上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
歌利亞向以色列軍挑戰
17:1 非利士人聚集𪜶的軍兵，欲交戰；聚集佇屬猶大的梭哥，紮營佇以弗‧大憫，佇梭哥及亞西加的中間。
歌利亞挑戰以色列人
17:1 非利士人聚集軍隊欲交戰；𪜶佇猶大的梭哥集合，佇梭哥及亞西加中間的以弗‧大憫紮營。
17:2 掃羅及以色列人也聚集，紮營佇以拉的山谷，排隊伍，抵敵非利士人。
17:2 掃羅及以色列人嘛聚集，佇以拉的山谷紮營，排陣欲對抗非利士人。
17:3 非利士人徛佇此旁的山，以色列人徛佇彼旁的山，中間有山谷。
17:3 非利士人及以色列人分別佇兩旁的山排陣，中間有山谷隔開。
17:4 對非利士的營中有一個戰將出來，名叫歌利亞，是迦特人，身軀高六肘閣一𠞉；
17:4 有一個非利士勇士迦特人歌利亞對營內行出來，向以色列人挑戰；伊高三公尺較加，
17:5 頭戴銅盔，身穿有鱗的戰甲，伊的戰甲的銅有五千舍客勒的重；
17:5 頭殼戴銅的頭盔，身軀穿有鱗的戰甲，戰甲重五十七公斤，
17:6 大腿穿銅裙，肩頭中背銅的戟；
17:6 大腿用銅的甲保護，肩頭揹一支銅的槍；
17:7 槍柄大親像布機的軸心，槍尾的鐵有六百舍客勒的重。有一個捾盾牌的行佇伊的頭前。
17:7 槍的柄親像織布機的車心赫粗；干焦槍的頭的鐵就有七公斤重；伊的頭前有一個人給伊夯盾牌。
17:8 伊徛啲對以色列的軍隊喝，給𪜶講：「恁出來排隊伍欲啥事啊？我豈是非利士人，恁豈是掃羅的奴僕嗎？恁中間揀一人，互伊落來我遮。
17:8 伊徛啲，對以色列軍隊喝講：「恁排陣欲創啥？我是非利士的勇士，恁是掃羅的部下。恁揀一個人落來遮，
17:9 伊若會及我相刣，刣死我，阮就欲做恁的奴才；我若卡贏伊，刣死伊，恁就欲做阮的奴才，服事阮。」
17:9 伊若有才調及我鬥輸贏，閣給我刣死，阮就做恁的奴才；伊若互我刣死，恁就做阮的奴才服事阮。」
17:10 彼個非利士人閣講：「我今仔日藐視以色列諸個軍隊。恁叫一人出來，及我相刣。」
17:10 彼個非利士人閣講：「今仔日我對以色列軍隊嗆聲；好膽派一個及我拼生死！」
17:11 掃羅及以色列眾人聽見非利士人諸個話，就真愞，真驚。
17:11 掃羅及以色列軍兵聽著非利士人諸個話，攏真懍，真驚。
大衛佇掃羅的營中
17:12 大衛是猶大、伯利恆的以法他人耶西的子。耶西有八個子。當掃羅的時，耶西年歲多佇人的中間算是老人。
17:12 大闢是猶大 伯利恆的以法他人耶西的子。耶西有八個子。掃羅作王的時，耶西年歲多，已經老。
17:13 耶西許個子三個卡序大的隨掃羅去出征。去出征彼三個子：大的名以利押，第二亞比拿達，第三個沙瑪。
17:13 耶西三個較大漢的子攏隨掃羅出征；上大的叫做以利押，第二的亞比拿達，第三的沙瑪。
17:14 大衛是第一細的；彼三個卡序大的跟隨掃羅。
17:14 大闢是煞尾子；彼三個兄哥跟隨掃羅的時，
17:15 大衛往來佇掃羅的所在，佇伯利恆飼伊的老父的羊。
17:15 大闢為著欲飼𪜶老父的羊群，佇伯利恆及掃羅遐來來去去。
17:16 彼個非利士人早暗出來徛啲展，歷過四十日。
17:16 彼個非利士人早暗出來挑戰，有四十日久。
