上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
基甸
6:1 以色列人閣行耶和華所看做歹的事，耶和華就交𪜶佇米甸的手歷過七年。
基甸
6:1 以色列人閣做上主看做歹的事，上主就將𪜶交佇米甸人的手七年。
6:2 米甸的手壓制以色列人；以色列人為著米甸人的緣故，就為家己佇山裡開穴及洞，及險要的所在。
6:2 米甸人比以色列人較強；以色列人為著欲逃避米甸人，就佇山裡挖山洞，起要塞。
6:3 以色列人撒種了後，米甸人、亞瑪力人，及東方的人攏上來攻擊𪜶，
6:3 以色列人逐遍撒種了後，米甸人、亞瑪力人，及東旁的部族攏來攻擊𪜶，
6:4 紮營佇𪜶的對面，拍歹彼所在的土產，到迦薩，無留食物互以色列人，羊、及牛、及驢也無；
6:4 佇遐紮營，將彼所在到迦薩歸個地區的農作物攏毀壞，嘛無留牛、羊、驢，及食物互以色列人。
6:5 因為𪜶帶精牲及布棚上來，親像草蜢許多來，人及駱駝算𣍐了，𪜶入此個地方欲拍歹伊。
6:5 𪜶帶牲生及布棚來，人額及駱駝算𣍐了；𪜶親像歸群草蜢毀壞彼個地區。
6:6 以色列人因為米甸人的緣故，困苦到極，以色列人就求叫耶和華。
6:6 以色列人因為米甸人的緣故，悽慘落魄，就求叫上主。
6:7 以色列人因為米甸人的緣故，求叫耶和華的時，
6:7 以色列人因為米甸人的緣故求叫上主，
6:8 耶和華就差先知到以色列人遐，對𪜶講：「耶和華──以色列的上帝按呢講：『我曾導恁對埃及上來，對做奴才的家出來，
6:8 上主就差先知去𪜶遐，對𪜶講：「上主 — 以色列的上帝按呢講：『我有導恁對埃及做奴才的家出來。
6:9 我也救恁脫離埃及人的手，也脫離一切壓制恁的人的手，對恁的面前趕𪜶出，用𪜶的地互恁』；
6:9 我救恁脫離埃及人及所有壓制恁的人的手，佇恁的面前給𪜶趕走，將𪜶的土地賜互恁。
6:10 我也對恁講：『我是耶和華──恁的上帝。恁徛起亞摩利人的地，通驚𪜶的上帝。總是恁聽我的話。』」
6:10 我嘛曾對恁講：我是上主 — 恁的上帝，所以恁雖然住佇亞摩利人的地，毋拘毋通拜𪜶的神明；總是恁毋肯聽我的話。』」
6:11 耶和華的使者到俄弗拉，坐佇亞比以謝族的人約阿施的橡樹腳。約阿施的子基甸佇酒窟遐啲拍麥，愛互米甸人看見。
6:11 上主的使者到俄弗拉，坐佇亞比以謝宗族的人約阿施的橡樹腳；彼時約阿施的子基甸佇酒窟遐啲拍麥，毋愛互米甸人看著。
6:12 耶和華的使者對基甸顯現，對伊講：「大氣力的勇士啊，耶和華及你佇啲！」
6:12 上主的使者對基甸顯現，對伊講：「強猛的勇士，上主及你同在。」
6:13 基甸對伊講：「我的主啊，若耶和華及阮佇啲，阮怎樣抵著這一切的事啊？阮的列祖所給阮講耶和華許個奇事佇叨落啊？𪜶講『伊豈無導阮對埃及上來』嗎？今耶和華放拺阮，將阮交佇米甸人的手。」
6:13 基甸對伊講：「先生，上主若及阮同在，是按怎阮會即呢悽慘？阮的祖先所給阮講『上主導阮出埃及』許個奇事佇叨位？今上主已經放拺阮，將阮交互米甸人。」
6:14 耶和華看基甸，給伊講：「著用你此個力去，來救以色列出米甸人的手，我豈無差你嗎？」
