上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
掃羅見撒母耳
9:1 有一個便雅憫人，名叫基士，是便雅憫人亞斐亞的元孫，比歌拉的曾孫，洗羅的孫，亞別的子，是一個大氣力的勇士。
掃羅去尋撒母耳
9:1 有一個便雅憫支族的人，叫做基士，是亞別的子，洗羅的孫，比歌拉的曾孫，亞斐亞的元孫；伊是好額人。
9:2 伊有一個子，名叫掃羅，勇壯、閣好生做，佇以色列中無一人會比得伊的好生做；身體比眾人卡高一個頭殼。
9:2 伊有一個子，叫做掃羅，勇壯閣英俊。以色列人無一個會當及伊比；伊比別人較高一粒頭。
9:3 掃羅的老父基士拍見幾若隻驢母，基士給伊的子掃羅講：「你導一個奴僕起身去尋驢母。」
9:3 掃羅的老父基士拍毋見幾若隻驢母。基士給掃羅講：「你導一個僕人去尋許個驢仔。」
9:4 伊就經過以法蓮山地，及沙利沙的地，攏尋無；閣經過沙琳的地，也無佇遐；閣經過便雅憫的地，也尋無。
9:4 𪜶行透以法蓮山區、沙利沙地區、沙琳地區，後來到便雅憫地區，攏尋無。
9:5 到蘇弗的地，掃羅給跟隨伊的奴僕講：「來啊，咱倒來去，驚了我的老父無掛慮驢，來煩惱咱。」
9:5 𪜶到蘇弗地區的時，掃羅給伊的僕人講：「咱轉來去。若無，老父無煩惱驢，煞煩惱咱。」
9:6 奴僕講：「看啊，此個城裡有一個上帝的奴僕，是人所尊重的，見伊所講的攏的確應驗。咱值著去伊遐，豈採伊會指示咱所行的路。」
9:6 僕人講：「等咧，此個庄社有一個上帝重用的人受大家敬重；伊所講的攏會實現；咱來去尋伊；無定著伊會給咱指示去叨位尋驢。」
9:7 掃羅給奴僕講：「咱若去，有甚麼通送彼人啊？因為咱袋仔內的食物攏了啦，也無禮物通送彼個上帝的奴僕，咱身邊猶有甚麼物無？」
9:7 掃羅給僕人講：「咱若欲去見伊，有什麼通送伊？咱袋仔內已經無食物，嘛無禮物通送彼個上帝重用的人。咱猶有什麼無？」
9:8 奴僕閣應掃羅講：「我手裡有銀一舍客勒的四份一，我將此個來送彼個上帝的奴僕，請伊指示咱所行的路。」（
9:8 僕人閣應掃羅：「我有一塊細塊銀仔，通送互彼個上帝重用的人，請伊給咱講佇叨位會尋著驢仔。」
9:9 前以色列中，若有人去問上帝，就講：「咱來去見先見！」因為現今稱「先知」，前稱「先見」。）
9:9 (以前以色列人欲求問上帝，會講：「咱來去尋先見。」較早的先見今仔日叫做先知。)
9:10 掃羅給奴僕講：「你所講的話好，來啊，咱來去。」𪜶就去上帝的人所𫢶的城。
9:10 掃羅給僕人講：「好，咱來去。」𪜶就去上帝重用的人住的城。
9:11 𪜶上山坪欲入城，就抵著幾若個少年的查某囝仔出來汲水，問𪜶講：「先見佇遮無？」
9:11 𪜶上山坪欲入城的時，抵著幾若個查某囝仔出來欲汲水，就問𪜶：「先見有佇遮無？」
9:12 查某囝仔應講：「是啦，佇遮，看啊，伊佇你的頭前。趕緊去！伊今仔日抵仔到城，因為今仔日百姓佇山頭壇獻祭。
9:12 查某囝仔應講：「有，伊佇遮；抵佇恁頭前。緊去，伊今仔日抵好來此個城，欲佇山頭壇為民眾獻祭。
9:13 佇伊猶未上去山頭壇欲食桌的代先，恁一下入城就會抵著伊；因為伊猶未到，百姓無代先食，的確聽候伊代先祝福祭物，然後所請的人客才食。今恁上去，此時會抵著伊。」
9:13 恁一下入城，佇伊猶未上山頭壇食祭物以前會尋著伊。因為民眾𣍐當先食，著等伊祝福祭物了後，受請的人才會當食。恁此陣去，就會尋著伊。」
9:14 二人就上城；已經入城，撒母耳出來，欲上高的所在就抵著𪜶。
