上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
底波拉及巴拉的歌
5:1 彼日，底波拉及亞比羅菴的子巴拉唱歌，講：
底波拉及巴拉的歌
5:1 彼日，底波拉及亞比挪菴的子巴拉唱歌，講：
5:2 因為以色列中做頭的，做頭導𪜶，
因為百姓甘願犧牲，
恁著謳咾耶和華！
5:2 以色列中有領袖導頭，
人民甘願犧牲，
恁著稱讚上主！
5:3 列王啊，著聽！
諸個首領，著俯耳孔！
我向耶和華我欲吟詩；
我欲唱歌謳咾耶和華──以色列的上帝。
5:3 君王啊，著聽！
統治者啊，著俯耳孔聽！
我欲向上主唱歌；
我欲唱歌稱讚上主 — 以色列的上帝。
5:4 耶和華啊，你對西珥出，
對以東地行來。
彼時地振動，天啲滴，
雲也滴水。
5:4 上主你對西珥出發，
對以東的地前進；
彼時大地搖泏，天摒水，
雲落大雨。
5:5 諸個山佇耶和華的面前搖泏，
就是此個西奈山佇耶和華──以色列上帝的面前搖泏。
5:5 眾山佇西奈山的上主面前動搖，
佇上主 — 以色列上帝的面前搖泏。
5:6 佇亞拿的子珊迦的時，
閣佇雅億的日，
大路無人行，
行路的人攏是彎小路。
5:6 佇亞拿的子珊迦的時，
佇雅億的日，
商隊無閣對遐經過，
旅行的人斡去行小路。
5:7 以色列中無頭人，攏總無，
到我底波拉起來，
到我起來佇以色列中做老母。
5:7 以色列農村拋荒，
攏無人住，
到我底波拉起來，
起來做以色列的老母。
5:8 𪜶揀新的上帝，
交戰就到𪜶的城門。
彼時，以色列四萬人的中間
豈會看見盾牌及槍嗎？
5:8 以色列揀新的神明，
戰爭就來到𪜶的城門。
彼時以色列四萬人的中間，
看𣍐著盾牌及槍。
5:9 我的心意向以色列許個設立律法者，
百姓中甘願犧牲者。
恁著謳咾耶和華！
5:9 我的心意向以色列的領袖，
意向甘願犧牲的人民。
恁著稱讚上主！
5:10 騎白驢者、坐綉花毯仔者、行路者，
恁攏著報揚！
5:10 騎白色驢母的、
坐馬鞍的、
旅行的人，
恁攏著報揚。
5:11 佇汲水的所在，離開射箭的人的聲遠遠，
佇遐人欲講起耶和華公義的所行，
就是伊治理以色列公義的所行。
彼時耶和華的百姓落去到城門。
5:11 汲水的所在，有唱歌的人的歌聲，
𪜶啲講起上主公義的所做，
就是伊解救以色列農民的作為。
彼時，上主的子民落去到城門歡呼：
5:12 底波拉啊，醒啊！醒啊！
你著醒，著醒，來唱歌。
巴拉啊，你著起來，亞比羅菴的子，
著掠你所掠的去。
5:12 底波拉，著興起，興起！
著醒起來，醒起來！
著唱歌！
巴拉，著起來！
亞比挪菴的子，著掠你的俘虜來！
5:13 彼時所剩的貴族及百姓相及落來；
耶和華為我臨到，攻擊勇士。
5:13 彼時，所賰的貴族落來，
上主的子民親像勇士為我出征。
5:14 有對以法蓮來的，
伊的根本佇亞瑪力；
便雅憫參佇你的百姓中跟隨你。
有設律法者對瑪吉落來；
有攑枴點算百姓的數額者對西布倫落來；
5:14 對以法蓮來的，進入山谷；
隨佇便雅憫支族的後面。
有領袖對瑪吉落來；
有指揮官對西布倫出來。
5:15 以薩迦的首領及底波拉相及來；
以薩迦及巴拉一樣。
𪜶隨伊走落平洋；
佇流便的溪邊心有大大斟酌議論。
5:15 以薩迦的領袖及底波拉做夥來；
以薩迦隨佇巴拉後面，
及伊做夥衝入山谷。
呂便心躊躇無決斷。
