上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
以利米勒全家去到摩押地
1:1 當士師辦政事的時，彼個地抵著飢荒。佇猶大伯利恆，有一個人及伊的某二個子出外去摩押地。
以利米勒全家搬去摩押
1:1 士師治理以色列的時代，猶大地發生飢荒。有一個人導伊的某及兩個子對猶大的伯利恆搬去摩押。
1:2 彼人名叫以利米勒，伊的某名叫拿俄米；伊二個子，名瑪倫、基連，攏是猶大伯利恆的以法他人。𪜶到摩押地，就佇遐徛起。
1:2 此個人名叫做以利米勒，伊的某名叫做拿俄美，兩個子名叫做瑪倫及基連；𪜶是猶大的伯利恆出身的以法他人。𪜶到摩押地就住佇遐。
1:3 後來拿俄米的丈夫以利米勒死，放伊及伊二個子。
1:3 拿俄美的丈夫以利米勒死去，放伊及兩個子。
1:4 二個子娶摩押的查某子做某，一個名叫俄珥巴，一個名叫路得，𫢶佇遐約略十年。
1:4 彼兩個子娶摩押女子做某，一個叫做娥珥巴，另外一個叫做路得。𪜶住佇遐約十年久了後，
1:5 瑪倫及基連二人也死，剩彼個婦仁人無丈夫，也無子。
1:5 瑪倫及基連兩個人嘛死去，賰拿俄美家己一個人，無翁嘛無子通靠。
拿俄米及路得倒去伯利恆
1:6 伊就及二個媳婦起來，欲對摩押地倒去；因為伊佇摩押地聽見耶和華眷顧伊的百姓，賞賜𪜶米糧。
路得隨拿俄美轉去伯利恆
1:6 拿俄美猶佇摩押的時，聽著上主眷顧伊的子民，互𪜶好收成，就及伊的新婦離開摩押地欲倒去伯利恆。
1:7 伊就對伊徛起的所在出去，二個媳婦及伊去，𪜶行路欲倒去猶大地。
1:7 伊就對伊住的所在出發，欲倒去猶大地，兩個新婦隨伊去。
1:8 拿俄米給二個媳婦講：「恁去啊，逐個倒去老母的厝。願耶和華好款待恁，親像恁款待已經死的人及我一樣！
1:8 佇路中拿俄美對兩個新婦講：「恁轉去家己的外家。願上主施恩互恁，親像恁有好款待死去的人及我像款。
1:9 願耶和華賞賜恁逐人佇丈夫的家得著平安！」就及𪜶唚嘴。𪜶就出聲啼哭，
1:9 願上主賜福恁，互恁兩個尋著新的對象，有好的歸屬。」伊就給𪜶唚，及𪜶相辭；𪜶大聲哮，
1:10 給伊講：「啊，阮欲及你相及倒去你的百姓遐。」
1:10 對伊講：「阮一定欲及你轉去恁的人遐。」
1:11 拿俄米講：「我的查某子啊，倒去啊！啥事欲及我去啊？我猶會懷胎生子做恁的丈夫嗎？
1:11 拿俄美講：「查某子啊，著轉去！是按怎欲隨我？我豈會閣生子互恁做翁？
1:12 我的查某子啊，倒去啊，去啊！我已經年老，𣍐會閣有丈夫；我若講，我猶有向望，我今暝若有丈夫也會生子，
1:12 查某子啊，著轉去，去啦。我已經老，𣍐當閣嫁翁；我若猶有向望，今暝有丈夫，閣生子，
1:13 恁豈會聽候𪜶大漢嗎？恁豈會家己守無嫁人嗎？我的查某子啊，莫得按呢。我為著恁盡在憂苦，因為耶和華伸手攻擊我。」
1:13 恁豈會當等𪜶大漢，無去嫁別人？查某子啊，啦，我比恁較歹命，因為上主伸手攻擊我。」
1:14 𪜶閣出聲哭，俄珥巴及乾家唚嘴，獨獨路得及伊放𣍐離。
1:14 𪜶閣大聲哮。娥珥巴就給伊的大家唚，及伊相辭。毋拘路得放𣍐離大家。
1:15 伊講：「看啊，你的同姒已經倒去伊的百姓伊的上帝遐，你也著隨你的同姒倒去！」
1:15 拿俄美就講：「你看，恁阿嫂已經轉去𪜶的親族及𪜶的神明遐，你嘛通隨伊轉去。」
1:16 路得講：「莫得勸我離開你，倒去無隨你。因為你去遐，我也欲去遐；你歇佇遐，我也欲歇遐；你的百姓欲做我的百姓，你的上帝也欲做我的上帝。
1:16 路得應講：
「毋通迫我放拺你，
離開你倒去。
你去叨位，我嘛欲去；
你住叨位，我嘛欲住遐。
你的親族就是我的親族；
你的上帝就是我的上帝。
1:17 你死佇遐，我也死佇遐，埋葬佇遐。除死以外若有甚麼互你我相離！願耶和華加倍責罰我。」
1:17 你死佇叨位，我嘛欲死佇遐，葬佇遐。
只有死會互你及我分開，
若無，願上主加倍責罰我。」
1:18 伊看見伊決意欲及伊去，就無閣對伊講起。
1:18 拿俄美看路得堅決欲隨伊，就無閣講什麼。
1:19 對按呢二人相及行，來到伯利恆。𪜶到伯利恆，通城為著𪜶攏泏起來。許個婦仁人講：「這是拿俄米嗎？」
1:19 𪜶兩人就繼續行，來到伯利恆。到伯利恆的時，全城為著𪜶擾動。眾婦女講：「此個人豈真正是拿俄美？」
1:20 伊應講：「莫得叫我拿俄米，著叫我瑪拉，因為全能者款待我真艱苦。
1:20 伊給𪜶講：「毋通叫我拿俄美，著叫我瑪拉，因為全能者互我受大苦難。
1:21 我出去的時滿足，耶和華互我空空倒來。耶和華已經責備我來證明我，全能者已經苦楚我。恁啥事叫我拿俄米啊？」
1:21 我滿滿出去，上主互我空空倒來。是按怎叫我拿俄美？上主苦楚我，全能者互我受患難。」
1:22 按呢拿俄米倒來，伊的媳婦摩押的查某子路得，對摩押地倒來的也及伊來，𪜶到伯利恆抵仔是起手割大麥的時。
1:22 這就是拿俄美及伊的摩押新婦路得對摩押地轉來的經過。𪜶佇開始收割大麥的時來到伯利恆。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。