上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
參孫及亭拿的查某囝仔
14:1 參孫落去亭拿，佇亭拿看見一個查某囝仔，就是非利士人的查某子。
參孫及亭拿的女子
14:1 參孫落去亭拿，佇遐看著一個女子，是非利士的查某囝仔。
14:2 參孫上去給伊老父老母講：「我佇亭拿看見一個查某囝仔，是非利士人的查某子，願恁給我娶伊來做某。」
14:2 參孫倒去給𪜶老父老母講：「我佇亭拿看著一個女子，是非利士的查某囝仔；請互我娶伊作某。」
14:3 伊的老父伊的老母給伊講：「佇你兄弟中的查某囝仔，抑是佇咱百姓中，豈無一個查某囝仔，致到你去佇無受割禮的非利士人中娶某啊？」參孫給伊的老父講：「願你給我娶伊，因為伊是我合意的。」
14:3 伊的父母給伊講：「佇咱的宗族及同胞的中間，豈無查某囝仔？你哪欲娶無受割禮的非利士人的查某囝仔？」
參孫給伊的老父講：「我合意伊，我欲娶伊。」
14:4 總是伊的老父伊的老母知此個事是出佇耶和華，因為伊尋機會攻擊非利士。彼時，非利士人管轄以色列。
14:4 伊的父母毋知此個代誌出佇上主，因為上主尋機會欲攻擊非利士人。彼時，非利士人管轄以色列人。
14:5 參孫及伊的父母落去亭拿，到亭拿的葡萄園，抵當有一隻獅仔哮來倚伊。
14:5 參孫及伊的父母落去亭拿。
參孫到亭拿的葡萄園的時，忽然抵著一隻少壯的獅對伊大聲哮。
14:6 耶和華的神大大臨到參孫，伊的手無家私，也拆裂伊，親像拆裂山羊仔一樣。伊也無給伊的父母講伊所行的事。
14:6 上主的神大大充滿參孫；伊空手給獅拆裂，親像啲拆裂山羊仔。此項代誌參孫無給伊的父母講。
14:7 伊落去及查某囝仔講話，伊是參孫所合意的；
14:7 參孫落去及彼個女子講話，真合意伊。
14:8 閣有許久，倒轉欲來娶伊，越對路邊欲看死的獅，看見有一巢蜂及蜜佇獅的身屍內，
14:8 過一段時間，伊倒去欲娶彼個女子做某；伊斡對路邊欲看彼隻伊拍死的獅，看著有一巢蜂及蜜佇獅的身屍內面。
14:9 手提蜜去行，愈行愈食；到伊的父母遐，就互𪜶，𪜶也食；總是無給伊講此個蜜是對獅的身屍提來的。
14:9 伊穵蜜下佇手裡，那行那食；來到伊的父母遐，分互𪜶食，毋拘無給𪜶講蜜是對獅的身屍穵來的。
14:10 伊的老父落去到查某囝仔遐。參孫佇遐設筵席，因為平素少年人攏有此號的風俗。
14:10 伊的老父落去彼個女子遐。參孫照彼所在作新郎的慣例，佇遐辦桌請人客。
14:11 𪜶看見參孫，就導三十個伴來陪伊。
14:11 非利士人看著參孫來，就導三十個人來陪伴伊。
14:12 參孫給𪜶講：「我今欲出一個猜互恁，恁佇筵席的七日內，若會猜出意思來給我講，我就欲互恁三十領的幼苧衫，三十套的外衫；
14:12 參孫給𪜶講：「我現在欲出一個謎猜互恁；恁佇宴席的七日內若猜會出，我就欲互恁三十領幼麻布的內衫、三十套禮服；
14:13 恁若𣍐會給我講，恁就著互我三十領的幼苧衫，三十套的外衫。」𪜶講：「請出你的猜互阮聽。」
14:13 恁若臆𣍐出來，恁著互我三十領幼麻布的內衫、三十套禮服。」
𪜶講：「請講你的謎猜互阮臆。」
14:14 伊就給𪜶講：
對食的出食物；
對強的出甜。
𪜶三日久猜𣍐出。
14:14 參孫就講：
「食物對吞食的出；
甜物對強猛的出。」
𪜶三日久臆𣍐出。
14:15 到第七日，𪜶給參孫的某講：「你著漏你的丈夫，互伊用猜的意思給阮講，免得阮用火燒你及你的老父的厝。恁請阮來，是欲搶阮抑是？」
14:15 到第四日，𪜶給參孫的某講：「你著給你的丈夫落話，互阮知謎猜的意思；若無，阮欲放火燒你及恁老父的厝。恁請阮來，是欲搶阮是無？」
14:16 參孫的某啼哭佇伊的面前講：「你是怨恨我，是疼我，因為你出猜互我本國的人，也無給我講明。」伊應伊講：「連我的老父老母都無給伊講，豈通給你講嗎？」
14:16 參孫的某仆佇伊的肩頭頂啼哭講：「你是怨恨我，毋是疼我；因為你出謎猜互阮本族的人，卻無給我講答案。」
伊應講：「我連父母都無給𪜶講，哪通給你講？」
14:17 佇筵席的七日內，伊啼哭佇伊的丈夫的面前，到第七日就給伊講，因為伊迫伊真殄，伊的某就給伊本國的人講。
14:17 參孫的某佇伊的面前啼啼哭哭到宴席的第七日，參孫𣍐堪得伊逼，就給伊講；伊的某就將答案給伊本族的人講。
14:18 到第七日，日猶未落的代先，城內的百姓給參孫講：
有甚麼比蜜卡甜啊？
有甚麼比獅卡強啊？
參孫給𪜶講：
恁若是用我的牛種仔犂田，
我的猜就猜𣍐出。
14:18 到第七日，日落以前，城內的人來給參孫講：
「有什麼比蜜較甜？
有什麼比獅較強？」
參孫給𪜶回答講：
「若無用我的細隻牛母犁田，
恁絕對臆𣍐出答案。」
14:19 耶和華的神大大臨到參孫，伊就落去到亞實基倫，刣死𪜶中間三十人，搶𪜶，將許個衫互猜著的人。參孫大受氣，就上去𪜶老父的家。
14:19 上主的神大大充滿參孫，伊就落去亞實基倫，刣死三十人，搶𪜶的衫，提互臆著謎猜的人。參孫氣沸沸，倒去𪜶老父遐。
14:20 參孫的某就嫁互伊的陪伴，就是參孫用做伊的朋友的。
14:20 參孫的某煞嫁互伊的伴娶的中間的一個。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。