上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
以利加拿及伊的家眷佇示羅
1:1 以法蓮山地的拉瑪‧瑣非有一個以法蓮人，名叫以利加拿，是蘇弗的元孫，託戶的曾孫，以利戶的孫，耶羅罕的子。
以利加拿及伊的家眷
1:1 有一個人叫做以利加拿；伊住佇以法蓮山區，蘇弗宗族啲住的拉瑪；伊是以法蓮人，蘇弗的元孫，託戶的曾孫，以利戶的孫，耶羅罕的子。
1:2 伊有二個某：一個名哈拿，一個名毗尼拿。毗尼拿有子兒，哈拿無子兒。
1:2 以利加拿有兩個某，一個叫做哈娜，一個叫做比尼娜；比尼娜有子兒，哈娜無子。
1:3 此人逐年對伊的本城上去到示羅，欲敬拜也欲祭祀萬軍的耶和華；以利二個子何弗尼、非尼哈佇遐做耶和華的祭司。
1:3 以利加拿逐年對伊的本城上去示羅敬拜上主 — 萬軍的統帥，閣對伊獻祭。以利兩個子何弗尼及非尼哈佇遐做上主的祭司。
1:4 以利加拿獻祭的日，分祭肉互伊的某毗尼拿及伊的子查某子；
1:4 以利加拿逐遍獻祭，攏分獻祭的肉互伊的某比尼娜及伊的子查某子各一份。
1:5 總是分互哈拿的是雙份，因為伊疼哈拿。若是耶和華關密伊的胎。
1:5 毋拘以利加拿互哈娜較好份，因為伊疼哈娜，可惜上主互伊無生子。
1:6 及伊做對頭的毗尼拿大大激伊，欲互伊憂悶，因為耶和華關密伊的胎。
1:6 因為上主互伊無生子，及伊做對頭的比尼娜不時激伊，互伊凝心。
1:7 伊上到耶和華的厝的時，以利加拿年年按呢行；毗尼拿猶原激伊，伊就啼哭續食。
1:7 此款代誌逐年啲發生。逐遍哈娜上去上主的厝的時，比尼娜照常按呢激伊；伊就啼哭，食𣍐落飯。
1:8 伊的丈夫以利加拿給伊講：「哈拿啊，你啥事啼哭，啥事食，啥事心憂悶啊？我對佇你豈無比十個子卡好嗎？」
1:8 伊的丈夫以利加拿給伊講：「哈娜，你是按怎啲哮？是按怎毋食？是按怎啲傷心？有我豈無比有十個子較好？」
哈拿及以利
1:9 𪜶佇示羅飲食了後，哈拿就起來。祭司以利佇耶和華殿的門竪邊，坐佇伊的位。
哈娜及以利
1:9 𪜶佇示羅飲食了後，哈娜就徛起來；彼時祭司以利坐佇上主的殿門柱邊的坐位。
1:10 哈拿的心內憂苦，祈禱耶和華，來大啼哭，
1:10 哈娜的心艱苦，對上主祈禱，直直流目屎。
1:11 下願講：「萬軍的耶和華啊，你若果然垂落看顧你的女婢的艱難，閣數念我無𣍐記得你的女婢，賞賜你的女婢生查甫子，我欲互伊歸佇耶和華到一世人，剃頭刀無到伊的頭殼。」
1:11 哈娜下願講：「上主 — 萬軍的統帥，你若真正關心你女婢的苦情，眷顧我，無𣍐記得你的女婢，賜你的女婢生一個後生，我欲給伊一世人獻互上主，攏𣍐給伊剃頭。」
1:12 哈拿佇耶和華的面前直直祈禱的時，以利注目看伊的嘴。（
1:12 哈娜對上主祈禱無停，以利注意看伊的嘴。
1:13 今哈拿心內靜靜求，只有嘴唇振動，無聽見聲，所以以利掠做伊是酒醉。）
1:13 哈娜靜靜祈求，只有嘴唇振動無出聲，所以以利想講伊是酒醉。
1:14 以利給伊講：「你欲醉到底時啊？你通閣飲酒。」
1:14 以利給伊講：「你欲醉偌久？毋通閣飲啦！」
