上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
18:1 大衛及掃羅講明白，約拿單的生命及大衛的生命生相連。約拿單疼伊，親像家己的生命。
18:1 大闢及掃羅話講煞。約拿單及大闢心結相連；約拿單疼伊親像疼家己的性命。
18:2 彼日掃羅留伊，無互伊倒去老父的家。
18:2 對彼日起，掃羅給大闢留佇身邊，無互伊倒轉去𪜶老父的厝。
18:3 約拿單及大衛二人結約，因為伊疼伊親像家己的生命。
18:3 約拿單及大闢兩人結約，因為約拿單疼大闢親像家己的性命。
18:4 約拿單褪伊身軀的外衫，互大衛，閣將伊的軍服，連伊的刀，伊的弓，伊的腰帶，也互伊。
18:4 約拿單褪伊的外衫互大闢，閣將軍服，連刀、弓、腰帶嘛攏互伊。
18:5 見若掃羅差伊去叨落，大衛所去無精通。掃羅就設立伊做戰士的頭人，眾百姓及掃羅的人臣攏看做好。
18:5 掃羅無論派大闢去叨位，大闢所做的攏順利，所以掃羅派伊做部隊的指揮官；眾人及掃羅的官長攏真滿意。
掃羅妒忌大衛
18:6 大衛拍死彼個非利士人倒轉，𪜶倒來的時，許個婦女對以色列逐個城出來，唱歌跳舞，用鈴瓏鼓，用歡喜，用作樂的器具，來迎接掃羅王。
掃羅怨妒大闢
18:6 大闢拍死歌利亞倒來的時，所有的婦女對以色列逐個城市庄社出來，唱歌，跳舞，拍玲瓏鼓，彈琴作樂來迎接掃羅王。
18:7 許個婦女跳舞有的唱有的和，講：「掃羅刣死𪜶千千，大衛刣死𪜶萬萬。」
18:7 許個婦女跳舞，有的唱，有的應，講：
掃羅刣死千千；
大闢刣死萬萬。
18:8 掃羅不止受氣，無歡喜此個話，就講：「將萬萬互大衛，千千互我，只有剩國位未互伊若定。」
18:8 掃羅非常受氣，無歡喜此個話，就講：「將萬萬互大闢，千千互我，賰王位猶未互伊若定。」
18:9 對彼日起，掃羅看見大衛就眥伊。
18:9 對彼日起，掃羅看著大闢就給伊睨。
18:10 隔日，對上帝遐來的歹神大大臨到掃羅，伊就佇厝內講先知話。大衛照常用手彈琴，掃羅手裡有槍。
18:10 隔日，對上帝遐來的歹神完全控制掃羅，伊就佇厝內開始亂講話。大闢照常用手彈琴；掃羅手裡有攑槍，
18:11 掃羅用槍擲去，因為講，我欲刺大衛，釘伊佇壁裡。大衛佇伊的面前閃避二擺。
18:11 就給彼支槍射去，想講：「我欲給大闢射迵過，給伊釘佇壁裡。」大闢有兩遍閃開。
18:12 掃羅驚大衛；因為耶和華及伊佇啲，離開掃羅。
18:12 掃羅驚大闢，因為上主離開伊，及大闢同在。
18:13 掃羅才互大衛離開伊，設立伊做千總，伊佇百姓的面前出入。
18:13 因為按呢，掃羅互大闢離開，派伊指揮一千個兵。大闢就做頭領導軍隊。
18:14 大衛見所做的代誌無精通，耶和華及伊佇啲。
18:14 大闢所做的代誌攏成功，因為上主及伊同在。
18:15 掃羅看見大衛所做的代誌真精通，不止驚伊。
18:15 掃羅看著大闢所做的代誌攏成功，就閣較驚伊。
18:16 獨獨以色列及猶大的眾人攏疼大衛，因為伊佇𪜶面前出入。
18:16 毋拘以色列及猶大的人民攏擁護大闢，因為伊攏做頭領導。
大衛娶掃羅的查某子
18:17 掃羅給大衛講：「看啊，我欲用大查某子米拉互你做某，獨獨愛你做我的勇士，替耶和華交戰。」掃羅心內講：「我通親手害伊，著借非利士人的手害伊。」
