上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
大衛救基伊拉
23:1 有人報大衛講：「看啊，非利士人拍基伊拉，搶五穀場。」
大闢救基伊拉城
23:1 有人給大闢講：「非利士人啲攻擊基伊拉城，搶五穀場。」
23:2 大衛就問耶和華講：「我通去拍許個非利士人抑通？」耶和華給大衛講：「你通去拍非利士人，救基伊拉。」
23:2 大闢問上主：「我來去攻擊許個非利士人好無？」
上主給大闢講：「你去拍非利士人，解救基伊拉。」
23:3 隨大衛的人給伊講：「咱佇猶大地遮尚且驚惶，何況去基伊拉拍非利士人的軍隊啊？」
23:3 跟隨大闢的人給伊講：「咱佇猶大地都真驚非利士人，何況去基伊拉拍𪜶的軍隊？」
23:4 大衛閣問耶和華。耶和華應講：「你起來落去基伊拉，因為我欲用非利士人交佇你的手。」
23:4 大闢閣問上主；上主應講：「你去，落去基伊拉，因為我欲將非利士人交佇你的手。」
23:5 大衛及隨伊的人去基伊拉，及非利士人交戰，搶𪜶的精牲，刣死𪜶多多人。按呢，大衛救基伊拉徛起的百姓。
23:5 大闢及跟隨伊的人去基伊拉，及非利士人交戰；搶𪜶的牲生，刣死𪜶真多人。按呢，大闢有解救基伊拉的住民。
23:6 亞希米勒的子亞比亞他走去到基伊拉見大衛的時，手裡帶以弗得落去。
23:6 亞希米勒的子亞比亞他逃走去基伊拉見大闢的時，手裡有帶以弗得去。
23:7 有人給掃羅講：「大衛到基伊拉。」掃羅講：「上帝將伊交佇我的手；因為伊入有門有閂的城，關住佇彼內面。」
23:7 有人給掃羅講：「大闢來到基伊拉。」
掃羅講：「上帝已經將伊交佇我的手，因為伊入去有門有閂的城，家己關佇彼內面。」
23:8 掃羅就招集眾百姓，欲去交戰落去基伊拉，圍困大衛及隨伊的人。
23:8 掃羅就召集所有的軍兵欲去攻打基伊拉，包圍大闢及跟隨伊的人。
23:9 大衛知掃羅設計謀欲害伊，就給亞比亞他講：「你帶以弗得來。」
23:9 大闢知掃羅設計謀欲害伊，就給祭司亞比亞他講：「你帶以弗得來。」
23:10 大衛講：「耶和華──以色列的上帝啊，你的奴僕確實聽見掃羅愛欲來基伊拉，欲為著我的緣故滅此個城。
23:10 大闢講：「上主 — 以色列的上帝啊，你的僕人有聽著掃羅欲來基伊拉，為著我的緣故剿滅此個城。
23:11 基伊拉人欲將我交佇伊的手抑無？掃羅欲照你的奴僕所聽見的落來抑無？耶和華──以色列的上帝啊，求你指示你的奴僕！」耶和華講：「掃羅欲落來。」
23:11 基伊拉人會將我交佇伊的手𣍐？掃羅會照你的僕人所聽著的落來抑𣍐？上主 — 以色列的上帝啊，求你指示你的僕人。」
上主講：「掃羅會落來。」
23:12 大衛閣講：「基伊拉人欲將我及隨我的人交佇掃羅的手嗎？耶和華講：「𪜶欲將你交互伊。」
23:12 大闢閣講：「基伊拉人會將我及隨我的人交佇掃羅的手抑𣍐？」
上主講：「𪜶會將你交互伊。」
23:13 大衛及隨伊的人約略六百，就起身出基伊拉，去𪜶所去的所在。有人給掃羅講，大衛已經對基伊拉逃走；掃羅就無出去。
23:13 大闢及跟隨伊的人約有六百，隨時離開基伊拉，四界飄流。
有人給掃羅講：「大闢已經對基伊拉逃走。」掃羅就無出兵。
大衛佇山裡
23:14 大衛𫢶佇曠野的衛所，常常佇西弗曠野的山地。掃羅逐日尋伊，總是上帝無將大衛交佇伊的手。
大闢佇曠野閃避掃羅
23:14 大闢匿佇西弗曠野山區的要塞。掃羅逐日追尋大闢，毋拘上帝無將大闢交佇伊的手。
