上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
11:1 基列人耶弗他是一個大權能的勇士，是妓女的子。耶弗他是基列所生的。
11:1 基列人耶弗他是強猛的勇士；伊的老母是妓女，老父是基列。
11:2 基列的某也給伊生幾若個子：伊的某所生的子已經大漢，就革逐耶弗他，給伊講：「你通佇阮老父的家承接業，因為你是別個婦仁人的子。」
11:2 基列的某嘛給伊生幾若個子；諸個子大漢，就給耶弗他趕出去，講：「你𣍐用得分阮老父的財產，因為你是妓女生的。」
11:3 耶弗他就走閃避伊的兄弟，去𫢶佇陀伯的地，有匪類聚集佇耶弗他遐，隨伊出入。
11:3 耶弗他就走閃伊的兄弟，去住佇陀伯地區；有一寡匪類倚來耶弗他遐，隨伊出入。
11:4 過有許久，亞捫人及以色列交戰。
11:4 過一段時間，亞捫人及以色列人交戰。
11:5 亞捫人及以色列交戰的時，基列的長老去，欲招耶弗他對陀伯的地來；
11:5 亞捫人及以色列人交戰的時，基列的長老去陀伯地區請耶弗他倒來。
11:6 對耶弗他講：「請你來做阮的元帥，阮就通及亞捫人交戰。」
11:6 𪜶對耶弗他講：「請你倒來做阮的指揮官，導阮及亞捫人交戰。」
11:7 耶弗他應基列的長老講：「前恁豈是怨恨我、趕我出老父的家嗎？今恁抵著患難啥事來我遮啊？」
11:7 耶弗他應基列的長老講：「恁以前豈毋是討厭我，給我對阮老父的家趕出來？現在恁抵著患難，是按怎來尋我？」
11:8 基列的長老應耶弗他講：「阮今所以歸向你，是愛你及阮去，及亞捫人交戰；你通做阮的頭來管轄基列一切徛起的百姓。」
11:8 基列的長老對耶弗他講：「就是因為按呢，阮現在倒轉來尋你。你若及阮做夥去及亞捫人交戰，你就通做阮的領袖，管轄基列所有的住民。」
11:9 耶弗他對基列的長老講：「恁導我倒去，及亞捫人交戰，耶和華將𪜶交佇我的面前，我真正欲做恁的頭嗎？」
11:9 耶弗他對基列的長老講：「恁若愛我倒去及亞捫人交戰，上主閣將𪜶交互我，我就欲做恁的領袖。」
11:10 基列的長老應耶弗他講：「耶和華佇咱中間做干證，阮的確照你的話行。」
11:10 基列的長老應耶弗他講：「上主作證，阮一定照你的話做。」
11:11 耶弗他就及基列的長老倒去，百姓就立伊做頭、做元帥。耶弗他佇米斯巴將家己一切的話排列佇耶和華的面前。
11:11 耶弗他及基列的長老倒去，人民就設立伊做領袖，做指揮官。耶弗他佇米斯巴將諸個一切的話對上主講一遍。
11:12 耶弗他差許個使者去見亞捫人的王，講：「你及我甚麼干涉，竟然來我遮攻擊我的地啊？」
11:12 耶弗他差使者去見亞捫人的王講：「我及你有什麼冤仇，你竟然來侵佔阮的地？」
11:13 亞捫人的王應耶弗他的使者講：「因為以色列人對埃及上來的時佔我的地，對亞嫩到雅博，直到約但。今恁著願願將諸個地還我！」
11:13 亞捫人的王應耶弗他的使者講：「以色列人對埃及上來的時，佔我的地，對亞嫩河到雅博河，閣到約旦河。今恁著乖乖仔將諸個地還我。」
11:14 耶弗他閣差使者去見亞捫人的王，
11:14 耶弗他閣差使者去見亞捫人的王，