17:17 耶西給伊的子大衛講：「你著給你許個兄帶烘的五穀一伊法及此十個餅，緊緊去軍營，互你許個兄；
17:17 有一日，耶西給伊的子大闢講：「你緊將焙好的麥穗十公斤，及十個餅提去軍營互恁兄哥；
17:18 閣帶此十個牛奶餅，送互𪜶的千總，閣問你的兄平安無，帶伊的證據來。」
17:18 閣帶十塊起司，送互𪜶的指揮官。去看恁兄哥有平安無，續帶證據轉來。
17:19 掃羅及大衛三個兄及以色列眾人，佇以拉的山谷及非利士人交戰。
17:19 掃羅及恁三個兄哥，以及以色列眾人，佇以拉的山谷及非利士人啲交戰。」
17:20 大衛透早起來，用羊群放交一個顧守的人，照耶西所命令伊的，帶食物去。到排列車的所在，軍兵抵仔出去到戰場，喝欲交戰。
17:20 第二日透早，大闢將羊群交互別人顧，就照耶西的吩咐帶食物去到軍營；彼時軍隊抵仔出去戰場，喝聲欲交戰。
17:21 以色列人及非利士人攏排列隊伍，兩旁的軍隊相對。
17:21 以色列人及非利士人攏排陣相對。
17:22 大衛用物件交代顧物件的人的手，走到戰場，請安伊的兄。
17:22 大闢給物件交代顧守的人，就走去戰場，給伊的兄哥請安。
17:23 及𪜶講話的時，看啊，彼個戰將，就是迦特的非利士人名歌利亞，對非利士的隊伍出來，照前所講的來講；大衛聽見。
17:23 伊及𪜶講話的時，看著彼個非利士的勇士迦特人歌利亞對營內出來，給以色列人講仝款的話；大闢攏有聽著。
17:24 以色列眾人看見彼人，就走閃伊，盡在驚。
17:24 以色列眾人一下看著彼個人就驚惶逃走。
17:25 以色列人講：「此個上來的人，你有看見嗎？伊上來是欲藐視以色列。若有人會刣死伊，王欲互伊大好額，將伊的查某子嫁伊，閣互伊老父一家佇以色列中免納稅當差。」
17:25 以色列人講來講去：「彼個行出來的人，恁有看著無？伊出來給以色列人嗆聲。給伊刣死的人，王有一大筆獎金欲互伊，嘛欲將查某子嫁互伊，閣互𪜶老父全家免納稅金，免服事王。」
17:26 大衛問徛佇伊身邊許個人：「有人刣死此個非利士人，洗除以色列的見誚，欲怎樣款待伊啊？此個無受割禮的非利士人是是誰？敢藐視永活上帝的軍隊嗎？」
17:26 大闢問徛佇伊身邊許個人：「刣死彼個非利士人，洗除以色列的見笑此個人會得著什麼？彼個無受割禮的非利士人是啥人，閣敢給永活上帝的軍隊嗆聲！」
17:27 百姓照前的話應伊講：「若有人會刣死此人，欲按呢款待伊。」
17:27 軍兵就照前的話給大闢回答，講刣死彼個人的，會當得著什麼報賞。
17:28 大衛的大兄以利押聽見伊及人啲講話，以利押受氣大衛，講：「你啥事落來遮？彼幾隻羊佇曠野裡，你放交是誰啊？我知你驕傲及你心內的歹，你落來不過是欲看交戰！」
17:28 大闢的大兄以利押聽著大闢及人講話，就對伊發受氣，講：「你哪來遮？曠野彼幾隻羊你放互啥人顧？我知，你假𠢕；你啲想啥我攏知。你來是欲看人相刣。」
17:29 大衛講：「我有做甚麼？豈是無因端嗎？」
17:29 大闢講：「我無做什麼，問一下也𣍐用得噢？」
17:30 大衛就離開伊去向別人，照前的話啲問；百姓照前的話來應伊。
17:30 大闢就離開去尋別人，問仝款問題，軍兵嘛用仝款的話應伊。
17:31 大衛所講的話已經互人聽見，𪜶就講佇掃羅的面前；掃羅就差人叫伊來。