23:15 大衛知掃羅已經出來啲數想伊的生命。彼時，大衛佇西弗的曠野𫢶佇樹林內；
23:15 大闢知掃羅已經出來欲刣伊，彼時大闢𫢶佇西弗曠野的哈列。
23:16 掃羅的子約拿單起身，去彼個樹林內見大衛，互伊靠上帝來堅固，
23:16 掃羅的子約拿單出發去哈列見大闢，鼓勵伊著信靠上帝的保護，
23:17 就給伊講：「免驚！我的父掃羅的手尋你𣍐著；你欲做以色列王，我欲做你的第二。此個事我的父掃羅已經知。」
23:17 給伊講：「毋免驚，阮老父掃羅的手無法度傷害你。你會做以色列王，我甘願坐第二位。此個事我的老父掃羅已經知。」
23:18 對按呢二人佇耶和華的面前結約。大衛𫢶樹林，約拿單倒去伊的厝。
23:18 𪜶兩人就佇上主的面前立約結盟。大闢留佇哈列，約拿單倒去伊的厝。
23:19 西弗人上去基比亞見掃羅，講：「大衛豈是𫢶佇阮遐匿佇樹林內的衛所，佇耶示們南旁的哈基拉山嗎？
23:19 有一寡西弗人上去基比亞見掃羅，講：「大闢豈毋是匿佇阮境內，約斯門南旁哈基拉山，哈列的要塞？
23:20 王啊，請你照你的心所愛落去的落去，將伊交佇王的手是阮的代。」
23:20 王啊，你若想欲落去，請此陣來去；阮會掠伊來交佇王的手。」
23:21 掃羅講：「願耶和華賜福恁，因為恁可憐我。
23:21 掃羅講：「願上主賜福恁，因為恁對我真好。
23:22 請恁倒去，閣代先備辦詳細知，探看伊行踏的所在，甚麼人看見伊佇遐，因為有人給我講伊真狡怪。
23:22 恁倒去，詳細調查，確實知伊𫢶佇叨位，什麼人有看著伊，因為有人給我講，伊真詭詰。
23:23 所以恁著查看，知伊一切家己匿密的所在，倒轉來用實情給我講，我就欲及恁去。伊若佇此個境內，我欲佇猶大的眾鄉社給伊搜出來。」
23:23 恁去，查出伊確實匿的所在；若知影，著來給我報告，我就欲及恁去。伊若佇猶大境內，我欲對所有的宗族中給伊抄出來。」
23:24 𪜶就起身，代先掃羅去西弗。
大衛及隨伊的人𫢶佇瑪雲的曠野佇耶示們南勢的亞拉巴。
23:24 許個人就出發，比掃羅較代先去西弗。大闢及跟隨伊的人匿佇瑪雲的曠野，約斯門南旁的亞拉巴。
23:25 掃羅及隨伊的人去尋伊；有人給大衛講，伊就落去到石磐，𫢶佇瑪雲的曠野。掃羅聽見，就佇瑪雲的曠野追趇大衛。
23:25 掃羅導伊的部下去追尋大闢；有人給大闢講，伊就落去瑪雲曠野的山巖遐。掃羅聽著，就佇瑪雲的曠野追趇大闢。
23:26 掃羅行佇山的此旁，大衛及隨伊的人行佇山的彼旁。大衛緊急行閃避佇掃羅的面前；因為掃羅及隨伊的人，四面圍大衛及隨伊的人，欲掠𪜶。
23:26 掃羅及伊的部下佇山的此旁，大闢及跟隨伊的人佇山的彼旁。掃羅及伊的部下逼倚大闢，啲欲掠著。大闢趕緊走，閃避掃羅。
23:27 有使者到來報掃羅講：「你著緊緊倒來，因為非利士人侵犯境界。」
23:27 彼時，有使者來報掃羅講：「你著趕緊倒來，因為非利士人侵犯咱的國境。」
23:28 對按呢掃羅無趇大衛，倒去抵敵非利士人。因為按呢彼個所在名叫西拉‧哈瑪希羅結。
23:28 掃羅就倒去對抗非利士人，無閣追趇大闢；因為按呢，彼個所在叫做西拉‧哈瑪希羅結，意思是隔離的山巖。
23:29 大衛對遐上去，𫢶佇隱‧基底的衛所。
23:29 大闢離開遐，就去𫢶佇隱‧基底的要塞。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。