上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
約拿單幫助大衛
20:1 大衛對拉瑪的拿約逃走，到約拿單的面前，講：「我做甚麼？我有甚麼歹？佇你的老父的面前有甚麼罪，伊竟然啲數想我的生命嗎？」
約拿單幫贊大闢
20:1 大闢對拉瑪的拿約逃走，去見約拿單，講：「我有做什麼？有什麼毋著？有對恁老父犯著什麼罪，伊竟然欲追殺我？」
20:2 約拿單給伊講：「決斷是！你𣍐到死。我的老父做代誌，無論大細，無一項無互我知。我的老父豈干單隱瞞我此項事嗎？決斷無按呢。」
20:2 約拿單給伊講：「無此款代誌！你絕對𣍐死。我的老父做代誌，無論大細，攏會互我知。此項代誌伊哪著給我掩蓋？絕對𣍐！」
20:3 大衛閣咒誓講：「你的老父準準知我佇你的面前得著恩典。伊的心講，通互約拿單知，驚了伊會憂悶。我指耶和華的永活，及你的活命來咒誓，我離開死只有一步若定。」
20:3 大闢閣咒誓講：「你的老父明明知你真意愛我，所以心內想：『毋通互約拿單知，驚了伊傷心。』我指永活的上主及你的性命咒誓，死已經逼到眼前啦。」
20:4 約拿單給大衛講：「你的心所愛，我欲給你做。」
20:4 約拿單給大闢講：「你愛我做什麼，我一定會做。」
20:5 大衛給約拿單講：「明仔日是初一，我應該著及王坐桌，求你容允我去匿佇田裡，到第三日下昏。
20:5 大闢給約拿單講：「明仔載是初一，我應該著及王食飯。若會用得，請容允我去匿佇野外，到第三日暗時。
20:6 你的老父若看我無佇啲，你就講：『大衛切切求我准伊倒去本城伯利恆，因為伊通家佇遐獻年祭。』
20:6 你的老父若發見我無佇遐，你著講：『大闢有得著我的允准，轉去故鄉伯利恆，𪜶全家佇遐啲獻年祭。』
20:7 伊若講好啦，就你的奴僕有平安；伊若發受氣，就知伊決意欲害我。
20:7 伊若講『好』，你的僕人就平安無事；伊若受氣，你就知伊決定欲害我。
20:8 今你著施恩互你的奴僕，因為你前有互你的奴僕及你指耶和華來結約。我若有罪，請你本身刣我，啥事帶我到你的老父遐？」
20:8 今你著誠心對待你的僕人；請你守你及我佇上主面前所立的約。我若有罪，你著親身刣我；哪著等你的老父下手？」
20:9 約拿單講：「決斷無對你按呢行！因為我若真知我的老父決意欲害你，我豈無給你講嗎？」
20:9 約拿單講：「我一定𣍐按呢做。我若確實知我的老父決定欲害你，我豈𣍐給你講？」
20:10 大衛給約拿單講：「你的老父若用歹聲嗽應你，是誰欲來給我講啊？」
20:10 大闢給約拿單講：「你的老父若歹聲嗽應你，什麼人欲報我知？」
20:11 約拿單給大衛講：「來啦，咱出來去田裡。」二人就出去田裡。
20:11 約拿單給大闢講：「來，咱來去野外。」𪜶就做夥去。
20:12 約拿單給大衛講：「願耶和華──以色列的上帝做干證。明仔日此時，抑是第三日，我探看我的老父，若有好意思向大衛，我豈無差人給你講嗎？
20:12 約拿單給大闢講：「願上主 — 以色列的上帝作證：明仔載抑是後日此個時，我會探阮老父的意思；伊對你的反應若好，我一定會派人報你知。
20:13 我的老父若有意思害你，我欲給你講互你平安去，若無，願耶和華加倍責罰約拿單。願耶和華及你佇啲，親像伊曾及我的老父佇啲一樣。
