上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
耶和華向撒母耳顯現
3:1 囝仔撒母耳佇以利的面前服事耶和華。當許個日，耶和華的話真稀罕，無常常有啟示。
上主對撒母耳顯現
3:1 囝仔撒母耳受以利教導服事上主。當時真罕得有對上主來的信息，無常常有啟示。
3:2 一日，以利睏佇家己的所在；伊的目睭已經霧，看𣍐明。
3:2 有一暝，以利佇家己的房間啲睏；伊的目睭已經霧，看𣍐明。
3:3 上帝的燈猶未熄，撒母耳已經佇耶和華的殿，佇上帝的約櫃遐啲睏。
3:3 撒母耳佇囥上帝約櫃的殿內嘛啲睏；天猶未光，上帝的燈猶啲𤏸。
3:4 耶和華叫撒母耳。伊應講：「我佇遮！」
3:4 上主叫撒母耳；撒母耳應講：「我佇遮。」
3:5 就走到以利遐，講：「我佇遮，因為你叫我。」以利講：「我無叫你，你倒去睏。」伊就去睏。
3:5 伊就走去以利遐，講：「我佇遮，你叫我乎？」
以利講：「我無叫你，倒去睏。」伊就去睏。
3:6 耶和華閣叫撒母耳。撒母耳起來，去以利遐，講：「我佇遮，因為你叫我。」伊應講：「我的子啊，我無叫你，通閣去睏。」
3:6 上主閣叫撒母耳；撒母耳起來，去以利遐，講：「我佇遮，你叫我乎？」
伊應講：「我的子，我無叫你，倒去睏。」
3:7 彼時撒母耳猶未識耶和華，耶和華的話未有啟示伊。
3:7 彼陣撒母耳毋識上主；上主的話猶未對伊啟示。
3:8 耶和華第三擺叫撒母耳。撒母耳起來，去以利遐，講：「我佇遮，因為你叫我。」以利才知是耶和華叫囝仔。
3:8 上主第三遍叫撒母耳。撒母耳起來，去以利遐，講：「我佇遮，你叫我乎？」
以利才知是上主啲叫囝仔。
3:9 對按呢以利給撒母耳講：「你閣去睏；伊若閣叫你，你就講：『耶和華啊，請你講，你的奴僕聽！』」撒母耳就去，睏佇伊的所在。
3:9 以利就給撒母耳講：「你閣去睏。伊若閣叫你，你就講：『上主啊，請你講，你的奴僕啲聽。』」撒母耳就閣倒去睏。
3:10 耶和華閣來徛啲，親像前幾若擺叫：「撒母耳啊！撒母耳啊！」撒母耳應講：「請講，你的奴僕啲聽！」
3:10 上主閣來徛啲，親像前幾若遍按呢叫：「撒母耳，撒母耳。」
撒母耳應講：「請講，你的奴僕啲聽。」
3:11 耶和華給撒母耳講：「看啊，我佇以色列中欲行一項事，互聽見的人二個耳孔欲抖起來。
3:11 上主給撒母耳講：「注意聽，我欲佇以色列人中間做一項代誌，互聽著的人攏驚一趒。
3:12 我論以利的家所講的，到彼日，頭到尾我欲應驗佇伊。
3:12 佇彼日，關係以利的家我所講的代誌攏會實現。
3:13 我曾給伊講我欲為著伊所知的罪永遠審判伊的家，因為伊的子家己招咒詛，伊也無禁止𪜶。
3:13 我有給伊講，我欲永遠審判𪜶此家；伊知伊的子有犯應該受咒詛的罪，閣無給𪜶譴責。
3:14 所以我有對以利的家咒誓講：『以利的家的罪過，雖然祭祀禮物，永遠𣍐會贖回。』」
3:14 所以我對以利的家咒誓：『以利𪜶此家的罪用牲禮祭物嘛𣍐當得著赦免。』」
3:15 撒母耳睏到天光，就開耶和華的殿門，撒母耳敢將異象給以利講。
3:15 撒母耳睏到天光，開上主的殿門。撒母耳毋敢將異象給以利講。
3:16 以利叫撒母耳講：「我的子撒母耳啊！」伊應講：「我佇遮！」
3:16 以利叫撒母耳，講：「我的子撒母耳。」
伊應講：「我佇遮。」
3:17 以利講：「耶和華對你講甚麼？求你通隱瞞佇我；若將伊所給你講的對我隱密一句，願上帝加倍責罰你。」
3:17 以利講：「上主對你講什麼？你毋通給我隱瞞；你若將伊給你講的對我掩蓋一句，願上帝加倍給你責罰。」
3:18 撒母耳就將許個話攏給伊講，也無對伊隱瞞。以利講：「是耶和華，願伊照伊所看做好的來行。」
3:18 撒母耳就將許個話攏給以利講，無對伊隱瞞。以利講：「伊是上主。上主會照伊看做好的去做。」
3:19 撒母耳漸漸大漢，耶和華及伊佇啲，互伊所講的無一句無應驗。
3:19 撒母耳漸漸大漢；上主及伊同在，互伊所講的話逐句攏實現。
3:20 對但到別是巴所有的以色列人攏知撒母耳受設立做耶和華的先知。
3:20 對但到別是巴，所有的以色列人攏知撒母耳確實是上主的先知。
3:21 耶和華閣佇示羅顯現；因為耶和華用耶和華的話佇示羅顯明佇撒母耳，撒母耳的話遍傳佇以色列眾人。
3:21 上主繼續佇示羅顯現。上主佇示羅用伊的話啟示撒母耳。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。