9:14 掃羅及伊的僕人就繼續行。𪜶欲入城的時，撒母耳抵抵向𪜶行來，欲出城去山頭壇。
9:15 掃羅未到的前一日，耶和華已經啟示撒母耳講：
9:15 掃羅猶未到的前一日，上主已經給撒母耳啟示講：
9:16 「明仔再此時，我欲差一人對便雅憫地到你遮，你著給伊抹油做我的百姓以色列的頭。伊欲救我的百姓脫離非利士人的手；因為我的百姓哀求的聲透到我，我看顧𪜶。」
9:16 「明仔載此個時陣，我欲差一個人對便雅憫地區來你遮；你著給伊抹油，設立伊做我的子民以色列的統治者；伊會救我的子民脫離非利士人的手。我有看著我的子民的困苦，聽著𪜶哀求的聲。」
9:17 撒母耳看見掃羅的時，耶和華給伊講：「看啊，此人就是我所給你講的，伊欲管理我的百姓。」
9:17 撒母耳一下看著掃羅，上主就對伊講：「此個就是我給你講欲治理我的子民彼個人。」
9:18 掃羅佇城門裡倚近撒母耳，講：「請給我講，先見的厝佇叨落？」
9:18 掃羅佇城門內行倚撒母耳，給伊問：「請問，先見的厝佇叨位？」
9:19 撒母耳應掃羅講：「我就是先見。你佇我的頭前上去高的所在，因為恁今仔日欲及我食；明仔早起我欲互你去，你心內的事攏欲給你講。
9:19 撒母耳應掃羅講：「我就是先見。你先上去山頭壇。今仔日恁欲及我做夥食飯；明仔早起我會送你轉去；你啲煩惱的代誌我會給你講。
9:20 你三日前拍見許個驢母，你免掛意，已經尋著啦。以色列眾人所欣慕的歸是誰啊？豈是歸你及你的老父的家嗎？」
9:20 你三日前拍毋見許個驢仔，你毋免煩惱，已經尋著啦。以色列人所啲渴慕的是什麼人？豈毋是你及恁老父的家族？」
9:21 掃羅應講：「我豈是便雅憫人以色列支派中極小可的嗎？便雅憫支派諸個家的中間我的家豈是極微細嗎？你啥事對我講此號話？」
9:21 掃羅應講：「我是便雅憫人，屬以色列人上細的支族；阮家族閣是便雅憫支族中上細的。你哪給我講諸個話？」
9:22 撒母耳導掃羅及跟隨伊的人入客廳，互𪜶佇所請的人的中間坐大位；所請的約略有三十人。
9:22 撒母耳導掃羅及伊的僕人入去客廳，互𪜶佇所請的人中間坐大位；所請的人客大約有三十個。
9:23 撒母耳給廚房講：「我所交代你教你著收啲彼份今通捧來。」
9:23 撒母耳給煮食的講：「我交代你收起來彼份通捧出來。」
9:24 廚房就捧彼腿及頂面所有的，下佇掃羅的面前，撒母耳講：「你看，此個所留的，你著提起來食。因為我請百姓的時，刁故意給你留啲到定著的日。」
彼日，掃羅就及撒母耳相及食。
9:24 煮食的就將特選的大腿捧出來，下佇掃羅面前。
撒母耳講：「此份是為著你留的，請你食。佇我邀請人客的時，就預先準備，留到此個時陣。」彼日掃羅就及撒母耳做夥食。
撒母耳抹油掃羅做王
9:25 𪜶對高的所在落來入城，撒母耳及掃羅佇厝頂講話。
9:25 𪜶對山頭壇落來，入城，撒母耳及掃羅佇厝頂講話。
9:26 𪜶早早起來，拍昲光的時，撒母耳佇厝頂。叫掃羅講：「起來啊，我欲送你倒去。」掃羅就起來，伊及撒母耳二人出去外面。
撒母耳設立掃羅作統治者
9:26 透早天昲光的時，掃羅猶佇厝頂啲睏，撒母耳叫伊：「起來，我送你倒去。」掃羅就起來；伊及撒母耳兩人出去外面。
9:27 𪜶落去到城的角頭，撒母耳給掃羅講：「著吩咐奴僕代先咱去（奴僕就去）。」閣講：「你且徛啲，我欲互你聽上帝的話。」
9:27 𪜶行到城的角頭，撒母耳給掃羅講：「叫僕人先去。」僕人就去。撒母耳閣講：「𫢶遮小等一下，我欲給你傳達上帝的話。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。