上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
約拿單的勇敢戰績
14:1 有一日，掃羅的子約拿單給攑伊的軍器的少年人講：「來，咱來去彼旁，到非利士人軍營遐。」總是伊無給𪜶老父講。
約拿單攻擊非利士人
14:1 有一日，掃羅的子約拿單給攑伊的軍器的少年人講：「咱來去非利士人的軍營彼旁。」毋拘約拿單無給伊的老父講。
14:2 掃羅佇基比亞的極頭，坐佇米磯崙的石榴樹腳，隨伊的約略有六百人。
14:2 掃羅佇基比亞的郊外，坐佇米磯崙的石榴樹腳；隨伊的人約有六百。
14:3 閣有亞希突的子亞希亞，帶以弗得。（是以迦博的兄，非尼哈的子，以利的孫，就是佇示羅做耶和華的祭司的。）百姓知約拿單去。
14:3 閣有亞希突的子亞希雅帶以弗得來佇遐。伊是以迦博的兄哥，非尼哈的子，是曾佇示羅做上主祭司的以利的孫。無人知約拿單已經離開營地。
14:4 約拿單欲去非利士的軍營所欲過許個隘口的中間。此旁有石的山尖彼旁也有石的山尖：一個名播設，一個名西尼；
14:4 約拿單欲去非利士的軍營著經過的隘口，兩旁攏是尖尖真崎的石壁，一個叫做播薛，一個叫做西尼；
14:5 一個石的山尖佇北旁，及密抹相對，一個石的山尖佇南旁，及迦巴相對。
14:5 北旁的石壁及密抹相對，南旁的石壁及迦巴相對。
14:6 約拿單給攑伊的軍器的少年人講：「來，咱來去無受割禮的人的軍營遐，豈採耶和華欲替咱做代誌；因為耶和華的救人，無限定人的多少。」
14:6 約拿單給攑伊的軍器的少年人講：「來，咱來去無受割禮的人的軍營遐，可能上主會幫贊咱，因為上主互人得勝毋是在佇人多人少。」
14:7 攑伊的軍器者給伊講：「照你的心所愛的攏行伊。通進前去，我及你同心，欲隨你去。」
14:7 攑軍器的給伊講：「我及你同心，你照你所愛的去做；你做前，我隨你。」
14:8 約拿單講：「咱欲經過到許個人遐，互𪜶看見咱。
14:8 約拿單講：「來！咱過來去𪜶遐，互𪜶看著咱；
14:9 𪜶若按呢給咱講：『恁徛啲，聽候阮到恁遐』，咱就定定徛啲，無上去𪜶遐。
14:9 𪜶若給咱講『徛咧！等阮過去』，咱就定定徛啲，上去。
14:10 𪜶若講：『恁上來阮遮』，咱就上去，因為耶和華將𪜶交佇咱的手，此個話通做咱的證據。」
14:10 毋拘𪜶若講『來阮遮』，咱就上去；這是上主將𪜶交佇咱的手的記號。」
14:11 二人就互非利士防守的兵看見。非利士人講：「希伯來人對所匿的洞出來！」
14:11 𪜶兩人就刁故意互非利士防守的兵看著；非利士人講：「你看，希伯來人對𪜶匿的洞出來啦。」
14:12 防守的兵給約拿單及攑伊的軍器的人講：「恁上來阮遮，阮有一項代誌欲報恁。」約拿單就給攑伊的家私者講：「你隨我上去，因為耶和華將𪜶交佇以色列人的手。」
14:12 防守的兵給約拿單及攑軍器的人講：「恁過來，阮欲互恁知死。」
約拿單就給攑軍器的講：「你隨我上去；因為上主已經將𪜶交佇以色列人的手。」
14:13 約拿單就用手擒腳踜上去，攑伊的軍器的人隨伊。非利士人倒佇約拿單的面前，攑伊的軍器的人也隨伊的後面來刣𪜶。
