上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
約書亞差二支派的人倒去
22:1 彼時，約書亞叫流便人、迦得人，及瑪拿西半支派的人來，
兩個半支族轉去約旦河東旁
22:1 彼時，約書亞召集呂便支族、迦得支族，及瑪拿西半支族的人，
22:2 對𪜶講：「耶和華的奴僕摩西所命令恁的，恁攏遵守；我所命令恁的，恁也攏聽趁。
22:2 對𪜶講：「上主的僕人摩西命令恁的，恁攏有遵守；我命令恁的，恁嘛有聽趁。
22:3 恁即多日，攏無離開恁的兄弟，直到今仔日，恁也有守耶和華──恁上帝所命令恁著守的。
22:3 一直到今仔日，恁即呢久攏無放拺恁的同胞；恁有遵守上主 — 恁的上帝所命令恁的。
22:4 今耶和華──恁上帝照伊所應允的，互恁兄弟得著平安，今恁通倒轉去恁的布棚，到耶和華的奴僕摩西佇約但彼旁所賜互恁作業的地。
22:4 今上主 — 恁的上帝有照伊的應允，互恁的同胞享受太平；現在恁通倒轉去恁兜，轉去上主的僕人摩西佇約旦河東旁賜互恁做家業的地。
22:5 總是恁切切著謹慎遵趁耶和華的奴僕摩西所命令恁的誡命律法，疼耶和華──恁的上帝，行伊一切的道路，守伊的誡命，結聯佇伊，盡心盡性服事伊。」
22:5 毋拘恁一定著謹慎，遵行上主的僕人摩西所命令恁的誡命及律法，疼上主 — 恁的上帝，行伊一切的道路，守伊的誡命，忠誠無離開伊，全心全意服事伊。」
22:6 對按呢約書亞給𪜶祝福，差𪜶去，𪜶就倒去𪜶的布棚。
22:6 約書亞給𪜶祝福，送𪜶去；𪜶就倒去𪜶兜。
22:7 瑪拿西半支派，摩西已經佇巴珊分業互𪜶。猶半支派，約書亞佇約但彼旁西勢，佇𪜶兄弟中，分業互𪜶。約書亞差𪜶倒去布棚的時給𪜶祝福，
22:7 瑪拿西半支族已經佇巴珊對摩西分著家業；另外半支族，佇約旦河西旁及𪜶的兄弟做夥對約書亞分著家業。約書亞送𪜶倒去的時，給𪜶祝福，
22:8 吩咐𪜶講：「恁著帶多多財物，多多精牲及銀、金、銅、鐵，及多多衣服，倒去恁的布棚，將恁所搶對敵的贓物，及恁的兄弟相及分。」
22:8 吩咐𪜶講：「恁著將搶著的戰利品，就是真多的牲生、金、銀、銅、鐵，及非常多的衣服，提倒去恁兜，分互恁的同胞。」
22:9 對按呢流便人、迦得人、瑪拿西半支派的人對迦南地的示羅起身，離開以色列人，欲倒去𪜶得著基列地，就是照耶和華託摩西所命令的得著做業的地。
22:9 對按呢，呂便支族、迦得支族，及瑪拿西半支族的人，就對迦南地的示羅出發，及其他的以色列人相辭，倒去𪜶得著的基列地；就是摩西照上主的命令，分互𪜶做家業的地。
約但河邊的祭壇
22:10 流便人、迦得人，及瑪拿西半支派到約但河邊一帶的迦南地，就佇近約但遐起一座壇；彼個壇看了真大。
佇約旦河河邊起祭壇
22:10 呂便人、迦得人，及瑪拿西半支族的人，佇迦南地的約旦河地區，倚近河的所在，起一座大閣顯目的祭壇。
22:11 以色列人聽見講，看啊，流便人、迦得人，及瑪拿西半支派有起一座壇佇迦南地的頭前約但的邊仔，以色列人過去的所在。
22:11 以色列人聽見呂便人、迦得人，及瑪拿西半支族的人佇迦南地對面約旦河邊，以色列邊界，起一座祭壇，
22:12 以色列人聽見，以色列人全會攏聚集佇示羅，欲上去及𪜶交戰。
