上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
參孫佇迦薩
16:1 參孫到迦薩，佇遐看見一個妓女，就親近伊。
參孫佇迦薩
16:1 參孫來迦薩，佇遐看著一個妓女，就及伊睏。
16:2 有人給迦薩人講：「參孫到遮！」𪜶就透暝圍伊，佇城門當等伊，通暝靜靜，講：「到天光早咱就通刣伊。」
16:2 有人給迦薩人講：「參孫來到咱遮。」𪜶就透暝給伊包圍，歸暝靜靜佇城門埋伏；𪜶講：「天光咱就通刣伊。」
16:3 參孫睏到半暝，佇半暝起來，將城門的門扇、及二支門竪、及門楗，攏拆起來，下佇肩頭裡，夯到希伯崙對面的山頂。
16:3 參孫睏到半暝，起來，將城門的門扇、兩支門徛，及門栱，攏拆起來，下佇肩頭，夯去希伯崙對面的山頂。
參孫及大利拉
16:4 後來，參孫佇梭烈山谷戀愛一個查某人，名叫大利拉。
16:4 後來，參孫佇梭烈山谷愛著一個女子黛利拉。
16:5 非利士人許個首領上去見彼個查某人，對伊講：「你著漏參孫，看伊的大氣力在佇叨落，阮怎樣才會贏伊，通縛來困苦伊。阮就逐人互你一千一百銀。」
16:5 非利士人許個首領去尋彼個女子，給伊講：「你著給參孫落話，看伊是按怎即呢有氣力；阮著按怎做，才會當較贏伊，給伊縛起來，給伊制伏。阮逐個人就互你一千一百塊銀。」
16:6 大利拉給參孫講：「求你給我講，你的大氣力在佇叨落，著怎樣才會縛你困苦你。」
16:6 黛利拉就給參孫講：「請你給我講，你是按怎即呢有氣力；著按怎才會當給你縛起來，給你制伏。」
16:7 參孫應講：「人若用七條猶未乾青的藤仔縛我，我就軟弱親像別人。」
16:7 參孫應講：「人若用七條猶未焦的索仔給我縛，我就及普通人像款無氣力。」
16:8 對按呢非利士人許個首領提七條猶未乾青的藤仔來，交互婦仁人，伊就用彼個來縛伊。
16:8 非利士人許個首領就提七條猶未焦的索仔互黛利拉，伊就用這給參孫縛起來。
16:9 婦仁人已經有埋伏人佇伊的內房。婦仁人講：「參孫啊，非利士人來欲掠你！」參孫就掇斷藤仔，親像掇斷經過火的麻絲一樣。按呢，伊的大氣力人猶原知。
16:9 彼時已經有人佇伊的內房啲當等；伊喝講：「參孫，非利士人來欲掠你！」參孫就擦斷索，親像擦斷火燒過的麻絲；按呢，伊大氣力的祕密人猶原毋知。
16:10 大利拉給參孫講：「你騙我，對我講白賊。今求你給我講著怎樣才會縛你。」
16:10 黛利拉給參孫講：「你給我騙，講白賊。今你著給我講，按怎才會當給你縛起來。」
16:11 參孫應講：「人若用未曾用的新索縛我，我就軟弱親像別人。」
16:11 參孫應講：「人若用毋曾用過的新索仔給我縛，我就及普通人像款無氣力。」
16:12 大利拉就用新索縛伊，對伊講：「參孫啊，非利士人來欲掠你！」彼時埋伏的人匿佇內房。參孫就掇斷伊手骨裡的索，親像掇斷一條線。
16:12 黛利拉就用新的索仔給伊縛起來，對伊講：「參孫啊，非利士人來欲掠你！」彼時，埋伏的人匿佇內房；參孫就擦斷縛佇伊手骨的索，親像擦斷一條線。
16:13 大利拉給參孫講：「你到今猶騙我，對我講白賊。求你給我講，著怎樣才會縛你。」參孫應講：「你若用七股的頭毛，及緯線相及織就會。」
16:13 黛利拉給參孫講：「你到今猶騙我，講白賊。請你給我講，按怎才會當給你縛起來？」
參孫應講：「你若將我七股的頭毛及織布的線織做夥，用杙仔釘啲，就會當。」
16:14 婦仁人就用釘釘伊的頭毛，給伊講：「參孫啊，非利士人來欲掠你！」參孫就醒，將布機的釘及緯線做一下拔出來。
16:14 黛利拉趁參孫啲睏的時，將伊的頭毛及織布的線織做夥，用杙仔固定，然後喝講：「參孫啊，非利士人來欲掠你！」參孫醒起來，將杙仔、織布機的梭及線，做一下拔出來。
16:15 大利拉給伊講：「你的心無連佇我，怎樣講你疼我？你已經騙我三擺，無給我講，你的氣力在佇叨落。」
16:15 黛利拉給伊講：「你無真正信任我，哪會當講你愛我？你已經騙我三遍，無給我講，你的氣力對叨位來。」
16:16 大利拉日日用話催伊迫伊，致到伊的心鬱悶到欲死。
16:16 黛利拉逐日用話給催給逼，互伊的心煩甲欲死。
