上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
及亞瑪力人交戰
15:1 撒母耳給掃羅講：「耶和華差我用油抹你設立你做王，治理伊的百姓以色列；所以你著聽耶和華所講的話。
及亞瑪力人交戰
15:1 撒母耳給掃羅講：「上主差我來給你抹油，設立你作王，治理伊的子民以色列。所以，你著聽趁上主所講的話。
15:2 萬軍的耶和華按呢講：『以色列人出埃及的時，亞瑪力人怎樣款待𪜶，怎樣截𪜶的路，我攏記得。
15:2 上主 — 萬軍的統帥按呢講：『我欲刑罰亞瑪力人，因為以色列人出埃及的時，亞瑪力人曾阻礙敵對𪜶。
15:3 今你著去拍亞瑪力，一盡滅無𪜶所有的，莫得保惜𪜶，將男女、囝仔、食奶的、及牛、羊、駱駝，及驢一盡刣死𪜶。』」
15:3 今你著去拍亞瑪力人，給𪜶剿滅。什麼都毋通留啲；著將男、女、囝仔、嬰仔，及牛、羊、駱駝、驢，攏刣死。』」
15:4 掃羅就招集百姓佇提拉因，點算𪜶，共步兵二十萬，猶大人一萬。
15:4 掃羅就召集軍兵佇提鍊，點算人數，步兵二十萬，猶大人一萬。
15:5 掃羅到亞瑪力的城，埋伏佇山谷中。
15:5 掃羅來到亞瑪力的城，埋伏佇山谷中。
15:6 掃羅給基尼人講：「恁落去離開亞瑪力人，免得我將恁及𪜶做一下剿滅；因為以色列人出埃及的時，恁曾好款待𪜶。」對按呢基尼人離開亞瑪力人去。
15:6 掃羅給基尼人講：「恁離開亞瑪力人去別位，才免我給恁及𪜶做一下剿滅；因為以色列人出埃及的時，恁曾好款待𪜶。」基尼人就離開亞瑪力人。
15:7 掃羅拍亞瑪力人，對哈腓拉到埃及頭前的書珥，
15:7 掃羅攻擊亞瑪力人，對哈腓拉到埃及東旁的書珥。
15:8 伊活活掠亞瑪力王亞甲，用刀一盡刣死伊的眾百姓。
15:8 伊活掠亞瑪力王亞甲，刣死伊攏總的人民。
15:9 總是掃羅及百姓保惜亞甲，也保惜上好的羊、牛、牛仔、羊仔，及一切好的物，肯剿滅伊。見若下賤成物的，攏一盡刣死。
15:9 毋拘掃羅及軍兵留亞甲，及上好的牛、羊、牛仔、羊仔，以及一切的好物，毋肯給𪜶剿滅，只有毀滅許個無路用、無價值的物件。
掃羅受廢
15:10 彼時耶和華的話臨到撒母耳講：
上主棄拺掃羅
15:10 上主對撒母耳講：
15:11 「我為著設立掃羅做王，來退悔；因為伊越轉去無隨我，無遵守我的命令。」撒母耳真慼心，通暝求耶和華。
15:11 「我後悔選立掃羅作王，因為伊背叛我，無遵守我的命令。」撒母耳真慼心，歸暝求叫上主。
15:12 撒母耳隔早起，透早欲去迎接掃羅。有人給撒母耳講：「掃羅到迦密，佇遐為家己徛石碑，閣越轉過去落到吉甲。」
15:12 隔日透早，撒母耳欲去見掃羅；有人給撒母耳講：「掃羅已經去迦密，佇遐為著家己徛石碑，後來斡去吉甲。」
15:13 撒母耳到掃羅遐，掃羅給伊講：「願耶和華賜福你，我已經遵守耶和華的命令啦。」
15:13 撒母耳到掃羅遐，掃羅給伊講：「願上主賜福你。我已經照上主的命令做啦。」
15:14 撒母耳講：「按呢就此個羊咩咩哮入我的耳孔，及我所聽牛啲哞，是甚麼因端？」
15:14 撒母耳講：「按呢噢？我哪有聽著牛及羊啲哮的聲？」
15:15 掃羅講：「𪜶對亞瑪力人遐帶來的，因為百姓保惜上好的羊、牛，欲獻互耶和華──你的上帝；其餘的，阮攏剿滅。」
15:15 掃羅講：「許個是我的軍兵對亞瑪力人遐掠來的；因為𪜶留上好的牛、羊，欲獻互上主 — 你的上帝；其他的阮攏有給剿滅。」
15:16 撒母耳給掃羅講：「你恬恬！我欲將耶和華昨暝所給我講的給你講。」伊給伊講：「請講。」
15:16 撒母耳給掃羅講：「你恬去！我欲給你講昨暝上主給我講的話。」
掃羅給伊講：「請講。」
15:17 撒母耳講：「早你雖然家己看做微細，豈是受設立做以色列支派的頭嗎？耶和華用油抹你做王來治理以色列。
15:17 撒母耳講：「雖然你看家己做微細，上主豈毋是互你做以色列眾支族的領袖？上主用油抹你作王，來治理以色列。
15:18 閣耶和華差你起身去，吩咐你講，亞瑪力人是有罪的人，你去一盡剿滅伊，閣及𪜶交戰到𪜶攏滅。