14:13 約拿單就手擒腳踜𬦰起去，攑軍器的隨伊。約拿單拍倒非利士人，攑軍器的隨後面刣死𪜶。
14:14 約拿單及攑伊的軍器的人起頭所刣的約略二十人，攏是佇半畝園的犂溝。
14:14 第一遍突擊，約拿單及攑軍器的佇四分一公頃內刣死約二十人。
14:15 對按呢佇營盤、佇田野、佇眾百姓的中間攏愕愕惙，防守的兵及搶劫的兵也攏愕愕惙，地也振動，致到愕愕惙到極。
14:15 所有的非利士軍兵，無論佇軍營，佇野外；無論防衛的，突擊的，攏驚甲皮皮惙；大地嘛搖動，這是上帝降落互𪜶的大恐怖。
非利士人敗退
14:16 佇便雅憫的基比亞，掃羅守望的兵啲看，看見非利士的眾軍兵四散，四界亂亂走。
非利士人刣輸
14:16 佇便雅憫地區的基比亞，掃羅的哨兵看著非利士軍兵四散，四界亂闖。
14:17 掃羅就給隨伊的百姓講：「恁點算，看是誰對咱遮出去？」𪜶點算了，就知約拿單及攑伊的軍器的人無佇啲。
14:17 掃羅給隨伊的軍兵講：「恁點算，看啥人對咱遮出去。」𪜶算了，就知約拿單及給伊攑軍器的人無佇遐。
14:18 掃羅給亞希亞講：「你著帶上帝的約櫃來。」因為彼時上帝的約櫃佇以色列人的所在。
14:18 掃羅給亞希雅講：「你將上帝的約櫃扛來。」彼陣上帝的約櫃佇以色列人遐。
14:19 掃羅及祭司講話的時，非利士營中喊嘩的聲愈久愈大；掃羅就給祭司講：「免動你的手！」
14:19 掃羅及祭司講話的時，非利士營中喊喝的聲愈來愈大。掃羅就給祭司講：「免啦！𣍐赴問囉！」
14:20 掃羅及隨伊的百姓攏聚集，來到戰場，看見非利士人逐個用刀相剆，真大亂。
14:20 掃羅及隨伊的軍兵攏聚集來到戰場，看著非利士人互相殘殺，大混亂。
14:21 以前倚非利士人的希伯來人對四方隨到伊的營的，今也反轉來幫助隨掃羅及約拿單的以色列人。
14:21 以前倚非利士人，對逐所在來到𪜶營中的希伯來人，現在反倒轉來幫贊隨掃羅及約拿單的以色列人。
14:22 許個匿佇以法蓮山地的以色列人聽見非利士人逃走，𪜶就出來趇倚𪜶的後面來交戰。
14:22 許個匿佇以法蓮山區的以色列人聽著非利士人逃走，就出來追殺𪜶，及𪜶交戰。
14:23 彼日，耶和華拯救以色列，直直戰到伯‧亞文。
14:23 彼日上主互以色列得勝；戰爭延續到伯‧亞文彼旁。
戰後發生的事件
14:24 彼日以色列人真困苦，因為掃羅向百姓咒誓講，無等到日暗，聽候我報我的對敵的冤讎的代先，食物的人著受咒詛。所以百姓無食甚麼。
戰後的事件
14:24 彼日以色列人枵甲真艱苦，因為掃羅有咒誓，命令軍兵講：「無等到日暗，我給對敵報冤仇了就食物件的人著受咒詛。」所以軍兵攏無食什麼。
14:25 眾百姓入樹林，看見有蜜佇地上。
14:25 𪜶入樹林，發見此所在土腳攏有蜜。
14:26 百姓入樹林，看見有蜜啲滴，總是無人敢用手提入嘴，因為百姓驚許個咒誓的話。
14:26 軍兵入樹林，看著有蜜啲滴，毋拘無人敢用指頭仔挖來食，因為驚受咒詛。
14:27 約拿單無聽見𪜶老父向百姓咒誓，所以伸伊手裡的枴仔尾，托佇蜜房，伊的手越到嘴裡，目睭就金。