16:17 就將伊的心底所囥的攏報伊，給伊講：「永曾有剃頭刀到我的頭殼，因為我對母胎就歸上帝做拿細耳人；若給我剃起來，我的氣力就離開我，我就軟弱親像別人。」
16:17 參孫就將心內的祕密攏給伊講：「我的頭毛攏毋曾用剃頭刀剃過，因為我對出世就奉獻互上帝做拿細耳人。若給我的頭毛剃起來，我的氣力就失去，我就無力，及普通人像款。」
16:18 大利拉看見伊將心底所囥的攏給伊講，就差人叫非利士人的首領，給𪜶講：「請恁此擺閣上來，因為伊已經將心底所囥的攏給我講。」非利士人的首領上去婦仁人遐，彼個銀帶佇手裡。
16:18 黛利拉知影參孫將心內的祕密攏給伊講，就差人去給非利士人的首領講：「請恁閣來一遍，因為伊已經將心內的祕密攏給我講啦。」非利士人的首領就帶銀去黛利拉遐。
16:19 伊就互參孫睏佇伊的腳頭窩，叫一人來剃伊七股的頭毛。對按呢困苦伊，伊的氣力就離開伊。
16:19 黛利拉互參孫睏佇伊的腳頭窩，叫一個人來給參孫七股的頭毛剃起來。按呢，黛利拉互參孫失去氣力。
16:20 伊講：「參孫啊，非利士人來欲掠你！」參孫睏就醒，心內講：「我欲親像前幾若擺家己滾開」；總是伊知耶和華已經離開伊。
16:20 黛利拉喝講：「參孫啊，非利士人來欲掠你！」參孫醒起來，想講：「我欲親像前彼幾遍家己弓開。」毋拘，伊毋知上主已經離開伊。
16:21 非利士人掠伊，挖伊的目睭，帶伊到迦薩，用銅鍊縛伊；伊就佇監裡挨磨。
16:21 非利士人給伊掠起來，挖伊的目睭，帶伊去迦薩，用銅鍊給伊鍊啲，互伊佇監裡挨磨。
16:22 若是伊的頭毛受剃了後，閣漸漸長起來。
16:22 總是伊的頭毛剃起來了後，閣漸漸長起來。
參孫的死
16:23 非利士人許個首領聚集，欲獻大祭互𪜶的上帝大袞，也欲宴樂，因為𪜶講：「咱的上帝將咱的對敵參孫交佇咱的手啦。」
參孫的死
16:23 非利士人的首領聚集，欲獻大祭祀互𪜶的神明大袞，歡喜慶祝；𪜶講：「咱的神明已經將咱的對敵參孫交佇咱的手。」
16:24 百姓看見參孫，就謳咾𪜶的上帝講：「咱的對敵毀咱的地、閣刣死咱多多人的，今咱的上帝已經將伊交佇咱的手。」
16:24 人民看著參孫，就謳咾𪜶的神明，講：「咱的對敵毀壞咱的土地，刣死足多咱的人，今咱的神明已經將伊交佇咱的手。」
16:25 𪜶宴樂的時，就講：「叫參孫來，互咱弄𨑨迌。」𪜶就叫參孫出監，伊就互𪜶弄𨑨迌。𪜶互伊徛佇二支柱的中間。
16:25 𪜶非常快樂的時，講：「叫參孫出來，互咱戲弄𨑨迌。」𪜶就給參孫對監裡押出來；伊就互人戲弄；𪜶互伊徛佇兩支柱的中間。
16:26 參孫給牽伊的手的囝仔講：「請你互我摸著托厝的柱，互我倚𪜶。」
16:26 參孫給牽伊的手的囝仔講：「請你互我摸著撐廟的柱，互我倚𪜶。」
16:27 彼時厝內男女滿滿，非利士人的眾首領也攏佇遐。厝頂男女約略有三千人看人啲弄參孫𨑨迌。
16:27 彼時廟內男女揢甲滿滿，非利士人的首領嘛攏佇遐；佇廟頂的平台啲看參孫互人戲弄的男女，大約有三千人。
16:28 參孫祈禱耶和華講：「主耶和華啊，求你數念我。上帝啊，求你賜我盡此擺的氣力，互我為我二蕊目睭對非利士人做一下報仇。」
16:28 參孫對上主求叫，講：「至高的上主，求你會記得我。上帝啊，此一遍就好，求你賜我氣力，互我為著兩蕊目睭對非利士人報仇。」
16:29 參孫就攬托彼間厝的二支中柱來倚伊：正手攬一支，倒手攬一支，
16:29 參孫就攬撐廟的兩支中柱，正手攬一支，倒手攬一支。
16:30 參孫講：「願我及非利士人相及死！」就盡力屈身，厝就倒，來壓佇許個首領及佇彼內面的眾人。按呢，參孫死的時所害死的比活的時所害死的閣卡多。
16:30 參孫講：「互我及非利士人做夥死。」伊屈身出大力，廟就倒，硩死許個首領及內面所有的人。按呢，參孫最後刣死的人，比活啲的時刣死的閣較多。
16:31 參孫的兄弟及伊的老父全家攏落來收拾伊，扛上去埋葬佇瑣拉及以實陶的中間，佇伊的老父瑪羅亞的墓地。參孫做以色列的士師二十年。
16:31 參孫的兄弟及伊老父的親族，攏落來收伊的身屍，給伊扛上去安葬佇瑣拉及以實陶的中間，𪜶老父瑪挪亞的墓。參孫做以色列的士師二十年。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。