上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
15:1 閣有許久，到割麥的時，參孫帶一隻山羊仔去尋伊的某，講：「我欲入房尋我的某。」伊的丈人准伊入，
15:1 過一段時間，到割麥仔的時，參孫帶一隻山羊仔去尋伊的某。伊對伊的丈人講：「我欲入去房間尋阮某。」伊的丈人毋准伊入去。
15:2 丈人講：「我按算你實在怨恨伊，因為按呢我將伊互你的陪伴。伊的小妹豈是比伊卡媠嗎？請你娶來替伊！」
15:2 丈人講：「我想你足慼伊，所以我將伊嫁互你的伴娶的。伊的小妹比伊較媠，你通娶伊。」
15:3 參孫給𪜶講：「此擺我傷害非利士人𪜶無通責罪我。」
15:3 參孫給𪜶講：「此遍我有正當的理由對付非利士人。」
15:4 參孫就去掠三百隻狐狸，閣帶火把，將狐狸尾二隻二隻縛相粘，將火把縛佇二支尾的中間，
15:4 參孫就去掠三百隻狐狸，將𪜶兩隻兩隻的尾縛做夥，閣將火把縛佇狐狸尾的中間。
15:5 火把點𤏸，就放狐狸入非利士人猶未收割的五穀，燒伊歸捆的及伊未割的五穀，以及橄欖園攏燒去。
15:5 伊將火把點𤏸，放狐狸入去非利士人的麥園，將割好𫞼佇遐，及猶未割的麥仔攏燒了了，連葡萄園及橄欖樹嘛攏燒去。
15:6 非利士人講：「此個事是誰做的啊？」𪜶講：「是亭拿人的子婿參孫，因為伊的丈人將伊的某互伊的陪伴。」非利士人就上去，用火燒婦仁人及伊的老父。
15:6 非利士人講：「這是啥人做的？」
有人講：「是亭拿人的子婿參孫，因為伊的丈人將伊的某嫁互伊的伴娶的。」非利士人就去放火燒彼個婦仁人及伊的老父。
15:7 參孫對非利士人講：「恁既然行按呢，我欲對恁報仇才欲息。」
15:7 參孫對非利士人講：「恁既然做此款代誌，我一定欲報仇，毋放恁煞。」
15:8 參孫就大大拍死𪜶，身屍相褡。就落去，𫢶佇以坦的石頭孔。
15:8 參孫就出重手攻擊𪜶，刣死真多人。後來，伊落去住佇以坦的石洞內。
參孫拍散非利士人
15:9 非利士人上去紮營佇猶大，分散佇利希。
參孫拍敗非利士人
15:9 非利士人去紮營佇猶大，佇利希排陣。
15:10 猶大人講：「恁啥事上來攻擊阮啊？」𪜶講：「阮上來是欲捆縛參孫；伊款待阮怎樣，阮也欲按呢款待伊。」
15:10 猶大人講：「恁是按怎上來攻擊阮？」
𪜶講：「阮來是欲掠參孫；伊按怎對待阮，阮嘛欲按呢對待伊。」
15:11 對按呢猶大三千人到以坦的石頭孔，對參孫講：「非利士人管轄咱，你知嗎？你啥事做此個事互阮啊？」應講：「𪜶怎樣款待我，我也按呢款待𪜶。」
15:11 對按呢，三千個猶大人就去以坦的石洞遐，給參孫講：「你豈毋知非利士人壓制咱？你哪給阮惹即大的麻煩？」
參孫應講：「𪜶按怎對待我，我嘛按呢對待𪜶。」
15:12 猶大人給伊講：「阮落來是欲捆縛你，將你交佇非利士人的手。」參孫給𪜶講：「恁著對我咒誓，恁本身無欲害我。」
15:12 猶大人給伊講：「阮來欲給你縛起來交互非利士人。」
參孫給𪜶講：「恁著咒誓，恁𣍐害我。」
15:13 𪜶對伊講：「無，只有欲捆縛你交佇𪜶的手，阮的確無害死你。」就用二條新的索捆縛伊，對石磐帶伊上去。
15:13 𪜶對伊講：「阮一定𣍐害你，干焦欲給你縛起來交互非利士人。」𪜶就用兩條新的索縛參孫，對石洞給伊帶出來。
15:14 參孫到利希，非利士人抵著就喝。耶和華的神大大臨到伊，伊手裡的索就親像過火燒的麻，所縛伊的索就對伊的手落落去。
15:14 參孫到利希；非利士人就行倚去，對伊大聲喝。上主的神大大充滿伊，縛伊的手的索就親像火燒過的麻索，對伊的手落落去。
15:15 伊看見驢一支新的嘴䩃骨，就伸手拾伊，用來拍死一千人。
15:15 伊看著一塊猶未焦的驢仔的嘴䩃骨，就拾起來，用來拍死一千人。
15:16 參孫講：
我用驢的嘴䩃骨拍死人一堆一堆，
我用驢的嘴䩃骨拍死一千人。
15:16 參孫講：
「我用驢的嘴䩃骨拍死一千人；
我用驢的嘴䩃骨拍死人，一堆閣一堆。」
15:17 講息，就將手裡的嘴䩃骨㧒擲。彼所在就叫拉末‧利希。
15:17 講煞，就將手裡的嘴䩃骨㧒确；彼所在就叫做拉末‧利希。
15:18 參孫嘴乾到極，就求叫耶和華講：「你既然用你的奴僕的手行即大的拯救，總無我今著嘴乾來死、陷落佇無受割禮的人的手嗎？」
15:18 參孫非常嘴焦，就求叫上主講：「你既然互你的僕人大勝利，哪通互我嘴焦甲欲死，互無受割禮的人掠去？」
15:19 上帝就互利希塌窩的所在裂開，有水對遐淐出來。參孫飲了，精神復倒閣活動；對按呢號彼個水泉叫隱‧哈歌利，彼個水泉到今仔日猶佇利希。
15:19 上帝就互利希塌窩的所在裂開，水對遐淐出來。參孫飲了，元氣回復；彼個水泉就叫做隱‧哈歌利，到今仔日猶佇利希。
15:20 當非利士人的時，參孫做以色列的士師二十年。
15:20 以色列人互非利士人壓制的時，參孫做士師二十年。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。