山羊一千隻；伊佇迦密剪羊毛。
25:2 佇瑪雲有一個大好額人，伊的產業佇迦密；伊有綿羊三千隻，山羊一千隻。彼陣，伊佇迦密啲剪羊毛。
25:3 彼人是迦勒族的人，名叫拿八；伊的某名叫亞比該，是聰明閣媠的婦仁人。總是彼人的行做是硬心閣兇惡。
25:3 彼個人屬迦勒宗族，叫做拿霸，伊的某愛比該是賢慧閣媠的婦仁人。毋拘拿霸作人粗魯閣兇惡。
25:4 大衛佇曠野聽見拿八啲剪羊毛，
25:4 大闢佇曠野聽著拿霸啲剪羊毛，
25:5 大衛就差十個少年人，大衛吩咐許個少年人講：「恁著上去迦密見拿八，用我的名給伊請安。
25:5 就派十個少年人，叫𪜶去迦密見拿霸，吩咐𪜶用伊的名給拿霸請安，
25:6 著給彼個好命人講：『願你平安，願你的家平安，願你一切所有的攏平安。
25:6 講：「祝你長歲壽！願恁全家平安！願你事事順利！
25:7 今我聽見講有人佇你遐給你剪羊毛，你的牧者曾及阮住，阮無欺負伊，𪜶佇迦密的時，攏未曾失落甚麼。
25:7 大闢有聽講你佇遮啲剪羊毛；你的顧羊的及阮做夥佇迦密的時，阮毋曾欺負𪜶，𪜶嘛毋曾失落什麼。
25:8 通問你的少年人，𪜶欲給你講。所以願我的少年人佇你的目睭前得著恩典，因為阮來是好日子。求你照你的手隨便提淡薄互你的奴僕及你的子大衛。』」
25:8 你通問你的工人，𪜶會給你講。大闢請你好款待阮諸個少年人，今仔日抵抵是節日。請隨便提淡薄互阮及你的後輩大闢。」
25:9 大衛的少年人到，就將諸個話用大衛的名攏給拿八講，就靜靜聽候。
25:9 大闢的少年人到位，就代表大闢將諸個話給拿霸講。𪜶講了，靜靜聽候。
25:10 拿八應大衛的奴僕講：「大衛是是誰？耶西的子是是誰？近來多多奴僕悖伊的主人，
25:10 拿霸應大闢的部下講：「大闢是啥人？耶西的子是啥人？最近不時有僕人背叛主人。
25:11 我的餅我的水及為著給剪羊毛的人，我所刣精牲的肉欲互剪羊毛的人，我豈通互許個我知伊對叨落來的人嗎？」
25:11 我的餅、我的水，及欲互剪羊毛的人食的肉，豈通提互毋知對叨位來的人？」
25:12 大衛的少年人就越轉身對原路倒去，照諸個話攏給大衛講。
25:12 大闢的少年人越轉身對原路倒去，將諸個話給大闢報告。
25:13 大衛對隨伊的人講：「恁逐人攏著背刀！」𪜶就攏背刀，大衛也背刀。隨大衛上去的約略有四百人，留二百人顧守雜物。
25:13 大闢對跟隨伊的人講：「恁逐個人攏著帶刀。」𪜶就攏帶刀，大闢嘛帶。隨大闢去的約有四百人，兩百個留啲顧守補給品。
25:14 拿八許個少年人中有一個來給拿八的某亞比該講：「大衛對曠野差使者來請安阮主人，主人反轉誚皮𪜶。
25:14 拿霸的工人有一個來給拿霸的某愛比該講：「大闢對曠野差使者來給阮主人請安，主人顛倒大聲給𪜶侮辱。
25:15 總是許個人款待阮真好；阮佇田野及𪜶往來的時，攏無受傷害，也無失落甚麼。
25:15 毋拘許個人對阮真好，阮佇野外及𪜶往來的時攏無受傷害，嘛毋曾失落什麼。
25:16 阮佇𪜶遐飼羊的時，𪜶暝日做阮的牆圍。
25:16 阮佇𪜶遐飼羊的時，𪜶暝日攏有給阮保護。
25:17 今你著知，也著打算，看你欲怎樣行；因為有定著意思欲害阮的主人及伊的全家。伊的性情兇惡，無人敢及伊講話。」
25:17 請你詳細想，看著按怎做，因為災禍一定會臨到阮的主人及伊的全家。阮主人性情兇惡，無人敢及伊講話。」
25:18 亞比該就趕緊將二百個餅，二皮袋酒，五隻備辦好的羊，五細亞烘的五穀，一百葩葡萄干，二百個無花果餅，互幾若隻驢背，
