上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
大衛閃避掃羅
21:1 大衛到羅伯到祭司亞希米勒遐，亞希米勒驚惶來接大衛，對伊講：「你啥事家己來，無人及你來啊？」
大闢逃避掃羅
21:1 大闢去挪伯見祭司亞希米勒。亞希米勒驚驚惶惶出來見大闢，對伊講：「你哪家己一個，無人及你鬥陣？」
21:2 大衛應祭司亞希米勒講：「王命令我一件事閣給我講：『我所差你的事及我所命令你的，攏通互人知。』我已經派少年人佇某所在聽候我。
21:2 大闢應講：「王互我一個任務，命令講此個任務毋通互人知。我已經派部下佇某一個所在聽候我。
21:3 今你的手有甚麼物？請你用五個餅互我抑是別項。」
21:3 今你有什麼通食，請你互我五個餅，抑是別項食物。」
21:4 祭司對大衛講：「我的手裡無平常的餅，只有聖的餅；若少年人無親近婦仁人才通。」
21:4 祭司應講：「我手內無普通的餅，只有分別作聖的餅；你的部下無親近婦女才通食。」
21:5 大衛應祭司給伊講：「到今約略有三日未曾親近婦仁人；我出門的時，雖然是平常的代誌，少年人的器具是清氣；何況今仔日𪜶的器具豈無聖嗎？」
21:5 大闢講：「最近阮攏無親近婦女。阮出去執行任務的時，諸個軍兵攏有潔淨。連平常都按呢，何況此遍的任務特別，軍兵的身軀閣較有保持潔淨。」
21:6 祭司就提聖的餅互伊；因為佇遐無別物的餅，只有排列的餅，對耶和華的面前提起來的，提起來彼日是欲下燒的餅來排伊。
（
21:6 祭司就提分別作聖的餅互大闢，因為佇遐無別項餅，只有獻祭的餅，是獻新餅的時對上主面前換落來的。
21:7 當彼日佇遐有掃羅的奴僕留佇耶和華的面前。名叫多益，是以東人，做掃羅顧精牲者的頭人。）
21:7 彼日，佇遐有一個掃羅的人臣留佇上主的面前；伊是以東人，叫做多益，是掃羅的牧者的總管。
21:8 大衛問亞希米勒講：「你手下有槍抑是刀抑無？因為王的代誌真緊急，我攏無帶刀及器械。」
21:8 大闢問亞希米勒講：「你遮有槍抑是刀無？因為王的任務真緊急，我煞無帶刀抑是其他的武器。」
21:9 祭司講：「有非利士人歌利亞的刀，就是你前佇以拉的山谷所刣死的佇遮，包佇布裡，佇以弗得的後面，你若欲用就攑去；因為彼支以外，無別項。」大衛講：「此支刀無一支會比得伊！請你互我。」
21:9 祭司應：「遮有一支刀，是你以前佇以拉的山谷所刣死的非利士人歌利亞的，用布包啲，囥佇以弗得的後面。你欲用就攑去；此支以外無別支。」
大闢講：「此支刀互我，無別支比此支較好。」
21:10 彼日大衛起身，閃避掃羅，走到迦特王亞吉遐。
21:10 彼日大闢離開，走到迦特王亞吉遐，去閃避掃羅。
21:11 亞吉許個人臣給伊講：「此個豈是彼國的王大衛嗎？𪜶佇跳舞中唱和講『掃羅刣死𪜶的千千，大衛刣死𪜶的萬萬。』豈是指此人嗎？」
21:11 亞吉許個人臣對伊講：「此個豈毋是以色列國的王大闢？豈毋是眾婦女那跳舞那唱講
『掃羅刣死千千；
大闢刣死萬萬』
彼個大闢？」
21:12 大衛將諸個話存佇心內，真驚迦特王亞吉，
21:12 大闢聽著諸個話心內不安，真驚迦特王亞吉，
21:13 就佇眾人的面前改換舉動，佇𪜶的手下假癲狂，佇城門的門扇亂寫亂畫，互涎流佇嘴鬚裡。
21:13 所以佇眾人面前假起𤞚，佇城門的門扇亂寫亂畫，嘴涎波噴甲歸嘴鬚。
21:14 亞吉給伊的人臣講：「恁看，此個人是癲狂。啥事帶伊來我遮啊？
21:14 亞吉給伊的人臣講：「恁看，此個人啲起𤞚。恁哪給伊導來我遮？
21:15 我豈有欠用癲狂的，恁才導此人來癲狂佇我的面前啊？此人豈通入我的厝嗎？」
21:15 我遮豈有欠𤞚人？恁哪給導來？毋通互此個人入我的厝。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。