上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
及非利士交戰
13:1 掃羅抵仔坐位的年歲；做以色列王二年，
及非利士人交戰
13:1 掃羅做以色列王兩年後，
13:2 掃羅就為家己對以色列中揀三千人：二千跟隨掃羅佇密抹及伯特利山，一千跟隨約拿單佇便雅憫的基比亞；其餘的人伊差𪜶倒去逐人的布棚。
13:2 對以色列中揀三千人；兩千個隨掃羅駐在佇密抹及伯特利山區，一千個隨約拿單駐在佇便雅憫地區的基比亞；其他的人互𪜶倒去家己的厝。
13:3 約拿單拍迦巴非利士人的軍營，非利士人聽見。掃羅就歕哨角佇全地，講，希伯來人著聽啊。
13:3 約拿單攻擊佇迦巴的非利士人的軍營；此個消息佇非利士人的中間傳開。掃羅吩咐人佇全地歕哨角，叫希伯來人著注意。
13:4 以色列眾人聽見掃羅拍非利士人的軍營，閣聽見以色列人互非利士人厭惡，百姓就跟隨掃羅聚集佇吉甲。
13:4 以色列眾人聽著掃羅攻擊非利士人的軍營，閣聽著非利士人厭惡以色列人，人民就隨掃羅聚集佇吉甲。
13:5 非利士人聚集欲及以色列人交戰，有車三萬張，馬兵六千，步兵親像海邊的沙許多，就上來佇伯‧亞文東勢的密抹紮營。
13:5 非利士人聚集欲攻擊以色列人；有戰車三萬台、馬兵六千，步兵親像海沙赫多。𪜶上來佇伯‧亞文東旁的密抹紮營。
13:6 以色列人看見家己危急，因為百姓窘迫，就家己匿佇山洞、樹林、石穴險要的所在，及深坑。
13:6 以色列人看著軍隊受包圍，情形危急，就去匿佇山洞、樹林、石穴、磅孔，及焦井。
13:7 也有希伯來人過約但，到迦得及基列地。掃羅猶久佇吉甲，百姓攏愕愕惙來跟隨伊。
13:7 閣有一寡人過約旦河到迦得及基列地區。
掃羅猶佇吉甲；隨伊的人攏驚惶皮皮惙。
13:8 掃羅照撒母耳所定著的日期聽候七日。撒母耳猶未來吉甲，百姓離開伊四散去。
13:8 掃羅照撒母耳決定的日期，聽候七日。因為撒母耳猶未來到吉甲，隨掃羅的人就開始四散。
13:9 掃羅講：「將燒祭及謝恩祭帶來我遮。」伊就獻燒祭。
13:9 掃羅講：「將燒化祭及平安祭的祭物提來我遮。」伊就獻燒化祭。
13:10 伊獻燒祭抵仔明白，看啊，撒母耳到啦。掃羅出去迎接伊，欲給伊請安。
13:10 伊獻燒化祭抵仔欲完成，撒母耳來到位。掃羅出去迎接欲給伊請安。
13:11 撒母耳講：「你做甚麼代啊？」掃羅講：「因為我看見百姓四散離開我，你也無照所定著的日期到，閣非利士人已經聚集佇密抹。
13:11 撒母耳講：「你啲做什麼代誌？」
掃羅講：「因為我看著人民四散離開我，你嘛無照決定的日期來，閣非利士人已經聚集佇密抹；
13:12 所以我講：非利士人欲到吉甲攻擊我，也我猶未求耶和華施恩，我就勉強獻燒祭。」
13:12 所以我想講非利士人啲欲來到吉甲攻擊我，閣我猶未求上主施恩，我才姑不將獻燒化祭。」
13:13 撒母耳對掃羅講：「你做戇事啦，因為你無遵守耶和華──你上帝所命令你的誡命。欲是有守，耶和華就堅固你的王位，佇以色列中到永遠。
13:13 撒母耳對掃羅講：「你哪即糊塗！你無遵守上主 — 你的上帝愛你守的誡命。你若有守，上主會堅固你佇以色列中的王位到永遠。
13:14 今你的王位無久長。耶和華已經尋著合伊的心意的一人，閣耶和華也定著伊做伊的百姓的頭，因為你無遵守耶和華所命令你的。」
13:14 今你的王位𣍐久長；上主已經尋著一個合伊心意的人，決定欲互伊做伊子民的領袖，因為你無遵守上主的命令。」
13:15 撒母耳就起來，對吉甲上去便雅憫的基比亞。
掃羅點算隨伊的人，約略有六百人。
13:15 撒母耳就出發，對吉甲上去便雅憫地區的基比亞。掃羅點算隨伊的人，約有六百人。
13:16 掃羅及伊的子約拿單，及隨𪜶的人，攏𫢶佇便雅憫的迦巴；總是非利士人紮營佇密抹。
13:16 掃羅及伊的子約拿單，以及隨𪜶的人攏𫢶佇便雅憫地區的迦巴。毋拘非利士人佇密抹紮營。
13:17 有搶劫的對非利士的軍營中出來，分做三隊：一隊越對俄弗拉的路到書亞的地去，
13:17 有突擊隊對非利士軍營出來，分做三隊，一隊對俄弗拉的路去書阿勒地區；
13:18 閣一隊越對伯‧和崙的路去，閣一隊越對洗波音的山谷對面地界的路向曠野去。
13:18 一隊對伯‧和崙的路去；閣一隊對看會著洗波音山谷，迵到曠野彼條邊界的路去。
13:19 彼時，以色列全地無一個拍鐵師傅；因為非利士人講，驚了希伯來人製造劍及槍。
13:19 彼時以色列全地無拍鐵師傅，因為非利士人驚希伯來人製造刀及槍。
13:20 以色列人欲磨利伊的犂、耙、斧頭、鋤頭，逐人著落去非利士人遐。
13:20 以色列人欲磨鋤頭、犁、斧頭、掘仔，攏著落去非利士人遐；
13:21 若欲鑢鋤頭、犂、三齒的叉、斧頭，及趕牛的鐵刺，著一賓的工錢。
13:21 若欲磨鋤頭、犁，著兩個銅錢；磨斧頭及刺棍，著一個銅錢；
13:22 所以到交戰的日，隨掃羅及約拿單的人無一個手裡有劍有槍的，獨獨掃羅及伊的子約拿單有。
13:22 所以到交戰的時，隨掃羅及約拿單的人無一個手裡有刀抑是槍；只有掃羅及伊的子約拿單有。
13:23 非利士防守的兵出去到密抹的隘口。
13:23 非利士人有派兵出去防守密抹的隘口。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。