11:15 給伊講：「耶弗他按呢講，以色列人並無佔摩押地及亞捫人的地。
11:15 給伊講：「耶弗他按呢講：『以色列人並無佔摩押人及亞捫人的地。
11:16 以色列人對埃及上來經過曠野到紅海，來到加低斯，
11:16 以色列人對埃及上來的時，是經過曠野到紅海，來到加低斯；
11:17 彼時以色列就差使者去見以東王，講：『求你准阮經過你的地。』總是以東王聽伊。閣差使者去見摩押王，伊也准。以色列人就𫢶佇加低斯。
11:17 彼時以色列人差使者去見以東王，請伊允准𪜶經過伊的地，毋拘以東王毋肯。𪜶閣差使者去見摩押王，伊嘛毋准；以色列人就住佇加低斯。
11:18 𪜶閣經過曠野，踅以東地及摩押地，對摩押地的東勢過來，佇亞嫩彼旁紮營，也無入摩押的境內，因為亞嫩河是摩押的交界。
11:18 𪜶閣經過曠野，踅過以東地及摩押地的外面，來到摩押地的東旁，佇亞嫩河彼旁紮營；無入摩押的境內，因為亞嫩河是摩押的邊界。
11:19 以色列差人去見亞摩利王西宏，就是希實本的王，以色列對伊講：『求你准阮過你的地，去阮家己的所在。』
11:19 以色列人閣差人去見亞摩利人希實本的王西宏，請伊允准𪜶經過伊的地，去𪜶家己的所在。
11:20 總是西宏信以色列，互𪜶經過伊的境界，西宏就聚集伊的眾百姓佇雅雜紮營，及以色列人交戰。
11:20 毋拘西宏無信任以色列人，毋互𪜶經過伊的境界，顛倒聚集伊的人民，佇雅雜紮營，及以色列人交戰。
11:21 耶和華──以色列的上帝用西宏及伊的眾百姓交佇以色列人的手，𪜶就拍𪜶，對按呢以色列就得著彼所在徛起的亞摩利人全地；
11:21 上主 — 以色列的上帝將西宏及伊的人民交佇以色列人的手，以色列人就給𪜶拍敗；對按呢，以色列人就得著彼地區亞摩利人的全地做產業。
11:22 𪜶得著亞摩利人的全境界，對亞嫩到雅博，對曠野到約但。
11:22 𪜶得著亞摩利人所有的土地，對亞嫩河到雅博河，對曠野到約旦河。
11:23 耶和華──以色列的上帝佇伊百姓以色列的面前趕出亞摩利人，你也欲得著𪜶的地嗎？
11:23 「『上主 — 以色列的上帝為著伊的子民以色列將亞摩利人趕走，你嘛欲佔此塊地是無？
11:24 你的上帝基抹所賞賜你得著的你無得著伊來做業嗎？耶和華──阮的上帝見若對阮的面前所趕出的，阮欲得著伊。
11:24 你應該去佔領你的神明基抹賜互你的地。上主 — 阮的上帝賞賜阮的地，阮欲顧守。
11:25 你豈贏過摩押王西撥的子巴勒嗎？伊豈曾及以色列人計較嗎？豈曾及𪜶交戰嗎？
11:25 你豈比摩押王西撥的子巴勒較強？伊毋敢及以色列人計較，嘛毋敢及𪜶交戰。
11:26 以色列人𫢶佇希實本及伊的鄉社，亞羅珥及伊的鄉社，及亞嫩河邊許個城，已經有三百年；恁佇彼時啥事無取𪜶倒轉啊？
11:26 以色列人住佇希實本、亞羅珥，及𪜶附近的庄社，以及亞嫩河邊許個城，已經有三百年；彼時恁哪無給𪜶搶轉來？
11:27 我無得罪你，你反轉及我交戰，實在無理。願審判的耶和華今仔日佇以色列及亞捫的中間來判斷。」
11:27 我無得罪你，你顛倒欲及我交戰。願審判的上主今仔日佇以色列及亞捫的中間裁決。』」
11:28 總是亞捫人的王肯聽耶弗他差人對伊講的話。
