上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
約書亞的遺言
23:1 耶和華已經互以色列人安靜，無及四圍一切的對敵交戰，已經歷過多多日。約書亞也歲壽多年老，
約書亞的遺言
23:1 上主互以色列人享受太平，無受四圍對敵的攻擊。經過一段真長的時間，約書亞年老；
23:2 彼時約書亞就叫以色列眾人，𪜶的長老，及𪜶的族長，𪜶的審判官，𪜶的官長攏總來，對𪜶講：「我已經歲壽多年老。
23:2 伊召集全以色列的長老、族長、審判官，及官長，對𪜶講：「我已經年老啦。
23:3 耶和華──恁的上帝因為恁的緣故，對許個國所行一切的事，恁有看見，因為替恁交戰的是耶和華──恁的上帝。
23:3 恁有看著上主 — 恁的上帝為著恁對許個國所做一切的事；因為上主 — 恁的上帝為恁交戰。
23:4 所剩諸個國，以及我所剪除許個國，對約但到大海向日落的所在，我已經分互恁逐支派做業。
23:4 我所消滅許個國家的土地，對約旦河到西旁地中海，包括猶未征服的國，我已經抽籤分互恁逐支族做家業。
23:5 耶和華──恁的上帝欲對恁的面前趕逐𪜶，也欲對恁的頭前革逐𪜶，恁就欲得著𪜶的地做業，照耶和華──恁的上帝所對恁講的。
23:5 上主 — 恁的上帝欲為著恁將𪜶趕走離開恁；恁就會照上主 — 恁的上帝對恁的應允，得著𪜶的土地做家業。
23:6 所以，恁著大大壯膽，執守來行摩西律法的冊一切所記載的，通離開伊來偏左偏右。
23:6 所以恁著加倍勇敢，忠實遵行摩西律法的冊所有的記載，毋通偏左偏右。
23:7 佇恁中間所剩許個國，恁通及伊參插。通提起𪜶許個上帝的名，通互人指𪜶來咒誓，也通服事伊，通跪拜伊；
23:7 恁中間猶未互恁征服的國，恁毋通及𪜶交插，毋通提起𪜶的神明的名，毋通指𪜶咒誓，毋通服事𪜶，毋通跪拜𪜶。
23:8 總是著照恁到今仔日所行的，結聯耶和華──恁的上帝。
23:8 恁著忠誠無離開上主 — 恁的上帝，親像恁過去到現在攏按呢做。
23:9 因為耶和華已經用大閣強的國對恁的面前趕出；到今仔日，無一人會徛住佇恁的面前。
23:9 因為上主已經將大閣強的國對恁的面前趕走；到今仔日無一個人會當對抗恁。
23:10 恁一人欲趕逐一千人，因為替恁交戰的，是耶和華──恁的上帝，照伊所對恁講的。
23:10 恁一個人會當趕走一千人，因為上主 — 恁的上帝會照伊對恁的應允為恁交戰。
23:11 恁著大大家己謹慎，疼耶和華──恁的上帝。
23:11 恁著謹慎，著疼上主 — 恁的上帝。
23:12 恁若略仔倒退，及存佇恁中間所剩許個百姓結聯，及𪜶結親，相及往來，
23:12 恁若越走離開上主，及佇恁中間留落來的人民交插，及𪜶通婚，往來；
23:13 恁著確實知，耶和華──恁的上帝的確無欲閣將許個百姓對恁的面前趕出；總是𪜶欲成做恁的羅網、活罩、拍恁身軀的箠、目睭內的茦，直到恁對佇耶和華──恁上帝所賞賜恁此個好的地滅無。
23:13 恁著確實知，上主 — 恁的上帝一定無欲將許個人民對恁的面前趕走；𪜶會成做恁的羅網圈套，拍恁的鞭，目睭內的刺，直到恁對上主 — 恁的上帝賜互恁此個媠的土地消滅。
23:14 「看啊，我今仔日欲行世間人所著行的路。恁一心一意知耶和華──恁上帝所應允賜福恁的話無一句落空，攏應驗佇恁的身上，其中無落空一項。
23:14 「今，我欲行世間人攏著行的路。恁確實知，上主 — 恁的上帝應允欲互恁的福氣，無一項落空，攏實現佇恁身上。
23:15 耶和華──恁上帝所應允一切的福氣怎樣臨到恁的，耶和華也欲照按呢互逐樣的災禍到佇恁，直到伊滅無恁佇耶和華──恁上帝所賞賜恁此個好的地。
23:15 上主 — 恁的上帝所應允一切的福氣按怎臨到恁，上主嘛會按呢互逐款的災禍到佇恁，直到上主 — 恁的上帝給恁對伊賞賜恁此個媠的土地除滅。
23:16 恁若違背耶和華──恁上帝所命令恁的約，去服事別個上帝，跪拜伊，耶和華的受氣欲對恁發出，恁欲緊緊滅無佇伊所賞賜恁好的地。」
23:16 恁若違背上主 — 恁的上帝所命令恁的約，去服事跪拜別個神明，上主會對恁發受氣，恁會真緊對伊賞賜互恁此個媠的地滅亡。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。