上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
為便雅憫支族人尋某
21:1 以色列人佇米斯巴曾咒誓講：「阮中間無一人欲用查某子嫁互便雅憫人。」
為便雅憫人尋某
21:1 以色列人佇米斯巴曾咒誓講：「阮無欲將查某子嫁互便雅憫人做某。」
21:2 百姓來到伯特利，佇遐坐佇上帝的面前到下昏，出聲大啼哭，
21:2 以色列人來到伯特利，坐佇上帝的面前大聲啼哭到下昏，
21:3 講：「耶和華──以色列的上帝啊，今仔日佇以色列中減一支派，以色列中啥事有此個事啊？」
21:3 講：「上主 — 以色列的上帝，今仔日佇以色列中間減一支族；阮以色列人哪會抵著此款代誌？」
21:4 隔日天光早，百姓起來，佇遐起一座壇，獻燒祭及平安祭。
21:4 隔日透早，人民起來，佇遐起一座壇，獻燒化祭及平安祭。
21:5 以色列人講：「佇以色列眾支派中，是誰無及會眾上去耶和華遐？」因為𪜶大咒誓講，見若無上米斯巴到耶和華的面前的，著互伊死。
21:5 以色列人講：「佇以色列支族中，啥人無做夥來上主遮聚集？」因為𪜶咒重誓，講：「無來米斯巴上主的面前的人，著互伊死。」
21:6 以色列人為著𪜶的兄弟便雅憫人退悔，講：「今仔日以色列中絕一支派啦。
21:6 以色列人為著𪜶的同胞便雅憫人心艱苦，講：「今仔日以色列中斷絕一個支族啦。
21:7 咱已經指耶和華來咒誓，無欲用查某子嫁𪜶，今就𪜶所剩的人，咱欲對叨落互𪜶有某啊？」
21:7 咱已經指上主咒誓，無欲將查某子嫁互𪜶，今咱欲對叨位為著𪜶所賰的人尋某？」
21:8 閣講：「以色列諸個支派中叨落一個無上米斯巴到耶和華遐？」𪜶就查出基列‧雅比無一人到營內會眾遐；
21:8 𪜶閣講：「以色列諸個支族中間，啥人無上來米斯巴上主遮？」𪜶就查出基列的雅比人無一個人來。
21:9 因為點算百姓的時，許個徛起佇基列‧雅比的人無一個佇遐。
21:9 因為𪜶點算的時，無一個基列的雅比人佇遐。
21:10 會眾就差一萬二千大力的勇士，吩咐𪜶講：「恁去用刀刣死徛起佇基列‧雅比的人以及婦仁人囝仔。
21:10 會眾就差一萬兩千個勇士，吩咐𪜶講：「恁去基列的雅比，用刀刣死所有的查甫人、婦仁人，及囝仔。
21:11 恁所著行的就是按呢：著將一切的查甫人及許個曾及查甫人同房的查某人一盡刣死。」
21:11 恁著按呢做：著將所有的查甫人，及結婚過的查某人攏刣死。」
21:12 𪜶佇基列‧雅比人的中間，抵著四百個未及查甫人同房的在室女，就帶到迦南地示羅的軍營。
21:12 𪜶佇基列的雅比人中間抵著四百個猶未結婚的在室女，就給𪜶帶到迦南地示羅的軍營。
21:13 全會差人給臨門石磐的便雅憫人講，用和平的話報𪜶。
21:13 全體會眾就派人去及臨門巖的便雅憫人講和。
21:14 彼時便雅憫人倒來，以色列人就將所留互伊活基列‧雅比的查某囝仔嫁互𪜶，猶久無夠額。
21:14 彼時，便雅憫人倒來；以色列人就將所留落來許個基列的雅比人的查某囝仔互𪜶做某；毋拘猶無夠。
21:15 百姓為著便雅憫人就退悔，因為耶和華互以色列支派缺一角。
21:15 以色列人民為著便雅憫人心艱苦；因為上主互以色列的支族缺一角。
21:16 會中的長老講：「便雅憫中的婦女已經剿滅，今就𪜶所剩的人咱欲對叨落互𪜶有某啊？」
21:16 以色列的長老講：「便雅憫的婦女既然已經受剿滅，今咱欲按怎尋某互許個活啲的人？」
21:17 閣講：「便雅憫逃走的人猶原著有業互𪜶，免得以色列中絕一支派。
21:17 閣講：「便雅憫所賰的人嘛著有家業互𪜶，才免以色列中一支族受除滅。
21:18 總是咱𣍐會將家己的查某囝仔互𪜶做某；因為以色列人曾咒誓講，用查某子嫁互便雅憫人的，著受咒詛。」
21:18 毋拘咱𣍐用得將家己的查某子互𪜶做某，因為咱以色列人有咒誓講：『將查某子嫁互便雅憫人的，著受咒詛。』」
21:19 𪜶閣講：「佇利波拿的南勢，伯特利的北勢，就是對伯特利去示劍大路東勢的示羅，逐年有耶和華的節期」；
21:19 𪜶閣講：「示羅逐年有舉行敬拜上主的節期。」示羅是佇利波拿的南旁，伯特利的北旁，就是伯特利向示劍的大路的東旁。
21:20 就吩咐便雅憫人講：「恁著去，匿佇葡萄園中。
21:20 𪜶就教便雅憫人，講：「恁著去示羅，匿𫢶葡萄園；
21:21 若看見示羅的查某囝仔出來跳舞，恁著對葡萄園出來，佇示羅的女子中逐人搶一個做某，倒去便雅憫地。
21:21 若看著𪜶的查某囝仔出來跳舞，著對葡萄園出來，逐個人搶一個示羅的女子做某，才倒去便雅憫地區。
21:22 𪜶的父兄若來對阮告訴，阮欲對𪜶講：『請恁帶著阮，來恩典𪜶，因為前交戰的時無留查某囝仔互𪜶逐人做某。今也是恁互𪜶；若是恁就有罪。』」
21:22 𪜶的老父抑是兄弟若來給阮抗議，阮會給𪜶講：『請恁帶念阮，寬容𪜶；因為交戰的時，阮無留查某囝仔互𪜶做某。今，毋是恁將查某子互𪜶；若是，恁就有罪。』」
21:23 便雅憫人就照按呢行，照𪜶的人額對跳舞的查某囝仔中所掠的娶𪜶做某，就倒去𪜶本地，閣起城來徛起遐。
21:23 便雅憫人就照按呢做，照𪜶的人額，搶跳舞的查某囝仔作某；然後倒去𪜶本地，重建城鎮，住佇遐。
21:24 彼時以色列人離開遐，逐人倒去𪜶的支派、伊的宗族、對遐出來逐人倒去𪜶本地。
21:24 像時，以色列人離開遐，逐個人倒去家己的支族、宗族；逐個人攏對遐離開，倒去𪜶本地。
21:25 當彼時，以色列中無王，逐人照伊所看做著的來行。
21:25 彼時，以色列人無王，逐個人攏照伊看做著的去做。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。