上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
以色列人準備交戰
20:1 對按呢以色列眾人對但，到別是巴攏出來，及𫢶佇基列的人，全會聚集親像一人，佇米斯巴到耶和華的面前。
以色列人準備交戰
20:1 對按呢，所有的以色列人，對但到別是巴，及住佇基列的人，攏徛出來，團結一致，聚集佇米斯巴，上主的面前。
20:2 百姓的首領，及以色列眾支派，攏家己來徛佇上帝百姓的會中；攑刀的步兵共四十萬。
20:2 以色列眾支族的領袖攏來徛佇上帝子民的會中；攑刀的步兵有四十萬人。
20:3 便雅憫人攏聽見以色列人上到米斯巴。以色列人就講：「此個歹代的情由著給阮講明。」
20:3 便雅憫人有聽見以色列人攏來佇米斯巴。
以色列人問，講：「給阮講，此個歹代誌按怎發生的？」
20:4 彼個利未人，就是受害死的婦仁人的丈夫，應講：「我及我的細姨到便雅憫的基比亞歇暝。
20:4 彼個利未人，就是受害死的婦仁人的丈夫，應講：「我及我的細姨到便雅憫的基比亞歇暝。
20:5 基比亞人起來攻擊我，暝時包圍我歇的厝，想欲害死我，閣強姦我的細姨致到死。
20:5 基比亞人起來攻擊我，暝時包圍我歇暝的厝，想欲害死我；𪜶閣給我的細姨強姦到死。
20:6 我就將我的細姨割歸塊，差人提到以色列得著做業的全地，因為𪜶佇以色列中行淫亂及見誚事。
20:6 我就將我的細姨切做一塊一塊，請人提去以色列人徛起的所有地區；因為基比亞人佇以色列人的中間做淫亂及見笑事。
20:7 恁攏總以色列人著打算議論。」
20:7 恁所有的以色列人著參詳，做決定。」
20:8 眾百姓攏起來親像一人，講：「阮無一人欲去伊的布棚，也無一人欲倒去伊的厝。
20:8 所有的人民攏起來，團結一致，講：「阮無一個人會轉去伊的布棚，嘛無一個會倒去伊的厝。
20:9 阮對基比亞人欲按呢行，照所抽的籤去攻擊伊。
20:9 今，阮對基比亞人欲按呢處理：阮照抽的籤去攻擊𪜶。
20:10 阮欲佇以色列眾支派中，一百人取十人，一千取一百，一萬取一千，給百姓運糧，互𪜶到便雅憫的基比亞的時，通照𪜶佇以色列中所行見誚的事來行佇𪜶。」
20:10 阮欲佇以色列眾支族的中間，一百人選十人，一千選一百，一萬選一千，給軍兵送糧食，互軍兵到便雅憫的基比亞，照基比亞人佇以色列中所做可惡的事給𪜶報復。」
20:11 對按呢以色列眾人聚集攻擊彼個城，大家聯合親像一人。
20:11 對按呢，所有的以色列人團結一致，攻擊彼個城。
20:12 以色列諸個支派差人，遍遍給便雅憫的支派講：「恁中間所行的甚麼歹啊？
20:12 以色列所有的支族派人去便雅憫支族徛起的逐所在，講：「恁做的代誌實在有夠可惡！
20:13 今恁著將許個人就是基比亞的匪類交出，阮通互𪜶死，對以色列中除去彼個歹。」總是便雅憫人肯聽𪜶兄弟以色列人的話。
20:13 今恁著將基比亞許個匪類交出來，阮欲互𪜶死，對以色列人的中間掃除此個邪惡。」毋拘便雅憫人毋肯聽𪜶的同胞以色列人的話。
20:14 便雅憫人對𪜶許個城出來，聚集到基比亞，欲及以色列人交戰。
20:14 便雅憫人攏對𪜶家己的城出來，來基比亞集合，欲及以色列人交戰。
20:15 彼時便雅憫人對逐個城點出攑刀的，共二萬六千；另外猶有基比亞人點出七百精練的兵。
20:15 便雅憫人對逐個城召集兩萬六千個攑刀的兵士，另外猶有基比亞人召集七百個精兵。
20:16 佇眾百姓的中間有七百精鍊的兵，慣練用倒手的，逐個會用索甩石，準準分毫無差。