6:14 上主對基甸講：「你著用你的氣力去解救以色列人脫離米甸人的手。我現在就差派你去。」
6:15 基甸給伊講：「主啊，我欲用甚麼救以色列？看啊，我的家是瑪拿西中第一喪鄉的。佇我老父的家我是第一細的。」
6:15 基甸應伊講：「主啊，我哪有法度解救以色列？阮的宗族是瑪拿西支族中上卑微的，我是阮兜上細的。」
6:16 耶和華對伊講：「我欲及你佇啲，你欲拍米甸人，親像拍一人一樣。」
6:16 上主對伊講：「我欲及你同在；你欲拍敗米甸人，親像啲拍一個人。」
6:17 伊給伊講：「我若佇你的面前得著恩典，求你互我一個兆頭，通知及我講的就是你。
6:17 基甸講：「我若對你得著恩典，求你互我一個證據，互我知及我講話的就是上主你。
6:18 請你通離開遮，聽候我閣來你遮帶我的禮物下佇你的面前。」伊講：「我欲聽候你閣來。」
6:18 請你毋通離開遮，聽候我倒來，帶禮物獻互你。」
上主講：「我會聽候你倒來。」
6:19 基甸去備辦一隻山羊仔，用一伊法的麵粉做無酵餅、肉下佇筐裡，湯貯佇壺裡，帶到橡樹腳，獻互伊。
6:19 基甸就去準備一隻山羊仔，用十公斤麵粉做無酵餅；肉下佇籃仔，用鍋仔貯湯，帶到橡樹腳獻互上主。
6:20 上帝的使者吩咐伊講：「肉及無酵餅下佇此個石磐頂，湯倒出來。」伊照按呢行。
6:20 上帝的使者對伊講：「肉及無酵餅下佇此個石磐頂，湯倒出來。」伊照按呢做。
6:21 耶和華的使者伸出手裡所攑的枴仔尾，來抵著肉及無酵餅，就有火對石磐出來，一盡燒肉及無酵餅。耶和華的使者就去無閣看見。
6:21 上主的使者伸出手裡攑的柺仔，用枴仔尾揬肉及無酵餅，就有火對石磐𤏸起來，將肉及無酵餅攏燒去；上主的使者就對基甸的目睭前消失。
6:22 基甸看出伊是耶和華的使者，基甸就講：「嗐啊！主耶和華啊，因為我當面看見耶和華的使者。」
6:22 基甸知伊是上主的使者，就講：「慘啊！至高的上主啊，我當面看著上主的使者。」
6:23 耶和華對伊講：「安你的心，免驚，你𣍐致到死。」
6:23 上主對伊講：「安心，毋免驚；你𣍐死。」
6:24 基甸就佇遐給耶和華起一座壇，號名叫「耶和華沙龍」。（此個壇佇亞比以謝族的俄弗拉到今仔日猶佇啲。）
6:24 基甸就佇遐給上主起一座祭壇，號名叫做「上主沙龍」。此個壇到今仔日猶佇亞比以謝族的俄弗拉。
6:25 彼暝，耶和華吩咐基甸講：「你牽你老父的牛仔來，就是七年的第二隻牛，也著拆毀你老父所有巴力的壇，剉壇邊的亞舍拉，
6:25 彼暝，上主吩咐基甸，講：「你牽恁老父的牛，就是伊另外一隻七歲的牛來，閣拆毀恁老父為巴力起的祭壇，剉壇邊的亞舍拉柱像，
6:26 佇此個山寨照合宜的法，為耶和華──你上帝起一座壇，用第二隻牛獻做燒祭，用你所欲剉的亞舍拉做柴。」
6:26 佇此個要塞頂面，照規定，為上主 — 你的上帝起一座壇，獻彼隻牛做燒化祭，用你所剉的亞舍拉柱像做起火的柴料。」
6:27 基甸就對伊的奴僕中導十人，照耶和華吩咐伊去行。伊因為驚老父的家及城內的人，日時敢做此個事，就佇暝時做伊。
6:27 基甸就導十個僕人，照上主的吩咐去做；伊因為驚家族及城內的人，毋敢佇日時做此個代誌，就佇暗時做。
