上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
路得佇波阿斯田裡拾麥屑
2:1 拿俄米有伊的丈夫的親人就是以利米勒的該親，有一人名叫波阿斯，是大好額的人。
路得抵著波阿斯
2:1 拿俄美有一個親成，名叫做波阿斯，是大財主，是伊的丈夫以利米勒的親族。
2:2 摩押的查某子路得給拿俄米講：「互我去園裡，我若得著恩典，佇甚麼人的面前就通佇彼人的後面拾麥屑。」伊給伊講：「我的查某子啊，做你去。」
2:2 摩押的女子路得對拿俄美講：「我想欲去園裡，通隨佇對我親切的人後面拾麥穗。」
拿俄美就對伊講：「查某子啊，做你去。」
2:3 伊就去，已經到，就隨割麥的人佇園裡拾麥屑。伊湊巧到以利米勒的該親波阿斯的一區園。
2:3 伊就去園裡，隨佇收割的人後面拾麥穗。真抵好，此坵園是以利米勒的親族波阿斯的。
2:4 波阿斯對伯利恆來，對割麥的人講：「願耶和華及恁佇啲！」𪜶應講：「願耶和華賜福你！」
2:4 抵彼時，波阿斯對伯利恆來，伊對收割的人講：「願上主及恁同在！」
𪜶就應伊講：「願上主賜福你！」
2:5 波阿斯問伊所派割麥的頭人講：「彼個是甚麼人的查某子？」
2:5 波阿斯問收割的工頭講：「此個少年查某囝仔是什麼人𪜶兜的？」
2:6 割麥的頭人應講：「此個是摩押的查某子，及拿俄米對摩押地倒來的。
2:6 收割的工頭應講：「此個摩押的女子是隨拿俄美對摩押地轉來的。
2:7 伊講：『請你准我拾麥屑，佇割麥者的後面佇歸捆中拾伊。』伊就來，對早起到今，定定住遮，只有歇佇厝內霎仔久。」
2:7 伊有講：『准我佇收割的人後面拾落落來的麥穗。』伊對早起無閒到今，抵仔才佇寮仔歇睏一時仔若定。」
2:8 波阿斯給路得講：「我的查某子啊，你著聽，莫得去別區園拾麥屑，也莫得離開遮，著按呢及我諸個女婢做陣。
2:8 波阿斯就對路得講：「查某子啊，我給你講，毋通去別人的園拾，嘛毋通離開遮，著隨我的女工隨互牢。
2:9 你著看𪜶佇叨落一區啲收割，就隨𪜶去。我豈無吩咐許個少年人通摸著你；你若嘴乾，就去許個器具遐飲少年人所汲的。」
2:9 看工人佇叨一坵園啲收割，著隨佇女工後面拾。我已經吩咐工人𣍐用得給你創治。你嘴焦的時，去水桶遐飲工人汲來的水。」
2:10 伊就仆佇地裡拜伊，給伊講：「我是外國人，怎樣會得著恩典佇你的面前，按呢看顧我啊？」
2:10 路得就仆落去，跪佇土腳，對伊講：「你哪會對我即呢好，即呢關心我此個外國人？」
2:11 波阿斯應講：「對你的丈夫死了後，見你款待乾家的事，閣你離開父母及你出世的所在，來到你平素識的百姓遮，人攏有給我講明啦。
2:11 波阿斯應伊講：「你的丈夫死了後，你對大家所做的一切，人攏給我講啦。你離開你的父母及故鄉，來住佇此個生份的人中間。
2:12 願耶和華報答你的所做。你來歇佇耶和華──以色列上帝的翅下，願你得著伊的大賞賜。」
2:12 願上主照你所做的報答你。你來上主 — 以色列的上帝翼股下避難，願你對伊得著滿滿的報賞。」
2:13 伊講：「我的主啊，願我得著恩典佇你的面前。我雖然𣍐比得你的女婢的一個，你猶久安慰我對你的女婢講好話。」
2:13 路得應講：「你對我即呢好；雖然我做你的女婢嘛𣍐堪得，你猶久安慰我，閣對我 — 你的女婢輕聲講好話。」
2:14 食的時，波阿斯給伊講：「你來遮食餅，用你彼塊搵醋。」伊就坐佇割麥的人的邊頭；𪜶提烘的麥穗互伊。伊食飽，猶有剩。
2:14 食飯的時，波阿斯對伊講：「來遮，提起來食，麵包搵醋食。」路得就坐佇收割的人身邊。波阿斯提焙好的麥仔互伊。伊食飽，閣有賰。
2:15 伊起來去拾麥屑，波阿斯吩咐少年人講：「伊就若佇歸捆的中間拾麥屑，也著容允伊，通互伊見誚；
2:15 伊𬦰起來，閣去拾麥穗。波阿斯就吩咐伊的工人，講：「伊若佇麥捆中拾，嘛毋通給伊擋，害伊見笑。
2:16 也著對歸捆的抽淡薄，放佇地裡互伊拾，通喝伊。」
2:16 恁甚至著對麥捆中抽一寡出來互伊拾，毋通給伊責備。」
2:17 按呢，佇園裡拾麥屑，到下昏，就拍伊所拾的，約略一伊法的大麥。
2:17 路得就佇園裡拾麥穗，拾到天暗。伊拍所拾的麥穗，大約有二十二公升的大麥。
2:18 伊帶伊所拾的入城互伊的乾家看，也將伊食飽所剩的提出來互伊。
2:18 伊就揹入城，提互伊的大家看，閣將食賰的提出來互伊的大家。
2:19 乾家問伊講：「你今仔日佇叨落拾麥屑，佇叨落做工啊？願彼個看顧你的得著福氣。」伊就給乾家講伊佇叨落做工，講：「今仔日我做工佇遐彼人名叫波阿斯。」
2:19 伊的大家對伊講：「你今仔日佇叨位拾麥穗？你佇叨位工作？願注意著你，好款待你彼個人受祝福。」
路得就給大家講伊佇什麼人遐工作，閣講彼個人名叫做波阿斯。
2:20 拿俄米給伊的媳婦講：「願伊得著耶和華賜福，就是施恩互活人死人無息的。」拿俄米閣講：「彼人是咱的親人，是咱該親的一個通贖回咱的產業。」
2:20 拿俄美對新婦講：「願波阿斯得著上主祝福；上主不時施恩互活人及死人。」拿俄美閣對伊講：「此個人是咱的親成，是有義務延續咱世系的一個至親。」
2:21 摩押的查某子路得講：「伊也有給我講：『你著跟隨我許個少年人，直到𪜶給我收割明白。』」
2:21 摩押的女子路得講：「伊嘛有給我講：『你著隨佇我的工人身邊到收割煞。』」
2:22 拿俄米給伊的媳婦路得講：「我的查某子啊，你及伊的女婢出去，是好，無互人看見你佇別人的園。」
2:22 拿俄美就對伊的新婦路得講：「我的查某子啊，你著及伊的女工做夥，才免佇別人的園裡互人創治。」
2:23 對按呢伊及波阿斯的女婢做陣拾麥屑，到大麥小麥收明白。伊猶原及乾家相及住。
2:23 路得就隨波阿斯的女工做夥拾五穀，到大麥小麥攏收割了。伊繼續及伊的大家住做夥。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。