20:16 全部的軍隊中間有七百個特選的精兵；𪜶慣勢用倒手，逐個會用索挕石，真準，分毫不差。
20:17 便雅憫人以外，點出以色列人攑刀的，共四十萬，攏是戰士。
20:17 以色列逐支族，便雅憫人以外，所召集攑刀的戰士，總共四十萬。
攻擊便雅憫人
20:18 以色列人就起來，到伯特利問上帝講：「阮中間是誰著代先上去及便雅憫人交戰啊？」耶和華講：「猶大著代先去。」
攻打便雅憫人
20:18 以色列人就起來，去伯特利求問上帝講：「阮中間叨一個支族著先去攻打便雅憫人？」
上主講：「猶大先去。」
20:19 以色列透早起來，紮營攻擊基比亞。
20:19 以色列人透早起來，佇基比亞對面紮營。
20:20 以色列人就出來，欲及便雅憫人交戰，以色列人排陣佇基比亞欲攻擊𪜶。
20:20 以色列人出來，佇基比亞排陣欲及便雅憫人交戰。
20:21 便雅憫人就對基比亞出來，彼日刣死以色列人二萬二千倒佇地裡。
20:21 便雅憫人嘛對基比亞出來；彼日，刣死以色列人兩萬兩千。
20:22 以色列人就家己奮勇，猶原佇頭一日排陣的所在閣排陣。
20:22 以色列人去到上主的面前，啼哭到暗時，請問上主講：「阮豈著閣進前及阮的同胞便雅憫人交戰？」
上主講：「著進前攻擊。」
以色列人就提出勇氣，猶原佇頭一日排陣的所在閣排陣。
20:23 以色列人上去，佇耶和華的面前啼哭，到下昏，問耶和華講：「阮著閣上去及阮的兄弟便雅憫人交戰抑免？」耶和華講：「著上去攻擊伊。」
20:23 併於上節
20:24 第二日，以色列人就進前去攻擊便雅憫人。
20:24 第二日，以色列人閣進前去攻擊便雅憫人。
20:25 便雅憫人也佇第二日對基比亞出來，攻擊𪜶，閣刣死以色列人一萬八千人倒佇地裡，攏是攑刀的。
20:25 便雅憫人嘛佇彼日對基比亞出來迎戰，閣刣死以色列人一萬八千個攑刀的戰士。
20:26 以色列人及眾百姓攏上去到伯特利，佇遐坐佇耶和華的面前啼哭，彼日禁食到日暗；閣佇耶和華的面前獻燒祭及平安祭。
20:26 以色列人，就是所有的軍兵，攏上去伯特利，坐佇上主的面前啼哭。彼日，𪜶禁食到日暗，閣佇上主的面前獻燒化祭及平安祭。
20:27 彼時，上帝的約櫃佇遐；亞倫的孫、以利亞撒的子非尼哈彼時徛佇伊的面前。
n 以色列人問耶和華講：「我著出去及我的兄弟便雅憫人交戰嗎？抑是著息啊？」耶和華講：「你著上去，因為明仔日我欲將𪜶交佇你的手。」
20:27 彼時，上帝的約櫃佇伯特利。亞倫的孫，以利亞撒的子非尼哈佇上主的面前服事。以色列人請問上主，講：「阮著閣去及阮的同胞便雅憫人交戰，抑是著煞？」
上主講：「著去，明仔載我欲將𪜶交佇恁的手。」
20:28 併於上節
20:28 併於上節
20:29 以色列人就埋伏兵佇基比亞的四圍。
20:29 以色列人就派兵佇基比亞的四圍埋伏。
20:30 第三日，以色列人閣上去攻擊便雅憫人，排列隊伍佇基比亞，及前二擺一樣。
20:30 第三日，以色列人閣去攻擊便雅憫人，及前兩遍像款，佇基比亞排陣。
20:31 便雅憫人就出去抵敵百姓，就受引誘離開城；𪜶親像前二擺，佇田裡起手刣死以色列人約略三十個；佇大路頂許個條路，一條𥦁伯特利，一條𥦁基比亞。
20:31 便雅憫人出去迎戰，受引誘離開城。𪜶佇兩條大路，一條迵伯特利，一條迵基比亞的野外，親像前兩遍，刣死以色列人約略三十個。
20:32 便雅憫人講：「𪜶猶原刣輸佇咱的面前。」以色列人講：「咱著逃走，引誘𪜶離開城到大路。」
20:32 便雅憫人講：「𪜶會親像以前按呢互咱拍敗。」