6:28 城內的人清早起來，看見巴力的壇拆毀，壇邊的亞舍拉剉落，第二隻牛獻佇所起的壇，
6:28 城內的人透早起來，看著巴力的壇已經拆毀，壇邊的亞舍拉柱像互人剉掉，第二隻牛獻佇新起的祭壇。
6:29 𪜶相及講：「甚麼人做此個事啊？」𪜶查問了後，就講：「這是約阿施的子基甸做的。」
6:29 𪜶講來講去：「這什麼人做的？」𪜶查問了後，就講：「這是約阿施的子基甸做的。」
6:30 城內的人對約阿施講：「掠你的子出來，通互伊死；因為伊拆毀巴力的壇，剉壇邊的亞舍拉。」
6:30 城內的人對約阿施講：「給你的子交出來，互伊死，因為伊拆毀巴力的壇，剉壇邊的亞舍拉柱像。」
6:31 約阿施給一切徛啲攻擊伊的人講：「恁欲為巴力爭辯嗎？恁欲救伊嗎？若有人為伊爭辯，趁早起著互伊死！巴力若是上帝，才互伊為家己爭辯，因為人拆毀伊的壇。」
6:31 約阿施給所有攻擊伊的人講：「恁欲為巴力辯護是無？恁欲救伊是無？若有人為巴力辯護，天猶未光以前著互彼個人死。巴力若是神，著互伊家己為著伊的壇受拆毀辯護。」
6:32 對彼日叫伊的名耶路‧巴力，是講：「巴力著及伊爭辯，因為伊毀壞伊的壇。」
6:32 對彼日起，人給基甸叫做耶路巴力，意思是「互巴力及伊爭辯」，因為伊毀壞巴力的壇。
6:33 彼時，米甸人、亞瑪力人，及東方的百姓攏聚集過河，佇耶斯列的山谷紮營。
6:33 彼時米甸人、亞瑪力人，及東旁的部族攏聚集，過約旦河，佇耶斯列山谷紮營。
6:34 耶和華的神臨到基甸，伊就歕哨角；亞比以謝族攏聚集跟隨伊。
6:34 上主的神臨到基甸，伊就歕哨角；亞比以謝宗族的人攏聚集跟隨伊。
6:35 伊差人遍行瑪拿西，瑪拿西人也聚集來隨伊；閣差人去見亞設人、西布倫人、拿弗他利人，𪜶也攏上來及𪜶聯合。
6:35 伊派使者去瑪拿西全地區，瑪拿西人就聚集來隨伊。伊閣另外派使者去亞設、西布倫、拿弗他利地區，諸個支族的人嘛攏來會合。
6:36 基甸對上帝講：「你若照你所講的，欲用我的手來救以色列，
6:36 基甸對上帝講：「你若真正應允欲通過我解救以色列，
6:37 我就用歸領的羊毛下佇五穀場：若干單羊毛有露水，土腳攏乾乾，我就知你欲照你所講的，用我的手救以色列。」
6:37 我會下歸領羊毛佇五穀場；若干焦羊毛有露水，土腳攏焦焦，我就知你欲照你的應允，用我解救以色列。」
6:38 就果然按呢，隔日基甸早早起來；捘羊毛，對羊毛絞出露水一碗滿滿。
6:38 代誌果然按呢發生。隔日透早，基甸起來，捘羊毛，對羊毛捘一碗淀淀的露水出來。
6:39 基甸閣對上帝講：「求你通受氣我，我閣講一擺若定：求你准我閣一擺用羊毛試看。今獨獨互羊毛乾乾，土腳攏有露水。」
6:39 基甸閣對上帝講：「懇求你毋通受氣，我閣求一遍就好。求你互我閣用羊毛試一遍，此遍只有互羊毛焦焦，土腳攏有露水。」
6:40 此暝上帝也按呢行：獨獨羊毛乾乾，土腳攏有露水。
6:40 彼暝上帝嘛按呢做，羊毛焦焦，土腳攏是露水。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。