22:12 以色列全會眾就佇示羅聚集，欲去給𪜶攻打。
22:13 以色列人差祭司以利亞撒的子非尼哈，去基列地見流便人、迦得人、瑪拿西半支派；
22:13 以色列人派祭司以利亞撒的子非尼哈去基列地呂便人、迦得人，及瑪拿西半支族的人遐；
22:14 閣差十個首領及伊去，就是以色列逐支派逐族一個首領，逐人佇以色列軍隊中做族長。
22:14 及伊做夥去的有十個支族的領袖，𪜶嘛是以色列逐宗族逐家族的序大。
22:15 𪜶到基列地，見流便人、迦得人，及瑪拿西半支派，對𪜶講：
22:15 𪜶到基列地，見呂便人、迦得人，及瑪拿西半支族的人，對𪜶講：
22:16 「耶和華全會的眾人按呢講，恁干犯以色列的上帝，今仔日越轉無隨耶和華，為家己起一座壇，致到今仔日悖逆耶和華，犯著這是甚麼罪啊？
22:16 「上主的全會眾按呢講：『恁是按怎背叛以色列的上帝？今仔日恁越頭無隨上主，為家己起一座祭壇，背逆上主，犯即大的罪！
22:17 早對佇毗珥的罪，咱猶掠做小可嗎？雖然瘟疫到耶和華的會眾，到今仔日咱猶未清氣。
22:17 以前咱佇比珥犯罪，瘟疫臨到上主的會眾，到今仔日猶未潔淨，咱猶看做無要緊是無？
22:18 恁今仔日竟然越轉無隨耶和華啊？恁今仔日悖逆耶和華，明仔日伊欲受氣以色列的全會。
22:18 恁竟然越頭無隨上主！恁今仔日背逆伊，明仔載伊會對以色列全會眾發大受氣。
22:19 恁所得著做業的地，若無清氣，就通過來耶和華的地的業，就是耶和華會幕所𫢶的所在，佇阮中間得著業。總是通悖逆耶和華，也通悖逆阮，通佇耶和華──咱上帝的壇以外，為家己閣起壇。
22:19 恁若想講所得著做家業的地無清氣，通過來上主的地，就是有上主會幕的所在，就會佇阮中間得著家業；總是毋通背逆上主，嘛毋通背叛阮，毋通佇上主 — 咱的上帝的祭壇以外，閣為家己起祭壇。
22:20 前謝拉的曾孫亞干豈無佇彼個應該獻的物犯罪，就有受氣臨到佇以色列的全會嗎？彼個人佇伊所犯的罪，若伊家己一人死。」
22:20 以前謝拉的乾仔孫亞干豈毋是佇彼個應該毀滅的物犯罪，上主的受氣就臨到以色列全會眾？因為伊犯罪，死的人毋是干焦伊一個人。』」
22:21 對按呢流便人、迦得人、瑪拿西半支派應以色列軍隊的頭人講：
22:21 呂便人、迦得人、瑪拿西半支族的人應以色列宗族的序大講：
22:22 「全能的上帝耶和華！全能的上帝耶和華！伊知！以色列也欲知！阮若有悖逆的意思，抑是干犯耶和華（今仔日無救阮），
22:22 「大權能的主上帝！大權能的主上帝！伊知，願以色列人嘛知，阮若有背叛抑是背逆上主，今仔日就互阮死。
22:23 為家己起壇，欲越轉無隨耶和華，抑是欲獻燒祭、素祭、謝恩祭佇彼頂面，耶和華欲歸咎伊。
22:23 阮若為家己起祭壇，越頭無隨上主，抑是佇壇頂獻燒化祭、素祭、平安祭，願上主給阮刑罰。
22:24 阮做此個代誌是為著持防，才故意做，是驚了後日恁的子孫對阮的子孫講：『恁及耶和華──以色列的上帝有甚麼關係啊？
22:24 毋拘毋是按呢！阮做此個代誌是驚了有一日，恁的後代對阮的後代講：『恁及上主 — 以色列的上帝有什麼關係？