14:27 約拿單無聽著𪜶老父的咒誓，所以伸枴仔尾揬蜜房，然後用指頭仔挖來食，目睭就金，回復元氣。
14:28 百姓中有一人給伊講：「你的老父向百姓嚴嚴咒誓講，今仔日食甚麼的，著受咒詛；百姓就真厭倦。」
14:28 有一個軍兵對伊講：「你的老父有嚴嚴咒誓命令軍兵講：『今仔日食物件的著受咒詛。』所以軍兵真厭倦。」
14:29 約拿單講：「我的父害著此個地方。恁看，我試此一點仔蜜，目睭就金。
14:29 約拿單講：「阮老父有害著咱諸個軍兵。恁看，我干焦啖一點仔蜜，就回復元氣；
14:30 何況百姓今仔日若出在意思食𪜶所搶對敵的物，拍死非利士人豈無閣卡多嗎？」
14:30 今仔日若出在軍兵食𪜶給對敵搶來的食物，豈毋是閣較有力通拍死較多非利士人？」
14:31 彼日，𪜶拍非利士人，對密抹到亞雅崙。百姓真厭倦，
14:31 彼日，𪜶拍敗非利士人，對密抹趕到亞雅崙；軍兵非常厭倦。
14:32 百姓就趕緊走去提所搶的羊、牛、牛仔子刣佇地裡，肉猶有血就食伊。
14:32 軍兵闖去掠所搶的牛、羊、牛仔子，就佇遐刣，食含血的肉。
14:33 有人給掃羅講：「百姓得罪耶和華啦，因為𪜶食猶有血的肉。」伊講：「恁差謬啦，今著翱大塊石來我遮。」
14:33 有人給掃羅報告：「軍兵有犯罪違背上主，因為𪜶食含血的肉。」掃羅大聲喝：「恁得罪上主啦！今去翱一塊大石來遮。」
14:34 掃羅閣講：「恁著四界行佇百姓的中間，給𪜶講，逐人牽𪜶的牛逐人牽𪜶的羊來我遮，佇遮刣來食；通食猶有血的肉來得罪耶和華。」彼暝，百姓逐人牽𪜶的牛去遐刣。
14:34 掃羅閣講：「恁著去叫逐個軍兵牽𪜶的牛及羊來我遮，佇遮刣來食；毋通食含血的肉來得罪上主。」彼暝軍兵攏牽𪜶家己的牛去遐刣。
14:35 掃羅給耶和華起一座壇，這是伊頭一擺給耶和華起的壇。
14:35 掃羅給上主起一座祭壇；這是伊頭一遍給上主起的壇。
14:36 掃羅講：「咱今著透暝落去趇非利士人，搶𪜶，到天光，無留𪜶一人。」百姓講：「你所看做好的就行伊！」祭司講：「咱著來遮親近上帝。」
14:36 掃羅講：「今咱著透暝落去趇非利士人，給𪜶搶，直到天光，給𪜶攏刣死，連一個都毋通留啲。」
軍兵講：「你看做好的，就照按呢做。」
祭司講：「咱著代先問上帝。」
14:37 掃羅問上帝講：「我著落去趇非利士人抑免？你欲將𪜶交互以色列的手嗎？」彼日上帝無應伊。
14:37 掃羅就問上帝：「我著落去趇非利士人無？你豈會給𪜶交互以色列人？」彼日上帝無應伊。
14:38 掃羅講：「恁百姓中的序大攏著上來遮，查明今仔日此個罪是在佇甚麼。
14:38 掃羅講：「恁軍隊的官長攏來我遮，查明咱今仔日有犯著什麼罪。
14:39 我指救以色列──永活的耶和華來講，雖然我的子約拿單，伊也著死。」總是百姓中無一人應伊。
14:39 我指互以色列勝利的永活的上主咒誓：『犯罪的人攏著死，甚至我的子約拿單，嘛著死。』」毋拘無人應伊。
14:40 伊就給以色列的眾人講：「恁徛此旁，我及我的子約拿單徛彼旁。」百姓對掃羅講：「你看做好的就行伊！」
14:40 伊就給以色列眾人講：「恁徛彼旁，我及我的子約拿單徛此旁。」