毋拘以色列人講：「咱來走，引誘𪜶離開城到大路。」
20:33 以色列眾人攏對伊的所在起來，排列隊伍佇巴力‧他瑪，以色列埋伏的兵對𪜶的所在就是馬利‧迦巴衝出來。
20:33 以色列人的主力軍來巴力‧他瑪重新排陣；以色列埋伏的兵士對基比亞的西旁衝出來。
20:34 通以色列有一萬精練的兵，進前來攻擊基比亞，交戰的勢面真猛烈；總是便雅憫人知災禍到啦。
20:34 全部的以色列人有一萬個精兵，進前攻擊基比亞；交戰的勢面真猛烈，毋拘便雅憫人毋知災禍到啊。
20:35 耶和華拍便雅憫佇以色列的面前。彼日，以色列人刣死便雅憫二萬五千一百人，攏是攑刀的。
20:35 上主互便雅憫人刣輸；彼日，以色列人刣死兩萬五千一百個便雅憫攑刀的兵士。
以色列人得勝
20:36 便雅憫人才知𪜶的受拍。因為以色列人退讓便雅憫人，是為著𪜶倚靠所設佇基比亞的伏兵。
20:36 便雅憫人知𪜶已經刣輸。
以色列人刣贏
以色列人撤退，是因為𪜶信任派佇基比亞四圍埋伏的戰士。
20:37 埋伏的兵緊緊竄入基比亞，埋伏的兵進前用刀刣死通城的人。
20:37 埋伏的兵真緊衝入基比亞，用刀刣死全城的人。
20:38 以色列人及伏兵有代先約一個記號，就是互火熏對城內淐起來。
20:38 以色列人的主力軍及埋伏的兵有約定一個信號，看著城內淐火燻的時，
20:39 以色列人當交戰的時越轉身，便雅憫人起手刣死以色列人，約略三十個，就講：「𪜶猶原親像前擺刣輸佇咱的面前。」
20:39 𪜶著越轉身反攻。代先，便雅憫人有刣死大約三十個以色列人，就講：「𪜶會親像以前按呢互咱拍敗。」
20:40 當火焰親像煙柱對城中淐上去的時，便雅憫人越頭看，看見通城的火熏抵天。
20:40 煙柱對城內淐高的時，便雅憫人越頭看著全城的火燻抵天。
20:41 以色列人閣越轉身，便雅憫人就真卬愕，因為看見災禍到啦。
20:41 以色列人閣越轉身反攻，便雅憫人就驚甲愣去，因為知災禍到啦。
20:42 所以𪜶佇以色列人的面前越轉身向曠野的路逃走；總是追趇𪜶真倚。對許個城出來的，𪜶攏刣𪜶佇彼中間。
20:42 𪜶佇以色列人的面前越轉身向曠野的路逃走；毋拘以色列人追趇𪜶真倚，𪜶就互主力軍及對逐個城出來的兵包圍，消滅。
20:43 𪜶圍困便雅憫人，追趇𪜶，佇𪜶歇腳的所在、𧿬踏𪜶，到基比亞的對面向日出的所在。
20:43 以色列人包圍便雅憫人，追趇𪜶，到基比亞的東旁，一路給𪜶追殺。
20:44 便雅憫人死的有一萬八千，諸個攏是勇士。
20:44 便雅憫人死一萬八千個勇士。
20:45 其餘的人越轉身走去曠野，到臨門的石磐。以色列人佇大路裡收拾𪜶五千人，親像拾麥屑一樣，閣追趇𪜶到基頓刣死𪜶二千人。
20:45 其他的人越轉身向曠野逃走，到臨門巖。以色列人沿路刣死𪜶五千人；追趇𪜶到基頓，閣刣死兩千人。
20:46 彼日便雅憫人死的共二萬五千人，許個攏是攑刀的勇士。
20:46 彼日，便雅憫人攏總死兩萬五千個攑刀的戰士。
20:47 獨獨六百人，越轉身走去曠野，到臨門的石磐，就𫢶佇臨門的石磐四月日。
20:47 便雅憫人猶賰六百個戰士，𪜶逃走去曠野，佇臨門巖匿四個月。
20:48 以色列人閣越轉攻擊便雅憫人，用刀拍死諸個城中的人及精牲，以及一切所抵著的，閣一切所到的城攏用火燒。
20:48 以色列人閣越轉攻擊便雅憫人，用刀刣死城內的住民、牲生，及所有抵著的人；𪜶閣一路放火燒附近的城。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。