5:16 你啥事坐佇羊的中央
聽叫羊群的聲啊？
5:16 𪜶是按怎留佇羊椆，
聽顧羊的人歕𥰔仔？
呂便心躊躇無決斷。
5:17 基列徛起佇約但彼旁。
但啥事停佇船裡？
亞設靜靜坐佇海邊，
𫢶佇港內。
5:17 迦得住佇約旦河東旁；
但是按怎留佇船頂？
亞設停留佇海邊，
安居佇港口。
5:18 西布倫是拼命拋死的百姓；
及拿弗他利佇田野高的所在也是按呢。
5:18 西布倫是拼命毋驚死的人民；
拿弗他利佇戰場嘛是按呢。
5:19 列王來交戰。
彼時迦南列王佇米吉多水邊的他納交戰，
總是無搶著銀。
5:19 君王攏來參戰；
彼時迦南諸王佇米吉多水邊的他納交戰，
毋拘無搶著銀。
5:20 有對天交戰的，
星辰對𪜶的軌道來及西西拉交戰。
5:20 星辰嘛對天參戰，
對𪜶的軌道攻擊西西拉。
5:21 基順河給𪜶流去，
基順河就是古早的河；
我的神啊，你奮勇進前去。
5:21 基順河給𪜶沖走；
基順河的水強閣大。
我的心啊，著奮勇前進！
5:22 馬蹄硞硞哮，是因為緊緊走，
就是力者有緊緊走。
5:22 勇壯的馬奔跑親像啲飛；
馬蹄的聲親像雷赫呢響。
5:23 耶和華的使者講：
著咒詛米羅斯，
大大咒詛其中徛起的百姓；
因為𪜶無來幫助耶和華，
無來幫助耶和華抵敵勇士。
5:23 上主的使者講：「著咒詛米羅斯，
重重咒詛遐的住民；
因為𪜶無來幫贊上主，
無幫贊上主攻擊對敵。」
5:24 基尼人希百的某雅億，比許個婦仁人卡有福氣，
比徛起布棚內的婦仁人卡有福氣。
5:24 基尼人希百的某雅億
比所有的婦仁人較通謳咾，
比住佇厝裡的婦仁人較通謳咾。
5:25 西西拉討水，
伊就用奶互伊
用寶貝的盤捧牛奶油互伊。
5:25 西西拉討水，雅億互伊牛奶，
用貴重的盤捧起司互伊。
5:26 雅億伸手攑釘，
正手攑做工人的鎚仔，
用鎚摃西西拉，
釘過伊的頭殼，
鑿來透過伊的鬢邊，
5:26 雅億手提杙仔，
正手攑工人的槌仔，
摃西西拉，拍碎伊的頭，
鑿迵伊的鬢邊。
5:27 佇伊的腳的中間，西西拉仆落去，扼落去，倒啲，
佇伊的腳的中間仆落，扼落去；
佇所仆落的所在，扼落去來死。
5:27 佇伊的腳前，西西拉慄落去，倒直直，
佇伊的腳前慄落去，𣍐振動；
西西拉佇遐慄落去，死去。
5:28 西西拉的老母對窗仔看出去，
對窗仔子裡叫講：
怎樣伊的車慢慢來？
怎樣伊的車輪許延迁啊？
5:28 西西拉的老母對窗仔看出去，
佇窗仔邊硞硞相，講：
「是按怎伊的戰車猶未轉來？
是按怎猶未聽著車輪的聲？」
5:29 跟隨伊聰明尊貴的婦女應伊，
伊也家己應講：
5:29 伊聰明的宮女回答伊，
伊嘛家己按呢講：
5:30 豈無所得著嗎？豈無分所搶的物嗎？
逐人分一二個查某囝仔？
西西拉就分所搶彩色的衫，
所搶綉花彩色的衫，
二面攏是彩色綉花的，
通掛佇頷頸做所搶的物。
5:30 「𪜶一定是啲分戰利品；
逐個勇士分著一兩個查某囝仔。
西西拉一定分著彩色的衫，
彩色繡花的衫，
兩領彩色繡花的衫，
袚佇頷頸做戰利品。」
5:31 耶和華啊，
願你的對敵攏親像按呢滅無！
願疼他的人親像日出，光爁爁！
以後，地方太平四十年。
5:31 上主啊，願你的對敵攏按呢滅亡。
願疼你的人親像日頭出現光映映。
以後彼個地區太平四十年。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。