22:25 流便人、迦得人啊，耶和華設此個約但，佇恁及阮的中間做界限，今恁佇耶和華無分。』按呢，就恁的子孫會互阮的子孫無閣敬畏耶和華。
22:25 上主設此個約旦河做恁及阮中間的隔界；呂便人、迦得人，恁無權通做上主的子民。』按呢，恁的子孫會害阮的子孫無閣敬畏上主。
22:26 所以阮相及講：『今咱著為家己起一座壇，是為著燒祭，也是為著別號的祭，
22:26 所以，阮就決定欲為家己起一座祭壇，毋是為著獻燒化祭抑是其他的祭；
22:27 就是為著恁阮的中間以及恁及阮後代的中間做證據，互阮通佇耶和華的面前用阮的燒祭、謝恩祭，及別號祭來服事伊，免得恁的子孫後日對阮的子孫講，恁無份佇耶和華。』
22:27 是為著欲佇恁及阮，以及恁的後代及阮的後代中間做證據，阮通佇上主的會幕獻燒化祭、平安祭，及別款的祭來服事伊；才免恁的子孫將來對阮的子孫講：『恁無權通做上主的子民。』
22:28 所以阮講：『別日𪜶若對阮，抑是阮的後代按呢講，阮通應講，恁通看耶和華的壇的款式，就是阮的列祖前所起的；是為著燒祭，及別號的祭，就是為著欲做恁阮中間的證據。』
22:28 所以阮講：『將來𪜶若對阮抑是阮的後代按呢講，阮通應講：恁看阮列祖起的祭壇及上主的祭壇形體完全仝款；毋是為著欲獻燒化祭及其他的祭，是為著欲做恁阮中間的證據。』
22:29 阮佇耶和華──咱上帝會幕前以外，另外閣起一座壇，為著燒祭、素祭，及別號的祭，來悖逆耶和華，今仔日越轉無隨耶和華，阮決斷無此號意思。」
22:29 今仔日，阮絕對無此個意思，欲佇上主 — 咱的上帝會幕頭前的祭壇以外，閣另外起一座祭壇獻燒化祭、素祭，及其他的祭，來背逆上主，越頭無順趁伊。」
22:30 祭司非尼哈及會中許個首領，以及及伊相及來以色列中軍隊的頭人，就是及伊相及來的，聽見流便人、迦得人、瑪拿西人所講的話，就攏掠做好。
22:30 祭司非尼哈及會眾的領袖，以及及伊做夥去許個以色列宗族的序大，聽著呂便人、迦得人，及瑪拿西人所講的話，就攏真滿意。
22:31 祭司以利亞撒的子非尼哈對流便人、迦得人、瑪拿西人講：「今仔日阮知耶和華佇咱的中間，因為恁無犯著此個罪來得罪耶和華。今恁有救以色列人脫離耶和華的手。」
22:31 祭司以利亞撒的子非尼哈對呂便人、迦得人，及瑪拿西人講：「今仔日，阮知上主及咱同在，因為恁無犯此個背逆的罪來得罪伊；恁實在有救以色列人脫離上主的刑罰。」
22:32 祭司以利亞撒的子非尼哈及許個首領離別流便人、迦得人，對基列地倒去迦南地，到以色列人遐，回覆𪜶。
22:32 祭司以利亞撒的子非尼哈及許個領袖，離開基列地區的呂便人、迦得人，倒去迦南地以色列人遐，給𪜶報告此個事。
22:33 以色列人掠此個事做好，對按呢以色列人謳咾上帝，無閣提起欲上去及流便人、迦得人交戰，來毀壞𪜶所徛起的地。
22:33 以色列人攏真滿意，就稱讚上帝，無閣提起欲攻打呂便人及迦得人，毀壞𪜶徛起的地。
22:34 流便人、迦得人叫彼個壇名做證據，因為講，此個壇佇咱中間證明耶和華是上帝。
22:34 呂便人及迦得人就給此個祭壇叫做「見證的壇」，是講：「此個壇佇咱中間見證上主是上帝。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。