1:15 哈拿應講：「我的主啊，是按呢。我是心內憂苦的婦仁人，薄酒厚酒我攏無飲，獨獨佇耶和華的面前吐出心情。
1:15 哈娜應講：「先生，我無啲醉；我是一個真傷心的查某人，薄酒厚酒攏無飲，不過是啲對上主吐出苦情。
1:16 莫得掠你的女婢做歹德行的婦女。因為我到今對我的大憂悶，受激氣來講。」
1:16 毋通看你的女婢做歹查某。我祈禱無停，因為真怨嘆，心艱苦。」
1:17 以利應伊講：「你通平安倒去。願以色列的上帝允准你所對伊求的！」
1:17 以利應伊講：「你平安倒去。願以色列的上帝照你所求的賜互你。」
1:18 哈拿講：「願你的女婢得著恩佇你的面前。」婦仁人就倒去來飲食，就無閣再帶憂容。
1:18 哈娜講：「願你的女婢對你得著恩惠。」哈娜倒去，食飽了後，就無閣憂頭結面。
撒母耳出世及奉獻
1:19 隔日，𪜶早早起來，佇耶和華的面前敬拜，就倒去拉瑪。到伊的家，以利加拿及某哈拿同房，耶和華數念哈拿，
撒母耳出世
1:19 隔日𪜶真早起來，敬拜上主了後，就倒去𪜶佇拉瑪的厝。以利加拿及哈娜同房；上主會記得哈娜。
1:20 哈拿就懷孕。到時，就生一個子，給伊號名叫撒母耳，講：「這是我對耶和華求的。」
1:20 哈娜就懷孕，到時生一個子，給伊號名叫做撒母耳，意思是：「伊是我對上主求來的。」
1:21 彼人以利加拿及伊的通家攏上去，欲用逐年的祭祀，及伊所下的願獻互耶和華。
獻撒母耳互上主
1:21 以利加拿及𪜶全家攏上去示羅，對上主獻年祭，閣謝伊所下的願。
1:22 總是哈拿無上去，給伊的丈夫講：「聽候囝仔斷奶，我就帶伊上去互伊朝見耶和華，永遠𫢶佇遐。」
1:22 毋拘哈娜無上去，給伊的丈夫講：「聽候囝仔斷奶，我才導伊去獻互上主，一世人住佇遐。」
1:23 伊的丈夫以利加拿給伊講：「照你所看做好的來行！通聽候囝仔斷奶。總是願耶和華應驗伊的話。」對按呢婦仁人佇家內育子，到斷奶；
1:23 伊的丈夫以利加拿給伊講：「你若看做好就按呢去做，聽候囝仔斷奶才去；願上主實現伊的話。」婦仁人就佇厝裡育子到伊斷奶。
1:24 已經給伊斷奶，就導伊相及上示羅，到耶和華的厝；閣帶三隻牛牨，一伊法幼的麵粉，一皮袋酒。（彼時，囝仔猶細漢。）
1:24 囝仔斷奶了後，哈娜就導伊去示羅上主的厝；閣帶一隻三歲的牛、十公斤的幼麵粉、一皮袋的酒。彼時囝仔猶細漢。
1:25 𪜶刣一隻牛牨，就導囝仔到以利的面前。
1:25 𪜶就刣彼隻牛，導囝仔去以利遐。
1:26 婦仁人講：「我的主啊，我指你的活命來咒誓，我的主啊，前徛佇你遮祈求耶和華的彼個婦仁人，就是我。
1:26 婦仁人講：「先生，我確實就是以前徛佇你面前對上主祈禱彼個婦仁人。
1:27 我求愛得著此個囝仔；耶和華已經賞賜我所對伊求的。
1:27 我對上主求此個囝仔，伊有照我所求的互我；
1:28 所以，我用此個囝仔還耶和華，伊一世人還耶和華。」
就佇遐敬拜耶和華。
1:28 所以我將此個囝仔獻互上主，互伊一世人服事上主。」
𪜶就佇遐敬拜上主。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。