11:28 毋拘亞捫人的王毋肯聽耶弗他派去的人對伊講的話。
11:29 耶和華的神臨到耶弗他，伊就經過基列及瑪拿西，閣經過到基列的米斯巴，閣對基列的米斯巴經過到亞捫人遐。
11:29 上主的神臨到耶弗他，伊就經過基列及瑪拿西的地區，倒來基列的米斯巴，閣對米斯巴去到亞捫人遐。
11:30 耶弗他就對耶和華下願，講：「你若將亞捫人交佇我的手，
11:30 耶弗他對上主下願，講：「你若將亞捫人交佇我的手，
11:31 我對亞捫人遐平安倒來的時，見若對我的厝的門出來迎接我的，欲歸佇耶和華，我欲獻伊做燒祭。」
11:31 我對亞捫人遐平安倒來的時，對阮兜的門出來迎接我的，無論啥人，我一定欲給伊獻做燒化祭歸上主。」
11:32 對按呢耶弗他去亞捫人遐，及𪜶交戰；耶和華將𪜶交佇伊的手，
11:32 耶弗他去及亞捫人交戰，上主將𪜶交佇伊的手。
11:33 伊就拍𪜶大大刣死𪜶，對亞羅珥到米匿，直到亞備勒‧基拉明，共二十個城。按呢亞捫人就屈服佇以色列人。
11:33 伊將亞捫人徹底拍敗，對亞羅珥到米匿，直到亞伯‧基拉明，攏總攻取二十座城，刣死真多人。對按呢，亞捫人就受以色列人制伏。
耶弗他的查某子
11:34 耶弗他倒來米斯巴到家己的厝，彼時，伊的查某子攑鈴瓏鼓跳舞出來迎接伊，此個是伊獨生的，以外無子無查某子。
耶弗他的查某子
11:34 耶弗他倒來米斯巴到家己的厝，彼時，伊的查某子攑玲瓏鼓跳舞出來迎接伊；此個查某囝仔是伊孤生的查某子。
11:35 耶弗他看見伊，就拆裂衫講：「唉啊，我的查某子，你互我真慘，你也是互我真大艱難；因為我已經對耶和華開嘴，𣍐會收倒轉。」
11:35 耶弗他看著伊，就拆裂衫，講：「唉啊，我的查某子，你互我真為難，互我真艱苦心；因為我已經對上主講出嘴，𣍐當收回。」
11:36 伊應講：「我的父啊，你已經對耶和華開嘴，就著照你的嘴所講出的行佇我，因為耶和華已經為著你報仇你的對敵亞捫人」；
11:36 伊應講：「阿爸，你已經對上主下願，著照你所講的對我按呢做；因為上主已經佇你的對敵亞捫人身上替你報仇。」
11:37 閣對伊的老父講：「有一件事求你允准：容允我二月日，互我及我的同伴去山裡，通啼哭我做在室女。」
11:37 伊閣對伊的老父講：「有一項代誌求你允准，請容允我兩個月，互我及我的同伴去山裡，為著我著一世人做在室女啼哭。」
11:38 伊講：「你去啊！」就差伊去二月日。伊及同伴去，佇山裡為著伊做在室女啼哭。
11:38 耶弗他講：「好，你去！」耶弗他就准伊去兩個月，及伊的同伴佇山裡為著伊一世人做在室女啼哭。
11:39 二月日已經滿，伊倒來到老父遐，老父就照伊所下的願款待伊。伊攏無親近查甫人。
11:39 兩月日後，伊倒來伊的老父遐，伊的老父就照所下的願對待伊；伊攏無結婚。後來，以色列有一個風俗：
11:40 後來以色列中有此個例，逐年以色列諸個查某囝仔去追悼基列人耶弗他的查某子每年四日。
11:40 逐年有四日，以色列的查某囝仔會出去追悼基列人耶弗他的查某子。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。