上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
10:1 撒母耳提一瓶油倒佇掃羅的頭殼，給伊唚，講：「這豈是耶和華抹你做伊的業的頭人嗎？
10:1 撒母耳提一罐油，倒佇掃羅的頭殼，給伊唚，講：「上主用油給你抹，設立你做伊子民的統治者。
10:2 今仔日你離開我了後，佇便雅憫交界的泄撒，近拉結的墓，欲抵著二人。𪜶欲給你講：『你去尋許個驢母已經尋著。今你的老父無啲掛慮驢，是啲煩惱你，講：我為著我的子欲怎樣啊？』
10:2 今仔日你離開我了後，去便雅憫地區的謝撒，倚近蕾潔的墓的時，會抵著兩個人；𪜶會給你講：『你啲尋的驢仔已經尋著。此陣你的老父無啲煩惱驢仔，是啲掛慮你；伊啲問：我的子攏無消息，欲按怎？』
10:3 你欲對遐去，到他泊的橡樹遐，欲有三人抵著你，𪜶是欲去伯特利到上帝遐：一個帶三隻山羊仔，一個帶三個餅，一個帶一皮袋的酒。
10:3 你繼續對遐去，到他泊的橡樹遐，會抵著三個人，𪜶欲去伯特利獻祭互上帝，一個帶三隻山羊仔，一個帶三個餅，一個帶一皮袋的酒。
10:4 𪜶欲問你平安，用二個餅互你，你就對𪜶的手接來。
10:4 𪜶會給你請安，互你兩個餅；你著接受。
10:5 此霎了後你欲到上帝的山，佇遐有非利士人防守的兵。你到城的時，欲抵著一陣先知對高的所在落來，佇𪜶的頭前有瑟，有鈴瓏鼓、有笛仔、有琴，𪜶攏講先知話。
10:5 後來你著去上帝的山基比亞，佇遐有非利士人啲防守；你入城的時，會抵著一陣先知對山頭壇落來；有人彈琴彈瑟，有人拍鼓，有人歕𥰔仔；𪜶攏入神講話。
10:6 耶和華的神欲大大臨到你，你也欲及𪜶講先知話；你欲變做新的人。
10:6 上主的神會大大充滿你，你會變做新的人，及𪜶像款入神講話。
10:7 諸個兆頭臨到你，你著趁機會來做，因為上帝及你佇啲。
10:7 諸個代誌發生的時，你就照所受的感動去做，因為上帝及你同在。
10:8 你著代先我落去吉甲，我也欲落去你遐獻燒祭及謝恩祭。你著聽候七日，聽候我到你遐，指示你著行的事。」
10:8 你落去吉甲，我嘛會去遐獻燒化祭及平安祭。你聽候七日，等我到你遐指示你著做的代誌。」
10:9 伊越轉身欲離開撒母耳，上帝換新伊的心。當彼日諸個兆頭攏應驗。
10:9 掃羅越轉身離開撒母耳的時，上帝互伊新的心。佇彼日，撒母耳給伊講的代誌攏實現。
10:10 𪜶已經到彼個山，有一陣先知人抵著伊，上帝的神大大臨到掃羅，伊就佇𪜶中間講先知話。
10:10 掃羅及伊的僕人來到基比亞，抵著一陣先知對遐出來。彼時，上帝的神大大充滿伊，伊就及𪜶像款入神講話。
10:11 平素識伊的人，看伊佇先知中啲講先知話，就相及講：「基士的子抵著按呢是怎樣？掃羅也列佇先知中嗎？」
10:11 前到今識伊的人看著伊佇先知中入神講話，就問來問去：「基士的子是按怎？掃羅嘛做先知噢？」
10:12 彼所在有一人應講：「許個人的老父是是誰啊？」對按呢有一句俗語講：「掃羅也列佇先知中嗎？」
10:12 有一個彼所在的人講：「許個人的師父是啥人？」對按呢有一句俗語講：「掃羅嘛做先知噢？」
10:13 掃羅講先知話明白，就上去高的所在。
10:13 掃羅入神講話了就上去山頭壇敬拜。