15:18 上主閣派你去，命令你講：『你去及邪惡的亞瑪力人交戰，著給𪜶攏剿滅。』
15:19 你啥事無趁耶和華的話，趕緊去搶物，行耶和華所看做歹的事啊？」
15:19 你是按怎無聽趁上主的話，闖去搶戰利品，做上主看做歹的代誌？」
15:20 掃羅給撒母耳講：「我實在有聽趁耶和華的命令，行耶和華所差我行的路，掠亞瑪力王亞甲來，一盡滅亞瑪力人。
15:20 掃羅給撒母耳講：「我有聽趁上主的命令，照伊的指示去交戰，掠亞瑪力王亞甲來，閣刣死所有的亞瑪力人。
15:21 獨獨百姓對所搶的物的中間，取羊牛應該獻的物的上好的，欲佇吉甲祭獻耶和華──你的上帝。」
15:21 毋拘我的軍兵對應該著毀滅的戰利品中間，留上好的牛及羊，帶來吉甲欲獻互上主 — 你的上帝。」
15:22 撒母耳講：
耶和華歡喜燒祭祭祀，
豈親像歡喜人遵趁耶和華的話嗎？
看啊，遵趁贏過獻祭；
聽趁是贏過羊牨的油。
15:22 撒母耳講：
「上主豈意愛燒化祭及祭物，
較贏意愛人遵趁伊的話？
你著知，聽趁比獻祭較好，
順趁贏過羊的油。
15:23 因為背叛是親像行邪術的罪；
硬心是親像服事虛假親像拜偶像。
為著你棄拺耶和華的話，
伊也棄拺你無互你做王。
15:23 背叛親像行邪術是犯罪；
自高親像拜偶像是邪惡。
因為你棄拺上主的話，
伊嘛棄拺你，毋互你作王。」
掃羅認罪
15:24 掃羅對撒母耳講：「我有罪，因為我有犯著耶和華的命令及你的話，是對我驚百姓，聽𪜶的話。
15:24 掃羅對撒母耳講：「我有犯罪，違背上主的命令及你的話，因為我驚軍兵，聽𪜶的話。
15:25 今求你赦免我的罪，及我倒去，互我通敬拜耶和華。」
15:25 今，求你赦免我的罪，及我做夥倒去，互我通敬拜上主。」
15:26 撒母耳給掃羅講：「我及你倒去；因為你棄拺耶和華的命令，耶和華也棄拺你無互你做以色列的王。」
15:26 撒母耳給掃羅講：「我毋及你倒去；因為你棄拺上主的話；上主嘛棄拺你，毋互你做以色列的王。」
15:27 撒母耳越轉身欲去，掃羅就搝伊的衫仔裾，衫就拆斷。
15:27 撒母耳越轉身欲離開，掃羅扭伊的衫仔裾，衫煞裂去。
15:28 撒母耳給伊講：「今仔日耶和華互以色列國及你絕斷，也是按呢，將伊賞賜你的厝邊的一個比你卡好者。
15:28 撒母耳給伊講：「今仔日上主互以色列國及你斷絕關係，將以色列國交互一個佇你身邊，比你較好的人。
15:29 以色列的大顯赫者無白賊，也無退悔；因為伊是世間人，有退悔。」
15:29 以色列的大能者，𣍐白賊，嘛𣍐改變心意；因為伊毋是世間人，伊𣍐改變心意。」
15:30 掃羅講：「我有罪，雖然按呢，求你尊重我佇我的百姓的長老及以色列人的面前，及我倒去，互我敬拜耶和華──你的上帝。」
15:30 掃羅講：「我有犯罪；請你佇父老及以色列人面前尊重我，及我做夥倒去，互我通敬拜上主 — 你的上帝。」
15:31 撒母耳就越轉身隨掃羅去，掃羅就敬拜耶和華。
15:31 撒母耳就越轉身隨掃羅倒去；掃羅就敬拜上主。
15:32 撒母耳講：「恁著帶亞瑪力王亞甲來我遮。」亞甲就安心來到伊的面前，亞甲講，死無的艱苦的確過去啦。
15:32 撒母耳講：「恁導亞瑪力王亞甲來我遮。」亞甲就驚驚惶惶來到撒母耳面前；亞甲講：「我死期到啦。」
15:33 撒母耳講：「你的刀曾互婦仁人無子，按呢，你的老母佇婦仁人中也欲無子。」對按呢，撒母耳佇吉甲耶和華的面前將亞甲破歸塊。
15:33 撒母耳講：「你曾用刀刣死婦仁人的子，恁老母的子嘛會互人刣死。」撒母耳佇吉甲，佇上主面前，將亞甲斬做一塊一塊。
15:34 撒母耳去拉瑪。掃羅上去伊的厝，到掃羅的基比亞。
15:34 撒母耳倒去拉瑪；掃羅轉去基比亞伊的厝。
15:35 撒母耳到伊死的日，無閣來見掃羅；因為撒母耳為著掃羅憂悶，耶和華因為設立掃羅做以色列王也退悔。
15:35 撒母耳死以前，無閣及掃羅見面；伊為著掃羅憂傷。上主嘛因為有設立掃羅做以色列王艱苦心。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。