軍兵對掃羅講：「你看做好的，就照按呢做。」
14:41 掃羅給耶和華──以色列的上帝講：「求你指示實情。」對按呢拈著約拿單及掃羅；百姓攏無代誌。
14:41 掃羅對上主 — 以色列的上帝講：「求你指示實情，看啥人有罪。」𪜶就抽著約拿單及掃羅，軍兵無代誌。
14:42 掃羅講：「著佇我，及我的子約拿單的中間來拈鬮。」就拈著約拿單。
14:42 掃羅講：「著佇我及我的子約拿單中間抽看啥人有罪。」𪜶抽著約拿單。
14:43 掃羅給約拿單講：「你給我講，你做甚麼事？」約拿單講：我實在用手裡的柺仔尾，搵一點仔蜜來試覓啲。按呢我著死啊？」
14:43 掃羅給約拿單講：「你給我講，你有做什麼代誌。」
約拿單講：「我確實有用枴仔尾挖一點仔蜜來啖。我甘願死。」
14:44 掃羅講：「約拿單啊，你的確著死！願上帝按呢行，也比按呢猶卡重。」
14:44 掃羅講：「約拿單，你一定著死；若無，願上帝加倍責罰我。」
14:45 百姓給掃羅講：「約拿單已經行此個大的拯救佇以色列的，伊著死嗎？決斷通！阮指永遠的耶和華來講，伊一支頭毛也的確無磕落佇地裡，因為伊今仔日及上帝相及做代誌。」對按呢百姓救約拿單免死。
14:45 軍兵給掃羅講：「約拿單有互以色列得著大勝利，伊豈著死？絕對毋通！阮指永活的上主咒誓，伊連一支頭毛都𣍐用得互伊落落土腳，因為伊今仔日所做的有上帝的幫贊。」按呢，軍兵救約拿單免死。
14:46 掃羅就上去，無追趇非利士人；非利士人也去伊本所在。
14:46 掃羅無閣追趇非利士人；非利士人就轉去𪜶本所在。
掃羅的王權及家眷
14:47 掃羅掌國的權柄治理以色列，去及四圍攏總的對敵交戰，就是攻擊摩押人、亞捫人、以東、及瑣巴諸個王，及非利士人。伊無論所去，攏卡贏。
掃羅的事蹟及家族
14:47 掃羅確立以色列王權了後，去攻打周圍所有的對敵，就是摩押人、亞捫人、以東人、非利士人，及瑣巴的諸王；伊百戰百勝，拍到叨位贏到叨位。
14:48 掃羅奮勇攻擊亞瑪力人，救以色列脫離搶𪜶的人的手。
14:48 掃羅奮勇拍敗亞瑪力人，救以色列脫離搶劫𪜶的人的手。
14:49 掃羅的子是約拿單、亦施韋、麥基舒亞。伊二個查某子的名：大的名叫米拉，細的名叫米甲。
14:49 掃羅的子有約拿單、亦施韋、麥基‧舒亞；伊有兩個查某子，大的叫做米拉，細的叫做米甲。
14:50 掃羅的某，名叫亞希暖，是亞希瑪斯的查某子。伊的軍長名叫押尼珥，是尼珥的子；尼珥是掃羅的叔。
14:50 掃羅的某叫做亞希暖，是亞希瑪斯的查某子；伊的元帥叫做押尼珥，是掃羅的阿叔尼珥的子。
14:51 掃羅的老父基士，押尼珥的老父尼珥，就是亞別的子。
14:51 掃羅的老父基士，押尼珥的老父尼珥，攏是亞別的子。
14:52 掃羅一生常常及非利士人大交戰。掃羅見若看見有能力的人抑是勇士，就招集來倚伊。
14:52 掃羅一生常常及非利士人有劇烈的交戰；伊看著強猛的人及勇士，攏招集𪜶加入伊的部隊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。