上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
留落來的民族
3:1 耶和華所留諸個族，是欲用伊來試驗以色列人就是許個曾見過迦南交戰的事的，
留落來的外族
3:1 上主留諸個族，是欲試驗許個毋曾經歷迦南戰爭的以色列人；
3:2 刁持欲互以色列後代的人知來教示𪜶交戰，就是許個前所未曾經過的人。
3:2 欲互以色列的後代，就是許個毋曾經歷戰爭的人，知閣學習交戰。
3:3 所留啲許個族就是非利士五個首領及一切的迦南人、西頓人，及徛起黎巴嫩山的希未人，對巴力‧黑們山到哈馬口。
3:3 留落來的族，有五個非利士的領袖、所有的迦南人、西頓人，及住佇巴力‧黑門山及哈馬隘口中間的黎巴嫩山的希未人。
3:4 這就是欲用𪜶，來試驗以色列人，看𪜶肯聽趁耶和華託摩西所命令𪜶列祖的誡命抑無。
3:4 留諸個是欲用𪜶來試驗以色列人，看𪜶肯聽趁上主通過摩西命令𪜶列祖的誡命抑無。
3:5 對按呢以色列人徛起佇迦南人、赫人、亞摩利人、比利洗人、希未人、耶布斯人的中間，
3:5 對按呢，以色列人住佇迦南人、赫人、亞摩利人、比利洗人、希未人、耶布斯人的中間；
3:6 娶𪜶的查某子做某，也用查某子嫁𪜶的子，續服事𪜶許個上帝。
3:6 娶𪜶的查某子作某；嘛將查某子嫁互𪜶的子，續去服事𪜶許個神明。
俄陀聶
3:7 以色列人行耶和華所看做歹的事，𣍐記得耶和華──𪜶的上帝，去服事諸個巴力及亞舍拉，
俄陀聶
3:7 以色列人做上主看做歹的事，𣍐記得上主 — 𪜶的上帝，去服事諸個巴力及亞舍拉。
3:8 所以耶和華受氣以色列人，賣𪜶互米所波大米王古珊‧利薩田的手。以色列人服事古珊‧利薩田八年。
3:8 上主就對以色列人發大受氣，將𪜶交互美索不達米亞王古珊‧利薩田；以色列人服事古珊‧利薩田八年。
3:9 以色列人求叫耶和華的時，耶和華就給以色列人興起一個拯救者救𪜶，就是迦勒的小弟基納斯的子俄陀聶。
3:9 以色列人求叫上主，上主就為著𪜶興起一個拯救者解救𪜶，就是迦勒的小弟基納斯的子俄陀聶。
3:10 耶和華的神臨到伊，伊就做以色列的士師，出去交戰。耶和華將米所波大米王古珊‧利薩田交佇伊的手，伊就卡贏古珊‧利薩田。
3:10 上主的神臨到伊，伊就做以色列的士師。伊出去交戰，上主將美索不達米亞王古珊‧利薩田交佇伊的手，伊就刣贏古珊‧利薩田。
3:11 對按呢彼個地方太平四十年。基納斯的子俄陀聶死。
3:11 彼個地區就太平四十年。後來，基納斯的子俄陀聶死。
以笏
3:12 以色列人閣行耶和華所看做歹的事，耶和華就互摩押王伊磯倫強盛，攻擊以色列人，因為𪜶行耶和華所看做歹的。
以笏
3:12 以色列人閣做上主看做歹的事。因為𪜶按呢做，上主互摩押王伊磯倫強盛，攻打以色列人。
3:13 伊磯倫聚集亞捫人及亞瑪力人倚伊，去拍以色列人，佔棗樹的城。
3:13 伊磯倫召集亞捫人及亞瑪力人來伊遐，去攻打以色列人，佔棕樹城耶利哥。
3:14 對按呢以色列人服事摩押王伊磯倫十八年。
3:14 對按呢，以色列人服事摩押王伊磯倫十八年。
3:15 以色列人求叫耶和華的時，耶和華就給𪜶興起一個拯救者，就是便雅憫人基拉的子以笏；伊是慣練用倒手的。以色列人託仗伊送禮物互摩押王伊磯倫。