17:31 有人聽著大闢講的話，就去給掃羅報告；掃羅就派人叫大闢來。
17:32 大衛給掃羅講：「人免為著彼人來失膽。你的奴僕欲去及彼個非利士人交戰。」
17:32 大闢給掃羅講：「咱毋免驚彼個非利士人，請互你的僕人去及伊決鬥。」
17:33 掃羅對大衛講：「你𣍐會去抵敵此個非利士人及伊交戰；因為你的年歲猶久少，伊對少年就學習戰事。」
17:33 掃羅對大闢講：「你無法度及此個非利士人決鬥；你猶少歲，毋拘伊對少年就做戰士。」
17:34 大衛給掃羅講：「你的奴僕給老父顧羊的時，有獅抑是熊來，對羊群中咬羊仔去。
17:34 大闢給掃羅講：「我給阮老父顧羊的時，有獅抑是熊來咬羊仔；
17:35 我就趇伊，拍伊，救羊仔出伊的嘴。伊起來欲共我，我就搝伊的嘴下斗，拍死伊。
17:35 我就給趇，給拍，將羊仔對𪜶的嘴救出來。獅抑是熊若欲咬我，我就摠伊的嘴鬚，給伊拍死。
17:36 你的奴僕曾拍死獅及熊，此個無受割禮的非利士人，也欲親像𪜶的一隻，因為伊藐視永活上帝的軍隊。」
17:36 我曾拍死獅及熊；此個無受割禮的非利士人，我嘛欲按呢給拍死，因為伊藐視永活上帝的軍隊。」
17:37 大衛閣講：「耶和華救我脫離獅的爪及熊的爪，伊也欲救我脫離此個非利士人的手。」掃羅給大衛講：「你去啊，耶和華欲及你佇啲。」
17:37 大闢閣講：「上主有救我脫離獅及熊的爪，伊嘛會救我脫離此個非利士人的手。」
掃羅給大闢講：「你去，上主及你同在。」
17:38 掃羅就用伊的軍服互大衛穿，用銅的頭盔互伊戴，閣互伊穿戰甲。
17:38 掃羅就用家己的軍服互大闢穿，用銅的頭盔互伊戴，閣互伊穿戰甲。
17:39 大衛用刀縖佇軍服，試行看唧；因為曾穿著，大衛給掃羅講：「穿諸個我行𣍐去，因為曾穿著。」
17:39 大闢給刀縖啲。因為伊無慣勢穿諸個，就試行看覓咧，然後給掃羅講：「穿諸個我行𣍐去，因為𣍐慣勢。」大闢就攏褪起來。
17:40 大衛就褪起來。伊手攑枴仔，閣佇山坑仔揀五塊光滑的石卵，下佇袋仔，就是顧羊的人所帶的囊；手提甩石的索仔，就行倚彼個非利士人。
17:40 大闢手攑柺仔，去溪邊揀五粒光滑的石頭，囥佇伊顧羊啲用的袋仔，手提挕索，然後行倚彼個非利士人。
大衛刣死歌利亞
17:41 彼個非利士人也愈行倚大衛，捾牌的行佇伊的頭前。
17:41 像時，彼個非利士人嘛行倚大闢；攑盾牌的兵行佇頭前。
17:42 彼個非利士人攑起來看，看見大衛，就看輕伊；因為伊少歲，色緻赤，面貌好看。
17:42 彼個非利士人看著大闢，就看輕伊；因為伊少年，紅膏赤蠘，生做英俊。
17:43 彼個非利士人給大衛講：「我豈是狗嗎，你才攑枴仔來我遮？」非利士人就指家己的上帝咒詛大衛。
17:43 彼個非利士人對大闢講：「我豈是狗？你攑柺仔欲創啥？」非利士人就指家己的神明咒詛大闢。
17:44 彼個非利士人閣給大衛講：「你來我遮，我欲用你的肉互空中的飛鳥及田野的野獸。」
17:44 彼個非利士人閣給大闢講：「來，我欲用你的肉飼鳥仔及野獸。」
17:45 大衛對彼個非利士人講：「你來倚近我，是用刀用槍用戟；我來倚近你，是用萬軍耶和華的名，以色列軍隊的上帝就是你所藐視者。
17:45 大闢對彼個非利士人講：「你是攑刀，攑長槍、短槍來攻擊我；我是奉上主 — 萬軍的統帥的名，就是你所藐視以色列軍隊的上帝，來攻擊你。
