上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
米迦及但支族
18:1 彼時，以色列中無王。彼時但的人的支派尋地做業通徛起；因為到彼日，佇以色列支派中𪜶猶未得著業。
米迦及但支族
18:1 彼時，以色列人無王；但支族啲尋土地做徛起的所在，因為到彼日，𪜶佇以色列人的中間，猶未得著分互𪜶做產業的土地。
18:2 但的人對瑣拉及以實陶差本族眾百姓中五個勇士，去偷看彼個地來查考，吩咐𪜶講：「恁去查考彼個地。」𪜶來到以法蓮山，入米迦的厝，就歇佇遐。
18:2 但的人對瑣拉及以實陶，差𪜶本族五個勇士去詳細偵探彼個地區，吩咐𪜶，講：「恁去偵探彼個地區。」𪜶來到以法蓮山區，入米迦的厝，就佇遐歇暝。
18:3 𪜶近米迦的厝，認著彼個少年利未人的聲音，就入去問伊：「是誰導你來遮？你佇遮做甚麼？你佇遮得著甚麼？」
18:3 𪜶佇米迦的厝附近認著彼個少年利未人的口音，就入去問伊：「啥人導你來遮？你佇遮啲做什麼？你佇遮有得著什麼好處？」
18:4 伊講：「米迦款待我按呢按呢，伊有倩我，我做伊的祭司。」
18:4 伊講：「米迦款待我按呢，按呢；伊閣倩我做伊的祭司。」
18:5 𪜶給伊講：「請你問上帝，互阮知阮所啲行的路，亨通抑無？」
18:5 𪜶給伊講：「請你問上帝，互阮知，阮的任務會順利達成𣍐？」
18:6 祭司給𪜶講：「恁通平安去，恁所行的路是佇耶和華的面前。」
18:6 祭司給𪜶講：「恁通平安去；上主會幫贊恁完成任務。」
18:7 五人就起身，來到拉億，看見遐的百姓安然徛起平安無掛慮，親像 西頓人一樣。佇遐無有掌權用甚麼事來攪擾𪜶；𪜶離開西頓人遠遠，無及別人往來。
18:7 彼五個人就出發，來到拉億，看著遐的住民平安徛起，親像西頓人無欠缺，無受人攪擾；𪜶離開西頓人真遠，無及任何人來往。
18:8 五人倒來到瑣拉、以實陶，𪜶兄弟遐；兄弟問𪜶講：「恁有甚麼話？」
18:8 𪜶倒來到佇瑣拉及以實陶中間仝支族的人遐；許個人問𪜶講：「恁看了按怎？」
18:9 𪜶應講：「起來，咱上來去攻擊𪜶！因為阮已經看彼個地，看啊，彼個地真好。恁啥事恬恬？著來去入，得著彼個地做業，通延迁。
18:9 𪜶應講：「來，咱趕緊來攻擊𪜶。阮已經探查過；彼個所在實在真好。恁毋通𫢶遮聽候，著隨時來攻佔彼個土地做咱的產業。
18:10 恁到遐，欲看安然徛起的百姓，所在也開闊。上帝已經將彼所在交佇恁的手；地上所有的物，彼所在無欠一項。」
18:10 恁到遐，就會看著安然徛起的人民，土地開闊，物產閣豐富；上帝已經將彼個所在交佇咱的手。」
18:11 對按呢但族的六百人，逐個帶軍器，對瑣拉及以實陶進前去，
18:11 對按呢，但支族六百個人帶軍器，對瑣拉及以實陶出發。
18:12 𪜶上去紮營佇猶大的基列‧耶琳。所以叫此所在名瑪哈呢‧但，到今仔日。看啊，這是佇基列‧耶琳的後面。
18:12 𪜶佇猶大的基列‧耶琳西旁紮營；所以彼個所在到今仔日猶叫做瑪哈尼‧但。
18:13 𪜶對遐去以法蓮山地，到米迦的厝。
18:13 𪜶對遐經過以法蓮山區來到米迦𪜶兜。
18:14 從前偷看拉億地的五人給𪜶的兄弟講：「諸個厝內有以弗得及家內偶像，及雕刻的像鑄的像，恁知嗎？今恁著想看欲怎樣做。」
18:14 彼五個去偵探拉億地區的人，給𪜶仝支族的人講：「恁豈知諸個厝內面有以弗得、家族神像、雕刻的神像，及鑄的神像？今恁著拍算，看欲按怎做。」
18:15 𪜶就越去遐，到彼個少年的利未人的厝，就是米迦的厝問伊平安。
18:15 𪜶就斡去米迦的厝，入去彼個少年的利未人的厝內，給伊請安。
