上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
7:1 基列‧耶琳人來，帶耶和華的約櫃上去，到佇山頂亞比拿達的厝，分別伊的子以利亞撒顧守耶和華的約櫃。
7:1 基列‧耶琳人就來，接上主的約櫃去山頂亞比拿達的厝；𪜶任命伊的子以利亞撒顧守上主的約櫃。
7:2 約櫃佇基列‧耶琳日子久久。歷過二十年，以色列全家追念耶和華。
7:2 約櫃留佇基列‧耶琳有二十年久；以色列全家痛悔歸向上主。
撒母耳統治以色列
7:3 撒母耳給以色列全家講：「恁若一心歸順耶和華，就著對恁中間除去外邦的上帝及亞斯他錄，堅心歸向耶和華，單單服事伊。伊欲救恁脫離非利士人的手。」
撒母耳治理以色列
7:3 撒母耳對以色列全家講：「恁若欲專心歸順上主，著對恁中間除去外族的神明及亞斯她錄女神，堅決歸向上主，只有服事伊，伊會救恁脫離非利士人的手。」
7:4 以色列人就除去諸個巴力及亞斯他錄，單單服事耶和華。
7:4 以色列人就除去逐所在的巴力及亞斯她錄女神，只有服事上主。
7:5 撒母耳講：「著聚集以色列眾人佇米斯巴，我欲替恁祈禱耶和華。」
7:5 撒母耳講：「著聚集所有的以色列人來米斯巴，我欲為著恁向上主祈禱。」
7:6 𪜶就聚集佇米斯巴，汲水傾佇耶和華的面前，佇彼日禁食，佇遐講：「阮有得罪耶和華。」撒母耳就佇米斯巴判斷以色列人。
7:6 𪜶就聚集佇米斯巴，汲水倒佇上主的面前。彼日，𪜶禁食，佇遐懺悔講：「阮有得罪上主。」撒母耳就佇米斯巴裁決以色列民間的案件。
7:7 非利士人聽見以色列人聚集佇米斯巴，非利士的首領就上來欲攻擊以色列人。以色列人聽見，就驚非利士人。
7:7 非利士人聽著以色列人佇米斯巴聚集，𪜶的首領就出兵攻擊以色列人；以色列人聽著就真驚。
7:8 以色列人給撒母耳講：「願你替阮求叫耶和華──咱的上帝無息，互伊救咱脫離非利士人的手。」
7:8 以色列人給撒母耳講：「請你繼續為著阮求叫上主 — 咱的上帝，求伊救咱脫離非利士人的手。」
7:9 撒母耳就用一隻食奶的羊仔歸隻燒獻互耶和華做燒祭，撒母耳替以色列人求叫耶和華；耶和華應伊。
7:9 撒母耳就用一隻食奶的羊仔做燒化祭獻互上主；撒母耳替以色列人求叫上主；上主有聽伊的祈禱。
7:10 撒母耳啲獻燒祭的時，非利士人進前來欲及以色列人交戰。佇彼日，耶和華起大聲的雷攻擊非利士人，拍亂𪜶，𪜶就刣輸佇以色列人的面前。
7:10 撒母耳啲獻燒化祭的時，非利士人迫倚來欲攻擊以色列人。彼日上主大聲彈雷攻擊非利士人，拍亂𪜶；𪜶就刣輸，對以色列人的面前逃走。
7:11 以色列人對米斯巴出來，追趕非利士人，拍𪜶，直到伯‧甲的下面。
7:11 以色列人對米斯巴出來，追趕非利士人，追殺𪜶直到伯‧甲附近。
7:12 撒母耳用一塊石徛佇米斯巴及善的中間，叫伊的名以便以謝，講：「到此霎耶和華幫助咱。」
7:12 撒母耳佇米斯巴及善的中間𫞼一塊石，給伊號名叫做以便‧以謝，講：「到今仔日，上主一直有啲幫贊咱。」
7:13 對此霎，非利士人就屈服，敢閣入以色列人的境內。撒母耳一生的日，耶和華的手攻擊非利士人。
7:13 對彼日起，非利士人就屈服，毋敢閣侵入以色列人的領土。撒母耳活啲的時，上主的手阻止非利士人的侵犯。
7:14 非利士人所有取以色列人的城，對以革倫到迦特，攏還以色列人。𪜶許個境界，以色列人也對非利士人的手收倒轉。彼時以色列人及亞摩利人和好。
7:14 對以革倫到迦特，非利士人搶去的城攏還以色列人。以色列人收回攏總的領土。彼時，以色列人及迦南人和平相處。
7:15 撒母耳一生做以色列的士師。
7:15 撒母耳一生做以色列的士師。
7:16 伊逐年巡視伯特利、吉甲、米斯巴諸個所在判斷以色列人。
7:16 逐年伊巡視伯特利、吉甲、米斯巴諸個所在，裁決以色列民間的案件。
7:17 就倒轉去到拉瑪，因為伊的家佇遐；也佇遐判斷以色列人，也佇遐給耶和華起一座壇。
7:17 伊巡視了後攏會倒去伊的故鄉拉瑪，佇遐做士師。伊嘛佇遐為著上主起一座祭壇。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。