上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
拍敗米甸人
8:1 以法蓮人對基甸講：「你去及米甸人交戰，無叫阮及你去，啥事按呢款待阮啊？」𪜶就及伊大大計較。
拍敗米甸人
8:1 以法蓮人對基甸講：「你去及米甸人交戰，哪無叫阮？你哪按呢對待阮？」𪜶就強烈指責基甸。
8:2 基甸對𪜶講：「我所行的豈會比得恁嗎？以法蓮拾葡萄屑豈無卡贏亞比以謝挽葡萄嗎？
8:2 基甸對𪜶講：「我所做的及恁𣍐比得。以法蓮拾賰落來的葡萄，豈無比阮亞比以謝族的人收成的葡萄較好？
8:3 上帝已經將米甸的首領俄立、西伊伯交佇恁的手；我所行的豈會比得恁嗎？」伊講諸個話，𪜶的受氣就消。
8:3 上帝已經將米甸兩個領袖俄立及西伊伯交佇恁的手；我所做的及恁豈會比得？」基甸講諸個話了後，𪜶就無閣受氣。
8:4 基甸及隨伊的三百人到約但過渡，雖然厭倦，猶久啲追趇。
8:4 基甸及隨伊的三百人過約旦河；雖然真悿，毋拘猶繼續追趇。
8:5 基甸對疏割人講：「請你將餅供給跟隨我的百姓，因為𪜶厭倦；我也啲趇米甸二個王西巴及撒慕拿。」
8:5 基甸對疏割人講：「請恁提一寡餅互隨我的軍兵，因為𪜶真厭倦，我嘛啲追趇米甸兩個王，西巴及撒慕拿。」
8:6 疏割許個首領應講：「西巴及撒慕拿的手已經佇你的手，阮才著用餅互你的軍隊啊？」
8:6 疏割許個領袖應講：「你都猶未掠著西巴及撒慕拿，阮哪著用餅互你的軍隊？」
8:7 基甸講：「耶和華將西巴及撒慕拿交佇我的手了後，我就欲用曠野的茦及莿仔拍傷恁的肉。」
8:7 基甸講：「上主互我掠著西巴及撒慕拿了後，我就欲用曠野的莿及籐條給恁捽。」
8:8 伊對遐上去毗努伊勒，也對𪜶按呢講；毗努伊勒人應伊也及疏割人所應的相同。
8:8 伊對遐去到比努伊勒，嘛對𪜶提出像款的要求；比努伊勒人嘛用及疏割人仝款的話應伊。
8:9 伊對毗努伊勒的人講：「我平安倒來的時，我欲拆此個台。」
8:9 伊對比努伊勒人講：「我平安倒來的時，我欲拆此個城樓。」
8:10 彼時西巴及撒慕拿，以及跟隨伊的軍隊攏佇加各，約略有一萬五千人，就是東方全軍所剩的；因為已經死十二萬人攏是攑刀的。
8:10 彼時，西巴及撒慕拿，以及𪜶的軍隊攏佇加各，大約有一萬五千人，攏是東旁的部族賰落來的軍兵；𪜶攑刀的戰士已經死十二萬人。
8:11 基甸就對羅巴及約比哈東旁，對徛起布棚者的路上去，拍贏𪜶的軍隊，因為𪜶的軍隊安然。
8:11 基甸對挪巴及約比哈東旁，順商隊的路上去，趁米甸的軍隊無啲警覺的時給𪜶突擊。
8:12 西巴及撒慕拿逃走；基甸追趇𪜶，掠著米甸二個王西巴及撒慕拿，互𪜶全軍驚走。
8:12 西巴及撒慕拿此兩個王逃走，基甸追趇𪜶，掠著𪜶，𪜶的軍隊敗退四散。
8:13 約阿施的子基甸對希列斯的山坪對戰陣倒來，
8:13 約阿施的子基甸對戰場，順希列斯的山坪倒來的時，
8:14 掠疏割一個少年人，問伊，伊就寫疏割許個首領及長老共七十七人互伊。
8:14 掠著一個疏割的少年人，給伊查問；伊就將疏割七十七個領袖及長老的名寫出來交互基甸。
8:15 基甸到疏割，對許個人講：「恁前為著西巴及撒慕拿謔俗我講：『西巴及撒慕拿的手已經佇你的手，阮才著用餅互你厭倦的人啊？』今恁來看。」
8:15 基甸到疏割，對遐的人講：「恁以前給我恥笑，講：『你都猶未掠著西巴及撒慕拿，阮哪著用餅互恁厭倦的軍兵？』今恁看，西巴及撒慕拿佇遮。」
8:16 就掠城內的長老，用曠野的莿及莿仔來教督疏割人；
8:16 伊就掠城內的長老，用曠野的莿及籐條教示疏割人；
8:17 閣拆毗努伊勒的台，刣死彼個城內的人。
8:17 閣拆比努伊勒的城樓，刣死城內的人。
8:18 就問西巴及撒慕拿講：「恁佇他泊山所刣的人甚麼款？」應講：「𪜶親像你，逐人攏有王的子的容貌。」
