上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
掃羅拍敗亞們人
11:1 亞捫人拿轄上到基列的雅比，紮營欲攻擊伊。雅比的眾人給拿轄講：「你及阮立約，阮就欲服事你。」
掃羅拍敗亞捫人
11:1 亞捫人拿轄上去圍攻基列的雅比。雅比人給拿轄講：「你及阮簽約，阮就服事你。」
11:2 亞捫人拿轄應講：「我及恁立約，著按呢就是挖恁眾人的正目，我通用此個來凌辱以色列人。」
11:2 亞捫人拿轄應講：「互我挖恁逐個人的正目來侮辱以色列人，我就及恁簽約。」
11:3 雅比的長老給伊講：「求你寬容阮七日，互阮差人去以色列的全境；若無人救阮，阮就出來就你。」
11:3 雅比的長老給伊講：「求你寬容阮七日，阮通派人去以色列全境；若無人欲救阮，阮就投降。」
11:4 所差的人到掃羅的基比亞，將諸個話講互百姓聽，百姓就攏開聲哮。
11:4 所派的人到掃羅住的基比亞，將此個消息講互民眾聽，𪜶就攏大聲哭。
11:5 掃羅抵當對田裡趕牛倒來，掃羅講：「百姓為啥事啼哭？」𪜶就將雅比人的話給伊講。
11:5 掃羅抵對園裡趕牛倒來；掃羅講：「大家是按怎啲哭？」𪜶就將雅比人的代誌給伊講。
11:6 掃羅聽見諸個話，上帝的神大大感動伊，伊大受氣。
11:6 掃羅聽著此個消息，受上帝的神大大充滿，非常受氣。
11:7 伊就將一對牛切一塊一塊，交代使者送到以色列的全境，講：「見若無出來跟隨掃羅及撒母耳的，也欲按呢款待伊的牛。」耶和華互百姓驚，𪜶就攏出來，親像一人。
11:7 伊就將一對牛切做一塊一塊，交代使者送到以色列全境，警告講：「無出來隨掃羅及撒母耳的人，𪜶的牛嘛會按呢互人切做一塊一塊。」上主互人民非常驚惶，𪜶就攏同心親像一人出來應戰。
11:8 佇比色點算許個人：以色列人有三十萬，猶大人有三萬。
11:8 掃羅佇比色點算人數，以色列人有三十萬，猶大人有三萬。
11:9 𪜶給所差的人講：「恁著按呢回覆基列的雅比人講，明仔日將近中晝的時，恁欲得著拯救。」所差的人倒去給雅比人講，𪜶就歡喜。
11:9 𪜶給派來的人講：「恁著按呢回復基列的雅比人，講：『明仔載日中晝的時，恁會得著解救。』」派來的人轉去給雅比人講，𪜶就非常歡喜。
11:10 雅比人就給亞捫人講：「明仔日阮欲出來就恁，恁通出在意思款待阮。」
11:10 雅比人就給亞捫人講：「明仔載阮會出來投降，出在恁對待阮。」
11:11 隔日，掃羅分百姓做三隊，佇五更早的時入亞捫人的軍營，拍死𪜶到日欲晝，所剩的人攏走四散，無二人相及住一位。
11:11 隔日，掃羅給人民分做三隊；天啲欲光的時，𪜶攻入亞捫人的軍營，一直到日中晝，拍死真多人；賰的人攏四散，隨人逃命。
11:12 百姓給撒母耳講：「彼個講『掃羅豈會管轄咱』的是是誰啊？著掠許個人出來，阮欲刣死伊。」
11:12 人民給撒母耳講：「是啥人講『掃羅哪會當治理咱』？給𪜶交出來，阮欲給刣死。」
11:13 掃羅講：「今仔日一人也通刣死，因為今仔日耶和華拯救以色列。」
11:13 掃羅講：「今仔日一個都毋通刣，因為今仔日上主有拯救以色列。」
11:14 撒母耳給百姓講：「來啊，咱來去吉甲，佇遐重再建立國。」
11:14 撒母耳給人民講：「來，咱來去吉甲，佇遐正式確立王權。」
11:15 眾百姓就去吉甲，佇吉甲當耶和華的面前設立掃羅做王，𪜶佇遐獻謝恩祭佇耶和華的面前。掃羅及以色列眾人大大歡喜。
11:15 全部的人民就去吉甲，佇上主面前設立掃羅作王，閣獻平安祭互上主。掃羅及以色列眾人歡喜慶祝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。