3:15 以色列人求叫上主，上主就為著𪜶興起一個拯救者，就是便雅憫人基拉的子以笏；伊慣勢用倒手。以色列人派伊去給摩押王伊磯倫進貢。
3:16 以笏為家己拍一支雙面利的劍，長一肘，縛佇正腿衣服的內面。
3:16 以笏拍一支雙面利的劍，長半公尺，縛佇正腿用衫蓋啲。
3:17 伊用禮物獻互摩押王伊磯倫（伊磯倫是真肥的人）；
3:17 伊帶禮物去見摩押王伊磯倫；伊磯倫真大箍。
3:18 獻禮物已經明白，就差帶禮物的人攏去，
3:18 以笏獻禮物了後，就叫扛禮物的人倒去。
3:19 伊本身對近吉甲拍石像的所在越倒轉來，講：「王啊，我有祕密的事欲給你講。」王講：「肅靜！」徛佇伊身邊的人就攏退出。
3:19 伊家己對倚近吉甲拍石像的所在越倒轉來對王講：「王，我有祕密的事欲給你報告。」
王講：「迴避！」許個侍候王的人就攏退出。
3:20 以笏就近伊；王家己一個坐佇涼冷的樓頂。以笏講：「我奉上帝的命令有代誌來報你。」王就對座位徛起來。
3:20 彼時王家己一個坐佇清涼的樓頂；以笏行倚去，對伊講：「上帝有話交代我給你講。」王就對座位徛起來。
3:21 以笏就伸倒手，對正腿拔出劍，刺入王的腹肚，
3:21 以笏就伸倒手，對正腿拔劍出來，鑿入王的腹肚，
3:22 劍的柄也續入去。劍互油咬住，因為伊無對伊的腹肚拔劍出來，就𥦁過尻脊出來。
3:22 連劍的柄嘛續鑿入去；劍互油咬牢。以笏無將劍對王的腹肚拔出來，王的屎流出來。
3:23 以笏就出去到兩廊，將許個樓門關鎖。
3:23 以笏出來走廊，將樓頂的門關起來，鎖啲。
3:24 伊出去了，王的奴僕到，看見樓門關鎖，就講：「伊的確是佇樓頂啲大便。」
3:24 伊出去了，王的部下來，看著樓頂的門關啲閣鎖啲，就講：「伊一定是佇清涼的樓頂啲大便。」
3:25 𪜶聽候到卬愕，看見伊無開樓頂的門，就攑鎖匙來開，看啊，𪜶的主人已經死，倒佇地裡。
3:25 𪜶聽候到心著急，看著伊無開樓頂的門，就攑鎖匙來開。唉啊，𪜶的主人竟然倒佇土腳，死佇遐。
3:26 𪜶延迁的時，以笏就逃走，已經過拍石像的地，閃走到西伊拉；
3:26 佇𪜶拖延的時，以笏已經逃走，過拍石像的所在，走到西伊拉。
3:27 已經到，就佇以法蓮山地歕哨角。以色列人就隨伊對山地落去，伊行佇頭前，
3:27 以笏到以法蓮山區的西伊拉，就歕哨角；以色列人對山區落去隨伊，伊就行佇𪜶的頭前領導𪜶。
3:28 對𪜶講：「恁隨我來，因為耶和華已經將恁的對敵摩押人交佇恁的手。」𪜶就隨伊落去，把守摩押的對面約但河的渡頭，無容允一人過去。
3:28 伊對𪜶講：「恁來隨我，因為上主已經將恁的對敵摩押人交佇恁的手。」𪜶隨伊落去，攻取摩押對面的約旦河渡頭，毋准人過河。
3:29 彼時刣死摩押人約略一萬，攏是大漢的勇士，無一個走離。
3:29 彼日，𪜶刣死摩押人大約一萬，攏是強猛的勇士，無一個逃脫。
3:30 對按呢，摩押就屈服佇以色列人。地方太平八十年。
3:30 對按呢，摩押人就受以色列人制伏；彼個地區太平八十年。
珊迦
3:31 以笏了後，有亞拿的子珊迦，伊用趕牛的鐵刺拍死六百個非利士人。伊也救以色列人。
珊迦
3:31 以笏以後，亞拿的子珊迦用趕牛的刺棍拍死六百個非利士人。伊嘛解救以色列人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。