上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
利未人及伊的細姨
19:1 當以色列無王的時，有寄腳佇以法蓮山地彼旁的一個利未人，娶一個猶大伯利恆的查某囝仔做細姨。
利未人及伊的細姨
19:1 以色列無王的時，有一個利未人住佇以法蓮山區偏僻的所在。伊娶一個猶大 伯利恆的女子做細姨。
19:2 細姨行淫背伊的丈夫，離開伊倒去猶大伯利恆，到老父的家，住遐四月日。
19:2 此個細姨受氣伊的丈夫，就離開丈夫，倒去後頭厝，佇遐住四月日久。
19:3 伊的丈夫起來，帶一個奴僕、二隻驢去趇伊，欲用好話安慰伊導伊倒來。伊就導伊入老父的厝。婦仁人的老父看見，就歡迎伊。
19:3 伊的丈夫帶一個奴僕及兩隻驢出發去尋伊，欲給伊姑情，導伊倒去。伊的丈夫到位，伊就導伊的丈夫入去老父的厝。利未人的丈人看著，就歡迎伊。
19:4 伊的丈人，就是查某囝仔的老父，留伊，伊就及伊住三日。𪜶就相及飲食，𫢶佇遐。
19:4 彼個丈人給伊留落來；伊就佇遐住三日，做夥飲食。
19:5 到第四日，𪜶透早起來伊欲起身去，查某囝仔的老父給子婿講：「請你食淡薄餅做點心，後來才通起身行。」
19:5 到第四日，𪜶透早起來，利未人欲出發；彼個丈人給子婿講：「請你食一寡物件，加添氣力，才出發。」
19:6 二人就坐落去相及飲食。查某囝仔的老父對彼人講：「請你歡喜閣𫢶一暝，互你的心快樂。」
19:6 兩個人就坐落來，做夥飲食。彼個丈人對伊講：「請你閣住一暝，閣放鬆一下。」
19:7 彼人起來欲起身，伊的丈人強強留伊，伊就閣歇一暝。
19:7 彼個人起來欲出發，伊的丈人閣強強留伊；伊就閣歇一暝。
19:8 到第五日，伊透早起來欲起身，查某囝仔的老父給伊講：「請你閣點心，聽候到日斜西。」𪜶二人就相及食。
19:8 到第五日，利未人透早起來欲出發，丈人給伊講：「請閣食一寡物件，加添氣力，聽候到日欲落山。」伊就留落來及丈人做夥食。
19:9 彼人及伊的細姨及奴僕起來欲起行，伊的丈人，就是查某囝仔的老父，給伊講：「看啊，日欲暗，請你閣歇一暝；日欲落啦，你著歇遮，互你的心快樂。明仔日透早起身倒去恁兜。」
19:9 彼個人及伊的細姨，以及奴僕起來欲出發；伊的丈人給伊講：「你看，日欲暗啊，請你閣歇一暝；日欲落啦，你著歇遮閣放鬆一下；明仔載透早才起身倒去恁兜。」
19:10 彼人肯閣歇一暝，就起來起身，到耶布斯的對面（耶布斯就是耶路撒冷。）二隻掛鞍的驢，以及伊的細姨及伊去。
19:10 彼個人毋愛閣歇一暝，就導伊的細姨及兩隻準備好勢的驢出發，來到耶布斯的對面；耶布斯就是耶路撒冷。
19:11 行近耶布斯的時，日已經欲落，奴僕給主人講：「來啊，咱值著越入耶布斯人此個城歇暝佇遐。」
19:11 𪜶行近耶布斯的時，日已經欲落山；奴僕對主人講：「咱斡入去耶布斯人的城，𫢶遐歇暝好無？」
19:12 主人講：「咱無欲越入外邦人的城就是無屬以色列人的，卡好咱著過來基比亞」；
19:12 伊的主人講：「咱無欲斡入去毋是以色列人啲住的外邦人的城；咱過來基比亞。」
19:13 閣給奴僕講：「來，咱著去諸個所在的一個，來歇佇基比亞，抑是拉瑪。」
19:13 伊閣給奴僕講：「來，咱看是欲去基比亞，抑是拉瑪過暝。」
19:14 𪜶就進前去。將近便雅憫的基比亞，日已經落；
19:14 𪜶就繼續行；欲到便雅憫的基比亞的時，日頭已經落山。
19:15 𪜶就越入去欲歇佇基比亞，就入去坐佇城內的街路，因為無人接納𪜶入厝歇暝。
19:15 𪜶就斡入去，欲佇基比亞歇暝。𪜶入城，坐佇廣場，因為無人接待𪜶入去厝裡歇暝。
19:16 日暗，有一個老人對田裡做工倒來。伊本是以法蓮山地的人，寄腳佇基比亞；總是彼所在的人是便雅憫人。