10:14 掃羅的叔問掃羅及伊的奴僕講：「恁去叨落？」應講：「去尋驢母。尋伊無，就去撒母耳遐。」
10:14 掃羅的阿叔問掃羅及伊的僕人講：「恁去叨位？」
伊應講：「去尋驢仔；尋無，就去撒母耳遐。」
10:15 掃羅的叔講：「請你給我講，撒母耳給恁講甚麼。」
10:15 掃羅的阿叔講：「請你給我講撒母耳對恁講什麼。」
10:16 掃羅給伊的叔講：「伊明明給阮講驢母已經尋著啦。」論到撒母耳所講國的事，伊無給伊講。
10:16 掃羅對伊的阿叔講：「伊清楚給阮講『驢仔已經尋著啦。』」毋拘掃羅無給伊的阿叔提起撒母耳講伊欲作王的事。
掃羅受揀做王
10:17 撒母耳招集百姓到米斯巴耶和華遐，
掃羅受設立作王
10:17 撒母耳召集人民到米斯巴來見上主。
10:18 給以色列人講：「耶和華──以色列的上帝按呢講：『我導以色列出埃及，救恁脫離埃及人的手，也脫離攏總許個制壓恁國的手。』
10:18 伊對以色列人講：「上主 — 以色列的上帝按呢講：『我導以色列出埃及，解救恁脫離埃及人的手及許個壓制恁的列國。』
10:19 總是恁今仔日有棄拺恁的上帝，就是本身救恁脫離一切患難艱苦的，恁也對伊講：『著設立王管理阮。』今恁著照恁的支派，恁的宗族來徛佇耶和華的面前。」
10:19 毋拘今仔日恁棄拺此位救恁脫離所有患難災禍的上帝，要求我給恁設立一個王統治恁。今著照恁的支族、宗族來徛佇上主面前。」
10:20 對按呢，撒母耳互以色列眾支派近前來，就取著便雅憫的支派；
10:20 撒母耳叫以色列逐支族進前來，抽著便雅憫支族；
10:21 閣互便雅憫支派照𪜶的宗族近前來，就取著瑪特利族，對彼中間閣取著基士的子掃羅。人尋伊也尋𣍐著，
10:21 閣叫便雅憫支族照𪜶的宗族進前來，抽著瑪特利族；對彼中間閣抽著基士的子掃羅。眾人尋伊，毋拘尋攏無。
10:22 所以就閣問耶和華講：「彼人有來遮抑未？」耶和華講：「伊匿佇雜物的中間。」
10:22 𪜶就閣問上主：「彼個人有來遮無？」
上主講：「伊匿佇彼堆行李內面。」
10:23 𪜶就走去對遐導伊出來。伊徛佇百姓的中間，比眾百姓卡高一個頭殼。
10:23 𪜶就走去，對遐給掃羅導出來；伊來徛佇眾人的中間，比別人較高一粒頭。
10:24 撒母耳給眾百姓講：「耶和華所揀的人，佇百姓中無一個會比得伊，恁看見嗎？」眾百姓就大聲叫講：「願王萬歲！」
10:24 撒母耳對民眾講：「恁有看著無？上主所揀的人，無一個會當及伊比。」眾人就歡呼：「王萬歲！」
10:25 撒母耳將國法對百姓講明，閣記佇冊裡，下佇耶和華的面前，然後撒母耳四散眾人，逐個倒去𪜶的家。
10:25 撒母耳將王的責任及權利對人民說明，閣記載佇冊裡，下佇上主的面前；然後撒母耳解散民眾互𪜶攏轉去𪜶兜。
10:26 掃羅也倒去基比亞到伊的家，有一陣人互上帝感動伊的心的隨伊去。
10:26 掃羅嘛倒去基比亞伊家己的厝；有一陣心受上帝感動的勇士嘛隨伊去。
10:27 許個匪類講：「此人豈會救咱啊？」就藐視掃羅，無送伊禮物；總是掃羅靜靜。
10:27 毋拘有一寡匪類講：「此個人哪會救咱？」𪜶藐視掃羅，嘛無送伊禮物；掃羅攏無講什麼。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。