20:13 我的老父若存心欲害你，我一定會給你講，互你平安離開；若無，願上主加倍責罰我。願上主及你同在，親像以前及我的老父同在仝款。
20:14 若我活啲的時你著對我顯明耶和華的慈愛，免得我死無，
20:14 我若猶活啲，你一定著照上主的慈愛對待我。我若死，
20:15 就耶和華對地上一盡剪除大衛的對敵的時，你也永遠通對我的家，絕斷你的恩惠。」
20:15 閣上主剿滅你的對敵的時，你嘛著仝款永遠照上主的慈愛對待我的家族。」
20:16 約拿單就及大衛的家結約：講：「願耶和華對大衛諸個對敵的手來討伊。」
20:16 約拿單就及大闢的家立約，閣講：「願上主用大闢對敵的手刑罰背約的人。」
20:17 約拿單因為疼大衛，就教伊閣咒誓，因為伊疼伊親像疼家己的生命。
20:17 約拿單因為愛大闢，就要求大闢閣咒誓；因為伊疼大闢親像疼家己的性命。
20:18 約拿單給伊講：「明仔日是月的初一，你的位放空，欲講你無佇啲。
20:18 約拿單給伊講：「明仔載是初一，食飯的時，你無在場，人一定會注意著。
20:19 等到三日，你著緊緊落去，到你前抵著代誌所匿的所在，佇以色的石磐遐聽候。
20:19 所以，後日你著趕緊落去前抵著代誌匿的所在，佇以色的石磐遐聽候；
20:20 我欲射三支箭佇石盤邊，那親像考靶一樣。
20:20 我會用石磐做目標射三支箭。
20:21 我欲差一個囝仔，講：『你去尋許個箭』我若給囝仔講：『看啊，箭佇你此旁著拾伊』，你就通倒來；我指活的耶和華來咒誓，你有平安無害。
20:21 我會差一個少年人去尋箭。我若給彼個少年人講『箭佇你的後面，著去拾』，你就通倒來。我指永活的上主咒誓，你平安無事。
20:22 我若給囝仔講：『看啊，箭佇你彼旁』你就著去，因為是耶和華差你去。
20:22 我若給少年人講『箭佇你的頭前』，你著趕緊走；因為是上主愛你離開。
20:23 論到你我今仔日所講的，有耶和華佇你我的中間，直到永遠。」
20:23 咱兩個的約定，有上主佇你我中間永遠作證。」
20:24 大衛就去匿佇田裡。到初一日，王坐桌得欲食。
20:24 大闢就去匿佇野外。初一彼日，王坐桌欲食。
20:25 王照常坐伊的位，就是倚佇壁裡的位，約拿單啲徛，押尼珥坐佇掃羅的身邊，大衛的位放空。
20:25 王照常坐伊倚壁彼個位，佇約拿單的對面，押尼珥坐佇掃羅身邊；大闢的位空啲。
20:26 總是此日掃羅無講甚麼，伊拍算大衛抵著代誌，無清氣，伊的確是無清氣。
20:26 毋拘彼日掃羅無講什麼；伊想講大闢抵著代誌互伊無清氣，到現在猶未潔淨。
20:27 隔日，就是彼月的初二，大衛的位猶原放空。掃羅問伊的子約拿單講：「耶西的子怎樣昨仔日、今仔日無來食？」
20:27 隔日，初二，大闢的位猶原空空。掃羅問約拿單：「耶西的子是按怎昨日今仔日攏無來食？」
20:28 約拿單應掃羅講：「大衛切切求我准伊去伯利恆。
20:28 約拿單應掃羅講：「大闢迫切求我允准伊倒去伯利恆。
20:29 伊講：『求你准我去，因為阮兜佇城內有祭祀；我的兄吩咐我去。今我若佇你的目睭前得著恩典，求你准去見我許個兄』；所以伊無來及王坐桌。」
