上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
約櫃受搶
4:1 以色列人出去欲及非利士人交戰，紮營近佇以便以謝；非利士人紮營佇亞弗。
約櫃互人搶去
4:1 撒母耳的話傳遍以色列。
以色列人出去欲及非利士人交戰；𪜶佇以便‧以謝附近紮營，非利士人佇亞弗紮營。
4:2 非利士人排陣攻擊以色列人。交戰的時，以色列人刣輸佇非利士人的面前；非利士人佇平洋刣死𪜶的軍兵約略四千人。
4:2 非利士人排陣攻擊以色列人，𪜶刣贏，刣死以色列人大約四千人。
4:3 百姓倒來到營內，以色列的長老講：「耶和華今仔日啥事互咱刣輸佇非利士人的面前啊？咱值著扛耶和華的約櫃對示羅來咱遮，互伊佇咱中間通救咱脫離咱的對敵的手。」
4:3 以色列軍隊倒來營內，𪜶的長老講：「是按怎上主今仔日互咱刣輸非利士人？咱來去示羅扛上主的約櫃來咱遮，按呢伊佇咱中間，會救咱脫離對敵的手。」
4:4 百姓就差人到示羅，對遐扛坐佇𠼻𡀔兵的中間萬軍的耶和華的約櫃來。以利二個子何弗尼、非尼哈及上帝的約櫃佇遐。
4:4 𪜶就派人去示羅，將上主 — 萬軍的統帥的約櫃扛來，因為上主坐佇約櫃頂面兩個天使基路伯的中間。以利兩個子何弗尼、非尼哈，及上帝的約櫃做夥來。
4:5 耶和華的約櫃到營中，以色列眾人就大聲喝，地續會應聲。
4:5 上主的約櫃來到營中的時，以色列人大聲喝，地煞振動。
4:6 非利士人聽見大聲啲喝的聲音，就講：「佇希伯來的營按呢大聲喝，是甚麼緣故？」後來就知耶和華的約櫃到營中。
4:6 非利士人聽著喊喝的聲，就講：「希伯來營中赫呢大聲，是啲喝什麼？」後來才知是上主的約櫃到營中。
4:7 非利士人就驚惶，講：「有上帝到𪜶的營中」；閣講：「咱有災禍啦！平素曾有此個事。
4:7 非利士人驚惶，講：「有神明來到𪜶的營中。」𪜶講：「慘啊，咱前到今毋曾抵著此款代誌。
4:8 咱有災禍啦！是誰會救咱脫離諸個大權能的上帝的手啊？前佇曠野用逐樣的災禍拍埃及人的，就是諸個上帝。
4:8 咱慘啊，啥人會當救咱脫離此款大權能的神明？以前佇曠野用逐款災禍拍死埃及人的，就是諸個神明。
4:9 非利士人啊，恁著勇敢，著做大丈夫，免得恁服事希伯來人，親像𪜶服事恁一樣。恁著做大丈夫，及𪜶交戰。」
4:9 非利士人啊，著勇敢，著做大丈夫，恁才免做希伯來人的奴隸，親像𪜶以前做咱的奴隸。著做大丈夫及𪜶交戰。」
4:10 非利士人就交戰，以色列人刣輸，逐個走倒去𪜶的布棚，刣死真多，以色列的步兵死三萬人。
4:10 非利士人就出戰，以色列人戰敗；步兵死三萬人，其他的攏逃走轉去𪜶兜。
4:11 上帝的約櫃互𪜶搶去，以利二個子何弗尼、非尼哈也死。
4:11 上帝的約櫃互非利士人搶去；以利兩個子何弗尼及非尼哈嘛攏死。
以利的死
4:12 有一個便雅憫人對戰陣走來，衫拆裂，頭殼摻土粉，像彼日到示羅。
以利死
4:12 仝彼日，有一個便雅憫支族的人對戰場走來示羅，衫拆裂，頭殼糝土粉表示哀傷。
4:13 伊到的時，抵當以利佇路邊坐佇伊的位啲瞭望，因為伊的心為著上帝的約櫃來掛慮。彼人入城報消息，通城的人就攏喉叫。
4:13 伊到的時，抵好以利佇路邊坐佇伊的椅仔啲看，因為伊啲掛慮上帝的約櫃。彼個人入城報消息，全城的人攏喉叫。
4:14 以利聽見喉叫的聲就問講：此個嘩嘩哮的聲是甚麼緣故啊？」彼人趕緊來報以利。
4:14 以利聽著喉叫的聲，就問：「𪜶啲喝什麼？」彼個人趕緊來給以利報告。
4:15 彼時以利九十八歲，目睭柴柴，𣍐會看見。
4:15 彼時以利已經九十八歲，目睭柴柴，無看見。
4:16 彼人給以利講：「我是對戰陣來的，今仔日我對戰陣走來。」以利講：「我的子啊，代誌怎樣？」
4:16 彼個人給以利講：「我抵仔對戰場來，對戰場逃走來。」
以利講：「我的子，代誌按怎？」
4:17 報消息的應講：「以色列人佇非利士人的面前逃走，百姓中受刣的不止多！你二個子何弗尼、非尼哈也死，上帝的約櫃續互𪜶搶去。」
4:17 報消息的應講：「以色列人戰敗逃走，互人刣死的真多。你兩個子，何弗尼及非尼哈嘛死。上帝的約櫃互人搶去。」
4:18 伊一下講起上帝的櫃，以利就對伊的坐位向對後面，跋倒佇門邊頷頸折就死；因為伊年老，身體重。以利做以色列的士師四十年。
4:18 彼個人一下講著上帝的約櫃，以利就對椅仔倒摔向，倒落去門邊，頷頸折，就死；因為伊年老閣大箍。以利做以色列的士師四十年。
非尼哈的某死
4:19 以利的媳婦、非尼哈的某懷孕欲到期，伊聽見上帝的櫃互人搶去，乾官及丈夫攏死的消息，就曲痀來生子，因為大痛疼忽然到；
非尼哈的某死
4:19 以利的新婦，非尼哈的某，懷孕啲欲生。伊聽著上帝的約櫃互人搶去，大官及丈夫攏死的消息，忽然催陣痛疼，屈落去生子。
4:20 啲欲死的時，邊頭啲徛許個婦仁人給伊講：「免驚！你生查甫囝仔啦。」總是伊無應，也無關心。
4:20 伊啲欲死的時，佇邊仔啲照顧的婦仁人給伊講：「免驚，你生查甫的！」毋拘伊恬恬，無回應。
4:21 伊給囝仔號名以迦博，講：「榮光離開以色列！」這是因為上帝的櫃互人搶，閣因為乾官及丈夫也死。
4:21 伊給囝仔號名叫「以迦博」，意思是上帝的榮耀已經離開以色列；因為上帝的約櫃互人搶去，大官及丈夫嘛攏死。
4:22 伊閣講：「榮光離開以色列，因為上帝的櫃受搶。」
4:22 伊閣講：「榮耀已經離開以色列，因為上帝的約櫃互人搶去。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。