18:16 但族許個六百人帶軍器，攏徛佇門口。
18:16 但支族彼六百個帶軍器的人攏徛佇門口。
18:17 偷看地的五人就入去，將雕刻的像、以弗得、家內的像、及鑄的像，攏提去。祭司及帶軍器的六百人，相及徛佇門口。
18:17 偵探彼個地的五個人入去，將雕刻的神像、以弗得、家族神像，及鑄的神像攏提去；祭司及帶軍器彼六百個人做夥徛佇門口。
18:18 彼五人入米迦的厝，提雕刻的偶像、以弗得、家內的偶像，及鑄的像，祭司就問𪜶講：「恁做甚麼啊？」
18:18 彼五個人入去米迦的厝，提雕刻的神像、以弗得、家族神像，及鑄的神像的時，祭司問𪜶講：「恁啲創啥？」
18:19 𪜶應講：「莫得做聲，用手掩嘴，隨阮來去！做阮的父、做阮的祭司。你做一人的家的祭司卡好？抑是做以色列一支派一族的祭司卡好啊？」
18:19 𪜶給伊講：「恬恬，毋通講話，隨阮來去，做阮的師父，阮的祭司。你做一個家族的祭司較好，抑是做以色列一個支族一個宗族的祭司較好？」
18:20 祭司心歡喜，就提以弗得及家內的偶像，及雕刻的像，行佇百姓的中間。
18:20 祭司真歡喜，就提以弗得、家族神像，及雕刻的神像，及許個人做夥去。
18:21 𪜶就越轉身離開遐，互囝仔、精牲、貨財做頭前。
18:21 𪜶就出發離開遐，互囝仔、牲生、財物做頭前。
18:22 離開米迦的厝嶄然遠，米迦許個厝邊攏聚集，追趕但的人，喉叫但的人。
18:22 離開米迦的厝已經真遠，米迦聚集伊的厝邊，追趇但的人。
18:23 但的人越頭看問米迦講：「你聚集許個人來是甚麼代誌啊？」
18:23 𪜶大聲喝但的人。但的人越頭，問米迦講：「你聚集諸個人欲創什麼？」
18:24 伊講：「我所妝的上帝及祭司恁攏帶去，我猶有剩甚麼？怎樣猶問我講『你甚麼代誌』啊？」
18:24 伊講：「我造的神明、倩的祭司，恁攏給我帶帶去，我猶賰什麼？恁哪猶啲問我講『你欲創什麼』？」
18:25 但的人給伊講：「你通互阮聽見你的聲，驚了躁性的人來共恁，致到你及全家攏失落生命。」
18:25 但的人給米迦講：「你給我恬去，才免歹性地的人給你攻擊，你及恁全家攏會無命。」
18:26 但的人做𪜶行。米迦看見𪜶比伊卡強，就越轉身倒去伊的厝。
18:26 但的人就做𪜶去。米迦看著𪜶比伊較強，就越轉身倒去𪜶兜。
18:27 𪜶帶米迦所做的及伊所有的祭司到拉億，看見安然無掛慮的百姓，就用刀刣死𪜶，閣放火燒彼個城，
18:27 但的人帶米迦造的神像及伊的祭司來到拉億，用刀刣死許個平安徛起的住民，閣放火燒此個城。
18:28 也無人拯救；因為離開西頓真遠，𪜶閣無及別人往來。彼個城佇彼個倚近伯‧利合的山谷。
18:28 此個城佇伯‧利合山谷附近，離西頓真遠，閣無及任何人來往，所以無人來給𪜶解救。
18:29 但的人閣佇遐起城來徛起，照𪜶祖公以色列的子但的名，叫彼個城名但；彼個城起頭名叫拉億。
18:29 但的人就重建此個城，佇遐徛起。𪜶給此個城號名叫做但，是用𪜶的祖先以色列的子但的名號的；此個城較早的名是拉億。
18:30 但的人就為家己祀彼個雕刻的像。摩西的孫、革舜的子約拿單，及伊的子孫做但的支派的祭司，直到彼地方的人抵著掠的日。
18:30 但的人就佇遐為家己𫞼彼個雕刻的神像。摩西的孫、革舜的子約拿單，及伊的後代，做但支族的祭司，一直到以色列人受掠彼日。
18:31 上帝的厝佇示羅許個日，但的人為家己祀米迦所做雕刻的像。
18:31 上帝的會幕佇示羅彼段期間，但的人嘛為家己𫞼米迦雕刻的神像。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。