20:29 伊講：『請你允准我倒去，因為阮兜佇城內有祭祀，我的兄哥吩咐我轉去；今你著施恩互我，准我去見我的兄哥。』因為按呢大闢無來及王坐桌。」
20:30 掃羅對約拿單發受氣，給伊講：「你此個硬心悖逆的婦仁人的子，我豈知你揀耶西的子，家己取凌辱，致到你的老母抵著褪裼的凌辱嗎？
20:30 掃羅對約拿單發性地，給伊講：「你此個不貞背逆的查某人生的子，我都知你徛佇耶西的子彼旁，家己取凌辱，閣互你的老母受著褪裼的見笑。
20:31 因為耶西的子活佇地上的時，你及你的國的確𣍐堅固。今著差人去，掠伊到我遮；伊的確著死。」
20:31 耶西的子若活啲，你及你的王權一定𣍐穩固。今著派人去給掠來我遮。伊一定著死！」
20:32 約拿單應伊的老父掃羅對伊講：「伊啥事著死啊？伊有做甚麼啊？」
20:32 約拿單應講：「伊是按怎著死？伊有做什麼毋著？」
20:33 掃羅擲彼支槍欲鑿約拿單，約拿單就知伊的老父決意欲刣大衛。
20:33 掃羅攑槍射約拿單，欲給伊鑿死。約拿單就知伊的老父決心欲刣大闢。
20:34 對按呢約拿單真受氣，就對桌裡起來佇此初二日無食甚麼。伊因為大衛煩惱，是因為伊的老父凌辱伊。
20:34 約拿單真受氣，對坐位徛起來，初二彼日攏無食什麼。伊為著大闢心艱苦，因為伊的老父侮辱大闢。
20:35 隔早起，約拿單照伊及大衛所約的時出去到田裡，有一個囝仔及伊去。
20:35 隔早起，約拿單照約定，出去野外欲及大闢見面；有一個少年人隨伊去。
20:36 給囝仔講：「你走去，尋我所射的箭。」囝仔走去，伊就射一支箭佇伊的頭前。
20:36 約拿單給少年人講：「你走去尋我射的箭。」彼個少年人一下走去，約拿單就射一支箭，飛過少年人。
20:37 囝仔到約拿單箭射到的所在，約拿單佇囝仔的後面叫講：「箭豈是佇你的頭前嗎？」
20:37 彼個少年人走到約拿單箭落落去的所在，約拿單佇後面喝講：「箭佇你的頭前。」
20:38 約拿單閣叫囝仔講：「趕緊噢緊緊去，通延迁！」約拿單的囝仔就拾許個箭，倒轉來伊的主人遐。
20:38 約拿單閣喝：「趕緊，緊去，毋通延延。」彼個少年人就拾許個箭轉來伊的主人遐，
20:39 總是囝仔知這是甚麼意思，只有約拿單及大衛知此個代誌。
20:39 毋拘伊毋知這是什麼意思，只有約拿單及大闢知。
20:40 約拿單將器械交代囝仔，吩咐講：「你提倒去城內。」
20:40 約拿單將弓及箭交互少年人，吩咐講：「你提倒去城內。」
20:41 囝仔去了後，大衛就對南勢一所在出來，仆佇地裡，拜三拜；二人相唚，相及啼哭，大衛閣卡到極。
20:41 少年人離開了後，大闢對石頭堆後面出來，仆佇土腳給約拿單拜三遍；兩人相唚，攬啲哭，大闢哭甲真激動。
20:42 約拿單給大衛講：「你今平安去，咱二人已經指耶和華的名咒誓講：『願耶和華佇你我的中間，閣佇你的後裔及我的後裔的中間，直到永遠。』」伊就起來去；約拿單也倒去城內。
20:42 約拿單給大闢講：「你通平安去；咱兩人已經有指上主的名咒誓講：『願上主幫贊咱永遠堅守你及我、你的後代及我的後代中間所立的約。』」大闢就離開，約拿單嘛倒去城內。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。