25:18 愛比該就趕緊將兩百個餅，兩皮袋酒，五隻烘好的羊，十七公斤焙熟的麥仔，一百粒葡萄乾丸，兩百粒無花果乾丸，互驢仔載。
25:19 給伊許個少年人講：「恁做頭去，我欲隨恁的後面去。」總是無給伊的丈夫拿八講。
25:19 然後伊給許個工人講：「恁先行，我隨恁的後面去。」毋拘伊無給伊的丈夫拿霸講。
25:20 伊就騎驢，抵仔落山的越角，忽然看見大衛及隨伊的人佇對面落來，伊就抵著𪜶。
25:20 愛比該就騎驢落山，對山彼旁斡過來的時，抵著大闢及跟隨伊的人抵好對對面啲來。
25:21 大衛曾講：「此人佇曠野一切所有的我給伊顧守，致到屬佇伊的無失落一項，實在是空空！伊用歹報我的好。
25:21 大闢抵仔啲講：「此個人佇曠野所有的一切，我給伊顧甲無失落半項，實在無採工；伊竟然用歹報好！
25:22 凡若屬伊的，我若留伊一個查甫子到明仔天光，願上帝照按呢款待大衛的對敵，也比按呢猶卡重！」
25:22 明仔載天光以前，我若無將𪜶兜所有的查甫人攏刣死，願上帝加倍責罰我。」
25:23 亞比該看見大衛，就趕緊對伊的驢落來，佇大衛的面前俯頭仆佇地裡拜伊，
25:23 愛比該看著大闢，趕緊對驢仔落來，佇大闢的面前仆佇土腳拜伊。
25:24 仆佇伊的腳下，講：「我的主啊，願此個罪歸佇我！求你准你的女婢講互你聽，閣求你聽你的女婢的話。
25:24 愛比該仆佇伊的腳前，講：「我的主啊，攏是我毋著。求你准你的女婢講互你聽。請聽女婢的話。
25:25 求我的主莫得致意此個無下落的人拿八，因為伊的名怎樣伊的人款也是按呢；伊的名叫拿八，伊做人果然愚戇。總是我的主所差來的少年人，你的女婢也無看見。
25:25 我的主，插彼個性情兇惡的人；伊叫做拿霸，名符其實是戇人。毋拘我，你的女婢，無抵著我的主派來的少年人。
25:26 我的主啊，耶和華既然禁止你犯著刣死人的罪，用你的手報家己的仇讎，所以我指永活的耶和華、及你的活命來咒誓講：『願你的對敵及計謀害我的主的攏親像拿八。』
25:26 我的主啊，既然上主阻止你無犯刣死人的罪，無互你親手替家己報仇，我指永活的上主及你的性命咒誓：『願我的主的對敵及計謀欲害你的人攏及拿霸仝款。』
25:27 今你的女婢所帶來互我的主的禮物通互跟隨我的主的少年人。
25:27 今你的女婢帶來互我的主的禮物，請分互跟隨我的主的少年人。
25:28 求你寬恕你的女婢的罪過。因為耶和華的確給我的主建立堅固的家，因為我的主為著耶和華交戰；閣佇你一生的日無查出你有甚麼過失。
25:28 求你寬赦你女婢的罪過。上主一定會給我的主建立穩固的王朝，因為我的主為著上主交戰，閣你一生尋𣍐出有什麼過失。
25:29 雖然有人起來追趇你，數想你的生命，總是我的主的生命欲佇耶和華──你的上帝遐，包佇活命的包內；你的對敵的生命，耶和華欲給伊甩出來，親像對甩索的中間甩出去一樣。
25:29 雖然有人起來追趇你，數想你的性命，毋拘我的主的性命會得著上主 — 你的上帝保護，親像啲保護極貴重的寶物。你對敵的性命會互上主㧒确，親像用挕索挕出去。
25:30 到後日耶和華照伊所應允我的主的福氣，來一盡行佇你，設立你做以色列的頭，當彼時，
25:30 將來上主照伊對我的主的應允成就一切好事，選立你做以色列的領袖的時，
25:31 我的主免為著流無罪的人的血伸家己的冤，致到有甚麼憂悶，抑是心內家己責備。耶和華賜福互我的主的時，求你記念你的女婢。」