17:46 今仔日耶和華欲將你交佇我的手。我欲拍死你，刣你的頭殼，今仔日我欲將非利士軍兵的身屍互空中的飛鳥、地上的野獸，互普天下的人攏知以色列有上帝；
17:46 今仔日上主欲將你交佇我的手；我欲給你刣死，給你斬頭。今仔日我欲用非利士軍兵的身屍飼鳥仔及野獸，互全世界的人攏知以色列有上帝；
17:47 閣互諸個歸群的人知耶和華救人，是用刀也是用槍，因為交戰的事在佇耶和華。伊欲將恁交佇阮的手。」
17:47 閣互所有聚集佇遮的人攏知，上主互人得勝毋是用刀，毋是用槍。交戰的勝敗上主啲決定；伊欲將恁交佇阮的手。」
17:48 彼個非利士人起來，進前近倚欲接大衛。大衛也趕緊走去，向軍隊欲接非利士人。
17:48 歌利亞行進前欲攻擊大闢。大闢趕緊走進前去迎戰。
17:49 大衛伸手入袋仔內提一塊石仔出來，用索甩去，射著非利士人的頭額，石仔沈入頭額，伊就倒落去，面仆佇地裡。
17:49 大闢對袋仔內提一粒石頭出來，用挕索挕去，抌著歌利亞的頭額，石頭鑽入頭額，伊就倒落去，面仆佇地裡。
17:50 按呢，大衛用甩索及石仔，卡贏非利士人，拍死伊；總是大衛的手無刀。
17:50 按呢，大闢無用刀，只有用挕索及石頭就拍死歌利亞。
17:51 大衛緊緊走去，徛佇彼個非利士人的頂面，將伊的刀拔出鞘，用彼支刣死伊，斬伊的頭殼。非利士眾人看見𪜶的勇士已經死，就走。
17:51 大闢走去，踏佇歌利亞的身軀頂，然後將伊的刀拔出來，給伊刣死，斬斷伊的頭。非利士人看著𪜶的勇士已經死，就攏逃走。
17:52 以色列人及猶大人就起來喝喊，追趇非利士人，到迦特及以革倫的城門。著傷的非利士人倒佇沙拉音的路，直到迦特及以革倫。
17:52 以色列人及猶大人就那喝喊那追殺非利士人，追到迦特及以革倫的城門；對沙拉音到迦特及以革倫，沿路攏是屍體。
17:53 以色列人追趇非利士人倒轉來，就搶𪜶的營盤。
17:53 以色列人追殺非利士人了後，倒轉來搶奪𪜶的營地。
17:54 大衛將彼個非利士人的頭殼帶到耶路撒冷，閣用伊的軍器下佇家己的布棚。
17:54 大闢將歌利亞的頭帶到耶路撒冷，毋拘給伊的軍器囥佇家己的布棚。
大衛見掃羅
17:55 掃羅看見大衛去拍非利士人的時，就問軍長押尼珥講：「押尼珥啊，彼個少年人是是誰的子？」押尼珥講：「我指王的活命來咒誓，我知。」
掃羅召見大闢
17:55 掃羅看著大闢去迎戰非利士人的時，問元帥押尼珥講：「押尼珥，彼個少年人是啥人的子？」
押尼珥講：「我指王的性命咒誓，我毋知。」
17:56 王講：「你去問看彼個囝仔是是誰的子。」
17:56 王講：「你去問看彼個少年人是啥人的子。」
17:57 大衛拍死非利士人倒來，押尼珥導伊來掃羅的面前，伊的手裡有非利士人的頭殼。
17:57 大闢拍死歌利亞倒來，押尼珥就導伊來見掃羅，伊的手猶捾歌利亞的頭。
17:58 掃羅問伊講：「少年人啊，你是甚麼人的子？」大衛講：「我是你的奴僕伯利恆人耶西的子。」
17:58 掃羅問伊講：「少年人，你是啥人的子？」
大闢講：「我是你的僕人伯利恆人耶西的子。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。