大闢娶掃羅的查某子
18:17 掃羅給大闢講：「我的大查某子米拉互你做某，毋拘你著做我盡忠的勇士，為上主交戰。」
掃羅心內想：「我毋通親手害伊，著借非利士人的刀互伊死。」
18:18 大衛給掃羅講：「我是是誰，我有甚麼身份，我老父的家佇以色列中是甚麼號的家，我通做王的子婿嗎？」
18:18 大闢給掃羅講：「我算什麼？我有什麼身份？阮的家族佇以色列中算什麼？我哪有資格通做王的子婿？」
18:19 掃羅的查某子米拉定著互大衛的期到啦，竟然互米何拉人亞得列做某。
18:19 掃羅的查某子米拉應該及大闢成親的時到，掃羅竟然將伊互米何拉人亞得列做某。
18:20 掃羅的查某子米甲疼大衛。有人給掃羅講，掃羅歡喜此個事。
18:20 掃羅另外一個查某子米甲愛大闢；有人給掃羅講，掃羅聽了真歡喜。
18:21 掃羅心內講：「我將此個查某子互大衛，做羅網來網伊，通借非利士人的手害伊。」掃羅就給大衛講：「今此個第二擺你通做我的子婿。」
18:21 掃羅心內講：「我將此個查某子嫁互伊，做羅網，通借非利士人的手害死大闢。」
掃羅第二遍給大闢講：「你通做我的子婿。」
18:22 掃羅吩咐人臣講：「恁暗靜給大衛講：『王歡喜你，人臣也疼你，所以你通做王的子婿。』」
18:22 掃羅就吩咐人臣講：「恁私下給大闢講：『王真合意你；人臣嘛真愛你，按呢你通做王的子婿。』」
18:23 掃羅的人臣就將諸個話講互大衛聽。大衛講：「恁拍算做王的子婿是小可事嗎？我是喪鄉卑微的人。」
18:23 掃羅的人臣將諸個話講互大闢聽；大闢講：「恁想，做王的子婿豈是小事？我不過是喪鄉卑微的人。」
18:24 掃羅的人臣回覆講，大衛所講的按呢按呢。
18:24 掃羅的人臣將大闢所講的給伊回復。
18:25 掃羅講：「恁著對大衛按呢講：『王愛甚麼聘禮，只有欲一百個非利士人陽物的皮，通報仇佇王的對敵。』」掃羅的意思欲互大衛死佇非利士人的手。
18:25 掃羅講：「恁著給大闢講，王無愛什麼聘禮，只有愛一百個非利士人的包皮，通替王給對敵報復。」掃羅的企圖是欲互大闢死佇非利士人的手下。
18:26 伊的人臣將諸個話給大衛講，大衛歡喜欲做王的子婿。日期猶未到，
18:26 掃羅的人臣將諸個話給大闢講，大闢就願意做王的子婿。指定的日期到以前，
18:27 大衛起來及隨伊的人起身去，刣死二百個非利士人，大衛帶許個陽物的皮，𪜶就照數額一盡獻互王，互伊通做王的子婿。對按呢掃羅將查某子米甲互伊做某。
18:27 大闢導部下去刣死兩百個非利士人。大闢將許個包皮全數獻互王，通做王的子婿。掃羅就將查某子米甲互大闢做某。
18:28 掃羅看見閣知耶和華及大衛佇啲，閣掃羅的查某子米甲也疼伊，
18:28 掃羅看出上主及大闢同在，閣知查某子米甲嘛愛大闢，
18:29 掃羅益發驚大衛，掃羅常常做大衛的對敵。
18:29 掃羅就閣較驚大闢，歸世人及大闢作對。
18:30 非利士許個首領出來交戰，𪜶逐擺出來，大衛所行比掃羅許個人臣卡精通，對按呢伊的名互人閣尊重。
18:30 非利士的首領常常出來攻擊以色列人；逐遍交戰，大闢的戰果攏比掃羅的官長較輝煌。大闢的名聲愈來愈響。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。