25:31 我的主就毋免為著無緣無故刣人，抑是替家己報仇，致到後悔，自責。當上主賜福互我的主的時，求你會記得你的女婢。」
25:32 大衛給亞比該講：「耶和華──以色列的上帝是應該謳咾的，因為伊今仔日差你來抵著我。
25:32 大闢給愛比該講：「上主 — 以色列的上帝應該受稱讚，因為伊今仔日差你來見我。
25:33 你的智慧通謳咾，你本身也通謳咾；因為你今仔日阻擋我犯著刣死人的罪，無用家己的手報家己的仇讎。
25:33 你及你的見識攏真通謳咾，因為你今仔日阻止我無親手報仇，互我無犯著刣死人的罪。
25:34 禁止我傷害你的耶和華──以色列的上帝我指伊的永活來咒誓，若你無緊緊來接我，到明仔早起，見若屬拿八的決斷無留一個查甫子。」
25:34 上主有阻止我無傷害你。佇上主 — 以色列永活的上帝面前，我敢講，佳哉你有隨時趕來見我，若無，到明仔早起，所有屬拿霸的查甫人，一定連一個都𣍐活啲。」
25:35 大衛收亞比該帶來互伊的物，就給伊講：「你通平安倒去你的家！看啊，我有聽你的話，帶著你。」
25:35 然後，大闢接受愛比該帶來的禮物，就給伊講：「你通平安倒去恁兜；我知你的意思。我答應你。」
25:36 亞比該到拿八遐，看見伊佇家內排設筵席，親像王的筵席；拿八心大歡喜因為伊真大醉。所以亞比該無論大細的事攏無給伊講，聽候到隔早起。
25:36 愛比該轉去拿霸遐，拿霸抵佇厝內啲辦桌，親像王排設宴席。拿霸心情非常爽快，飲甲醉茫茫。所以，彼暝愛比該無將所有發生的代誌給伊講。
25:37 到隔早起，拿八酒退，伊的某將諸個事給伊講，伊的心佇內面親像死，伊變親像石頭。
25:37 隔早起，拿霸酒退，伊的某才將諸個代誌給伊講；伊聽了隨時失去意識，歸身軀𣍐振動。
25:38 約略十日，耶和華拍拿八，伊就死。
25:38 大約十日後，上主拍拿霸，伊就死去。
25:39 大衛聽見拿八已經死，就講：「應該著謳咾耶和華，因為我對拿八的手所受的凌辱，伊有給我伸冤，閣阻止奴僕行歹；耶和華也互拿八的歹歸到拿八的頭殼。」按呢大衛就差人去，及亞比該講，欲娶伊做某。
25:39 大闢聽著拿霸已經死，就講：「上主應該受稱讚，因為我對拿霸受的侮辱，伊有替我申冤，閣阻止我無去做歹；上主照拿霸所做的歹給伊刑罰。」大闢就差人去給愛比該講欲娶伊做某。
25:40 大衛的奴僕到迦密見亞比該，給伊講：「大衛差阮來見你，想欲娶你做某。」
25:40 大闢的僕人去迦密見愛比該，給伊講：「大闢差阮來見你，講欲娶你做某。」
25:41 亞比該就起來，仆佇地裡，講：「你的女婢佇遮，願做差用，來洗我的主許個奴僕的腳。」
25:41 愛比該就起來，仆佇土腳，講：「我願意做差用，給我的主的僕人洗腳。」
25:42 亞比該緊緊起來，騎驢，有伊五個女婢相及去，伊就隨大衛的使者去，做大衛的某。
25:42 愛比該隨時起來，騎驢，導五個女婢隨大闢的使者做夥去；伊就做大闢的某。
25:43 大衛也娶耶斯列人亞希暖，𪜶二人攏做伊的某。
25:43 大闢已經有娶耶斯列人亞希暖；𪜶兩個人攏做伊的某。
25:44 掃羅已經將伊的查某子米甲，就是大衛的某，互迦琳人拉億的子帕提做某。
25:44 掃羅已經將伊的查某子米甲，就是大闢的某，互迦琳人拉億的子帕鐵做某。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