8:18 基甸問西巴及撒慕拿講：「恁佇他泊山刣的人生做什麼款？」
𪜶應講：「親像你，逐個人看起來攏親像王子。」
8:19 伊講：「𪜶是我像母的兄弟，我指耶和華的永活來講，恁前若留𪜶的生命，我今就無刣恁。」
8:19 基甸講：「𪜶是我仝母的兄弟。我指永活的上主咒誓，恁若有留𪜶的性命，我就𣍐刣恁。」
8:20 就對伊的大子益帖講：「起來刣𪜶。」總是少年人無拔刀，因為伊猶少年，就驚。
8:20 伊就給伊的大子益帖講：「給𪜶刣死！」毋拘益帖驚，毋敢拔刀，因為伊猶少年。
8:21 西巴及撒慕拿講：「你家己起來刣阮！因為人怎樣，氣力也是按呢。」基甸就起來，刣死西巴及撒慕拿，取𪜶駱駝頷頸的妝飾款式親像月眉。
8:21 西巴及撒慕拿給基甸講：「你家己動手。你才有夠力。」基甸就起來刣死西巴及撒慕拿，將𪜶的駱駝頷頸月眉形的妝飾提去。
8:22 以色列人對基甸講：「你已經救阮脫離米甸人的手，願你及你的子你的孫管理阮。」
8:22 以色列人對基甸講：「你已經救阮脫離米甸人，請你及你的子、你的孫統治阮。」
8:23 基甸講：「我無欲管理恁，我的子也無欲管理恁，獨獨耶和華欲做恁的王。」
8:23 基甸講：「我無欲統治恁，我的子嘛無欲統治恁；只有上主才是恁的統治者。」
8:24 基甸閣對𪜶講：「我有一項求恁：請恁逐人將所搶的耳環互我。」（因為對敵是以實瑪利的人，才有此號金的耳環。）
8:24 基甸閣對𪜶講：「我有一項要求，請恁逐個人將搶著的耳環互我。」(𪜶的對敵以實瑪利人有此款金的耳環。)
8:25 𪜶講：「阮甘願互你。」就舒一領外衫，逐人將所搶的耳環㧒佇彼頂面。
8:25 𪜶講：「阮真歡喜互你。」𪜶就舒一領外衫，逐個人將搶來的耳環㧒佇彼頂面。
8:26 基甸所討的金耳環重一千七百舍客勒的金仔。此個以外閣有月眉的妝飾、耳墜，及紫色的衣服，米甸王所有的，及駱駝頷頸的鍊仔。
8:26 人民互基甸的金耳環，大約二十公斤；以外閣有米甸王月眉形的妝飾、耳墜、紫色的外袍，及駱駝頷頸的鍊仔。
8:27 基甸用此個製造一個以弗得，下佇伊的本城俄弗拉。後來以色列人攏去遐行邪淫拜伊；這是做害基甸及伊全家的羅網。
8:27 基甸用諸個金仔製造一個以弗得，下佇伊的本城俄弗拉；後來以色列人攏去遐拜彼個以弗得背叛上帝；此個代誌成做基甸及伊全家的羅網。
8:28 按呢，米甸屈服佇以色列人，𣍐會閣攑起頭殼。基甸的日，彼個地方太平四十年。
8:28 按呢，米甸人受以色列人制伏，無力通閣反抗。佇基甸活啲的日，彼個地區太平四十年。
基甸死
8:29 約阿施的子耶路‧巴力倒去家己的厝徛起。
基甸死
8:29 約阿施的子基甸倒去住佇伊家己的厝。
8:30 基甸有七十個親生子，因為伊有娶多多個某。
8:30 基甸娶真多某，有生七十個子。
8:31 佇示劍伊的細姨也給伊生一個子。伊就給伊號名叫亞比米勒。
8:31 伊佇示劍的細姨嘛給伊生一個子，伊給號名叫做亞比米勒。
8:32 約阿施的子基甸，年老歲多就死，埋葬佇亞比以謝族俄弗拉，佇伊的老父約阿施的墓。
8:32 約阿施的子基甸年老歲壽多，就死；人給伊安葬佇亞比以謝族的俄弗拉，𪜶老父約阿施的墓。
8:33 基甸死了後，以色列人越轉去行淫，隨諸個巴力用巴力‧比利土做𪜶的上帝。
8:33 基甸死了後，以色列人背叛上帝，去拜巴力，用巴力‧比利土做𪜶的神明。
8:34 以色列人無記念耶和華──𪜶的上帝，就是救𪜶脫離四圍的對敵的手的，
8:34 以色列人𣍐記得解救𪜶脫離四圍對敵的上主 — 𪜶的上帝，
8:35 也無好款待耶路‧巴力，就是基甸的家照伊所行佇以色列的恩惠。
8:35 嘛無因為耶路巴力，就是基甸，為著以色列人做的好事，好款待伊的家庭。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。