19:16 日暗，有一個老人對野外做工倒來。伊是以法蓮山區的人，住佇基比亞；基比亞是便雅憫人住的所在。
19:17 老人攑目看見人客佇城內的街路，就問伊講：「你對叨落來？欲去叨落？」
19:17 彼個老人攑頭看著有出外人佇城內的廣場，就問伊講：「你對叨位來，欲去叨位？」
19:18 伊應講：「阮對猶大伯利恆來，欲去以法蓮山地彼旁。我本佇遐，過去猶大伯利恆，今我去耶和華的厝，佇遮無人接納我入伊的厝。
19:18 伊應講：「阮對猶大的伯利恆來，欲去以法蓮山區偏僻的所在；我是遐的人，去猶大的伯利恆，現在欲轉去阮兜；毋拘佇遮無人接待我去𪜶兜。
19:19 總是我有草有糧通互驢，也有餅有酒通互本身及你的女婢，及隨你的奴僕的少年人，攏無欠一項。」
19:19 我有草料互驢，嘛有餅及酒互我，及我的細姨，以及侍候我的少年人，攏無欠什麼。」
19:20 老人講：「願你平安！你所欠用的是我代，獨獨你通佇街路裡過暝。」
19:20 老人講：「請你放心！恁欠用的我攏會設法。千萬毋通𫢶廣場過暝。」
19:21 對按呢導𪜶到伊的厝，飼伊的驢，𪜶就洗腳飲食。
19:21 伊就導𪜶去伊的厝，飼𪜶的驢；𪜶就洗腳飲食。
19:22 𪜶的心抵啲快樂的時，城內許個匪類圍纍伊的厝，直直拍門，對厝主老人講：「你將彼個入你的厝的人帶出來，阮欲及伊交合。」
19:22 𪜶抵啲歡喜快樂的時，城內許個匪類來圍彼間厝，直直拍門，對厝主，彼個老人，講：「給入去恁兜彼個查甫人導出來，阮欲及伊交合。」
19:23 彼個厝主出來𪜶遐給𪜶講：「我的兄弟啊，通，莫得做此個歹；此人既然入我的厝，恁就莫得做此個見誚的事。
19:23 彼個厝主出來，對𪜶講：「朋友啊，按呢啦，毋通做此款歹代誌。此個人是我的人客，恁毋通做此款見笑事。
19:24 我有查某子，猶是在室女，閣有伊的細姨，我導伊出來恁通凌辱伊出在恁的意思款待𪜶，獨獨對此人恁通行此個見誚事。」
19:24 我有一個查某子，猶是在室女，閣有彼個人的細姨；我導𪜶出來，恁通給𪜶凌辱，出在恁的意思對待𪜶。毋拘，對此個人恁毋通做此款見笑事。」
19:25 總是許個人聽伊的話。彼人就將伊的細姨牽出去外面交𪜶，𪜶就及伊交合，通暝凌辱伊，到早起天欲光的時，才放伊去。
19:25 毋拘許個人毋聽彼個老人的話；彼個利未人就掠伊的細姨給伊拺出去外面互𪜶。𪜶就給伊強姦，通暝凌辱伊，到隔日天欲光的時，才放伊去。
19:26 天昲光的時，婦仁人來到伊的主人所歇彼個厝門口，就倒佇遐，直到天光。
19:26 天昲光的時，婦仁人來到伊的丈夫歇暝彼間厝的門口，倒佇遐，直到天光。
19:27 天光早，伊的主人起來開厝的門，出去欲起身，看見彼個婦仁人就是伊的細姨倒佇厝門口，二支手靠佇戶椗裡；
19:27 伊的丈夫透早起來，開門，欲出發倒去𪜶兜，看著伊的細姨倒佇門口，兩支手靠佇戶橂。
19:28 就給婦仁人講：「起來，咱欲起身！」總是伊無應。伊就給伊扶佇驢的頂面，起身去伊的本所在。
19:28 伊對伊的細姨講：「起來，咱轉來去。」毋拘伊無回應，利未人給伊扶起去驢仔頂，就出發倒去𪜶兜。
19:29 到伊的厝，就用刀將伊的細姨的身屍及骨割做十二塊，差人提去通以色列的全境。
19:29 轉去到𪜶厝，伊就提刀將伊的細姨切做十二塊，差人送去通以色列的全境。
19:30 見若看見的人攏講：「對以色列人出埃及的日，直到今仔日，未曾按呢行，也無看見。今恁著想，著參詳然後才講。」
19:30 所有看著的人攏講：「對以色列人出埃及到今仔日，此款代誌猶毋曾發生，嘛毋曾看過。今，咱著想，著參詳，著決定欲按怎做。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。